بوست مهم منقول من الدكتور : أحمد محمد

===========================================

​

انا شايف ناس كتير محتاره تروح تركيا أو لأ .. مع ان كل حاجه مشروحة في البوست المثبت بالتفصيل الممل !

​

مش عارف دة كسل ولا عدم استيعاب المعلومه ولا ايه

بس عموما انا نزلت البوست دة في جروب تاني وهنزله هنا كمان عشان يبقي الفاصل والناهي في اي حد مش عارف يجي تركيا ولا ميجيش .. وازاي يقعد قانوني لما ييجي وازاي يشتغل ومصاريف كل حاجه 
-------------------------------------------------------------------
مفيش معلومه عن الحياه في تركيا مش هتلاقيها في البوست دة .. انا جايبلك كل المعلومات من الابره للصاروخ عن تركيا ... كل ما عليك انك تقرأ البوست دة 
.

البوست دة مبني علي تجارب واقعيه وحقيقيه لناس عايشه هناك بدون تذويق للكلام ولا تطفيش للناس منها .. يعني لا ترهيب ولا ترغيب .. لا نعملك البحر طحينه ولا نكرهك في العيشه فيها ..

----------------------------------------------------------------
نفترض ان انت خلاص عرفت تجيب فيزا السياحه وعرفت تعمل التصريح و وصلت بالسلامه تركيا 
.

ازاي تقعد قانوني وتعمل اقامه ؟

الاقامه في تركيا كذا نوع :

1- اقامه عائله : انك تكون متجوز حد تركي .. ودي ليها ميزة انك تقدر تقدم ع الجنسيه 
.

2- اقامه عمل : ان حد تركي شركه او مؤسسه تعملك عقد عمل .. بتدي الجنسيه بعد 5 سنين 
.

3- اقامه مستثمر : انك تستثمر مشروع او مبلغ معين في مشروع هناك .. بتدي الجنسيه بعد 5 سنين
.

4- اقامه لاجئ : بيسموها اقامه انسانيه .. او ايا كان المسمي .. وبتكون لجنسيات معينه زي السوريين 
.

5- اقامه دراسيه : انك تدرس سواء علي حسابك او بالمنح .. مش بتدي الجنسيه مهما درست 
.

6- اقامه سياحيه : ودي هنتكلم عنها بالتفصيل تحت بعد شويه 
.

7- اقامه عقاريه : عن طريق شراء عقار .. تشتري بيت بمبلغ معين وتاخد اقامه بيه وبتكون اقامه قصيرة وبتتجدد كل سنه طول ما انت لسه مالك العقار ( مبعتوش لانك لو بعته هتتلغي الاقامه )

و الاقامه عن طريق شراء عقار دي مبتديش الجنسيه كلام مؤكد 100 % .. اقسم بالله العظيم مبتديش الجنسيه .. والله مبتديش الجنسيه ..

ده حوار عاملينه شركات السياحه هناك عشان ينصبوا علي الخلايجه اللي جايين من دبي والسعوديه ..

---------------------------------------------------------------
ملحوظه مهمه فشخ انا عارف اني هلاقي حد هيكلمني عليها في الكومنتات

حد هيقولي التقسيمه دي مش مظبوطه المفروض تقول ان انواع الاقامات نوعين : اقامات طويله الامد واقامات قصيره الامد 
.

و مفيش حاجه اسمها اقامه سياحيه اصلا .. هي قانونا اسمها اقامه قصيره الامد و من ضمن اسباب إعطائها بغرض السياحه 
.

ومفيش حاجه اسمها اقامه دراسيه اصلا .. هي قانونا اسمها اقامه قصيره الامد ومن ضمن اسباب اعطائها بغرض الدراسه ..
.

بلا بلا بلا بلا بلا بلا بلا 
.

تمام .. عليا الطلاق عارف كل دة .. وحياه خالتي محاسن عارف كل دة 
.

لكن لازم تحط في اعتبارك اننا بنخاطب عموم الشعب .. لو انا اتكلمت بصيغه المحامين الناس مش هتفهم .. وهيكرهوا تركيا وهيكرهوا البوست وهيكرهوني شخصيا ..
.

عشان كدة حبيت ابسطها للناس عشان ميحسوش ان الموضوع مكلكع .. معلش خلوا البساط احمدي واستحملوا الكلام العام عشان الناس تفهم معلش ..

----------------------------------------------------------------
الاقامه السياحيه :

بتروح بفيزا السياحه او الزياره العاديه وتعمل الاقامه السياحيه هناك ودي عباره عن تصريح اقامه لمدة سنتين كحد اقصي ( ساعات بتطلع بسنه واحدة لبعض الحالات ) .. وبتتجدد بعد انتهاء المدة ..

ودي بتبقي اقامه قصيره تُمنح بغرض السياحه فقط .. ومستحيل تاخد منها الجنسيه مهما جددت ..

يعني فايدتها انك تقدر تقعد في تركيا بشكل قانوني .. وتقدر تخرج وتدخل من تركيا زي ما انت عايز وفي كل مرة بتروحها بعد الاقامه مبتحتاجش اي تصاريح امنيه تاني 
.

1- انت بتقول لغرض السياحه بس يعني مش هقدر اشتغل بيها ؟ 
قانونا مبتقدرش .. لكن فعليا وعلي ارض الواقع العالم كله بيشتغل بيها هناك ومحدش بيتكلم 
.
.

2- طيب افرض حد قالي بتشتغل بيها ليه ؟

بص دي حيله من حكومه اردوغان عشان النازحين من بلادهم لاي سبب من الاسباب يقدروا يقعدوا قانوني ويعيشوا في البلد .... و طبعا محدش هيعيش من غير شغل .. يعني لازم هتشتغل بيها .. فهما عارفين انك هتشتغل بيها وبيطنشوا .. لانهم عايزين يطنشوا .. اظن الرساله وصلت ..
.
.

3- برضو مش فاهم اشمعني عاملينها سياحه بس !! ليه معملوش اقامه تخلينا نشتغل كمان بيها ؟؟

مينفعش طبعا .. لان لو عملوا كدة الاتراك نفسهم هيقلبوا عليهم .. انت عايز تيجي علي الجاهز ب 200 ولا 300 دولار وتتساوي بالتركي في مرتبه وتقبض زي ما بيقبض .. و تزاحمه في حياته وتقدم علي الجنسيه بالاقامه دي بعد كام سنه وتبقي كأنك تركي بالظبط !! 
.

اكيد مش هيسكتوا علي الوضع دة .. لكن لما بتعمل الاقامه السياحيه انت كدة مش متساوي بيه في شغله وبتقبض اقل منه ومش هتعرف عن طريق الاقامه السياحيه دي تاخد الجنسيه زيه مهما قعدت ومهما جددت .. يعني العمليه بالنسبالهم بتبقي مقبوله نوعا ما .. 
.
.

4- طيب هو ممكن الاقامه دي تتلغي في السنين الجايه ونبقي ف الشارع ؟

محدش يعرف ومحدش يقدر يدخل في علم الغيب او يفتي في النقطه دي لكن كل شئ وارد 
.
.

5- طب والحل ايه منا اكيد مش عايز اجي بأسرتي ونقعد فيها وبعدين الاقامه دي تتلغي ؟؟

انت وشطارتك .. حاول تجتهد في شغلك وعلاقاتك وتقوي التركي بتاعك وتتميز في مجالك لغايه لما تلاقي حد تركي يعملك عقد عمل وبالتالي تعمل اقامه عمل وساعتها محدش يقدر يفتح بوقه معاك 
.
.

6- طيب منا اشوف حد تركي من دلوقتي وانا في مصر يظبطني بعقد عمل وبدل الاقامه السياحيه و وجع القلب دة اعمل اقامه عمل مباشره ... ودنك منين يا جحا ؟؟ 
.

لا مهي مش بالسهوله دي! .. شروط اقامه العمل كتيرة وصعبه .. لازم يكون عدي على تأسيس الشركه اللي هتشغلك اكتر من سنة و يكون رأس مالها اكبر من 50 ألف دولار وارباحها السنويه 400 الف دولار مبلغ اجمالي او صادرات بقيمه 250 الف دولار 
.

ولازم يكون قصاد كل واحد اجنبي هيشتغل فيها ( اللي هو انت يعني ) .. 5 اتراك شغالين .. ولازم يكون مرتبك ضعف مرتب الاتراك ( في بعض الوظائف بتكون ضعفين او 3 اصعاف ) 
.

واصلا اصلا اصلا حتي لو حققت كل دة بيكون فيه كوته لعدد الاجانب اللي بيدوهم اقامه عمل كل سنه ..

يعني ممكن اصلا تتوافر كل الشروط دي لكن يكون عدد الاجانب اللي واخدين تصريح من كل الجنسيات في السنه اللي جبت فيها انت عقد العمل بتاعك يكون كتير اوي اوي فمش هيدولك وقتها الاقامه حتي لو جبت عقد عمل .. 
.

يعني عشان اجنبي يشتغل بأقامه عمل الموضوع صعب و عشان كدة الشركات والمصانع مبتاخدش اجنبي غير واحد متميز ومتخصص .. فهمت بقي ليه متقدرش تجيب عقد عمل من وانت برا تركيا !

---------------------------------------------------------------------------
طيب ايه خطوات الاقامه السياحيه دي والاوراق المطلوبه ؟؟ 
.

لو انت من محبي مبدأ " هين قرشك ولا تهين نفسك " ف انت ممكن تروح لاي مكتب سياحه موجود ف تركيا او اشخاص مصريين موجودين هناك وترميله 250 ولا 300 دولار ويروح معاك المقابله كمان ويفسحك ويجبلك لعب وهدايا وتاخد الاقامه وانت بتشرب كاركاديه بالنعناع 
.
.

اما لو انت من محبي الاعتماد علي النفس وعدم القرطسه والتفخيد ف ركز معايا ف الكلام اللي جاي

لو انت فوق ال 18 سنه هيطلبوا منك الطلبات الجايه : 
-------------------------------------------------------
1- جواز سفر, صوره منه , ترجمه جواز السفر للتركي

2- تأشيرة الدخول و اخر ختم دخول للاراضي التركيه بشكل نظامي من أي معبر حدودي

3- ايصال تصريف بقيمة 6000 دولار, أو كشف حساب جاري من البنك يكون الرصيد فيه نفس القيمة المطلوبة بالدولار ( بيتغاضوا عنه ومبيطلبهوش اوقات كتير )

4- الرقم الضريبي او رقم المعاملات الماليه

5- طلب الرانديفو الأساسي .. رانديفو يعني المعاد اللي بتاخده عشان تقدم علي الاقامه

6- عقد ايجار صالح و حقيقي موثق عند كاتب العدل ويكون العنوان عنوان رسمي في سيستم الدوله .. وتصديق عقد البيت في ال noter ..

7- صحيفه السوابق ودي اسمها Sabika Belgesi وبتطلعها من المحكمه

8- اثبات العنوان بتأكد انك ف العنوان الفلاني زي السجل المدني عندنا + اثبات الاسم واللقب كامل + ايصال رسوم للدوله لاصدار البطاقه البلاستيكيه واجراء المعاملات ودي ب 50 دولار .. و 6 صور شخصيه ملونه ليك

9- تأمين صحي اسمه سيجورتا لو هتعمل اقامه لمدة سنة هتدفع تأمين من 80 ل 100 دولار ( بتختلف حسب الشركه ) لكل شخص .. ركز لكل شخص

و لو هتعمل اقامه سنتين يبقي هتدفع تأمين الضعف من 160 ل 200 دولار

ولو عائلة هتعملها , لازم كل واحد يكون عنده تأمين صحي... وبيستفيد من التأمين الصحي بتخفيض بعض تكاليف الرعاية الصحية حتى 60%

ملحوظه : هناك في شركات تأمين كتير بتعملك الموعد بتاع المقابلة وتملالك الابليكيشن بحوالي ٣٠ ليرة (ده مقابل ما بيملوا الابليكيشن بدالك....لكن اصلا الابليكيشن مجاني...وهو ده اللي بتاخد فيه ميعاد المقابلة )

10- بتقدم جميع الأوراق بمركز الأمنيات - فاتح. وبعدين في خلال شهر بتطلع الاقامه وتستلمها .. 
.

المواعيد بسبب الضغط الرهيب بتبقي اقل حاجه بعد شهر و بعد ما بتقدم كل الاوراق بتستني حوالي 15 يوم او شهر كمان علي ما الاقامه تطلع ..

.---------------------------------------------------------------------

طيب لو عايز تعمل اقامه لابنك وهو اقل من 18 سنه او انت نفسك عندك اقل من 18 سنه وعايز تعمل اقامه ايه الاجراءات ؟؟ 
.

1- شهادة الميلاد الاصليه 
.

2- في حاله الانفصااااااااااااااااااال بين الاب والام

* لو الاب او الام حد فيهم منفصل تجيب اصل شهادة الطلاق أو تجيب قرار المحكمه بالحضانه انها الحاضنه الوحيدة لو في مشاكل بينهم

* لو الاب او الام حد فيهم متوفي يجيب اصل شهادة الوفاه 
.

3- في حاله ان الاباء مرتبطين وكله ميت فل واربعتاشر ولكن احد الاباء مأنتخ في مصر ومش موجود ف تركيا عندة شغل يعني ومش فاضي يسافر .. وقتها :

لو الام بتعمل الاقامه لاولادها لوحدها من غير الاب لازم تجيب وكاله من الاب

والعكس صحيح لو الاب بيعمل الاقامه لوحده من غير الام لازم يجيب وكاله من الام

ولو الاتنين هيعملوها مع بعض يجيبوا اصل شهادة الزواج 
.

4- شهادة الدخول والخروج ودي بتطلع من الامنيات

والحاجات دي لازم تكون متوثقه الاول من الخارجيه في مصر وبعدين تتوثق في سفاره تركيا في مصر وبعدين تتوثق في حاجه اسمها قائم مقام في تركيا وبعدين تقدمها في الامنيات

------------------------------------------------------------------
استني ياعم الحج دة في هنا خازوق كبير فشخ !

انت بتقول الاقامه بعد المقابله بتاخد 15 يوم أو شهر علي ما تطلع ؟؟ طب اصلا التأشيرة بتاعتي بتكون شهر واحد .. هعمل الاقامه ازاي وانا اصلا هكون كسرت الـتأشيرة ؟؟ 
.

لا متقلقش :

1- انت اهم حاجه تقدم اوراقك وتروح الرانديفو قبل انتهاء التأشيرة ولما بتروح الرانديفو بتاخد ايصال الايصال دة بتقدر بيه تقعد تستني الاقامه لغايه لما تطلع

و بتستني حوالي 15 يوم او شهر بالكتير بعد ما الرانديفو ما يخلص وبعد ما بتاخد الايصال

يعني انت لازم اول لما رجلك تلمس ارض تركيا تقوم مباشره تبدا ف الاجراءات عشان تعرف تاخد معاد وتروح الرانديفو قبل انتهاء مدة تأشيرتك 
.

2- ممكن تعمل توكيل لاي صديق يستلمها مكانك ويبعتهالك بالبريد لو انت هترجع مصر يعني 
.

3- بتقدر تعمل المعاد من وانت ف بلدك اصلا ( مكاتب كتير بتعملهالك ) وبتبعتله صور الباسبورات وبعدين قدم ع التأشيرة ولما تاخدها تقوم تسافر وتيجي علي معاد الرانديفو مباشره

يعني هنرجع لنقطه هين قرشك ولا تهين نفسك والكاركاديه بالنعناع .. كله بيخلص بالفلوس ..

------------------------------------------------------------------
طيب يا دكتره انا جبت زفت فيزا سياحه و عملت خرا تصريح امني و جيت تركيا و عملت كل الحوارات والافشخنات دي وبقي معايا اقامه سياحيه

هاكل منين ؟؟ هشتغل ايه ؟؟ ايه انواع الشغل ؟؟ والمرتبات نظامها ايه ؟؟ 
.

طيب نمسك حاجه حاجه ونتكلم فيها

مفتاح الشغل في تركيا هو اللغه .. الترررررررررررركي .. لازم تكون بتعرف تركي 
.

1- اعرف تركي ازاي يعني ؟ يعني اكون fluent و اتكلم زي اتاتورك ؟؟

تعرف تركي يعني تبقي فاهم الجمل ومستوعبها وتقدر تعمل محادثه بينك وبين الي قدامك بحيث يكون فاهمك وفاهم كلامك حتي لو بتتكلم بلهجه تعبانه او مكسره .. عقدة ال fluent دي عند المصريين بس
.

2- طيب انا بعرف انجلش كويس اوي اوي هل ينفع بدل التركي ؟

لا مينفعش ومش هتلاقي شغل محترم وعدل وأدمي بالانجلش عشان تريح نفسك 
.

3- طب هو اللغه التركيه دي عشان اتعلم اتكلم بيها محتاج وقت قد ايه ؟

اللي يقولك علي رقم معين يبقي كداب وهلاس .. في ناس اتعلمتها بعد 5 سنين وناس تانيه اتعلمتها بعد سنه وناس تالته اتعلمتها بعد 6 شهور وناس رابعه بتقعد عمرها كلها مش عارفه تتعلمها .. الموضوع حسب قدراتك واستيعابك ومجهودك وتفرغك في تعلم اللغه 
.

4- طيب اتعلم منين التركي ؟؟

* لو انت ممعاكش فلوس وبتحب ال self study هديك لينكات جميع القنوات اللي بتعلمك التركي من علي الانترنت زي :

*https://www.youtube.com/user/ar1tr

*https://www.youtube.com/user/turkiyaganetelard

*https://www.youtube.com/channel/UCvB6gOqNHfg2qP2hpN8Yd0g

*https://www.youtube.com/watch?v=u7YOVk33K1Y
.

* في تطبيق سحري وممتاز جدا لممارسه اللغه في الأندرويد اسمه Doulingo هيفرق كتير اوي معاك ..

* اما لو انت معاك فلوس فهتاخد كورسات في المركز الثقافى التركى يونس إمرة في الدقي .. 
.
.

5- طيب هي انواع الشغل هناك ايه والمرتبات كام ؟؟

مبدأيا .. اي شغل تركي ب 12 ساعه في اليوم .. ايوة 12 ساعه زي ما قريت كدة بالظبط 
.

* لو شغل مبيحتاجش شهادة عليا ومن غير تركي : من 800 ل 1000 ليره 
زي العمال بالظبط بمختلف انواعهم 
.

* لو شغل مبيحتاجش شهادة عليا ومعاك تركي : من 1200 ل 1500 ليره
زي كول سنتر - مطاعم - كاشير - سواق 
.

* لو معاك صنعه مميزة اوي ومعاك تركي : من 1500 ل 2000 ليره 
زي سباك - نقاش - نجار 
ولو بتفهم في الخياطة هتلاقي شغل كتير لان ورش تصنيع الملابس كتير جدا
.

* لو شغل بشهادات عليا وبعد المعادله بتاعتك ومعاك تركي : من 2000 ل 4000 ليره 
زي دكتور - مهندس الخ الخ 
.

هل في مرتبات اقل من الارقام دي ؟ ايوة طبعا اعرف حد شخصيا بياخد 750 ليره فقط في الشهر .. بس احنا بنتكلم علي الاغلبيه من الناس .. 
.

ملحوظه رقم 1 : الشهادات الطبيه كلها بتحتاج لمعادله .. وعشان تعمل معادله لازم تتعلم تركي .. ولازم تمتحن وتاخد كورس تركي معتمد اكثر من 6 شهور

وبعد ما بتمتحن تركي بتقدم بقي علي موقع وزاره الصحه في انقره وبعدين بيحددولك الجامعه وجهه المعادله وتفاصيل المعادله وفلوسها 
.

ملحوظه رقم 2 : الصيدله و الطب البيطري هي الشهادة الوحيدة اللي مينفعش حد اجنبي يشتغل فيها في تركيا . الصيدله للاتراك فقط

طب الاسنان طبقا لاخر update انهم سمحوا للناس مؤخرا بممارسه المهنه لغير الاتراك 
.

الحل : لو انت صيدلي او بيطري تفتح مؤسسه وتخلي اطباء اتراك هما اللي يشتغلوا فيها وانت اللي تديرها فقط بس طبعا دي عايزة صرف كتير فشخ 
.

ملحوظه رقم 3 : عشان تشتغل بشهادتك الجامعيه في تركيا لازم معادله وعشان تعملها هتاخد اجراءات متقلش عن سنه من تعب تعليم لغه و اجراءات امتحانات يعني لازم تكون عارف انك هتتعب كتير عشان تشتغل بشهادتك

--------------------------------------------------------------
طيب تكاليف المعيشه هناك هتبقي ازاي ؟؟؟ 
.
اولا مصاريف المعيشه بتنقسم ل جزئين ..

* الجزء الاول اللي بياكل اي مرتب وهو السكن ..

* الجزء التاني وهو الاكل والشرب والمواصلات وفواتير ( مياه - كهربا - غاز - نت ) 
.

الجزء الاول اللي هو السكن : الايجارات بتختلف حسب المدينه .. وحسب المنطقه نفسها جوة كل مدينه ..

اسطنبول غاليه .. باقي المدن رخيصه

ايجار سكن شبابي .. شييرنج يعني .. بيتراوح ما بين 250 ل 300 ليره

ايجار شقه كامله اوضتين وصاله بيتراوح ما بين 800 ل 900 ليره 
.

في حاجه اسمها كوميسيون .. وفي حاجه اسمها تأمين .. وفي حاجه اسمها بدون فواتير .. اتأكد من ال 3 حاجات دول قبل ما تمضي اي عقد عشان هتلاقي خوازيق كتير بسبب الحوار دة 
.

يعني مثلا يقولك ايه .. الحححححححححححححق العرض السحري الفنكوشي ايجار شقه 3 اوض وصاله ب 600 ليره .. تقوم انت تفرح .. يجيلك ف الاخر ويقولك تم اضافه الكوميسيون أو الفواتير .. فتلبس فخازوق كبير .. لازم تبقي واعي عشان اكثر حاجتين بينصبوا فيهم في تركيا : الاقامات وعقود الايجار 
.
.
.

* الجزء التاني وهو الاكل والشرب والمواصلات وفواتير ( مياه - كهربا - غاز - نت )

لو اسره .. اب و ام .. و طفلين .. يعني اربع افراد زي معظم الاسر المصريه هتحتاج شاكب راكب فواتير غاز وكهرباء ومياه .. و اكل وشرب ومواصلات .. 1000 ليره في الشهر 
.

كان فيه شويه ناس بيوهموا الناس ويقولولهم ان الاسره الكامله في تركيا تنفع تقضي عيشتها طول الشهر من فواتير كهربا وغاز ومياه و مصاريف اكل وشرب ومواصلات ب 500 ليره في الشهر طبعا دة هلس وهري ومش حقيقي 
.

يعني من الاخر كدة اسره اربع افراد هتعيش في اسطنبول محتاجين اقل حاجه 1800 ليره شهريا عشان تدفع ايجار سكن واكل وشرب و فواتير وكل حاجه .. يعني لازم الاب و الام يشتغلوا مع بعض عشان نكون واقعيين وصريحين ..
.
.

طب انت عمال تتكلم عن الاسره الاسره الاسره ! انا سنجل يا عم والسنجله جنتله هحتاج مصاريف كام ؟؟

.

انت عشان سنجل فممكن تعمل اي حاجه .. ممكن تنام مع 10 في الاوضه .. ممكن تقضيها وجبه واحدة ف اليوم ... ممكن تقضيها سنكحه .. المقصود ان اي حد سنجل ممكن يحوش من اي مرتب بياخده اساسا ويعيش بأي مرتب بياخده 
.

لكن انا بركز علي الاسره لان قرار الانتقال لأي اسره من مصر صعب وعايز دراسه ولازم نوعيهم .. انما انت سنجل يعني الحياه بيس معاك وهتدوس في اي حاجه وتستحمل وعموما المصاريف بتاعتك هتكون نص مصاريف الاسره

-----------------------------------------------------------------------
طيب انا عندي عيال في سن المدارس ايه وضعهم ؟؟ 
.

التعليم في المدارس الحكومية مجاني لاي مقيم حتي الاجنبي ... لكن الدراسه في المدارس بالتركي .. وعشان انت اجنبي بتدرس سنه لغه الاول في المدارس .. 
.

عندهم السنين الدراسيه مختلفه عننا .. احنا هنا 6 سنين ابتدائي و 3 اعدادي و 3 ثانوي 
هما هناك 4 بس ابتدائي و 4 اعدادي ( بيسموه متوسط ) و 4 ثانوي
.

لو هتعلم ابنك في مدرسه خاصه او بمعني اصح مدرسه عربيه ( مش عايز تعلمه في مدارس الاتراك ) هتدفع متوسط حوالي 1000 دولار في السنه 
.

في مدارس خاصه بتبقي ب 600 و 700 دولار و مدارس ب 1500 و 2000 دولار بس احنا بنتكلم علي المتوسط 
.

التعليم الجامعي :

للاسف التعليم الجامعي مش مجاني ابدا للاجانب .. هو مجاني للاتراك بس

يعني لو عندك عيال في سن الجامعات لازم هيدفعوا فلوس

وطبعا الرسوم بتختلف حسب الجامعه وحسب التخصص .. لكن بتدخل في رينج 2000 دولار 
.

لكن تقدر تقدملهم في المنحه التركيه اللي بتنزل كل سنه بحيث متدفعش اي مليم ليهم

ودي لينكات التقديم :
http://hajjajj.com/المنح-الدراسية-بكالوريوس-في-تركيا/

http://masdarona.com/scholarships-in-turkey-2017-2018

-------------------------------------------------------------