الحلقة 1 : ليه نهاجر لكندا
ليه نهاجر لكندا ؟ ؟
الحلقة الاولي من سلسلة #الهجرة_لكندا_بالتفصيل_الممل
جميع الحلقات هتلاقيها هنا
=====================================
من سنة 2011 , و بداية ثورات الربيع العربي , وكل الاحداث اللي حصلت بعدها , بلادنا العربية كلها اتغيرت , و بعد 6 سنين , بقي الهدف الاكبر لكتير من شباب العالم العربي هو ازاي يهاجر . . .
فيه عدد من الدول فاتحة باب الهجرة ليها . . .
زي امريكا اللي بتعمل اسلوب الهجرة العشوائية , اسلوب سهل و بسيط , بس فرص النجاح قليلة جدا . .
او استراليا و نيوزلاندا , واللي برضه ماشيين بنظام هجرة النقط زيها زي كندا . . .
و لما بنتكلم علي الهجرة لكندا , لا اقصد انها افضل او اقل من استراليا او نيوزلاندا , لكن باعتبار اني قريت عنها كتير , فهي الحاجة اللي هاقدر اعرض عنها معلومات وافية . .
طب ليه اصلا اختار كندا ؟ و ايه اللي يخليني اروح لاخر الدنيا ؟ ؟
الحقيقة كنرا فيها مجموعة من المميزات , اللي ترجح كفتها بشكل كبير لما تقارنها مع غيرها من الدول . . .
-
مساحتها فوق ال 10 مليون كيلو متر , يعني زي مصر عشر مرات , صحيح ان نسبة كبيرة من المساحة ديه غابات او بحيرات او جليد , لكن ميمنعش ان المساحة الصالحة للعيش فيها اضعاف اضعاف المساحة الصالحة للعيش في مصر مثلا . .
-
كندا تعدادها السكاني 35 مليون , يعني تقريبا تلت سكان مصر , و 10 % من سكان امريكا , و ده اللي بيخلي البلد في حاجة مستمرة لمهاجرين جدد . .
-
كندا فيها ثروات طبيعية هائلة , من اراضي خصبة او مياه عذبة , او بترول او معادن او ذهب , ده غير سياستها التصنيعية و التجارية اللي مخلياها احد عمالقة الاقتصاد العالمي , حتي ان ليا صديق كندي , قالي ان البلد هناك , محتاجة يكون عدد سكانها 180 مليون فرد , عشان بس تكون قادرة علي استغلال كل مواردها بشكل سليم . .
يعني كندا نفسها عايزة تخلي سكانها يتضاعف عددهم 5 مرات . . تخيل ؟ ؟
-
أن كندا من الدول القليلة اي فيها تأمين صحي شامل للمواطنين , والمهاجرين , وده بيجعلك تحت مظلة تأمين صحي مجاني كامل , و بمستوي عالي جدا لكل افراد الأسرة
-
ان فرص العمل متوافرة بشكل كبير , و بمرتبات متفاوتة , تضمن ليك و لاسرتك مستوي معيشي مناسب , وانك تقدر توفر بشكل كويس
-
ان النجاح في البلاد ديه معتمد علي مجهودك وتعبك و دراستك و خبرتك , مش واسطة او معارف او طبقات اجتماعية معينة , وده اللي بيصنع نوع من العدالة المجتمعية , واللي تدفعك دفعا للنجاح
النجاح في البلد ديه , محتاج ناس نشيطة , متعلمة , عندها خبرة , فاهمة شغلها , مش عايزين كسالي و جهلة . .
و ده هو مفتاح الهجرة لكندا . . .
ده غير ان الباسبور الكندي من اقوي جوازات السفر العالمية , وتقريبا يدخل كل البلاد اللي يدخلها الباسبور الامريكي . .
و حتي لو انت حلمك انك تعيش في امريكا , ففيه اتفاقية النافتا NAFTA اللي تخلي اي مواطن امريكي او كندي , يعيش في البلد التانية , بشوية خطوات ادارية بسيطة . . .
واحد يقول , يا عم انا مش هاقدر اعيش في التلج ده كله , انت متعرفش درجة الحرارة بتوصل كام في الشتا ؟ ؟
اقوله اولا مش كل كندا بالشكل ده , فيه مدينة فانكوفر , جوها احسن من باريس نفسها , و مش بينزل فيها التلج الا فترة قليلة في السنة غير كدة الجو ربيع . .
ده غير ان حتي المدن الباردة جدا , الناس فاهماها غلط . .
زميل كندي ليا زارني في اسطنبول من كام سنة , قالي ايه يا خي البرد اللي عندكو ده , قلتله انت اخر واحد تتكلم عن البرد , هنهزر ؟ ؟ شوف يا عم الجو عندكو عامل ازاي . .
قالي خد بالك , اغلب الكنديين مش بيحسو بالبرد حتي لما توصل الحرارة ل 40 تحت الصفر , البيت مكيف , الشغل مكيف , المول مكيف , الاسانسير مكيف , العربية مكيفة , الحمام مكيف , مين اللي اصلا بيمشي في الشارع في الجو ده . .
و بالمقابل , المدن اللي البرد فيها شديد , بتلاقي فرص العمل اكتر , والمرتبات غالبا اعلي . .
الكلام الجميل اللي فوق ده كله يخلينا متاكدين ان عيون عشرات الملايين من الشباب علي مستوي العالم علي كندا , وعايزين يهاجرو . . . .
و ده اللي مخلي الحكومة نفسها , عاملة معايير صعبة شوية في اختيار المهاجرين . .
معايير صعبة لكن مش مستحيلة , وكلها مقدور عليها . . .
بس محتاجة منك نشاط و صبر , وتكون حاطط الموضوع فعلا في بالك مش مجرد فكرة عابرة . . .
الهجرة لكندا مش محتاجة حساب بنكي ضخم , ولا مؤهلات رهيبة , ولا حظ زي هجرة امريكا , مجموعة من الخطوات اللي محتاجة مجهود و تعب و اصرار , لكن نتيجتها اكتر من رائعة
في الحلقات الجاية هنتكلم علي متطلبات و شروط الهجرة لكندا