أنواع الهجرة الي كندا . . .

 

الحلقة الثانية من سلسلة #الهجرة_لكندا_بالتفصيل_الممل

جميع الحلقات هتلاقيها هنا 

 

=================================

 

اتكلمنا في الحلقة الاولي عن اهمية الهجرة لكندا . . .

 

خلينا نعرف دلوقتي عدد من انواع الهجرة  . . .

 

كندا عاملة عدد كبير من برامج الهجرة ليها  , كل نوع بيكون ليه مواصفات و متطلبات معينة , الشخص الذكي اللي يتابع البرامج ديه , عشان يختار اللي يناسبه منها . ..

 

اشهر تلات برامج للهجرة لكندا هم كالتالي  :

​​

• هجرة العمالة الماهرة   Federal skilled workers

• هجرة الفنيين الماهرة   Federal Skilled Trades Program

• هجرة الخبرة الكندية   Canadian Experience Class

 

ولو انت قدرت تجيب النقط الكافية لاي برنامج من البرامج ديه , فأنت مؤهل "مبدئيا" للهجرة لكندا

 

و "مبدئيا" ديه مهمة جدا . لان الحصول علي النقط لبرنامج ما , مش معناه قبولك , لكن معناها ان اسمك موضوع علي قوائم الترشح زي ما هنشوف بالتفصيل لسة قدام

​

ديه مش البرامج الوحيدة , بس خلينا نقول ان دول اشهرهم , واسرعهم

 

و هتلاقو ان كل التفاصيل موجودة في الموقع الرسمي للحكومة الكندية 

​
 

اي موقع غير ده يبقي غير رسمي , الا لو تم الاشارة ليه في نفس الموقع ده , مش معني كدة ان اي موقع تاني كلامه غلط , فيه مواقع تانية ممتازة في التفاصيل و الدقة , زي ده

 

​

بس يظل الموقع الرسمي الاكثر ثقة هو اللي قلنا عليه

 

تعالي نتكلم بالتفصيل عن البرامج دي

 

=================================

​

اولا هتلاقي ان النوعين للهجرة ( هجرة العمالة الماهرة ) و (هجرة الفنيين الماهرة ) قريبين شوية في المواصفات , والفروق بينهم بسيطة

 

ديه الصفحة الرسمية الخاصة بالنوع الاول و ديه صفحة النوع التاني

 

النوعين من الهجرة , عندهم مجموعة من المتطلبات الاساسية وهي :

​

• الخبرة المهنية : يعني يكون عندك خبرة حقيقية في اي مجال من المجالات المطلوبة في كندا , ولازم المهنة ديه يكون ليها رقم (نوك) NOC زي ما هنشوف قدام , وشهادات الخبرة ديه بتيجي بورق رسمي مش بالكلام و خلاص

​

• مهارات اللغة : معناها يكون عندك درجات كويسة في احد امتحانات الانجليزي المعترف بيها CELPIP , IELTS او اللغة الفرنسية TEF , وياريت يكون معاك الاتنين

​

• الشهادت : يا تري معاك ثانوي بس , ولا كمان جامعة , ولا دراسات عليا

​

• حساب بنكي برقم يكفيك واسرتك للمعيشة في كندا  , وده مقدور عليه

​

• هل عندك عرض عمل حقيقي في كندا ولا لا

​

• هل عندك ترشيح لاحد الولايات او المقاطعات ولا لا , وديه لو موجودة هتسرع كتير عملية الهجرة

​

• العوامل اللي فوق مش لازم تجيب فيهم كلهم ارقام عالية , لكن هي معادلة بتوازن بعضها , فلو انت معاك ارقام عالية في نقط , وارقام اقل في نقط تانية ممكن تعوض بعضها

 

=================================

​

النوع التالت هو (هجرة الخبرة الكندية )

 

صفحته الرسمية هنا
 

و ديه الحقيقة متاحة بس للي اشتغلو في كندا فعليا , و بشكل رسمي , يعني واحد سافر و اشتغل في كندا لمدة سنة علي الاقل بشكل رسمي

 

طبعا الفئة ديه حظها اكبر في الحصول علي الهجرة و بشكل اسرع  , بس من غير الشرط ده , فانت مش هتكون مؤهل للهجرة بالطريقة ديه

 

=================================

​

و فوق ده كله , لو عندك حاجة من الحاجات ديه , فده هيزود من فرص قبولك بشكل اسرع  :

​

• ان يكون ليك شقيق (اخ او اخت) في كندا ,بشرط يكون مواطن كندي او معاه اقامة دائمة PR

​

• ان يكون معاك درجة معقولة في امتحان اللغة الفرنسية  TEF جنب الايلتس , اللغة الفرنسية مش مطلوبة اجباري للهجرة , لكن وجودها بيزود من فرص قبولك

​

• لو عندك فرصة عمل حقيقية من كندا ( وديه من الحاجات بالغة الصعوبة الحقيقة ) بتزود كتير من فرص قبولك و بتخليها اسرع

 

==============================================

 

لو انت عندك المؤهلات الكافية لاحد انواع برامج الهجرة اللي فاتت , فانت بتقدم بياناتك بالكامل, و بيكون ليك حاجة زي ملف بكامل بياناتك و درجاتك , وساعتها بيدخل حاجة اسمها الـ Pool

 

الـ Pool ده اشبه بمخزن كبير , او ممكن نقول اشبه ببورصة فيها عشرات الالاف من الملفات لكل اللي حصلو علي النقط الكافية للقبول في الهجرة لكندا . .

 

يعني كانه صندوق كبيرة فيه عدد كبيرة من سيفيهات ناس عايزة تشتغل , و الـ Pool ديه هي اللي الحكومة الكندية , وكمان المقاطعات بتختار منها مين المؤهل للهجرة

 

و الاختيار مش بيتم بناء علي الاقدمية  , لكن بناء علي نقطك كام , ولغتك عاملة ازاي , وايه المتطلبات اللي الحكومة عايزاها في الفترة الحالية . . .

 

فمثلا مقاطعة مسيساجا , في احتياج عاجل في 2018 لمحاسبين عندهم خبرة عالية في التامين و الضرايب , و لازم يكونو كويسين في الانجليزي و الفرنسي , هوب , يدخلو علي الـ Pool و يختارو افضل محاسبين عندهم درجات عالية في الانجليزي و الفرنسي و هكذا

 

و بالتالي دخولك الـ Pool في حد ذاتها لا يعني ضمان هجرتك لكندا , لكن بيخلي اسمك و بياناتك معروضة و متاحة للحكومة نفسها , او للمقاطعات علي حدة

 

كل الكلام اللي فوق ده , بيتكلم علي كل ارجاء كندا ما عدا مقاطعة كيبيك , واللي قوانينها مختلفة تماما , و ليها انظمة هجرة متغيرة  , هنتكلم عنها بعدين ان شاء الله . .

 

المرة الجاية هنتعرف علي الاداة اللي نستخدمها عشان نعرف هل هنكون مؤهلين للهجرة ولا لا