الحلقة 5 : الأيلتس
خطوات التقديم للهجرة لكندا
الحلقة الرابعة من سلسلة #الهجرة_لكندا_بالتفصيل_الممل
جميع الحلقات هتلاقيها هنا
==============================
اتكلمنا في الحلقات اللي فاتت بالتفصيل عن خطوات الهجرة لكندا , وعرفنا ان اول و اهم و اصعب خطوة هي الايلتس , ياريت لو مكنتش قريتهم اقراهم الاول من اللينك فوق عشان تقدر تتابع معانا
مشكلة الايلتس انك مش هتعرف تتعلمه بين يوم وليلة , ولا حتي خلال كام اسبوع , الموضوع محتاج شوية وقت و مجهود خاصة لو الانجليزي بتاعك اصلا ضعيف . .
بس هو بالفعل اهم خطوة في الهجرة , مش بس عشان تقدر تعدي في التقييم الاول اللي لازم تجيب 67 نقطة , او التقييم التاني اللي لازم تجيب فيه 460 نقطة , ده كمان عشان تقدر تجيب ترشيح للمقاطعات اللي اكيد هتحدد درجة معينة للايتلس متقلش عنها . .
وحتي لو انت بتفكر في هجرة استراليا , هتلاقي ان الايلتس مفيش مهرب منه , بيحتاجوه و درجتك بتحدد سرعة قبولك
==============================
ايه بقي الايلتس ؟
الايلتس اختبار بريطاني , و بيتم عمله في مركزين معتمدين علي مستوي العالم , المركز الثقافي البريطاني , ومركز آي دي بي
هو مكون من اربع امتحانات , قراءة , كتابة , سماع , تحدث , وكل امتحان فيهم فيه مجموعة من الاليات اللي تضمن هل انت بالفعل متقن اللغة الانجليزية ولا لا
كل امتحان فيهم من 10 , وبيجيبو متوسط درجاتك في الاربع امتحانات , و بتكون ديه الدرجة العامة . . .
اقل من درجة 6 , اعرف انك غير مقبول سواء لكندا او استراليا , و حتي لو جبت الرقم ده , فاعرف ان فرص قبولك قليلة جدا , يعني ياريت تجيب 7 او 7.5 عشان تكون ضامن القبول السريع
فيه نوعين من امتحانات الايلتس , جينيرال و اكاديمي , الهجرة لكندا لازم جينيرال مينفعش اكاديمي , بينما استراليا بتقبل الاتنين , فيفضل تمتحن جينيرال
لو انت متوسط في الانجليزي , ياريت تعمل حسابك في متوسط من 500 لـ 1000 ساعة مذاكرة علي الاقل , يعني بتتكلم من شهرين لتلاتة , لو انت هتذاكر ساعتين او تلاتة في اليوم
==============================
نيجي بقي للسؤال الاهم , اذاكر ازاي و مع مين و اخد كورس فين و ايه ايه الماتيريال ؟
الحقيقة ان اجابة السؤال ده هي اقل اهمية من سؤال اخطر بكتير , وهو : هل هتقدر بالفعل تفضي من وقتك و جهدك انك تذاكر من 500 ل 1000 ساعة عشان تجيب سكور عالي ولا لا
اللي اقصده ,ان مش هيفرق كتير ايه الماتيريال او ايه المركز اللي هتذاكر فيه , طالما انت اصلا همتك ضعيفة , وصبرك قليل , و بالعكس , لو انت بالفعل صبور و هدفك واضح قدامك , فايا كان الماتيريال او المركز اللي هتذاكر فيه , فثق انك هتوصل لهدفك . .
الحقيقة الشبكة العنكبوتية فيها كمية ماتيريال ايلتس متخلصش , انت بس اعقد نيتك و فضي نفسك و هتلاقي كل اللي انت عايزه
و النصيحة انك متشتتش نفسك في كمية كبيرة من الماتيريال و تتوه فيها , المثل بيقول كتير النط قليل الصيد , ركز في حاجات محددة , خلصها للاخر , وادخل علي اللي بعدها , وهتلاقي الدنيا بقت سهلة ان شاء الله
ولازم لما تذاكر ايلتس تكون محدد انت بتذاكر انهي فرع فيهم , يعني مذاكرة الايلتس مش بتكون عايمة علي بعضها , كل فرع من الفروع الاربعة قراءة , كتابة , سماع , تحدث ليه كتبه و فيديوهاته , وطرق التعلم الخاصة بيه
و لاحظ ان الايلتس مش بس بيختبر انك فلوينت في الانجليزي ولا لا , يعني فيه ناس بيعرفة يتكلمو انجليزي بالممارسة , ومن كتر ما شاف افلام او عمل شات مع اجانب , بل ان اصغر طفل شغال في خان الخليلي او هضبة الهرم هتلاقيه بربنط في الانجليزي , بس الايلتس محتاج انجليزي بروفيشنال , فالانجليزي المسلوق ده مينفعش معاهم
انا هنزل هنا مجموعة من اللينكات المهمة, بس برضه هكرر تاني , ان المهم انك صبور انك تتعلمها ولا لا
==============================
-
اولا بالنسبة لخطة مايكل يوسف هنا تفاصيل خطته للتغلي علي الايلتس
-
و هنا اغلب الكتب اللي عنده رافعها هنا
-
و هنا لينكات تانية ليه خطة المبتدئين و خطة المتوسط و خطة الايلتس
-
وهنا كتب كامبريدج , اهم كتب للايلتس
-
و هنا خطوات جميلة لو ممكن تبدا بيها
-
و هنا مجموعة كبيرة من مواقع المحادثة بالانجليزي
https://www.conversationexchange.com/
https://www.verbling.com/find-teachers/french?sort=magic
https://www.mylanguageexchange.com/
https://www.easylanguageexchange.com
-
هنا موقع عام فيه فيديوهات كتيرة جدا للايلتس
-
و هنا تجربة جميلة لواحدة كانت حامل و جابت 8.5 , مش عارف ازاي
-
و هنا شرح تفصيلي ايه هو امتحان الايلتس
==============================
لو اخدت بالك , اللينكات كتيرة جدا , ومحتاجة شهور طويلة عشان تخلص , ولو دورت انت هتلاقي اكتر من كدة ,واليوتيوب فيه فيديوهات مجانية كتيرة جدا , وجوجل بلاي فيه عشرات التطبيقات الممتازة , الحقيقة انت مش محتاج تعملها كلها , يكفي انك تركز علي شوية مهها و تخلصها للاخر , وهتلاقي الدنيا معاك بقت افضل كتير , بس نرجع للسؤال تاني , هل انت صبور ولا لا
==============================
نيجي بقي للجزء الاخير , امتحن فين و ازاي و بكام ؟
زي ما قلنا فيه مكانين للايلتس , المركز الثقافي البريطاني , وآي دي بي
اختبار الايلتس عبارة عن 4 اختبارات في بعض
قراءة , كتابة , تحدث , سماع
وهنتكلم بالتفصيل عن الاختبار ده في حلقات منفصلة
تكلفة الاختبار تقريبا 2100 جنيه , وسمعت انها هتزيد من شهر ابريل الجاي , و فيه حوالي 3 اختبارات شهرية
============================================
البوست ده هدفه مش اعطاء معلومات عن الايلتس اللي اغلبكو عارفها , لكن هدفه اني احطك قدام نفسك , عشان تعرف ان انت لوحدك اللي في ايدك قرار عايز تهاجر و تستقر في مكان يحترمك و تبني فيه مستقبلك ولا لا . .
يا تري هتعمل حفظ للبوست و تنساه زي باقي البوستات , ولا فعلا هتتحرك خطوات جادة و قوية