الحلقة 6 : تقييم الشهادات
تقييم الشهادات
الحلقة السادسة من سلسلة #الهجرة_لكندا_بالتفصيل_الممل
جميع الحلقات هتلاقيها هنا
....................................................................
ياريت متقراش البوست ده , الا لو كنت قريت بالفعل البوستات الخمسة اللي فاتو عن هجرة كندا . .
عرفنا ان اول خطوة المفروض تعملها انك تذاكر ايلتس , تاني خطوة ( اللي ممكن تعملها بالتوازي مش لازم ورا بعض ) انك تعمل ما يسمي بـ: تقييم الشهادات
تقييم الشهادة معناه , انك بتثبت للحكومة الكندية ان معاك شهادات تساوي الشهادات الكندية اللي عندهم , وده عشان تعرف تاخد درجات البكاليريوس او الماستر او الدكتوراه
الموضوع بسيط مفيهوش لغبطة , ومش هياخد اكتر من اسبوعين وشوية فلوس معقولة , وهو خطوة لابد منها , ومن غيره مفيش هجرة لكندا
....................................................................
عايزين بس الأول نوضح الخلط بين مصطلحين قريبين من بعض , تقييم الشهادة , ومعادلة الشهادة
اللي احنا هنعمله , هو تقييم شهادة , وده بيتم عن طريق انك هتبعت شهاداتك بطريقة معينة لمكتب في تورونتو , كندا , لكن ده ميعتبرش معادلة شهادة
يعني لو انت مهندس او مدرس او محامي او صيدلي او ايا كان , فبمجرد ما بعت شهاداتك - بالشكل اللي هنقوله - لمكتب (الويس) او اي مكتب معتمد , فكدة الحكومة الكندية عرفت ان معاك بكاليريوس كذا ,لكن ده مش معناه خالص ان يحق ليك العمل هناك بالشهادة ديه
فالطبيب او المهندس او المحاسب او او او . . . . لو عمل تقييم لشهادته وعرف يهاجر , مش هيعرف هناك يشتغل طبيب ابدا , الا لو عمل خطوات لمعادلة الشهادة , لو كان ده ممكن
قد يكون بعض المهن معادلة الشهادة فيها و الحصول علي رخصة بالعمل فيها سهلة , وقد تكون مهن صعبة جدا , بعض المهن بتحتاج امتحانات و بعضها لا , ايا كان ده مش موضوعنا , احنا دلوقتي بنتكلم عن ازاي تقيم الشهادة , عشان تعرف تاخد نقطها و تهاجر , حكاية انك تشتغل بتخصصك هناك , ده موضوع تاني معلوماتي فيه مش كتيرة. .
....................................................................
طيب دلوقتي عايزين نعمل تقييم للشهادة , ابدا ازاي
اولا فيه 7 جهات بتعمل تقييم لشهاداتك , خمسة منهم لاي مؤهل دراسي , ما عدا طب و صيدلة , هما
----------------------------------------
World Education Services
وموقعهم
----------------------------------------
Comparative Education Service – University of Toronto School of Continuing Studies
وموقعهم
http://www.learn.utoronto.ca/ces
----------------------------------------
International Credential Assessment Service of Canada
وموقعهم
----------------------------------------
International Qualifications Assessment Service
وموقعهم
http://www.alberta.ca/iqas-immigration.aspx
----------------------------------------
International Credential Evaluation Service
وموقعهم
----------------------------------------
المكان السادس خاص بالأطباء بس وهو
Medical Council of Canada (professional body for Doctors)
وموقعهم
http://mcc.ca/repository/educational-credential-assessment/
----------------------------------------
والمكان السابع خاص بالصيادلة بس وهو
Pharmacy Examining Board of Canada
وموقعهم
http://www.pebc.ca/index.php/ci_id/3374/la_id/1.htm
----------------------------------------
فلو انت طبيب او صيدلي روح علي الموقع الخاص بيك و شوف شروطه ايه و تعامل معاه
ولو انت اي تخصص تاني , فممكن تروح لاي موقع من الخمس الاولين , والحقيقة ان اغلب النصايح علي موقع (ويس) اللي هو اول واحد , لانه سريع و الناس بتشكر فيه
و ده اللي هنشرحه حالا
....................................................................
أول خطوة تعملها انك تدخل علي موقع الويس نفسه اللي هو
https://applications.wes.org/createaccount
وتعمل اكونت و تفعله بالايميل بتاعك
بعدها تبدا تختار نوع الشهادة اللي عايز تقيمها , بكاليريوس , ولا اكتر
خد بالك او انت معاك بكاليريوس ( او ليسانس هي هي ) فانت بس هتعادل شهادة البكاليريوس BSc مش هتعادل شهادة الثانوي
بينما لو مش معاك الا الثانوي فلازم تبعتها هي
اما لو كان معاك ماجيستير فلازم تقيم البكاليريوس و الماستر مع بعض
ولو معاك دكتوراه فلازم تقيم البكاليريوس و الماستر والدكتوراه كمان
فانت لما تعمل اكونت هيبدا يقولك ايه الشهادات اللي عايز تقيمها ؟ ؟
هل ثانوي بس ( لو مش معاك الا ثانوي )
ولا بكاليريوس بس ( لو بس معاك بكاليريوس )
ولا بكاليريوس وماستر ( لو معاك ماستر )
ولا بكاليريوس وماستر ودكتوراه ( لو معاك دكتوراه )
هتحدد ايه الشهادات اللي هتقيمها , وتحدد انهي تخصص , انهي قسم , اسم الجامعة , اسم الدولة
وطبعا بتدخل كل بياناتك , بما فيها عنوانك و تليفونك
طب وبعدين ؟
بييجي فيه قسم هتدفع فيه فلوس , والمبلغ هيكون من 250 ل 400 دولار كندي . حسب هتقيم كام شهادة
ولازم يكون معاك كريديت كارد ( يكون شغال دولي مش محلي بس ) عشان تقدر تدفع الفلوس
خد بالك ان في كل مراحل الهجرة لكندا , كل الفلوس بتدفعها لما تتتقبل بالفعل في الهجرة , باستثناء 3 حاجات بتدفع فيهم فلوس وانت لسة متقبلتش , يعني سمك في المية , وهي :
-
امتحان الايلتس ( ولو امتحنت اكتر من مرة لازم تدفع كل مرة)
-
تقييم الشهادات ( اللي بنتكلم عليه )
-
مصاريف هجرة المقاطعات ( احيانا بتتطلب و هنتكلم عنها الحلقة بعد الجاية )
غير كدة اي مصاريف بتكون لما تتقبل بالفعل
اول ما تدفع بالكريديت , ساعتها الويس هيجيبلك كود مكون من 8 ارقام تقريبا , ده رقم الريفرنس بتاعك
كمان الموقع هيجيبلك عنوان المكتب بتاعهم في ترونتو , اللي هو
WES Reference No. _ _ _ _ _ _.
World Education Services
Attention: Documentation Center
2 Carlton Street, Suite 1400.
Toronto, Ontario M5B 1J3 Canada
العنوان ده بقي تكتبه في ورقة وورد نضيفة , وتكتب جنب جملة
WES Reference No. _ _ _ _ _ _.
تكتب رقم الريفرنس بتاعك اللي ادوهولك
ممكن تكتب ده بايدك مش بالكومبيوتر , بس هيكون شكلها معفن علي الفاضي
و خد بالك اي غلطة في كتابة رقم الرفرنس , هيمنع شهادات انها تتقيم , وبالتالي هتعيد الموضوع من الاول و هتدفع الفلوس تاني
....................................................................
طيب بعد ما عملت الحوار ده علي الموقع ؟ ؟
تروح علي شئون الخريجين في الكلية عندك , وتروح لمدام ابتسام , وتقولها اني عايز حاجتين ( اوعي تنسي حاجة فيهم )
-
شهادة التخرج
-
بيان درجات لكل سنة
شهادة التخرج اللي بيظهر فيها ان فلان الفلاني حصل علي درجة البكاليريوس سنة كذا في تخصص كذا بمجموع كذا
بيان الدرجات ده حضرتك اللي فيه الاربع او الخمس سنين اللي درستهم , كل سنة انت اخدت مواد ايه , وكل مادة جبت فيها مجموع كام
ولازم لازم لازم لازم لازم لازم لازم لازم لازم لازم تكون الشهادتين بالانجليزي , لو بالعربي مش هيستخدمو الا لعمل قراطيس للطعمية
ومتقلقش لما تروح لمدام ابتسام و تقولها كدة , لان فيه العشرات غيرك طلبو منها نفس الطلب , وهي فاهمة ايه الموضوع
طبعا لازم الشهادتين كونو مختومين و ممضيين سواء من العميد او رئيس القسم او اللهو الخفي , هما عارفين مين هيمضي عليه ايه
طب و بعدين ؟ ؟
خد بالك انك مش هتستلمها بايدك , لكن الجامعة هتحطها في ظرف مقفول تابع للجامعة , ولازم ادارة الجامعة تمضي و تختم علي الظرف من برة , وبالذات علي مكان لصق الظرف
ديه شروط الويس عشان يستلمو اي ظرف , يكون مقفول , وممضي و مختوم علي مكان اللصق , عشان يتاكدو انها صادرة من الجامعة فعلا
يوم ما تستلم الشهادات , يكون معاك العنوان اللي فيه رقم الرفرنس بتاعك مطبوع في ربع ورقة مثلا , عشان يتلزق علي الظرف من برة
طب لو بعادل اكتر من شهادة , سواء معاك اتنين بكاليريوس , او البكاليريوس و الماستر مثلا ؟
هتعمل نفس الحوار لكل شهادة , وكل واحدة يكون ليها ظرف مستقل
....................................................................
كدة انت جاهز تبعت الملفات , تروح علي اي مكتب بريد , سواء البريد المصري او اي شركة طرود زي اراميكس , وتبعت الظرف او لو اكتر من ظرف , علي العنوان اللي انت طبعته في الورقة
و متنساش يكون رقم الرفرنس واضح جدا علي الظرف من برة , والا كل ده ملوش اي لازمة وهتعيد الموضوع من الاول
و هتلاقي هنا ملف بي دي اف هايل , فيه كل الخطوات اللي المفروض تعملها في الموقع , من اعداد علاء شعبان
============================================
طب لو انا مش مقيم في مصر , ينفع اعمل نفس الموضوع ده ؟ ؟
ايوة , مفيش مشاكل , موقع الويس ممكن تسجل عليه من اي مكان في العالم و تدفع الفلوس و تاخد الرقم
وادارة الجامعة رسميا مش بتطلب انك تكون موجود عشان تديلك شهادة , ممكن حد من قرايبك او اصدقائك ,او لو تعرف معيد او دكتور في القسم عندك يخلص الموضوع علي طول , وهو يبعت الورق لتورونتو
ولو ادارة الجامعة غلست , روح اقرب سفارة مصرية ليك , واعمل توكيل لابوك او اخوك , وهو يروح بالتوكيل ده و يخلص الموضوع
============================================
لو شايف الموضوع متعب او ممل او مكلف او غلس , يبقي كبر دماغك خالص عن هجرة كندا , قلنا قبل كدة ان كندا بتفلتر الناس و مش عايزة الا الناس الصبورة , المثابرة , المهتمة , اللي فعلا بيحدد هدف في عقله و بيسعي اليه دايما
وهنا هتلاقي نماذج للورقة المطلوبة و الظرف المقفول
وهنا هتلاقي مجموعة من الفيديوهات عن نفس الموضوع
