هجرة المقاطعات 

​

الحلقة التاسعة من سلسلة #الهجرة_لكندا_بالتفصيل_الممل

جميع الحلقات هتلاقيها هنا 

 

....................................................................

 

عرفنا من الحلقة اللي فاتت ان اسلوب الهجرة كالتالي : بتدخل بياناتك في موقع الهجرة الكندية , وبيكون ليك نقط معين , ولو وصلت للمجموع المطلوب (اللي هو حاليا 450) بيتم اختيارك فورا

 

المعضلة الأساسية , ان من الصعب جدا ان حد يجيب لوحده مجموع 450 , يعني لازم يكون سنك صغير ,  و خبرتك كبيرة , ومعاك ماجيستير , و معاك 8 علي الاقل في الايلتس , وتكون مراتك معاها ايلتس عالي

 

رقم 450 لازال من الارقام الصعبة جدا ان حد يوصله , فبيكون الحل الوحيد لحاجة زي كدة هي ما يسمي : ترشيحات المقاطعات , او ما يسمي Provincial Nominee Programs

 

وده معناه كالتالي : أن الحكومة الفيدرالية الكندية , عاملة امكانية لاغلب المقاطعات الكندية , انها تختار بعض المهاجرين , حسب احتياج كل مقاطعة , في الوظايف و اللغات المطلوبة و الحالات الاجتماعية وهكذا

 

فلو فيه مقاطعة وافقت بالفعل علي مهاجر , ساعتها المقاطعة تبعت لموقع الهجرة ان فلان الفلاني اللي متسجل في الـ Pool احنا موافقين عليه . .

 

و بعدين ؟ ؟

 

لو اي مقاطعة وافقت عليك , ساعتها بتاخد 600 نقطة فورا , وده معناها ان مجموعك هيكون اقل حاجة 900 نقطة , وهيتم اختيارك فورا من موقع الهجرة الفيديرالية . .

 

و ده معناه ان طالما اغلبنا مش قادر يجيب مجموع 450 المطلوب , يبقي معندكش اي امل الا ترشيح المقاطعات , لان مهما كانت نقطك قليلة , فاي ترشيح من اي مقاطعة , معناه انك هتاخد 600 نقطة زيادة فورا , وهيتم اختيارك و الموافقة عليك

 

كلام جميل , المقاطعات بقي بتختار علي اساس ايه  ؟

 

الحقيقة ان الموضوع ده متشعب لان كندا دولة فيدرالية , يعني بتعمل شبه حكم ذاتي لكل مقاطعة علي حدة  ,فكل مقاطعة ليها نظام غير النظام , وكل مقاطعة ليها ادارة مستقلة , خاصة فيما يتعلق بالهجرة

 

فكل مقاطعة بتحدد متطلباتها , حسب المهن الشاغرة عندهم , والاحتياج الديموغرافي للناس , وهكذا

 

فممكن تلاقي البيرتا مثلا دايما العاملين في المهن الهندسية و الكيميائيين لان فيها كم ضخم من حقول البترول , وتلاقي نوفا سكوتشا بتركز علي العاملين في المهن الزراعية عشان يستصلحو المساحات الصخمة اللي عندهم , بينما اونتاريو عايزة ناس شغالة في التصدير و الاستيراد عشان يشغلو موانئ تورونتو

 

اغلب المقاطعات يهمها الدرجات العالية في الايلتس , بعضها يشترط وجود لغة عند الزوجة كمان , بعضها يفضل  وجود اطفال , وهكذا

 

طيب اجيب ازاي الترشيح ده ؟ ؟

 

ديه بقي المشكلة , ان الموضوع ده محتاج منك متابعة مستمرة , و تركيز كبير , عشان مفيش بوابة واحدة تقدر تشوف منها ترشيح المقاطعات , لكن لازم تتابع كل مواقع المقاطعات بشكل مستمر , ياريت يوميا , لان لما بتفتح مقاطعة , مش هيستنوك لما تاخد بالك عشان تقدم , المقاطعة بتفتح لمدة قليلة  , احيانا بتكون لمدة ساعات قليلة  , و يقفلو

 

فلازم سيادتك يكون ملفك جاهز علي موقع الهجرة , و تكون عامل سكان لكل ورقك , وشهادات الخبرة  , و حسابك البنكي , وكل التفاصيل ديه , بحيث اول ما مقاطعة مانيتوبا تفتح , فورا تقدم ورقك و ترشق فيها

 

احيانا مقاطعات بتفتح علي مهن محددة بس , واحيانا لشروط معينة زي درجات لا تقل عن 7 في الايلتس و هكذا  ,فلازم تكون متابع و عارف مين بيودي لفين , و انهي مقاطعة عايزة مهن ايه , عشان تقدر تقدم فورا فيها

 

بعض المقاطعات بتطلب رسوم في التقديم  من 50 لغاية 300 دولار , طبعا الفلوس اللي بتتدفع مش بترجع , فديه نقطسة سلبية  , لكن لابد منها , عشان كدة متقدمش في اي مقاطعة مالم يكون ورقك بالفعل سليم  وجاهز , نظام ابو بلاش كتر منه مش بياكل معاهم في كندا

 

موضوع هجرة المقاطعات اكبر من انه يتشرح في مقال واحد , و هو اكتر مجال المتنسافين في الهجرة بيحاولو فيه  , و علي قد صبر الواحد و متابعته , بيلاقي نتايج هايلة

 

هنا مواقع اهم مقاطعات بتعمل ترشيحات , ادخل عليهم و شوف مين عايز ايه , وايه متطلباتهم عشان تحضرها

​



 

Alberta

http://www.albertacanada.com

 

British Columbia

http://www.welcomebc.ca/home.aspx

 

Manitoba

http://www.immigratemanitoba.com

 

New Brunswick

http://www.welcomenb.ca/content/wel-bien/en.html

 

Newfoundland & Labrador

http://www.nlpnp.ca

 

Nova Scotia

http://www.novascotiaimmigration.com

 

Ontario

http://www.ontarioimmigration.ca/en/index.htm

 

Prince Edward Island

http://www.opportunitiespei.ca

 

Saskatchewan

http://www.saskatchewan.ca

 

و هنا هتلاقي مقال مهم جدا عن ساسكتشوين , باعتبارها الام الحنون لكتير من المهاجرين و بيعرفو يجيبو ترحشيها و يسافرو خلالها

 

​

و هنا ملف شديد الأهمية عن كل حاجة في هجرة المقاطعات , ملف 33 صفحة , فضي نفسك ساعتين عشان تخلصه كلمة كلمة

 

متنساش ان ده فعلا بوابة هجرتك لكندا , ومن غيره مفيش

 

بالتوفيق الدائم يا رب