سلسلة مصطفي سعد للهجرة لكندا
مصطفي سعد شاب مصري, هاجر لكندا , وكتب في تدوينة مهمة , كل خطوات الهجرة لكندا
ده اكونت مصطفي , وده لينك تفاصيل الهجرة , وده لينك البوست المجمع الخاص بيه
=====================
ناس كتير بتسألني هاجرت ازاي وايه الخطوات والاجراءات والورق والمصاريف.. فقلت أعمل البوست ده واجمع فيه كل المعلومات بدل ما أكتبها كل مرة ..
طبعا الموضوع كبير فأنا هاحاول أكون محدد ومختصر بقدر الامكان وهاقول لكم في الآخر لو حد عاوز
يستفيض أو عنده أسئلة تانية يعمل إيه..
نبدأ بسم الله الرحمن الرحيم
مبدئيا عشان موضوع الهجرة ده كبير فانا هاقتصر في كلامي عن كندا مع العلم ان فيه هجرة لبلاد تانية أبرزها أستراليا ونيوزلندا ودول في أوربا بطرق مختلفة بس أنا ماعنديش تفاصيل كتير عنها وطبعا فيه أمريكا من خلال الهجرة العشوائية
في كندا فيه أنظمة هجرة كتير منها ما هو فيدرالي (يعني تابع للحكومة المركزية مباشرة) ومنها ما هو تابع للمقاطعات (المقاطعات في كندا زي الولايات في أمريكا كده كل مقاطعة ليها حكومة ودستور وقوانين خاصة بيها وكمان ليها برامج هجرة خاصة بيها)
النظام اللي هاتكلم عنه هو النظام الأشهر وهو الخاص بالحكومة الفيدرالية .. وده اسمه Express Entry وبدأ تطبيقه من 2015 وزي ما هو باين من اسمه الهدف منه انه يدخل المهاجرين بسرعة للبلد يعني في خلال شهور بدل ما كانت اجراءات الهجرة بتاخد بالسنين قبل كده بس طبعا لازم تكون مؤهل ومستوفي الشروط
برامج الهجرة كلها معتمدة على شروط معينة لازم تتوفر في المتقدم وبناء على مدى توفرها بيحصل على عدد من النقاط وبناء على النقاط دي بيتحدد اذا كان مقبول أو لا وفرص اختياره من عدمه (هيبان قصدي كمان شوية)
بما ان معظم أو كل اللي بيسألوني عن الهجرة من أصحاب المؤهلات العليا فالبرنامج اللي يهمنا هو ما يسمى ببرنامج العمال المهرة Skilled Workers وهنا لازم أوضح نقطة مهمة جدا يمكن تكون مسببة لخبطة لبعض الناس اللي حاولت تقرأ عن شروط الهجرة .. وهي أنه في النظام الجديد بقى فيه نظامين للنقط 2 Point Systems واحد فيهم خاص بشروط القبول (يعني بيحدد إمكانية انك ممكن تقدم للهجرة من الأساس ولا لأ) والتاني بيحدد ترتيبك بين المتقدمين (يعني بيحدد فرصك في القبول) .. معلش لسه الموضوع هيوضح أكتر
بالنسبة لبرنامج العمالة الماهرة.. نظام النقط الأولاني (بتاع القبول Eligibility) من 100 نقطة.. عشان تتقبل لازم تبقى جايب 67 نقطة على الأقل.. بمعنى انك لو جايب أقل من 67 فانت مش هينفع تقدم أصلا .. بس مش معنى كده انك لو جبت 67 يبقى اتقبلت.. لأ معناها انك ينفع تقدم للهجرة.. طيب ال100 نقطة دي متوزعة ازاي؟
متوزعين على 6 حاجات:
-
اللغات
-
التعليم
-
الخبرة
-
السن
-
عرض عمل من كندا (إن وجد)
-
العامل السادس والأخير.. اسمه الAdaptability دي بقى عبارة عن حاجات ممكن تساعدك على التكيف والإندماج في المجتمع الكندي وبتديك نقاط زيادة.. بحد أقصى 10نقط زي ان يبقى ليك قريب في كندا أو سبق ليك العمل أو الدراسة فيها أو ان الزوج/ الزوجة يكون مستواه كويس في اللغة
اللينك ده بيوضح العوامل دي بالتفصيل:
بالنسبة لبند اللغة عشان ده محتاج شوية تفصيل:
البند ده عليه 28 نقطة متوزعين كالآتي: 24 نقطة على اللغة الأولى، و4 نقاط على اللغة التانية (اللغة التانية اختياري أساسا) .. اللغة الأولى والتانية دول انت اللي بتحددهم وطبعا انت بتختار ما بين الانجليزي والفرنساوي اللي هم اللغتين الرسميتين لكندا زي ما قلنا معظم الناس بتاخد الانجليزي كلغة أولى وبيمتحنوا أيلتس ..
ال24 نقطة بتوع اللغة متقسمين كالتالي: 6 نقط لكل مهارة من مهارات (للي مايعرفش امتحان الأيلتس ده عبارة عن 4 أجزاء كل جزء بيقيس مهارة من مهارت اللغة الأربعة: السماع، القراءة/ الكتابة، التحدث) بحد أدنى 4 في حالة انك تجيب الحد الأدنى (اللي هو CLB7) وبحد أقصى 6 نقط في الفرع في حالة انك جبت CLB9 أو أكتر..
أما بالنسبة لل4 نقاط بتاعة اللغة التانية فدول أساسا مش ضروري بس لو عندك لغة تانية اللي غالبا هتكون الفرنساوي يبقى خير وبركة.. هتزود نقاطك سواء هنا (عوامل القبول) أو في عوامل الترتيب.. ال4 نقط دول يا تاخدهم كلهم يا ما تاخدهمش خالص .. تاخدهم لو جبت في امتحان اللغة التانية ما يكافئ CLB5 في الأربع فروع .. لو قليت عن كده في أي فرع ما تاخدش حاجة منهم.. لو هتمتحن فرنساوي (سواء لغة أولى أو تانية) الامتحان الوحيد المعتمد في الهجرة الفيدرالي هو امتحان اسمه TEF وده موجود في مصر في المركز الثقافي الفرنسي في القاهرة فقط
واللينك ده فيه تفاصيل أكتر عن النقاط اللي هتحصل عليها من امتحانات اللغات سواء أيلتس أو TEF أو الامتحان التالت اللي اسمه CELPIP
بالنسبة لبند التعليم اللي عليه 25 نقطة: لو معاك بكالوريوس أو ليسانس بتاخد 21 نقطة، لو ماجستير 23 نقطة، لو دكتوراه 25 نقطة كاملين.. (ملاحظات: دبلوم دراسات عليا بيتحسب 22 نقطة، بكالوريوس الصيدلة بيتحسب زي الماجستير 23 نقطة.. من فضلك ما تسألش ليه دي خلاصة خبرات سنين :): )
بس علشان تحصل على النقاط دي لازم تعمل حاجة اسمها ECA أو Educational Credential Assessment أو تقييم للشهادة .. وده عبارة عن تقرير بتحصل عليه من أحد الجهات في كندا بيقول ان شهادتك بتعادل ايه في التعليم الكندي وبناء عليه بتاخد النقط بتاعة التعليم.. عن تجربة .. لو انت مش دكتور أو صيدلي فأحسن مكان تعمل فيه التقييم ده اسمه WES وده الموقع بتاعهم:
http://www.wes.org/ca/eca/
أما الأطباء والصيادلة فلازم يعملوا التقييم ده من جهات معينة
بالنسبة لبند الخبرة محتاج جواب أو جوابات خبرة من جهات العمل اللي اشتغلت فيها (بمواصفات معينة) بعدد سنين الخبرة المطلوب اثباتها
غير ال6 عوامل دول فيه شرطين تانيين لازم يتوفروا فيك:
-
بالنسبة للغة لازم ما تقلش عن CLB7 يعني تجيب 6 في الأيلتس في كل الفروع
-
لازم يبقى عندك مقدرة مالية يعني يكون معاك مبلغ من المال بيسموه Proof of funds كضمان مالي انك تقدر تتكفل بنفسك وأسرتك في أول كام شهر ليك في كندا (عشان ما تروحش تشحت هناك) المبلغ ده لو انت أعزب بيكون تقريبا 12 ألف دولار كندي وبيزيد حوالي 3 آلاف دولار وشوية لكل فرد إضافي في الأسرة.. يعني مثلا لو انت متزوج وعندك طفلين هيبقى المبلغ ده 22 ألف دولار تقريبا (اللينك ده فيه الجدول اللي بيوضح المبلغ المطلوب منك بالظبط على حسب أفراد الأسرة http://www.cic.gc.ca/english/immigrate/skilled/funds.asp)
وده اللينك اللي فيه الشروط كاملة: http://www.cic.gc.ca/english/immigrate/skilled/apply-who.asp
يبقى مبدئيا كده اللي مفروض تعمله قبل ما تبدأ أي خطوات وتصرف مليم واحد هو الآتي:
-
تحسب النقاط اللي هتحصل عليها من خلال السن/ الخبرة/ التعليم وتشوفها كام.. انت طبعا لسه ما دخلتش امتحان أيلتس.. ممكن تفترض رقم أو تطرح مجموع التلات عوامل اللي فاتوا من 67 عشان تعرف انك محتاج تجيب كام في اللغات
-
تتأكد أنك هتجيب النقط المطلوبة .. وانك هتقدر تجيب جوابات الخبرة من جهة العمل وانك هتقدر تدبر مبلغ الProof of funds وتجيب بيه كشف حساب من البنك (ممكن تستلف الفلوس من حد وترجعاله تاني) وتقدر تتحمل مصاريف التقديم (هتلاقيها في الآخر)
بعد كده تبتدي تمشي في المشوار وأول حاجتين هتعملهم:
-
انك تذاكر انجليزي كويس أوي وتدخل امتحان الأيلتس
-
انك تقيم الشهادات بتاعتك (أنصح انك تستنى تشوف نتيجة الأيلتس الأول قبل ما تبدأ في الخطوة دي)
-
طيب لو عملت الحاجتين دول ساعتها انت تقدر تقدم على الهجرة من خلال انك تعمل بروفايل على نظام الأكسبريس انتري.. وده نظام الكتروني .. مش محتاج علشان تفتح البروفايل غير ان يبقى معاك تقرير ECA بتاع تقييم الشهادات.. وشهادة الأيلتس .. دول بتدخل أرقامهم.. وبتدخل بياناتك كاملة على السيستم.. بعد ما تخلص ادخالها انت كده بقيت فيما يسمى Express Entry Pool يعني المكان اللي فيه كل المتقدمين اللي زيك واللي هيتم الاختيار من بينهم..
الاختيار بقى بيتم ازاي؟ من خلال ترتيب المتقدمين كلهم عن طريق نظام تقييم تاني اسمه CRS.. وده من 1200 ومالوش حد أدنى .. كل فترة (حوالي أسبوعين) بيعملوا سحب Draw بيختاروا فيه أحسن ناس في الPool بناء على نقاطهم ويبعتولهم ما يسمى Invitation to Apply.. أقل سكور وصلوا له لحد دلوقتي تقريبا 450 ..
طيب خلونا بقى ننكلم عن نظام التقييم ده أبو 1200 .. ال1200 دول متقسمين جزئين .. الجزء الأول من 600 ودول على عوامل زي اللي اتكلمنا عنها فوق (السن والخبرة والتعليم واللغات) مع اختلاف نظام النقط كليا.. والجزء التاني من 600 برضه ودول بتحصل عليهم في حالة من اتنين: انك تحصل على عرض عمل أو ترشيح من مقاطعة
اللينك ده بيشرح توزيعة النقاط بتاعة CRS بالتفصيل:
http://www.cic.gc.ca/english/express-entry/grid-crs.asp
المشكلة في النظام ده ان أي حد ما عندوش خبرة كندية، أو مستوى خارق في اللغات والتعليم والعوامل الأخرى صعب يجيب سكور قوي يؤهله أنه يتم اختياره.. زي ما قلت أقل سكور وصلوا له 450 .. لو حسبت نقاطك (بفرض انك عملت تقييم الشهادة و الأيلتس) لو انت انسان عادي هتلاقي ان نقاطك بتترواح من 300 ل 400 في أحسن الأحوال .. طبعا فيه ناس بتوصل ل450 وأكتر بس صعب جدا.. طب ايه الحل؟ الحل انك تشوف حاجة من اللي بتدي 600 نقطة .. اللي هم عرض العمل أو ترشيح المقاطعة .. عرض العمل صعب جدا يكاد يكون مستحيل خاصة لمن هو خارج كندا.. أما ترشيح المقاطعة فهو ممكن.. ودي الطريقة اللي أنا هاجرت من خلالها..
طيب ازاي نحصل على ترشيح مقاطعة؟
برامج المقاطعات كتيرة جدا وشروطها مختلفة.. ومواعيد فتحها والتقديم فيها كمان مختلفة.. ممكن أقول لك على برنامج معين تيجي تشوفه تلاقي شروطه مش منطبقة عليك أو تلاقيه قفل.. فالموضوع ده مالوش غير حل واحد .. انك تتابع مواقع الهجرة بتاعة المقاطعات بشكل منتظم وأول ما تلاقي برنامج فاتح وبتنطبق شروطه عليك تقدم فيه.. أنا شخصيا اتقبلت من خلال برنامج خاص بمقاطعة
نوفاسكوشا اسمه Nova Scotia Demand: Express Entry ..
اللينك ده فيه معلومات عن مقاطعات كندا، ممكن تاخد اسم المقاطعة وتكتب جنبه كلمة Immigration وتبحث عنهم في Google هيطلع لك الموقع الرسمي للهجرة بتاعة المقاطعة دي:
المصاريف:
المصاريف اللي هتصرفها في مشوار الهجرة يمكن تلخيصها كالتالي:
-
مصاريف امتحان الأيلتس : 2150 جنيه (من أول فبراير 2017) ده غير أي كورسات هتدخلها علشان تحضر للامتحان.. مع ملاحظة ان ممكن تحتاج تدخل الامتحان أكتر من مرة عشان توصل للدرجة اللي انت عاوزها وممكن كلا الزوجين يحتاجوا يدخلوا الامتحان
-
مصاريف تقييم الشهادة: حوالي 300 دولار كندي.. للأطباء والصيادلة أكتر شوية أعتقد في حدود 550 غير مصاريف ارسال الشهادات بالبريد السريع لتقييمها (حوالي 300 جنيه)
-
في حالة انك اتقبلت في Draw بيبقى مطلوب منك تقدم مستنداتك كاملة انت وكل أفراد أسرتك (شهادات الميلاد، قسيمة الزواج، البطاقات الشخصية، جوازات السفر، فيش وتشبيه، الشهادات الدراسية، جوابات الخبرة .. إلخ) مع ملاحظة ان أي مستندات مش بالانجليزي أو الفرنساوي هتحتاج تترجمها .. وتدفع مصاريف معالجة الملف ومصاريف اصدار الفيزا.. وبالتالي :
-
مصاريف اصدار الشهادات المختلفة (شهادات ميلاد/ تخرج/ فيش/ زواج..): تختلف من حالة لأخرى حسب عدد الشهادات وجهات اصدارها
-
مصاريف ترجمة أي مستندات.. برضه بتختلف حسب الشهادات اللي هتترجم
-
مصاريف معالجة الملف: ودي زي ما قلت بتتدفع لما بيجيلك invitation to apply ودي 550 دولار كندي للمتقدم الرئيس ومثلهم الزوجة و150 دولار لكل طفل
-
مصاريف اصدار الفيزا.. ودي ممكن تدفعها مع اللي فاتت بمجرد استلام ITA او الانتظار حتى الانتهاء من معالجة الملف ودي 490 دولار كندي لكل فرد كبير فقط ولا يوجد للأطفال
ملاحظات هامة وعامة:
-
الموضوع ممكن يبقى شكله صعب وطويل ومكلف وهو فعلا كده ومحتاج معافرة وصبر ونفس طويل.. بس لو انت عاوز والموضوع في دماغك ونفسك طويل وصبور ومقتنع بموضوع الهجرة صدقني هتوصل في الأخر بإذن الله مهما الموضوع طول
-
لا أنصح بالاستعانة بمكاتب الهجرة أو المحامين لسببين: الأول ان كتير منهم حرامية ونصابين ما يهمهمش مصلحتك كل همهم أنهم يسحبوا منك فلوس.. التاني ان كل المعلومات متاحة سواء على المواقع الرسمية للهجرة أو على المنتديات والمواقع.. وإن كان ولا بد من الاستعانة بمحامي أو مستشار هجرة لعدم التفرغ يبقى دور على حد معتمد ومتجرب
-
المنتدي ده رائع لأي حد بيبحث في موضوع الهجرة.. أنا شخصيا استفدت منه جدا جدا جدا:
-
الموضوع ده عن الاكسبريس انتري.. أنا اللي عامله بالمناسبة فيه تفاصيل التفاصيل واسئلة وأجوبة عن كل حاجة ابتديته من قبل الاكسبريس انتري ما يبدأ ومن قبل ما شروطه تتعرف أساسا.. مشكلته انه كبير جدا ومش سهل تلاقي المعلومات فيه ..وصعب جدا تقراه كله.. بس لو بقيت محترف في المنتدى هتعرف تطلع المعلومة اللي انت عاوزها.. ولو مالقيتهاش ممكن تسجل في المنتدى وتخش تسأل السؤال اللي انت عاوزه هتلاقيني أنا أو حد من الزملا بنرد عليك وان شاء الله
-
وده موضوع تاني مختصر كنت ناوي أعمله بس ربنا ما أرادش بس فيه زملا تانيين دخلوا كتبوا فيه ملخص كويس
-
تقييم الشهادة المذكور هنا ده مجرد اجراء خاص بالهجرة.. ليس له علاقة بالمعادلة أو بمعنى أصح الترخيص اللي بيحتاجه أصحاب بعض المهن للعمل في كندا.. دي قصة تانية خالص
-
قبول الهجرة مش معناه ان الحكومة هتوفر لك سكن أو شغل ولا هتصرف عليك لما تروح.. هي هتساعدك بطرق كتيرة انك تنجح بس نجاحك هناك محتاج تعب ومجهود تاني كبير برضه ولازم تبقى فاهم كده كويس عشان ما تتصدمش..
-
لازم تقرا كتير أوي عن الهجرة وعن البلد اللي انت اخترتها عشان تتأكد ان قرار الهجرة مناسب ليك.. القرار ده مافيهوش صح وغلط.. فيه مناسب ليك ولظروفك ولا لأ.. وانت اللي بتحدد ده من خلال طريقة تفكيرك وتقييمك للأمور
-
الموضوع ده فيه تجميعة مصادر مهمة لمذاكرة الأيلتس:
-
وبصفة عامة منتدى المطاريد هتلاقى فيه موضوعات كتير عن التحضير للأيلتس وكل ما يتعلق بالهجرة
-
شروط الهجرة بتتغير من وقت للتاني.. ومتوقع انها تتغير (للأسهل) في الفترة الجاية لأن حكومة الليبراليين اللي فازت في الانتخابات الأخيرة بتشجع الهجرة وفي الخطة اللي قدموها للبرلمان لسنة 2016 مخططين يدخلوا 300 ألف مهاجر وده رقم قياسي وشبه استحالة يقدروا يحققوه إلا لو سهلوا شروط الهجرة عشان يزودوا أعداد المقبولين.. تابعوا الأخبار والشروط أول بأول وانا لو عرفت أي تحديث هاعدل في البوست ان شاء الله
-
من ساعة ما عملت البوست بتجيلي مئات طلبات الصداقة والكومنتات والرسائل.. أنا مش عامل البوست عشان اشتهر انا عامله عشان أساعد الناس.. بالنسبة لطلبات الصداقة فانا باعتذر عن قبولها ﻷني ماباقبلش صداقة حد ماعرفوش بصفة شخصية.. بس أنا بوستاتي كلها public وفاتح الكومنت.. لو أي حد عنده استفسار ممكن يسأله في كومنت أو في رسالة خاصة وانا ان شاء الله هارد عليه قدر المستطاع
-
كل ما افتكر حاجة تانية هابقى أدخل أكتبها ان شاء الله
بالنسبة لتقييم الشهادات بالويس
جالي استفسارات كتير على بريد البرنامج حوالين تقييم الشهادات الدراسية الخاصة بالهجرة لكندا..
فدورت في دفاتري القديمة وجبت الكلام ده من مشاركات سابقى ليا على منتدى المطاريد.. وانا هنا باتكلم عن تقييم الشهادات من خلال مؤسسة WES الخاصة بكل التخصصات ماعدا الأطباء والصيادلة:
خطوات التقييم كالتالي:
1- هتدخل على الموقع ده:
تدخل بياناتك وتعمل حساب وتطبع الاستمارة اللي مطلوب تملأ نصفها العلوي.. وإدارة الجامعة أو الكلية تملأ الجزء السفلي منها وتختمها (لو مارضوش يملوها مش مشكلة كبيرة.. بتمشي من غيرها)
2- تذهب إلى الكلية تستخرج شهادة بالمقررات الدراسية والدرجات باللغة الانجليزية (او باللغة العربية ويتم ترجمتها إلى الانجليزية بمكتب ترجمة معتمد) وكذلك الشهادة الدراسية بالانجليزية (أو ترجمة)
3- يتم ملأ الاستمارة ووضعها في ظرف مع أصل شهادة المقررات ويتم اغلاق الظرف والختم عليه من الخارج (على قفل الظرف)
4- تقوم بإرسال الظرف مع صورة الشهادة الدراسية (صورة ضوئية فقط لا يلزم الأصل) عن طريق أحد شركات الشحن مثل FedEx أو DHL أو Aramex إلى عنوان WES اللي هو
World Education Services
2 Carlton Street, Suite 1400
Toronto, ON M5B 1J3
Canada
Telephone: (+1) 416-972-0070
5- في حالة الحصول على أكثر من مؤهل يتم تكرار الخطوات السابقة ويتم ارسال الأظرف الخاصة بالمؤهلات المختلفة في شحنة واحدة فقط.. يتم تقييم الشهادات التامة فقط وليست التي لم يتم أنهاؤها بعد
6- تدفع مصاريف معالجة الملف الخاصة بWES عن طريق كارت ائتمان .. لاحظ أن هناك اختيارين للتوصيل .. أحدهما مجاني عن طريق البريد العادي .. والآخر بزيادة 85 دولار عن طريق خدمة الشحن.. رجاء مراجعة المشاركة حتى النهاية إذا أردت توفير مبلغ ال85 دولار لكن لا أنصح مطلقا باختيار البريد العادي لأن الاحتمال الأكبر انه يضيع
7- تتابع من خلال الموقع موقف الملف الخاص بك .. في العادة التقييم يستغرق من أسبوع إلى أسبوعين والحد الأقصى 20 يوم من تاريخ وصول الشهادات إلى مقرهم، بشرط أنك تكون دفعت مصاريف المعالجة أيضا
بخصوص موضوع ال85 دولار.. في النظام القديم.. كان ﻻزم نرفق أصل تقرير ECA المرسل من WES ضمن ملف الهجرة اللي بيتبعت لادارة الهجرة.. فكنا بننصح الجميع انهم يختاروا ارسال التقرير باستخدام خدمة الشحن Courrier اللي بتكلف 85 دوﻻر كندي زيادة وذلك لسرعة وصول التقرير من ناحية وضمان عدم ضياعه في البريد العادي من ناحية أخرى
دلوقتي في النظام الجديد لم يعد مطلوب ارسال أي أوراق.. في المرحلة اﻷولى للتقديم وهي مرحلة انشاء البروفايل مطلوب فقط الreference number الخاص بالتقرير وده انت بتحصل عليه بمجرد التسجيل وممكن تدخله بمجرد ما يجيلك رسالة من WES تقول لك انهم خلصوا التقييم.. وفي المرحلة التانية اللي هي بعد الحصول على ITA بيتطلب عمل Scan للتقرير ورفعه على السيستم
لهذا أرى انه يمكن توفير هذا المبلغ خاصة وان التقييم أصبح مطلوب للزوجة أيضا للحصول على درجات التعليم.. واختيار البريد العادي وتوفير المبلغ الخاص بخدمة الشحن.. نختار البريد العادي والتقرير يوصل براحته ما احنا خلاص دخلنا الرقم ومش مستعجلين..طبعا هيفضل احتمال ضياع الجواب في البريد وبالتالي مش هنعرف نعمل scan ونبعته وفي الحالة دي هنضطر نطلب نسخة تانية بالشحن وندفع المصاريف برضه.. بس المشكلة دي ممكن نتغلب عليها لو لينا قريب او صديق في كندا أو أمريكا.. فنكتب عنوانه ونختار البريد العادي.. هيوصل له التقرير يعمل له scan ويبعتهولنا soft copy.. الhard copy بقى يبعتها بالبريد أو مع حد نازل.. أو حتى ما يبعتوش خالص مش مشكلة مش هيبقى ليه ﻻزمة أصلا..
طبعا اللي عاوز يشترى دماغه من اﻷول يدفع فلوس الشحن من سكات ويفكه من الرغي اللي فات ده كله
مواصفات شهادة الخبرة المطلوبة في الهجرة لكندا:
=========================
الشهادة علشان تبقى مظبوطة - طبقا للمواصفات اللي محدداها وزارة الهجرة , لازم:
-
تبقى مكتوبة على ورق الشركة
-
يبقى ممضية من الشخص المسؤول (في الغالب مديرك المباشر أو مدير الإدارة أو مدير الموارد البشرية)
-
موضح فيها العناوين والتليفونات والايميل والموقع الالكتروني (إن وجد)
-
مختومة بختم الشركة (إن وجد)
-
يبقى فيها تاريخ بدء وانتهاء العمل (طبعا الوظيفة الحالية تتكتب till now ولازم يبقى فيه تاريخ للجواب)
-
يبقى مذكور فيها الposition ويكون مطابق أو مشابه لأحد الtitles الموجودة في الNOC
-
يبقى فيها المهام الوظيفية وده أهم جزء في الشهادة (ولازم تكون matching مع وظيفتك طبقا للNOC)
-
يبقى فيها المرتب
-
يبقى فيها ساعات العمل الأسبوعية
-
طبعا لازم تبقى مكتوبة بالانجليزي (أو الفرنساوي) ولو بالعربي يبقى لازم تترجم
طيب لو فشلت انك تجيب شهادة بالمواصفات المطلوبة .. يبقى ايه الحل؟ قدامك حل من اتنين:
-
لو الشركة طلعت لك شهادة خبرة بس مافيهاش كل التفاصيل المطلوبة (مثلا مافيهاش المهام الوظيفية أو مكتوبة بشكل اجمالي غير مفصل أو مافيهاش عدد الساعات أو المرتب.. إلخ) ممكن تعمل جواب مكمل وتكتب فيه كل البيانات الناقصة وتخلي مديرك المباشر يمضي لك عليه
-
ممكن ترفق صورة من العقد أو شيكات القبض أو الوصف الوظيفي لوظيفتك
طيب لو فشلت انك تجيب أي حاجة من الحاجات دي :
-
تكتب جواب ترفقه مع شهادة الخبرة اللي هتقدر تجيبها من شغلك وتكتب فيه سبب انك ماقدرتش تجيب بيان بالمعلومة دي وساعتها الموضوع خاضع لتقييم الأوفيسر اللي هيبقى مسئول عن ملفك يا يقبلها يا يرفضها
طيب واحد بيسأل ايه الNOC اللي بتقول عليه ده.. ده اختصار National Occupational Classification وده عبارة عن تصنيف عاملاه الحكومة الكندية فيه قائمة بكل الوظايف (القانونية) اللي ممكن أي حد يشتغلها في كندا والخبرات والمؤهلات المطلوبة لشغل كل وظيفة وكذلك المهام الوظيفية اللي في الغالب بتعملها كل وظيفة وبيحدثوه كل 5 سنين.. وكل وظيفة ليها كود من 4 أرقام يعني مثلا مهندس ميكانيكا النوك بتاعها 2132، مبرمج كمبيوتر النوك بتاعها 2174، طبيب أسنان 3113 وهكذا ..
لما بتقدم في الهجرة أول حاجة بتحدد كود الNOC بتاع الوظيفة أو الوظايف اللي اشتغلتها وبتختار لنفسك Primary NOC يعني الوظيفة اللي تحب انها تكون الوظيفة الرئيسية في البروفايل بتاعك ودي بتكون غالبا الوظيفة اللي عندك فيها أكبر عدد من سنوات الخبرة مش شرط تكون آخر وظيفة..
ممكن تكون اشتغلت كذا وظيفة تحت نفس النوك أو تحت نوكات مختلفة.. وممكن نفس الوظيفة تندرج تحت أكتر من نوك .. اختيارك للنوك ممكن مايفرقش في حاجة لو انت مجموع النقط بتاعتك عالي جدا (يعني الانجليزي بتاعك ممتاز وسنوات الخبرة كويسة والسن مش كبير أوي ويا سلام لو معاك ماستر والمدام (أو الزوج في حالة ان الزوجة هي المتقدم الرئيسي) كمان معاها/ معاه أيلتس بسكور كويس أو معاك كمان فرنساوي جنب الانجليزي.. كده انت برنس في نفسك وممكن يجيلك دعوة من غير ترشيح مقاطعة .. بس لأن الحالات دي نادرة ففي الغالب هتحتاج تدور على ترشيح مقاطعة عشان تزود نقاطك ويجيلك الدعوة.. في الحالة دي يبقى يستسحن تبص على الوظايف اللي المقاطعات غالبا بتطلبها وتختار نوك منهم تخليه هو النوك بتاعك وتظبط شهادات الخبرة عليه
طيب أخيرا.. تعرف النوك بتاع كل وظيفة إزاي.. من اللينك ده
بالنسبة للجزئية بتاعة المهام الوظيفية.. زي ما قلت فوق.. المفروض ان المهام الوظيفية المذكورة في الشهادة تبقى متماشية مع المهام اللي في النوك.. متماشية مش يعني متطابقة يعني مش تعمل لها Copy & Paste لأ يعني تبقى متقاربة.. يعني لو قولنا مثلا ان النوك فيه 10 مهام وانت هتكتب في الجواب 10 مهام برضه.. ممكن يبقى فيه اتنين أو تلاتة من اللي في النوك مش عندك، وممكن يبقى عندك اتنين أو تلاتة مش في النوك، والسبعة أو التمانية الباقيين تكتبهم بصياغة مختلفة عن اللي في النوك بحيث انه ما يبانش انك ناقلهم..
وممكن تفصص واحدة من المهام في نقطتين أو تلاتة أو تختصر اتنين في نقطة واحدة وهكذا.. وافتكر ان الصياعة أدب مش هز كتاف والفبركة فن مش عن عن
النهارده ان شاء الله هاوضح الفرق بين حاجتين بيحصل بينهم خلط عند كتير من الناس اللي مهتمة بالهجرة لكندا .. وهما: تقييم الشهادة المطلوب للهجرة ومعادلة الشهادة (الترخيص) المطلوب للشغل في كندا (في بعض المهن)
الأول تقييم الشهادة ده إجراء مطلوب في عملية التقديم للهجرة من غير الحاصلين على مؤهلات دراسية من داخل كندا (يعني لو دارس في كندا مش محتاج تعمل الخطوة دي).. تقريبا كل برامج الهجرة الفيدرالية والمقاطعات بتطلبه (كيبيك استثناءا ما بتطلبوش ودي أحد المزايا في هجرة كيبيك).. طيب التقييم ده عبارة عن إيه؟ عبارة عن انك بتبعت نسخ من المؤهلات الدراسية الخاصة بيك لأحد الجهات في كندا .. الجهات دي مسئولة عن انها تراجع الشهادات وتديلك تقرير بيقول ان التعليم اللي انت حاصل عليه في بلدك يساوي إيه في التعليم الكندي.. وبناءا على التقرير دا بتاخد النقاط الخاصة بالتعليم حسب برنامج الهجرة اللي مقدم عليه. التقرير ده بيسمى Educational Credential Assessment وبيتم اختصاره ECA
طيب إيه هي الجهات اللي بتعمل التقييم ده؟ فيه 7 جهات بتقوم بالعملية دي أول 5 منهم بيعملوا التقييم لأي مؤهل دراسي ماعدا الطب والصيدلة.. والسادسة بتعمل تقييم (فقط) للأطباء والسابعة (فقط) للصيادلة .. والجهات دي اساميها ولينكات المواقع الخاصة بيها كالآتي:
Comparative Education Service – University of Toronto School of Continuing Studies
http://www.learn.utoronto.ca/ces
International Credential Assessment Service of Canada
http://www.icascanada.ca/fsw
World Education Services
http://www.wes.org/fswp
International Qualifications Assessment Service
http://www.alberta.ca/iqas-immigration.aspx
International Credential Evaluation Service
http://www.bcit.ca/ices/eca/
Medical Council of Canada (professional body for Doctors)
http://mcc.ca/repository/educational-credential-assessment/
Pharmacy Examining Board of Canada (professional body for Pharmacists)
http://www.pebc.ca/index.php/ci_id/3374/la_id/1.htm
هتسألني -لو انت مش طبيب أو صيدلي- طيب الفرق بين الخمسة الأولانيين؟ هاقول لك ولا حاجة.. الفرق الوحيد في زمن المعالجة وسرعة الانتهاء من التقرير.. في الوقت اللي قدمت فيه ماكنش فيه رقم 4 و 5 فما اعرفش نظامهم ايه الحقيقة لكن من بين التلاتة الأولانيين كل تجارب الزملاء اللي سبقونا في مشوار الهجرة بتقول ان الجهة رقم 3 اللي اسمها WES اختصارا لـ World Education Services هي أسرع واحدة فيهم ودي اللي أنا شخصيا عملت معاهم التقييم ..
ومع ذلك ممكن تاخد جولة في مواقع الخمس جهات دول واحدة واحدة وتشوف مصاريف كل واحدة أد إيه والوقت اللي بياخدوه عشان يخلصوا التقييم واختار الأنسب ليك.. طبعا لو انت طبيب أو صيدلي فما عندكش اختيارات أساسا
ده لينك لبوست سابق كنت كتبته عن تقييم الشهادات من خلال WES:
https://www.facebook.com/MostafaSaad1982/posts/10153509742362304
وبالنسبة للأخوة الأطباء دا لينك لموضوع على منتدى المطاريد كتبه صديق عزيز أعرفه شخصيا بيوضح خطوات التقييم:
https://www.almatareed.org/vb/showthread.php?t=659126#.Wm204LyWbIV
وده موضوع خاص بالأخوة الصيادلة:
https://www.almatareed.org/vb/showthread.php?t=53974#.Wm204LyWbIV
==============================
طيب دا التقييم ... وزي ما وضحنا ان دا اجراء ضروري في عملية التقديم للهجرة كل الغرض منه انك تحصل على نقاط التعليم في برنامج الهجرة اللي انت مقدم فيه..
أمال إيه موضوع المعادلة دا بقى؟
مبدئيا لازم نوضح جزئية بسيطة.. وهي ان الحكومة الكندية عاملة تصنيف لكل مهنة وأي مهنة ممكن أي حد يشتغلها في كندا (بخلاف طبعا المهن غير المشروعة.. يعني مش هتلاقي مثلا وظيفة حرامي أو تاجر مخدرات :)) التصنيف دا اسمه National Occupational Classification وبيختصر NOC .. وده زي ما قلنا عبارة عن دليل فيه كل المهن الممكنة .. كل مهنة ليها رقم أو كود بيسموه NOC Code ولكل NOC Code بيبقى مشروح: الوصف الوظيفي والمهام الوظيفية الخاصة بالوظيفة دي وكمان الألقاب والاسماء المختلفة للوظيفة دي والمؤهلات اللازمة لشغل النوعية دي من الوظائف.. اللينك ده بتاع موقع الNOC:
http://noc.esdc.gc.ca/English/home.aspx
المهن دي بقى فيه منها مهن بتمسى Regulated ومهن Non-regulated .. الأولانية دي المهن اللي لابد من الحصول على ترخيص من جهة معينة (زي النقابات المهنية كده) عشان أي حد يقدر يشتغل المهن دي في كندا .. ودي اللي بتسمى في عرف المهاجرين باسم معادلة الشهادة بس الاسم الصحيح ليها هو ترخيص مزاولة المهنة.. والغرض من موضوع الترخيص دا هو ان المهن دي ليها ارتباط مباشر بالجمهور فبالتالي لازم يبقى فيه جهة تحط معايير وشروط في الشخص اللي بيزاول المهنة وتتأكد من توافر الشروط دي فيه قبل ما تديله الترخيص وده حفاظا على صحة وسلامة الجماهير.. المهن دي زي الأطباء (لو مش دارس طب أو مش مؤهل كفاية ممكن يموت مريض) أو المهندسين (المهندس بيعمل تصميمات هندسية ولو التصميم غلط ممكن يتسبب في كوارث.. عمارة تقع.. كوبري يتهد.. غلاية في مصنع تنفجر.. إلخ ودي ممكن تموت عشرات أو مئات الناس)..
وممكن كمان تبقى الوظيفة ليها تأثير وتبعات قانونية أو اقتصادية ضخمة (زي المحاسبين والمحامين) فما ينفعش تتساب من غير ضوابط حاكمة وصارمة.. أما النوع التاني فدي مهن مش محتاجة ترخيص من جهة معينة (يعني مش محتاجة معادلة) ومتسابة لعوامل العرض والطلب في سوق العمل (زي مبرمجي الكمبيوتر، مصممي الجرافيكس، الرياضيين، الفنانين بصفة عامة.. إلخ)
كل مهنة من المهن الـRegulated ليها جهة مسئولة عن منح التراخيص الخاصة بيها .. في بعض المهن بتبقى جهة واحدة على مستوى كندا (زي الطب والصيدلة) وفي بعض المهن بتبقى ليها جهة خاصة بها في كل مقاطعة على حدة (زي الهندسة) وفيه بعض المهن ممكن تكون Regulated في بعض المقاطعات وNon-regulated في مقاطعات أخرى.
طيب إزاي أعرف إذا كانت مهنتي regulated ولا non regulated وايه الجهة المسئولة عن المعادلة؟
أول حاجة هتدخل على موقع NOC (اللينك فوق) تشوف الNOC Code الخاص بالمهنة بتاعتك
ثانيا تدخل على الموقع ده (ده اسمه بنك الوظائف فيه كمية كبيرة من الوظائف المتاحة في كندا وفيه معلومات عن كل وظيفة):
http://www.jobbank.gc.ca/occupation_search-eng.do
هتدخل في الخانة الأولى رقم النوك وفي الخانة التانية اسم المدينة اللي بتدور فيها (ممكن تكتب Toronto مثلا علشان ماينفعش تسيبها فاضية) وبعدين تدوس Search
هيطلع لك الوظائف الخالية الموجودة ومعلومات كتير عن الوظيفة.. زي متوسط الأجور ومعلومات عامة عن الوظيفة .. لو ضغطت على آخر tab من ناحية اليمين (Education & Job Requirements) وبعدين ضغطت على tab اللي اسمها Canada هيجيب لك اذا كانت الوظيفة دي regulated ولا لأ في كل مقاطعة من مقاطعات كندا بالاضافة لحاجات تانية زي المهارات الخاصة بالوظيفة والمتطلبات الوظيفية اللي عادة بتتطلب لشغل الوظيفة والبرامج الدراسية اللي ممكن تؤهلك للحصول على الوظيفة دي وهكذا... لو المهنة regulated وعاوز تعرف الجهة المنوط بيها منح الترخيص الخاص بيها هتضغط على الtab اللي جنبه (اللي فيه اسم المقاطعة Ontario مثلا) هتلاقي مكتوب اسم الجهة دي محطوط اللينك بتاعها.
طيب ايه خطوات المعادلة واجراءاتها؟ طبعا دي بتختلف من مهنة لأخرى وأحيانا زي ما وضحنا من مقاطعة لأخرى وبالتالي مستحيل اتكلم عنها كلها أولا لأني ما اعرفش (ممكن أتكلم عن معادلة المهندسين في بوست لاحق إذا شاء المولى) وثانيا لأن كل مهنة معادلتها فيها تفاصيل كتير جدا لا يتسع المقام لذكرها هنا.. بس اللي ممكن أعمله اني أحط بعض الروابط المفيدة للي عاوز ياخد فكرة عن معادلة بعض المهن ويدوس في الموضوع وهتبقى كالعادة لينكات لمواضيع من منتدى المطاريد (كنز المهاجرين):
ديه لينكات معادلة بعض المهن
===============================ه
ملحوظة هامة:
-------------
نظريا: كندا لما بتديلك تأشيرة هجرة سواء كنت مقدم فيدرال أو مقاطعات أو كيبيك.. وأنا هنا باتكلم عن برامج العمال المهرة أو الحرفيين المهرة مش هجرة رجال الأعمال مثلا .. المفروض -نظريا- انك تشتغل في الوظيفة اللي انت كاتبها في ملفك واللي المفروض انك اتقبلت على أساسها .. ومع ذلك ليس هناك -عمليا- ما يمنع انك تشتغل في وظيفة تانية أو حتى تفتح بيزنس خاص.. الحكومة الكندية مش هتمشي ورا كل واحد دخل البلد وتشوف هو كان وظيفته إيه في ملف الهجرة واشتغل إيه؟ فيه ناس كتير بتدرس وبتغير الكارير بتاعها -ودي واحدة من أهم مميزات كندا انك سهل تعمل ده- وناس كتير بتشتغل في وظايف غير اللي مهاجرين عليها وفيه اللي بيفتح بيزنس خاص بيه..
أحد أسباب ده خاصة لأصحاب الوظايف الRegulated ان عملية المعادلة (الترخيص) بتكون في بعض الأحيان مرهقة جدا ومكلفة جدا جدا وبتاخد وقت كبير وأحيانا بتكون شبه مستحيلة (زي الأطباء البشريين كده ربنا يعينهم) وللأسف الحكومة الكندية مش بتعمل مجهود كافي لتسهيل العملية دي من وجهة نظر كتير من المهاجرين ومن وجهة نظري الشخصية.
طيب أنا باقول الكلام ده ليه؟ عشان لو وظيفتك regulated وشايف ان معادلتها صعبة وهتاخد منك وقت ومجهود كبير.. مش لازم تربط نفسك بالمسمى الوظيفي ده اللي محتاج معادلة.. ممكن يبقى فيه وظيفة تانية قريبة منها وتكون انت بتعمل جزء كبير من المهام الوظيفية بتاعتها في عملك الحالي وتكون مش محتاجة معادلة.. ولو انت أصلا مش حابب مجال شغلك الحالي وعاوز تغيره ممكن تعمل ده .. فيه برامج قروض دراسية بتسهل لك الموضوع ده وممكن تعيش منها بشكل جزئي أو كامل.. وغالبا الجامعات والكليات بتعمل برامج تدريب للطلبة والخريجين بتتيح لهم بنسبة كبيرة انهم يلاقوا شغل بعد التخرج.
بوست مهم عن هجرة المقاطعات:
ناس كتير بتسألني: هو لازم المهاجر من خلال مقاطعة يعيش في المقاطعة دي ولا ممكن ينقل مقاطعة تانية؟ وهل فيه مدة معينة لازم يقضيها في المقاطعة دي ولا ممكن ينقل من أول يوم أو مايروحش عليها أصلا؟ السؤال ده بقى ملح جدا في الفترة الأخيرة بعد ما بقى ترشيح المقاطعة شبه ضروري للحصول على دعوة من خلال الأكسبريس انتري
عشان أجاوب على السؤال ده خلوني أشرح ببساطة طريقة عمل نظام المقاطعات واللي ما يفرقش كتير بالمناسبة عن نظام هجرة كيبيك..
مبدئيا المقاطعات مالهاش الحق انها تديلك تأشيرة دخول أو هجرة ولا تديلك اقامة دائمة ولا تعمل لك جواز سفر.. اللي بيعمل كل الحاجات دي هي الحكومة الفيدرالية الكندية.. يعني انت حتى لو مهاجر مقاطعات أو كيبيك فاللي بيديلك التأشيرة اللي بتدخل بيها هي كندا مش المقاطعة واللي بيديلك الاقامة الدائمة هي كندا وبتبقى إقامة دائمة في كندا مش في المقاطعة واللي بيديلك الجنسية -بعد عدد السنوات المطلوب واستيفاء باقي الشروط- هي كندا وبتبقى جنسية كندا مش جنسية المقاطعة.. أمال المقاطعات بتعمل ايه؟
الحكومة الفيدرالية بتدي المقاطعات حق انهم يعملوا برامج هجرة خاصة بيها بحيث ان كل مقاطعة تحدد مواصفات الناس اللي عاوزاهم يهاجروا ليها.. ده طبعا بخلاف برامج الهجرة اللي بتديرها الحكومة الفيدرالية من الألف إلى الياء.. فتيجي مقاطعة مثلا تحدد لستة وظايف تقول أنا عاوزة ناس تشغل الوظايف دي (علشان تسد عجز موجود عندها) ..
مقاطعة تانية تقول أنا هاشترط اللي ييجي لازم يكون له قريب أو معرفة (عشان يقدر يساعده ويدعمه ويزيد من فرص نجاحه في الهجرة ويقلل اعتماده على المساعدات الحكومية) .. مقاطعة تالتة تقول أنا مش هاخد حد غير اللي عنده عرض عمل أو سبق ليه الدراسة أو العمل في المقاطعة (عشان يضمن ان المهاجر ده ييجي يشتغل ويفيد اقتصاد المقاطعة من أول يوم مش يقعد بالشهور بيدور على شغل) .. مقاطعة رابعة تدي نقط كتير للي عنده أطفال (عشان عندهم مشكلة في زيادة معدل الأعمار فعاوزين يعادلوا النسبة).. وهكذا .. وساعات حتى المقاطعات بتدي الحق لبعض المدن انها تعمل برامج هجرة خاصة بيها (تطبيق عملي لمبدأ اللامركزية .. لأن كل مكان أدرى باحتياجاته)
المقاطعات بتعمل البرامج دي حسب احتياجاتها وترتيب أولويتها وبتستقبل طلبات الراغبين في الهجرة وتدرسها وتختار اللي بتتوفر فيهم الشروط وتعمل لهم ترشيح "Provincial Nomination" .. الترشيح ده كان بيتم زمان بشكل ورقي.. يعني تبعت للمهاجر شهادة الترشيح ..المهاجر ياخد الشهادة يروح يفتح ملف جديد عند الحكومة الفيدرالية..
دلوقتي فيه بعض برامج المقاطعات متوافقة مع نظام الاكسبريس انتري بيبعتوا الترشيح ده على النظام الخاص بالاكسبريس انتري على طول وبالتالي بيديك ال600 نقطة بتوع الترشيح وبالتالي بيجيلك Invitation انك تقدم وتستكمل الإجراءات مع إدارة الهجرة بتاعة الحكومة الفيدرالية وبعضها ما زال على قديمه (ورقي) ..
يعني في الحالتين الموضوع في الآخر بيصب عند الحكومة الفيدرالية اللي بتقوم بدورها بدراسة أوراقك مرة تانية وبتطلب منك حاجتين ما بيتطلبوش غالبا في معظم برامج المقاطعات وهما: الكشف الطبي والكشف الجنائي (الفيش والتشبيه) وبعد استيفاء كل الاجراءات دي بتقوم مديالك التأشيرة.. اللي بتقدر تدخل بيها كندا كمهاجر وبمجرد ما بتدخل البلد من أي منفذ بري أو جوي بتعمل اجراءات اللاندينج اللي بيها بتبقى مقيم دائم Permanent Resident رسمي.. ودي برضه اجراءات فيدرالية تقدر تعملها في أي مطار بغض النظر عن برنامج الهجرة اللي انت جي عليه..
طيب كيبيك؟ نفس النظام تقريبا .. اجرائيا كل حاجة بالظبط زي المقاطعات .. الفروق هي فروق شكلية.. الفرق الأول.. ان الحكومة الكندية مدية الحق لكيبيك انها تحدد احتياجاتها من المهاجرين (كما وكيفا) بعكس المقاطعات اللي بيتم تحديد الأعداد بالتنسيق مع الحكومة الفيدرالية .. الفرق التاني ان المقاطعات بتعمل ترشيح Nomination إنما كيبيك بتعمل اختيار Selection..
يعني نظريا الحكومة الفيدرالية مش من حقها ترفض مهاجر اختارته كيبك (إلا لو فيه مشكلة طبية أو مشكلة أمنية) إنما من حقها ترفض واحد مرشحاه مقاطعة أو ما تاخدش بالترشيح ده ..وباقول نظريا لأن عمليا ده ما بيحصلش.. بالمنطق كده ايه اللي هيخليهم يرفضوا؟ يعني عمليا ترشيح المقاطعة زيه زي شهادة الاختيار بتاعة كيبيك المسماة CSQ
نرجع مرجوعنا للسؤال الأساسي .. اللي واخد ترشيح مقاطعة ممكن يروح مقاطعة تانية؟
الموضوع ده أنا اهتميت بيه وقريت وبحثت فيه من أيام ما كنت مقدم على كيبيك لأني ماكنتش واثق اني هاكمل واعيش في كيبيك لو كنت هاجرت من خلال كيبيك.. وزي ما قلت اللي ينطبق على كيبيك يبنطبق على باقي المقاطعات
الموضوع فيه بعض التعقيد مش هينفع نقول أيوه ينفع أو لأ ما ينفعش كده ببساطة..
من ناحية.. لو انت مهاجر من خلال مقاطعة بيتطلب منك من ضمن الأوراق اللي بتقدمها في ملف الفيدرال اقرار انك "بتنوي" تعيش في المقاطعة اللي ادتك الترشيح.. الفورمة دي اسمها:
Schedule 4: Economic Classes: Provincial Nominees
وفي حالة كيبيك اسمها:
Schedule 5: Economic Classes—Declaration of Intent to Reside in Quebec
وفي الفورمتين الصياغة واحدة وهي:
I declare that my family members and I intend to live in the Province that nominated me. (in the province of Quebec)
ومن ناحية تانية.. الدستور والقوانين الفيدرالية بتسمح لك وبتديلك الحق انك تتنقل بحرية تامة بين المقطاعات وتختار المكان اللي انت عاوز تعيش فيه (في النهاية هي بلد واحدة ومش محتاج أي تصريح عشان تدخل من مقاطعة للتانية ولا فيه بوابات بينها)
\طيب ده معناه إيه؟
معناه ان الاقرار ده بتعبر فيه عن "نية" وليس إلتزام بالإقامة في مكان معين. طيب يعني ايه النية؟ يعني نية.. يعني عزم على شئ معين.. انت لما تنوي تعمل ريجيم لازم تعمله؟ لما تنوى تبطل إدمان الفيسبوك بتبطل؟ ساعات آه وساعات لأ.. لما ما بتنفذش الشئ اللي انت نويت عليه ممكن تكون غير جاد في نيتك من الأساس وممكن تكون فعلا عندك النية الصادقة انك هتعمل شئ معين وتكون بدأت في خطوات معينة عشان تنفذ الشئ اللي انت نويت عليه ده بس بعد كده الظروف اتغيرت فما قدرتش تنفذه..
الخلاصة من الكلام ده كله .. ودي قناعتي الشخصية اللي أنا شخصيا طبقتها واللي بانصح بيها أي حد بيسألني: لو انت مهاجر من خلال مقاطعة يبقى من الأحسن انك تروح على المقاطعة اللي انت آخد منها الترشيح فعلا.. وحاول تعيش فيها وتدور على شغل فيها.. حتى لو ناوي تنقل بعد كده بس على الأقل حاول تقعد لك سنة هناك أو حتى كام شهر.. لو ربنا وفقك واشتغلت واستقريت جايز الحياة تعجبك وتكمل..
طيب لو ما عجبتكش أو لو مالقيتش شغل أصلا.. ساعتها ممكن ببساطة تقول انك فعلا كنت ناوي تعيش هناك والدليل على كده انك رحت هناك وأجرت سكن والتحقت ببرامج مساعدة المهاجرين (في كل مقاطعة فيه مؤسسات بتساعد المهاجرين من خلال دورات لغة ومهارات البحث عن عمل وأحيانا برامج تدريب في شركات.. إلخ) ومشيت في خطوات المعادلة (لو وظيفتك محتاجة معادلة) ودورت على شغل وقدمت في وكالات توظيف وبعت لشركات ومع ذلك مالقتش شغل مناسب (ممكن تكون اشتغلت شغل كاجوال بس مش متناسب مع تعليمك وخبرتك) .. وبالتالي فانت في الحالة دي عندك مبرر قوي انك تسيب المقاطعة.. بعكس لو واحد من أول يوم راح على مقاطعة تانية ده هيقول ايه؟
طيب هتقول لمين؟ هو فيه احتمال حد يسألك؟ أنا باقول الكلام ده تحسبا لأي مساءلة قانونية من أي نوع.. ما اعرفش حد بشكل شخصي حصل معاه مشكلة بسبب الموضوع ده وان كنت قريت من فترة ان مقاطعة ساسكاتشوان اتخذت اجراءات ضد مهاجرين كانوا مفروض جايين من خلال ترشيحها بس راحوا على مقاطعات تانية (لدرجة ان بعضهم اتسحب منهم الاقامة بس أنا مش متأكد من مدى صحة ودقة الكلام ده) .. مع العلم ان دي المقاطعة الوحيدة اللي سمعت انها بتعمل كده.. على الجانب الآخر سمعت عن ناس بتبقى مهاجرة مقاطعات أو كيبيك وحتى ما بتنزلش في المقاطعة بتاعتهم أصلا.. وماحدش كلمهم لحد ما أخدوا الجنسية.. عشان كده زي ما باقول خليك وسط.. اثبت حسن نيتك وخلي معاك مستندات تثبت ده وفي نفس الوقت ما تبقاش خواف وامشي ورا اللي فيه المصلحة..
وبالتوفيق للجميع ان شاء الله
أسئلة شائعة عن الهجرة لكندا
===============
بتجيلي أسئلة كتير عن الهجرة -طبعا بعد البوست الشهير اللي كتبته والبوستات التانية اللي كتبتها بعد كده- سواء في كومنتات أو رسائل خاصة كتير منها بيبقى متكرر ..
فبصراحة أنا صوابعي تعبتني من كتر كتابة نفس الأجوبة دشليون مرة وساعات لما بلاقي الأسئلة متكررة بازهق ومابردش والناس بتزعل مني وكده.. فقلت أجمع الأسئلة الشائعة اللي بتتسأل كتير في البوست ده واللي هيسألني بعد كده هاقوم لاطع له البوست ده .. وان شاء الله كل ما ألاقي سؤال وجيه هاضيفه وأضيف إجابته.. واللي عنده سؤال يتفضل يحطه في كومنت ولو لقيته سؤال شائع هارفعه في البوست وأجاوب عليه
ملحوظة قبل ما تبدأ: أنا مش محامي ولا مستشار هجرة أنا واحد هاجرت بعد أربع سنين معافرة ومرمطة في دهاليز وسكك الهجرة وده هو مصدر معلوماتي .. أنا عادة من النوع اللي مش باحب أفتي ومش باجاوب على سؤال غير لو متأكد من إجابته واللي ما اعرفوش باقول ما اعرفش.. أو بادور على إجابته قبل ما أجاوبه .. ومع ذلك وارد أكون فيه حاجة فاهمها غلط أو إجابتي مش متكاملة فاللي عنده تصحيح أو تكملة أو تعقيب على أي إجابة يتفضل يقول لي أهلا وسهلا
==================================
س- ماذا تعني الهجرة؟ ما الذي يحصل عليه المهاجر؟
ج- طبعا كلامي عن كندا تحديدا .. الهجرة معناها الحصول على الإقامة الدائمة والتي تعطي لحاملها معظم حقوق المواطن من الحق في العمل والحصول على العلاج المجاني والتعليم قبل الجامعي المجاني للأبناء و مختلف الخدمات التي تمنحها الدولة للمواطنين
==================================
س- متى يتم الحصول على الجنسية الكندية بعد الهجرة؟ وما هي مميزاتها؟
ج- حسب القانون الحالي لازم المهاجر يكون قعد 4 سنوات في آخر 6 سنوات جوا كندا للحصول على الجنسية.. بس حاليا فيه تعديلات مقترحة على القانون ده متوقع يتم إقرارها قريبا هتخلي الجنسية بعد البقاء 3 سنين في آخر 5 سنين
الجنسية بتمنح حاملها -إلى جانب مزايا الإقامة الدائمة- جواز السفر الكندي الذي يتيح لصاحبه دخول معظم دول العالم بدون تأشيرة وكذلك حق الترشيح والانتخاب في الانتخابات المحلية والفيدرالية.
==================================
س- ما هي برامج الهجرة المتاحة لكندا؟
ج- فيه برامج كتير جدا للهجرة لكندا منها ما هو فيدرالي (يعني تابع للحكومة المركزية مباشرة) ومنها ما هو تابع للمقاطعات (المقاطعات في كندا زي الولايات في أمريكا كده كل مقاطعة ليها حكومة ودستور وقوانين خاصة بيها وكمان ليها برامج هجرة خاصة بيها) .. ومنها ما هو مناسب للعمال المهرة ومنها ما هو مناسب لرجال الأعمال.. أشهر برامج الهجرة برنامج العمالة الماهرة الفيدرالي Federal Skilled Workers وبرنامج الحرفيين المهرة الفيدرالي Federal Skilled Trades وبرنامج العمالة الماهرة لمقاطعة كيبيك Quebec Skilled Workers وبرامج هجرة المقاطعات Provincial Nomination Programs
==================================
س- ما هو نظام الإكسبريس إنتري؟
ج- هو نظام جديد بدأت الحكومة الكندية في تطبيقه بداية من عام 2015 لتسهيل وتسريع عملية الهجرة وهو ليس برنامج هجرة جديد وإنما نظام لإدارة بعض برامج الهجرة مثل Federal Skilled Workers و Federal Skilled Trades و Canada Experience Class (برنامج خاص بمن سبق له العمل أو الدراسة بكندا) وكذلك بعض برامج هجرة المقاطعات Provincial Nomination Programs
وهو نظام إليكتروني يعتمد على تقديم طلبات الهجرة من خلال نظام إليكتروني ويتم إدخال البيانات ورفع المستندات عليه مباشرة بعكس النظام الورقي السابق والذي كان له العديد من العيوب
==================================
س- ما هي مقاطعة كيبيك؟ وما هي برامج الهجرة الخاصة بها؟
ج- مقاطعة كيبيك هي ثاني أكبر مقاطعات كندا من حيث السكان وأكبرها من حيث المساحة وهي مقاطعة لها طبيعة خاصة حيث أنها المقاطعة الوحيدة المتحدثة بالفرنسية في كندا (كانت مستعمرة فرنسية قبل أن تسيطر عليها بريطانيا وتصبح جزء من دولة كندا فيما بعد).. ونظرا لهذه الخصوصية الثقافية فإن الحكومة الكندية أدتها حق اختيار المهاجرين إليها بحيث ان الراغبين في الهجرة إلى كيبيك يقوموا بتقديم طلباتهم إلى إدارة الهجرة الخاصة بكيبيك وبعد دراسة ملفاتهم تقوم بمنحهم شهادة الإختيار أو ما يسمى CSQ (شهادة معناها أنه تم الموافقة على طلب الهجرة الخاص بهم من قبل كيبيك) .. يقوم المتقدم بعدها بتقديم ملف آخر للحكومة الفيدرالية بموجب شهادة الإختيار ولكن في هذه الحالة تكون مرحلة الملف الفيدرالي مجرد مرحلة إجرائية حيث لا يتم رفض أي طلب تمت الموافقة عليه مسبقا من قبل كيبيك إلا في حالة وجود مشكلة أمنية أو صحية مزمنة.
==================================
س- ما هي الأمراض التي يمكن أن يتم رفض طلب الهجرة بسببها؟
ج- اللي هم كاتبينه عن موضوع الأمراض اللي ممكن بسببها يرفضوا الهجرة انها بتكون حاجة من اتنين:
1- انه يكون مرض معدي بحيث يشكل خطر على صحة الناس في كندا
2- أو انه يكون بيشكل عبء على ميزانية الرعاية الصحية
مافيش لستة معينة بالأمراض دي وكل حالة بتتقيم على حدى
Each medical case is analyzed individually, taking into account your full medical history. If the disease or disorder poses health risks to Canadians or places excessive demands on the Canadian health care system, it may result in medical inadmissibility.
==================================
س- وما هي برامج هجرة المقاطعات؟ وما الفرق بينها وبين برامج هجرة كيبيك؟
ج- هي برامج شبيهة ببرامج هجرة كيبيك حيث تعطي الحكومة الفيدرالية لباقي المقاطعات الكندية الحق في ترشيح المهاجرين من خلال برامج تديرها إدارات الهجرة بالمقاطعات ولكنها تختلف عن برامج كيبيك في عدة نقاط:
-
النقطة الأولى وهي نقطة شكلية.. المقاطعات بتعمل ترشيح Nomination إنما كيبيك بتعمل اختيار Selection.. يعني نظريا الحكومة الفيدرالية مش من حقها ترفض مهاجر اختارته كيبك (إلا لو فيه مشكلة طبية أو مشكلة أمنية) إنما من حقها ترفض واحد مرشحاه مقاطعة أو ما تاخدش بالترشيح ده ..وباقول نظريا لأن عمليا ده ما بيحصلش.. بالمنطق كده ايه اللي هيخليهم يرفضوا؟ يعني عمليا ترشيح المقاطعة زيه زي شهادة الاختيار بتاعة كيبيك المسماة CSQ
-
برامج المقاطعات بعضها بيكون تحت مظلة النظام الفيدرالي "إكسبريس انتري" بحيث يتم الترشيح من قبل المقاطعة من خلال النظام الالكتروني مباشرة ثم استكمال باقي الاجراءات مع الحكومة الفيدرالية، وبعضها غير منضم لهذه المظلة بحيث يتم التقديم على برنامج المقاطعة أولا وبعد الحصول على الترشيح يتم تقديم ملف للحكومة الفيدرالية بشكل مشابه لبرامج كيبيك
-
برامج المقاطعات بتكون الأعداد فيها محدودة لا تتعدى عدة مئات لكل مقاطعة سنويا أما برامج كيبيك بتقبل أعداد أكبر بتوصل لعدة آلاف.
==================================
س- عاوز أهاجر ومش عارف أبدأ منين وأعمل إيه؟
ج- ابدأ من هنا: https://www.facebook.com/MostafaSaad1982/posts/10153459914932304
ومن هنا: https://www.facebook.com/MostafaSaad1982/posts/10154150631637304
==================================
س- هل فيه شرط للسن للتقديم للهجرة؟
ج- لأ مافيش.. فيه حد أدني 18 سنة ومافيش حد أقصى.. بس النقاط الممنوحة لبند السن بتبتدي تقل من أول 29 سنة.. وتقريبا كده اللي فوق 45 سنة ما بياخدش أي نقط على السن ولكن يظل له فرصة في الهجرة اذا استوفى باقي الشروط وقدر يحصل على النقط المطلوبة
==================================
س- ما المقصود بتقييم الشهادة؟
ج- ده إجراء مطلوب اجراء ضروري في عملية التقديم للهجرة كل الغرض منه انك تحصل على نقاط التعليم في برنامج الهجرة اللي انت مقدم فيه.. البوست دا بيشرح بالتفصيل إيه المقصود بيه والفرق بينه وبين المعادلة (ترخيص مزاولة المهنة) والجهات التي تقوم بالتقييم وكيفية إرسال الشهادات للتقييم
https://www.facebook.com/MostafaSaad1982/posts/10154207728952304
==================================
س- وما المقصود إذا بالمعادلة؟
ج- بعض المهن بتحتاج للحصول على ترخيص لمزاولة المهنة في كندا، ويطلق عليها مجازا "المعادلة".. في حين البعض الآخر لا يحتاج لمعادلة.. اللينك في السؤال السابق يعطي فكرة جيدة عن هذا الموضوع.
==================================
س- ما هي مواصفات شهادة الخبرة المطلوبة في الهجرة؟
ج- اللينك ده بيشرح المواصفات دي بالتفصيل
https://www.facebook.com/MostafaSaad1982/posts/10154806423317304
==================================
س- هل يجب إعتماد الشهادات الدراسية أو أي مستندات أخرى من الخارجية أو الغرفة التجارية أو أي جهة أخرى؟
ج- لا، لا يجب اعتماد أي مستندات متعلقة بالهجرة من الخارجية أو أي جهة أخرى
==================================
س- هل يجب تقديم شهادة من التأمينات الإجتماعية؟
ج- في برامج الهجرة الفيدرالية أو برامج المقاطعات لا يلزم تقديم شهادة من التأمينات، فقط في برنامج هجرة كيبيك يجب تقديم تلك الشهادة
==================================
س- هل يلزم ترجمة المستندات الصادرة باللغة العربية؟ وهل يوجد جهات معتمدة من الحكومة الكندية تقوم بتلك الترجمة؟
ج- نعم، يجب ترجمة أي شهادات أو مستندات غير صادرة باللغتين الإنجليزية أو الفرنسية، الترجمة تتم في أي مكتب ترجمة بشرط أن يتم ختمه بختم المكتب.. وثائق الزواج يمكن ترجمتها في وزارة العدل وشهادات الميلاد في وزارة الصحة (وفي الحالة دي بتكون بمثابة أصول مش مجرد نسخ مترجمة)
==================================
س- في الاكسبريس انتري هل يلزم تقييم شهادة الزوجة/الزوج (في حالة ان الزوجة هي المتقدم الرئيسي)؟ وكذلك الأمر بالنسبة لامتحان اللغة؟
ج- التقييم وامتحان اللغة شرط أساسي للمتقدم الرئيسي، ولا يلزم عملهما للزوج أو الزوجة.. ولكن في حالة عملهما سيضيف ذلك نقاط إضافية للملف
==================================
س- امتحنت أيلتس وعملت تقييم شهادة وفتحت بروفايل إكسبريس إنتري.. ولسه سكوري ضعيف.. وبعيد عن أقل سكور اتاخد في أي سحب.. أعمل إيه؟
ج- لابد من إيجاد وسيلة لرفع مجموع النقاط.. والوسائل المتاحة قد تكون: الحصول على مؤهل دراسي أعلى، إعادة امتحان اللغة للحصول على درجات أعلى، عمل تقييم الشهادة وامتحان لغة للزوجة، امتحان لغة ثانية للمتقدم الرئيسي (في حالة اختيار اللغة الانجليزية كلغة أساسية يتم في هذه الحالة امتحان اللغة الفرنسية كلغة ثانية.. والعكس)، الحصول على عرض عمل (صعب للغاية إن لم يكن مستحيلا) وأخيرا الحصول على ترشيح مقاطعة.
==================================
س- ليه عرض العمل شبه مستحيل لمن هو خارج كندا؟
ج- لأن عرض العمل المقبول والذي يعطي نقاط في الهجرة هو عرض العمل المدعوم بLMIA ودي اختصار Labour Market Impact Assessment ودي باختصار عبارة عن موافقة من وزارة العمل على عرض العمل .. وعلشان صاحب العمل يقدر يعملها لازم يثبت انه ماقدرش يلاقي حد يشغل الوظيفة المطلوبة من جوا البلد علشان كده مضطر يجيب حد من برا وعشان يثبت ده لازم يكون عمل إعلان وماجالوش حد أو جاله ناس لا تصلح للوظيفة ويقدر يثبت انهم فعلا ما ينفعوش .. عشان كده الموضوع ده مش بينفع غير في حالات محدودة (تخصصات نادرة مش موجودة في البلد.. مش بالضرورة يكون عالم ذرة يعني بس تخصص مش موجود زي: إمام مسجد أو كاهن من طائفة دينية معينة أو مثلا حلواني شرقي .. وهكذا
==================================
س- ما المقصود بترشيح المقاطعة؟
ج- البوست ده بيدي فكرة مبسطة عن برامج هجرة المقاطعات:
https://www.facebook.com/MostafaSaad1982/posts/10154025565302304
==================================
س- كيف يمكن التقديم في برامج هجرة المقاطعات؟
ج- يجب مراجعة شروط البرامج الخاصة بالمقاطعات ومتابعة مواقع هجرة المقاطعات بشكل مستمر وكذلك المواقع والمنتديات المختصة بالهجرة لمعرفة مواعيد فتح باب التقديم لهذه البرامج لأنه -حسب ما قلت سابقا- برامج المقاطعات بتكون الأعداد المحددة ليها محدودة للغاية وبيكون فيه إقبال شديد عليها لأن شروطها أحيانا بتكون أسهل من الفيدرال. البوست ده فيه شرح مبسط لكيفية البحث عن ترشيح مقاطعة وخاصة تلك التي لا تحتاج عرض عمل
https://www.facebook.com/remon.s.habib/posts/10154259634270966
==================================
س- هل يمكن التقديم في أكتر من مقاطعة؟
ج- نعم، ليس هناك ما يمنع من التقديم في أكثر من برنامج هجرة في نفس الوقت إلا إذا كان برنامج الهجرة الخاص بالمقاطعة يشترط بشكل صريح عدم التقديم في مقاطعات أخرى
==================================
س- إذا حصلت على ترشيح مقاطعة هل يمكن الانتقال إلى مقاطعة أخرى بعد ذلك؟
ج- الموضوع ده كبير ومحتاج تفصيل.. البوست دا انا شرحت فيه الموضوع بشكل جيد:
https://www.facebook.com/MostafaSaad1982/posts/10154025565302304
==================================
س- هل يمكن الدخول لكندا بتأشيرة سياحة ثم توفيق الأوضاع؟
ج- لا يوجد نظام لهذا ولا أنصح بذلك على الإطلاق. الحالة الوحيدة التي قد تجدي نفعا هي تقديم طلب لجوء إنساني إذا كان هناك أسباب قوية تستدعي قبول طلب اللجوء كوجود حرب أو نزاع مسلح في بلدك الأصلي أو تعرضك انت شخصيا لاضطهاد ديني أو سياسي ووجود خطر حقيقي يمنع رجوعك لبلدك الأصلي أو البلد التي جئت منها
==================================
س- هل يمكن الدخول لكندا للدراسة ثم التقديم على هجرة من هناك؟
ج- نظريا يمكن لكن عمليا هذه عملية مكلفة ومحفوفة بالمخاطر
بعبارة أخرى الدراسة هي سكة من السكك المؤدية للهجرة ولكنها غير مضمونة
مميزاتها:
الدراسة تمنح إقامة مؤقتة للدارس وأسرته طوال فترة الدراسة مع إمكانية العمل لساعات محدودة له أثناء الدراسة وإمكانية العمل للزوجة/الزوج وتمنحه إقامة وتصريح عمل بفترة مساوية لفترة الدراسة .. مع تمتع الأبناء بحق التعليم (قبل الجامعي) مجانا والعلاج للأسرة كلها
كما تمنحه بعض النقاط الإضافية في أي نظام هجرة خاصة إذا حصل على عمل بعد الدراسة وتعطيه إمكانية الحصول على عرض عمل يستطيع من خلاله القبول في معظم برامج الهجرة
عيوبها:
أولا مكلفة جدا لأن الدراسة بعد الثانوية غير مدعومة من الحكومة
ثانيا الحصول على الفيزا من مصر مش سهل
ثالثا بعد انتهاء الدراسة لا يوجد ضمان للحصول على إقامة دائمة.. الموضوع معتمد على إمكانية القبول في أحد برامج الهجرة بعد اتمام الدراسة
لذا يجب دراسة الموضوع بشكل مفصل ومتأني من كافة الجوانب خاصة من حيث إمكانية توفير مصاريف الدراسة والمعيشة وإمكانية القبول في أحد برامج الهجرة بعد الدراسة
==================================
س- هل يمكن تقديم طلب لجوء لكندا؟
ج- يمكن ذلك ولكن لا يتم الموافقة على طلب اللجوء إلا ذا كان هناك أسباب قوية تستدعي قبول طلب اللجوء كوجود حرب أو نزاع مسلح في بلدك الأصلي أو تعرضك انت شخصيا لاضطهاد ديني أو سياسي ووجود خطر حقيقي يمنع رجوعك لبلدك الأصلي أو البلد التي جئت منها
==================================
س- هل يمكنني الدراسة في كندا في حالة الحصول على لجوء؟
ج- لو اخدت لجوء لك كل حقوق المقيم الدائم وبالتأكيد يمكنك الدراسة. مع العلم ان الدراسة الجامعية غير مجانية ، و لكن يمكن للمواطن والمقيم الدائم الحصول على قرض دراسة
==================================
س- ما هي المساعدات التي يحصل عليها المهاجر من الحكومة الكندية؟
ج- المساعدات تختلف من مقاطعة لأخرى ولكن بعض أهم المساعدات هي:
-
المساعدات الخاصة بالأطفال ويحصل عليها كل من لديه أطفال تحت 18 سنة ودي بتختلف حسب المقاطعة والمدينة ودخل الأسرة وعمر الأطفال .. في الغالب بتكون مبلغ كويس في الأول لأنها بتحسب على دخلك في العام السابق وغالبا لو انت جي من مصر هيكون الدخل ده قليل خاصة لما تحوله لكندي.. كتير من الأسر بتعتمد على المبلغ ده كجزء رئيسي من دخلها الشهري.. بعد كده ومع استقرار الأسرة والحصول على عمل بيبتدي المبلغ يقل بسبب ارتفاع دخل الأسرة
-
GST/HST وده مبلغ تاني بييجي من الحكومة للناس اللي دخلها بسيط كنوع من التعويض عن الضرايب اللي بتدفعها على المبيعات والمبلغ ده بيتحدد برضه على حسب المقاطعة ودخل الأسرة وعدد الأفراد
-
دعم الطاقة.. ودي مساعدة في دفع فواتير الكهرباء برضه لمحدودي الدخل
-
دعم رعاية الأطفال.. في حالة وجود أطفال في سن قبل الدراسة مع عمل كلا من الأبوين واضطرارهم لتسجيل الأطفال في حضانات رعاية daycare يتم الحصول على دعم من الحكومة
-
القروض الدراسية .. كالعادة تختلف من مقاطعة لأخرى.. في حالة الرغبة في استكمال الدراسة أو دراسة مجال جديد يوجد برامج للقروض الدراسية مدعومة من حكومات المقاطعات تغطي مصاريف الدراسة وجزء من مصاريف المعيشة ويتم تسديدها بعد التخرج بشروط ميسرة وكذلك يتم إعفاء الدارس من جزء من هذه المصاريف في حالة النجاح بمعدلات مرتفعة
-
يوجد أيضا مراكز مدعومة من حكومات المقاطعات لمساعدة المهاجرين في جميع المقاطعات الكندية.. من أمثلة هذه المساعدات: دورات توعية عن طبيعة الحياة في كندا، دورات لغة مجانية، دورات في تنمية المهارات الشخصية وكيفية الحصول على عمل، المساعدة في الحصول على عمل أو تدريب متخصص في مجال العمل، ترجمة الأوراق والمستندات، المساعدة في إيجاد مسكن، المساعدة في إتمام الإجراءات الحكومية (مثل التقديم على مساعدات الأطفال واستخراج كروت التأمين الصحي ورخصة القيادة وخلافه).. إلخ
-
إعانة البطالة.. وهي إعانات تصرف لمن يفشل في الحصول على عمل ولها شروط معينة حيث لا يمكن التقديم عليها فور الوصول مباشرة بل ينبغي الانتظار لمدة 6 شهور على الأقل (من ضمن شروط الهجرة شرط توفير مبلغ مالي يكفي لتغطية مصاريف المعيشة لمدة 6 أشهر) وكذلك يجب أن يكون الرصيد البنكي أقل من حد معين ويتم قطع هذه المساعدات إذا ثبت أن المتقدم يتعمد عدم البقاء عاطلا أو رفضه للوظائف التي تعرض عليه أو فرص تطوير الذات التي تقدم له
==================================
س- ما هي أفضل مقاطعة للمعيشة والعمل وتربية الأطفال؟
ج- إجابة السؤال تعتمد على عوامل عديدة منها مجال العمل ووجود أقارب أو أصدقاء في مقاطعة معينة تعطيها الأفضلية .. هناك العديد من التصنيفات لأفضل المدن للمعيشة أو تربية الأطفال ولكنها مختلفة فيما بينها حسب العوامل التي يأخذها كل تصنيف في الاعتبار.. بصفة عامة كل مقاطعة فيها مدن أفضل من مدن، وفي كل مدينة يوجد أحياء أفضل من أخرى.. وبصفة عامة أيضا المدن الصغيرة والضواحي تكون أكثر هدوءا وأمنا وأكثر ملاءمة لتربية الأطفال ولكن فرص العمل تكون أفضل في المدن الكبرى وهذه معادلة صعبة يجب على كل شخص أن يجد أفضل صيغة لحلها
==================================
س- وما هي أفضل مقاطعة للدراسة؟
ج- بإجماع الكثيرين ممن عرفتهم وقرأت لهم تعتبر مقاطعة كيبيك أفضل مقاطعة للدراسة حيث يوجد بها العديد من الجامعات منها جامعات تدرس باللغة الإنجليزية كما أن أسعار الجامعات بها يعتبر الأرخص على مستوى كندا.. ومع ذلك فإن جميع المقاطعات بها جامعات جيدة جدا حيث يعتبر التعليم العالي في كندا من الأفضل على مستوى العالم
==================================
س- بعد وصول المهاجر لكندا هل الحكومة بتوفرله سكن ، عمل او اي شئ؟
ج-للأسف لأ، مافيش أي حاجة من الحاجات دي.. انت اللي بتتكفل بنفسك وبأسرتك وطبعا هتقابل صعوبات كتير في الأول.. الحكومة عاوزاك تنجح وبتساعدك تنجح بس بطرق غير مباشرة ومش من ضمنها أنها توفر لك سكن أو عمل
==================================
س- هي شهادة الخبرة بتبقى محتاج تسجلها في الشهر العقاري ؟
ج- ليه كده يا أخي بس؟ لا مش مطلوب تسجلها ولا توثقها في حتة
==================================