حساب بنكي في تركيا
فتح حساب بنكي في تركيا
اولا ليه اعمل حساب بنكي ؟ ؟
لأن اساسا غلط انك تمشي بفلوس في الشارع , نسبة الـ "تثبيت" موجودة , واحتمال انك تتسرق كبيرة سواء في الشارع او المواصلات , او حتي في السكن الشبابي , وبالتالي اتعود ان مايكونش في جيبك اكتر من 50 ليرة تركي وباقي الفلوس كلها في الحساب
والميزة ان كل الاماكن في تركيا متصممة علي انك تحاسب بالفيزا , حتي لما تطلب ديليفري بييجي الراجل ومعاه الالة الصغيرة بتاعت الحساب بالفيزا
وياما سمعنا عن مآسي من فلوس ضاعت او اتسرقت من ناس في اول ايام ليها في تركيا بسبب حاجات زي كدة
طيب نعمل ازاي الحساب , وبيكلف قد ايه ؟
الحساب البنكي بيتعمل في يوم واحد , ومابيكلفش ليرة واحدة , الفلوس الوحيدة اللي هتدفعها هي ترجمة جواز السفر وديه في حدود 20 ليرة
بعض الفروع بتشترط انك تعمل كريديت كارد , وده بيكلف حوالي 1200 ليرة , بس الفلوس ديه مضاعتش عليك , انت ممكن بعد شهر تروح البنك و تلغي الكريديت و تسحب الفلوس تاني , وبعض الفروع اصلا مش بتشترط ده
وبما ان معظم البنوك بتشترط وجود اقامة لعمل حساب بنكي , فهنتكلم علي بنك من البنوك القليلة اللي ممكن تعمل فيها حساب من غير اقامة , وهو كويت ترك
اول خطوة تعملها انك تطلع الرقم الضريبي , وده عن طريق انك تروح مبني اسمه
Vergi Dairesi
و عشان تروحه , اركب المترو الأول بتاع المطار وانزل محطة ( امنيات – فاتح ) هتلاقي المبني اول ما تطلع من المحطة
وهنا مكانه علي جوجل مابس
روح من 9 الصبح , ادخل الدور الأرضي , ادخل الممر علي اليمين , وقول للموظف
vergi numarası
هتاخد رقم , لما ييجي دورك , روح للموظف وقوله نفس الكلمة , واديله جواز سفرك , خمس دقايق ويديلك ورقة مطبوعة او مكتوبة بالايد وفيها رقم طويل , هو ده الرقم الضريبي , يفضل انك تاخد نسخة من الرقم ده في موبايلك او اي حاجة تاني عشان لو الورقة ضاعت
بعدها يا بوب اطلع علي اي مكتب لترجمة اول صفحة من جواز سفرك اللي فيها بياناتك الشخصية , لازم تكون الترجمة معتمدة , بس مش لازم النوتير , النوتير هتدفع فيه 50 ليرة علي الأقل وهو مش مطلوب فمتعملوش
المفروض ترجمة الورقة في حدود 20 ليرة , لو قالك اكتر من كدة فاصل معاه , وخد بالك ان ديه الفلوس الوحيدة الي بتدفعها في الليلة ديه كلها , وده مكان مكتب بترجم عنده بـ 15 ليرة , قدام محطة ترام يوسف باشا علي طول , يعني 3 دقايق مشي من مكان الرقم الضريبي
اتأكد ان الورقة المترجمة مختومة من عندهم , و خد بالك هما بيدولك نسختين من الترجمة
دلوقتي ممكن تروح اي فرع لكويت ترك , فيه عدد كبير من الفروع في اسطنبول هتلاقيها هنا
اقرب فرعين للفاتح اللي هنا او اللي هنا :
والفرع التاني انا بارجحه , لان فيه موظفين بيتكلمو عربي وانجليزي , مش عارف هل الفرع الأول فيه كدة ولا لأ
اول ما تدخل قول عايز اعمل حساب , لو انت في الفرع التاني , اطلع علي الدور التاني , روح لأخر مكتب علي الشمال , وقول عايز حساب جديد
New Account
هتطلب منك الرقم الضريبي و ترجمة جواز السفر ويكون معاك رقم موبايل , ولازم يكون الموبايل معاك ساعتها ومش متسجل في رقم حساب تاني في نفس البنك, يعني ماينفعش نفس الرقم لاكتر من حساب , وفي ربع ساعة هيكون الحساب اتعمل من غير مصاريف , وتاخد كارت الفيزا معاك
لو معاك فلوس ساعتها , سواء ليرة او دولار او يورو , ياريت تحطها في حسابك وانت واقف , انزل للموظف في الدور الارضي وايله الفلوس وكارت الفيزا , وهو هيحطهملك في حسابك
دلوقتي بقي ازاي اشتري بالكارت ؟
اتصل برقم خدمة العملاء بتاعتهم من اي موبايل او ارضي وهو
4440123
بعدها دوس رقم 8 للغة العربية
هيرد عليك موظف بيتكلم عربي , قوله عايز اعمل باسورد لحسابي , هيسألك كام سؤال زي تاريخ الميلاد , رقم جواز السفر , اسم الوالدة , بعدها هيحولك للسيستم اللي انت بتحدد الباسورد عن طريق ارقام الموبايل , اختار اربع ارقام مش متتالية ولا متشابهة , وطبعا احفظهم
يفضل تعمل ده كله وانت في البنك , عشان لما تخلص اطلع في ماكينة الاي تي ام بتاعت البنك ودخل الكارت وجرب
لما تدخل الكارت الاول هيطلب كلمة السر , دخلها , فهيجيبلك قايمة بالتركي , دوس رقم 9 هيجيبلك اختيار اللغة فممكن تختار عربي او انجليزي ( للأسف مش كل ماكينات الاي تي ام فيها اختيار اللغة )
, ولما تدخل علي القوائم ممكن تعرف حسابك , او تدفع فواتير او تسحب فلوس او حتي تعمل ايداع لفلوس
خد بالك برضه – او خدي بالك – ان مش كل ماكينات الاي تي ام فيها سحب بالدولار , فيه ماكينات مافيهاش الا الليرة بس , كمان مش كل الماكينات فيها امكانية ايداع الفلوس
كدة يا هندسة انت خلصت الحساب البنكي , ونفس الباسورد بتاعت الاي تي ام هي اللي ممكن تشتري بيها من اي سوبر ماركت , فانت اختار الحاجات اللي عايزها , الكاشير بيحسب الفلوس قد ايه , اديله الكارت , بيدخل الكارت في الالة الصغيرة ديه , وبعدها الكاشير بيكتب انت هتدفع منها كام , وخد بالك جدا في الخطوة ديه , عشان الرقم اللي هيكتبه الكاشير في الالة الصغيرة ديه هي اللي هتتسحب من الكارت , فلو الراجل كتب 500 ليرة بدل 50 ليرة هتتسحب 500 , وبعدها برضه عشان تتأكد الالة بتطلع وصل صغير نسخة ليك ونسخة للكاشير , امسك الوصل واتاكد ان اسمك فيه , وان المبلغ هو تمن الحاجة بس مش اي رقم تاني
بعد ما تعمل حساب , ياريت تنزل الابليكاشن بتاع بنك كويت ترك من جوجل ستور , تحميله و تفعيله سهل , و ممكن تعمل كلمة السر بتاعته برضه بالاتصال علي رقم البنك 4440123
ميزة الابليكاشن ان فيه حاجات مفيدة جدا , زي انك تدفع فواتير الغاز و الميا و الكهربا , انك تعمل شحن فلوس لتليفونك , انك تحول فلوس لاي حد , انك تحول من فلوسك من دولار لليرة او العكس و هكذا