دلوقتى هنتكلم عن التخليص الجمركى فى مصر ومتطلباته وشروطه

​

• أول حاجة المستندات المطلوبة من المصنع إللى هتستورد منه لتخليص الشحنة

  • ​الفاتورة التجارية

  • بيان العبوة

  • شهادة المنتج

  • بوليصة الشحن

  • الشهادات الخاصة زى شهادة صحة لو المنتج مواد غذائية مثلا أو مستحضرات تجميل

  • شهادات تبخير لو المنتج مواد خشبية مثلا

​

• ​المستندات المطلوبة من المستورد

  • ​نموذج أربعة تطلبه من البنك إللى حولت منه مبلغ الشحنة للمصنع ومذكور فيه قيمة المبلغ إللى إتحول ونوع التعاقد

  • سجل تجارى

  • سجل صناعى

  • بطاقة ضريبية

  • بطاقة إستيرادية

  • بطاقة المتعاملين مع الجمارك

  • تفويض عام للمخلص الجمركى

​

​

فى البداية انت تقدر تقوم بكل الإجراءات الجمركية دون الحاجة إلى رخصة خاصة للتخليص الجمركى لكن لو مش عندك الخبرة الكافية يبقى ماتغامرش لإن المستخلص هيكون أكتر منك خبرة وهيقدر يعالج أى مشكلة ممكن تظهر للشحنة وكمان هيكون أسرع منك فى إنهاء الإجراءات علشان تتفادى إحتساب الأرضية ودى ممكن ترفع تكلفة الشحن وتسببلك خسارة كبيرة

​

إزاى بقى بيتم عملية التخليص الجمركى  :

 

• وصول المركب إللى عليها الحاوية بتاعتك للمينا بعد كده بيتم تفريغ المركب من الحاويات وده ممكن يستغرق يومين تقريبا

• المخلص الجمركى بيسحب إذن التسليم من الوكيل الملاحى

• المخلص الجمركى بيقدم نموذج إقرار القيمة الجمركية بناء على الفواتير إللى بتسلمهالو

• هيئة الجمارك بترسل مندوب للكشف على السلعة وتتمنها

• لو السلعة بتاعتك محتاجة موافقة جهات العرض بيقوم مندوب الجمارك بأخذ عينة وإرسالها لجهة العرض

• بعد كده المستخلص الجمركى بيدفع الضريبة الجمركية ومصاريف العرض لو سلعتك راحت لجهة العرض

• المستخلص بيكون متعاقد مع شركة نقل داخلى بيحمل الشحنة و تدخل على أشعة الكشف وبعد كده تخرج من المينا

• لو مافيش مخالفات على الشحنة العملية دى هتستغرق أسبوع تقريبا

​

​

نصيحة :

• دور على مخلص جمركى ثقة وخبرة مش أى حد تتعامل معاه خليك مفتح أو صديق ليك ثقة يكون ليه تعامل مع مخلص جمركى بيثق فيه وتسأله عن الأوراق المطلوبة ونوع التعاقد المناسب مع المورد وتعرف منه كل التفاصيل عن عملية التخليص الجمركى

• إحسب تكاليف التخليص الجمركى كويس وإسأل المستخلص عن الضرايب المفروضة على السلعة وتكلفة الأتعاب ومصاريف العرض والكشف علشان ماتتفاجئش بتكاليف جديدة تسببلك خسارة .

• قبل التعاقد مع المورد لازم تتأكد من إنه هيسلمك كل الأوراق الكاملة للتخليص الجمركىوده مهم جدا جدا

  • الفاتورة

  • كشف العبوة

  • بوليصة الشحن

  • شهادة المنشأ

  • شهادة الجودة

  • شهادة صحية

• تابع شحنتك عن طريق وكيل الشحنة علشان تقدر تقوم بالتخليص الجمركى للشحنة فى بداية وصولها .

 

دى كانت الطريقة السهلة للتخليص الجمركى وياريت أصحاب الخبرة يشاركونا لو فى حاجة غلط او حاجة ناقصة