فرص العمل بتركيا
المعضلة الأهم اللي كله بيسأل عنها في تركيا , فرص العمل . . .
بداية لازم نعرف كام حاجة مهمة . .
اولا تركيا مش هي الخليج , اللي اهل البلد مش بيعملوا اي حاجة بايديهم وبالتالي في احتياج دائم للايدي العاملة
ولا هي اوروبا او كندا اللي مواردهم ضخمة , ففرص ايجاد العمل سهلة الي حد ما
تركيا بلد كبيرة مش صغيرة , عدد سكانها فوق ال 75 مليون , ونسبة لا بأس منهم حالتهم المادية مش كويسة
اقتصاد البلد صحيح قوي , لكنه لسة بينمو , ومش معني ان اقتصاد البلد كويس ان فيه فرص عمل للاجانب
اساسا ظاهرة العمالة الأجنبية في تركيا هي حديثة نسبيا , لغاية 30 سنة فاتو كان العكس اللي بيحصل , إن الأتراك بيشتغلوا في سوريا والعراق
===================================
طب اختصارا , هل فيه فرص عمل في تركيا ؟
الحقيقة ان فيه كذا عامل بيخلو فرص العمل قليلة نوعا . . .
اولا ان فيه نسبة بطالة لا بأس بها في الشعب التركي
ثانيا ان زي ما قلنا ,مرتبات المهن البسيطة للأتراك نفسهم مش كبيرة
كمان حاجز اللغة مش سهل , وهما معندهمش استعداد يشغلوا ناس مش هيعرفوا يتفاهمو معاهم
كمان الأحداث في سوريا والعراق خلت عدد كبير جدا من السوريين والعراقيين ييجو هنا , وده عمل إشباع كبير لسوق العمل في تركيا , والأسوء انه قلل المرتبات جدا وخلي المعاملة سيئة للعاملين , ولسان حال صاحب العمل , اللي مش عاجبه الباب يفوت جمل وهلاقي الف غيرك
===================================
طب ايه فرص العمل اللي ممكن تكون متاحة عشان لو جيت تركيا ؟
- اولا لو انت ليك شغل تعرف تعمله علي النت بعيدا عن تركيا نفسها , يعني انت مصمم , مترجم , مبرمج , مسوق الكتروني , فانت كل اللي محتاجه مكان فيه نت وخلاص
- ثانيا انك تشتغل في احد المحال في تركيا , مطعم بقي , محل ملابس , عطارة , اغذية , بقالة , بس ديه محتاجة لغة من غير نقاش
- الحاجة اللي بعدها انك تشتغل "نفر" يعني مجرد واحد بيشيل ويحط او في مصنع او ورشة , وديه مرتبها قليل شوية والتعب فيها كتير للأسف
- كمان لو انت معاك لغة كويسة ممكن تشتغل في الترجمة , ولو معاك انجليزي كويس مع التركي ففرص شغل في الترجمة بتكتر
- لو انت مدرس في احتمال – بقول احتمال مش اكيد – انك تشتغل في إحدي المدارس العربية في تركيا ,
- لو انت طبيب او صيدلي , ففيه احتمال – برضه مش أكيد – انك تشتغل في إحدي العيادات العربية في تركيا
ديه غالبا هي الفرص المتاحة للشغل في اسطنبول , غير كدة ممكن نتكلم عن تلات مهن تانية فرصهم افضل شوية , الاستثمار العقاري , عمل مشروع في تركيا , والتصدير والاستيراد
===================================
بالنسبة للاستثمار العقاري من الحاجات اللي شغالة بشكل كبير في تركيا , الحكومة هنا عاملة تسهيلات كبيرة في بيع الأراضي والشقق لغير الأتراك , واكبر زبون ليهم هما الخليجيين
فانت لو عندك خبرة كويسة في الاستثمار العقاري , ومعاك لغة تركي ممكن تعمل زي ما حد علي الجروب هنا بعت من شهور طويلة تجربته , وقال هو عمل ايه
اول ما جه تركيا مكانش عايز يشتغل في غير تخصصه اللي هو الاستثمار العقاري , بس هو مش عارف يبيع ازاي ولمين , فراح لمكاتب السماسرة في اسطنبول , وقالهم ايه رايكم تدوني بيانات الشقق اللي عندكم , وانا اجيبلكم زباين , وقالهم مش هاخد منكم مرتب ولا حاجة , كل زبون ييجي يشتري ليا نسبة كذا , اغلبهم وافق , وفعلا خد بيانات الشقق وصورها ,
عمل صفحة علي الفيسبوك باسم شركة كذا للاستثمار العقاري في تركيا , وعمل اعلان لصفحته علي الفيس نفسه , واختار ان يكون منطقة الاعلان هو الخليج العربي , وبالفعل بدء بعض الخلايجة يتواصلوا معاه , ولما جم اسطنبول كان هو اللي بيروح معاهم ويرتب كل حاجة , وشوية شوية ربنا فتحها معاه و القرش جري في جيبه
طبعا تجربته مش لازم تتكرر بالنص , بس بشكل عام الاستثمار العقاري هنا من الحاجات الكويسة , خاصة للي عنده خبرة فيه وعارف هيسوق ازاي وفين وهكذا
===================================
الحاجة اللي بعدها هو اقامة مشروع في تركيا
ومشروع اقصد بيه من اول حاجة صغيرة : محل بقالة , مطعم , سوبر ماركت , سكن شبابي , بيع ملابس , لغاية الحاجات الضخمة
اي مشروع هو مغامرة , ديه حقيقة لا بد من ذكرها , خاصة انك مش في بلدك وعندك معوقات اكتر من حاجز اللغة , عشان كدة متفكش في المشروع الا لو دارسه حقيقي مش بتمشي ورا مزاجك او كلام حد وخلاص
اول خطوة لاي مشروع انك تحدد معاك مبلغ كام , واعتقد لو معاك مبلغ اقل من 20 الف دولار يبقي انسي انك تعمل مشروع , تركيا كل حاجة فيها غالية , والاوراق الرسمية والضرايب والفواتير مش قليلة , فلو معاك رقم قليل يبقي ريح دماغك ومتغامرش بيه
تاني خطوة تيجي بنفسك وتشوف احتياج المنطقة اللي هتعمل فيها ايه , و انت خبرتك في انهي مجال
كمان لازم تعمل دراسة جدوي حقيقية مش تقريبية , والمصاريف الثابتة والمصاريف الشهرية , والأجور , والفواتير , والعائد المتوقع , ويا تري معاك مبلغ يكفيك تصبر قد ايه من غير عائد , وتاخد بالك من الموسم وان في الشتا السياحة بتقل وكتير من الشغلانات نشاطها بيقل وهكذا , ده غير ان اسعار كتير من المواد الغذائية بيزيد في الشتا
بعد ده كله لازم يكون ليك شريط تركي , يا اما شريك اسمي بس عشان الورق , وده معانه انه هياخد مبلغ معين , او الأسوء يكون شريط فعلي في اتخاذ القرارات وربنا يستر
ويا حبذا لو الاول متدخلش بفلوسك في مشروع لوحدك , لكن تروح لحد عامل مشروع و تكون انت واثق فيه بشكل كبير وفي صدقه وامانته , وتدخل بفلوسك وتكبر المشروع , وتستفيد بخبرته وفهمه للسوق
كمان ممكن اكتر من واحد يشتركوا مع بعض في مشروع معين , يعني لو فيه 5 افراد كل واحد معاه 20 الف دولار , يجتمعوا ويعملوا مع بعض مشروع ب 100 الف دولار وهيكون عائده اكبر بكتير من مجموع عائدات الخمس مشاريع الصغيرة , بس ارجع واقول يكون فيه ثقة متبادلة وتحديد واضح لمين اللي بيدير بدل ما يحصل مشاكل قدام
الخلاصة , ان اقامة مشروع في تركيا حاجة كويسة وزي الفل , بس تمشي علي خطواتها صح , مش تمشي بمزاجك
===================================
الحاجة التالتة المهمة هي الاستيراد والتصدير من والي تركيا
لو بدأنا بالاستيراد إلي تركيا , فعايزين نعرف إن الحاجات اللي تركيا بتستوردها قليلة جدا , هي بتزرع وتصنع كل حاجة تقريبا , فمعندهمش احتياج يستوردوا حاجة الا ما ندر
فلو انت عايز تستورد حاجة لتركيا , الأول اعرف ايه اللي مش موجود في تركيا , او ايه اللي موجود بس انت هتجيبه باسعار اقل بكتير من المتاح هنا , وبعدها اتفق مع التجار وشوف هتسوق البضاعة ازاي , وهنا في تركيا ما اكتر شركات الشحن والتفريغ والتخليص الجمركي و هكذا .
فقضيتك الأولي لو انت هتستورد حاجة لتركيا هي تسويقها هنا , ومتخافش من الاجرائات الرسمية عشان هي مش معقدة
فيه ناس كانت قالت اكتر من فكرة اننا نجيب منتجات خاصة بالعرب هنا , زي المانجا او البطاطا او حتي الملابس العربية اللي مش منتشرة هنا , الفكرة ديه شكلها من برة كويس بس محتاجة دراسة جدوي بالأرقام , زي عندك كام واحد تقريبا هيشتري ؟ ياتري الفاكهة علي ما تيجي قدامها قد ايه وتفسد , وهكذا
لو عايز بقي تعمل العكس , وتصدر من تركيا لاي مكان تاني – بما فيها مصر – فالموضوع هيكون اسهل شوية .
أولا لأن تركيا اساسا معتمدة علي التصدير بشكل كبير فهتلاقي كل اجرائاتك سهلة , لأن اي مصنع او خط انتاج هيرحب جدا انك تشتري كمية كبيرة من المنتجات اللي عنده
كمان لان الليرة التركية رخيصة فده بيجعل المنتجات التركية رخيصة في السوق العالمية بما فيها الجنيه المصري , يعني من كام شهر كانت الليرة ب حوالي 3 جنيه ونص , دلوقتي اقل من 3 جنيه , وده بيفرق جدا في التصدير لانك بتصدر كميات ضخمة
فمتقلقش بالنسبة لاجرائات التصدير من تركيا , لكن فكر بس في السوق اللي هتوديله , ايه هو , وهل هيتسوق كويس ولا لأ
أعتقد اهم سوقين نعرف نشتغل فيهم هو الخليج , ومصر , الخليج باعتباره سوق ضخم قادر انه يبتلع اي حاجة بتتباع هناك حتي لو باسعار كبيرة , بس ديه طبعا محتاجة اما شريك ليك في الدولة اللي هتسوق لها
, او يكون انت معاك تاشيرة متاحة للدول ديه وعارف ازاي هتسوق الحاجة ديه , وفيه تجارب ناجحه فعلا في تصدير الملابس , ادوات واجهزة كهربائية , اثاث , اكسسوارات لدول الخليج , وزي ما قلنا , لأن المواطن الخليجي ربنا مباركلهم في الناحية المادية , فالتيشيرت الماركة اللي ب 100 دولار ده سعره معقول عندهم مش غالي قوي , بينما في مصر هو مصيبة
السوق التانية هي مصر , مصر مع الحالة المادية الصعبة اللي فيها تظل سوق ضخم برضه , لأن للأسف معظم منتجاتنا في مصر مستوردة , والمصانع المصرية مش قادرة تجيب نفس جودة ولا رخص اسعار المنتجات المستوردة ومنها التركية طبعا
لازال سوق الملابس التركية في مصر شغال بشكل كبير , كمان الادوات والأجهزة الكهربية , واحيانا الاثاث , بس طبعا مع مراعاة اننا هنركز في تصدير المنتجات ( قليلة الجودة \ قليلة السعر ) لمصر , مش ( عالية الجودة \ عالية السعر ) اللي ممكن نوديها الخليج , والميزة في المصانع التركية , ان ده موجود وده موجود
يعني فيه التيشيرت اللي ممكن تجيبه من المصنع في تركيا ب 8 و 9 ليرة , وفيه اللي ب 150 ليرة
اول خطوة كالمعتاد التعرف علي السوق في مصر , انك تكون عارف ان التيشيرت التركي ماركة "ال سي وايكيكي " في ارخص مكان فيكي يا مصر يا 60 جنيه مثلا , فشوف هل هتعرف تجيب من هنا نفس الجودة بسعر اقل من كدة , مع احتساب طبعا اسعار النقل والجمارك وخلافه ولا لأ
نفس الموضوع في الاجهزة الكهربية او حتي الفواكه , فاول خطوة محتاج مسح للسوق المصري , وتتواصل مع كبار التجار عشان تعرف ايه الاسعار اللي عندهم
لما خلاص تعرف ان فيه احتياج معين لمنتج كذا , تبدأ ترتب عشان تعمل تصدير لكمية مناسبة منه لمصر , وخد بالك ان في الشهور الأخيرة حصل نوع من تعقيد اجرائات الاستيراد والجمارك في مصر , فلازم تكون عارف الخطوات كويس , ورايي انك متشيلش الليلة كلها لوحدك , يعني خليك في الأول انت معاك الجانب التركي بحيث تتواصل مع شركة في مصر هي تستلم الحاجات وهي تتصرف في تسويقها و ينتهي دورك لما تخرج الشحنة من اسطنبول
واعرف ناس ماشاء الله ربنا فاتحها معاهم بشكل كبير , وبييجي تركيا كل كام شهر عشان يجيب شحنه جديد وهكذا , فلو عايز تدخل "الكار" ده , ادخل واحدة واحدة وخليك في الاول شريك صغير لغاية لما تعرف خبايا الموضوع
===================================
طيب من الآخر كدة , لو انا مليش في الاستثمار العقاري , ولا ليا معايا مبلغ اعمل مشروع او تجارة , وعايز اشتغل حاجة من النوع الأول , أعمل ايه
شوف يا سيدي , امشي علي الخطوات ديه بالتفصيل , وان شاء الله ربنا هييسرك وتلاقي حاجة كويسة
- ابدأ في تعلم التركي , لان من غيرها فرص العمل بتقل حقيقي , لو انت في مصر او تركيا عندك اكتر من مكان هنا وهناك بيعلم التركي
- الحاجة اللي بعدها اعمل سي في كويس لنفسك في المجال اللي انت عندك خبرة فيه , واحد بالعربي والتاني بالتركي , وقدمه في كل الأماكن اللي تطلب شغل , وحتي ممكن تقدمه في اماكن مش طالبة وظيفه حاليا , لأن ممكن تكون مثلا مطبعة عايزة مصمم بس مش هيعملوا اعلان مخصوص عشانه ,فلو السي في بتاعك عندهم هيتصلو بيك
وممكن تجيب ايميلات وعناوين مئات الشركات في تركيا من موقع يلوباجز تركيا
http://www.yellowpages.com.tr/en/
ادخل فيه , واكتب اسم المجال اللي عايز فيه , واسم المدينة , وهتلاقي عشرات الشركات ابدأ تواصل معاهم , وابعتلهم السيفي بتاعك
وزي ما قلنا فوق لو انت مدرس او طبيب , تواصل مع المدارس\المستشفيات العربية وشوف لو عندهم فرص
- قبل ما تبعت السي في , اتأكد انه بالفعل حاجة كويسة , لا اقصد انك تحشيه كلام غير صحيح , لكن انك ترتب المعلومات و شغلك القديم بطريقة مناسبة , ولو شغلك فيه صور وتصميمات , اعمل حساب فورا علي موقع بيهانسيه
https://www.behance.net/
واتاكد ان ليك اكونت مليان كل شغلك , كذلك لو شغلك متعلق بالفيديوهات , اعمل قناة يوتيوب باسمك وهكذا , وفي كلا الحالتين متنساش تعمل حساب علي لينكد ان
https://www.linkedin.com
عشان صاحب الشغل يعرف انك راجل محترف
- غير ده كله , ممكن تتابع بعض الوظايف اللي بيتم الإعلان عنها في موقع
http://www.adwhit.com/trade_list.php?browse=story&cid=0
بس طبعا خد بالك ان احتمال النصب مش قليل , للأسف كتير بيتم خداعهم وبيتاخد منهم كوميسيون ومبيشتغلوش , او يشتغلوا وصاحب الشغل يظلمهم
- اخر حاجة لو كل ده منفعش , انزل بنفسك شوف شغل , يعني انزل مناطق : مارتر , زيتينبورنو , افجلار , الفاتح , اكسراي , تقسيم , يانيكابي , بيازيت , لاليلي , امينونو , سوق المصريين , حتي المحلات اللي في اسينيورت , المصانع اللي في باجلر و كوتشوكتشيكميجي واكيتلي , انزل بنفسك ودور وثق ان ربك هيبعلتك الرزق ساعتها , لكن انك تيأس او تزهق من كام مرة تترفض فيهم فانت الغلطان
وفيما يلي قائمة و روابط لأهم مواقع التوظيف التركية والتي يمكنك من خلالها ارسال معلوماتك و السيرة الذاتية الخاصة بك , كذلك يمكنك البحث عن الوظائف المطلوبة والشواغر المتوفرة .
بعض هذه المواقع تحتوي على واجهة باللغة الانكليزية وبعضها متوفر فقط باللغة التركية، نحن ننصحك بان تقوم بارسال المعلومات الخاصة بك باللغة التركية أيضاً مما سوف يوفر فرصاً أكبر للقبول والحصول على وظيفة في تركيا.
علماً أن جميع الشركات والبنوك والمؤسسات الكبيرة والمعروفة تمتلك مواقع للتعريف عن نفسها، وبالتأكيد يعرض فيها ما لديهم من شواغر وظيفية أو يمكنك مراسلتهم عبر صفحة اتصل بنا او باللغة التركية İletişim
يعتبر من أهم وأفضل المواقع الخاصة بالبحث عن العمل في تركيا والكثير من الشركات تعتمد عليه ولكن للاسف لا يملك واجهة انكليزية فقط تركية ولكن بعد التسجيل يمكنك تعبئة سيرتك الذاتية باللغة الانكليزية.
—————————–
من أفضل مواقع البحث عن العمل وأيضاً الواجهة هي فقط باللغة التركية ويمكنك اعتماد واجهة انكليزية عند تعبئة معلومات السيرة الذاتية
—————————–
www.elemanonline.com
موقع جيد و يحتوي على العديد من الوظائف وفرص العمل في اسطنبول وتركيا بشكل عام.
—————————–
www.jobnak.com
إحدى مواقع التوظيف الجيدة للحصول على الوظائف في تركيا وقد كان سابقاً بعرض خدماته للأشخاص المتقدمين من دول معينة ثم تم حل المشكلة و إتاحة الإشتراك فيه من كافة الدول بدون أية مشاكل.
—————————–
www.secretcv.com
وهو موقع عالمي للوظائف ويمكنك البحث من خلاله على الوظائف في تركيا ولكن عدد النتائج التي سوف تظهر فيه أقل مقارنة مع المواقع السابقة.
—————————–
www.michaelpage.com.tr
موقع عالمي للوظائف ويمكنك البحث من خلاله على الوظائف في تركيا واسطنبول و يتعاقد مع شركات عالمية وعادة ما تكون الوظائف المعروضة به ذات فرص كبيرة للنجاح والقبول.
—————————–
فيه كمان مواقع تانية زي