Kayseri şehir - مدينة قيصري

​

معلومات عامة بسيطة عن مدينة قيصري..

هي واحدة من بلاد الأناضول ذات الطابع التاريخي الإسلامي والي كانت تابعة لدولة السلاجقة ومن بعدهم كانت أحد مراكز انطلاق الدولة العثمانية.

مدينة قيصري موجودة في نص خريطة تركيا. بتبعد عن اسطنبول حوالي 12 ساعة وعن مدن أنقرة و أضنة ومرسين وقونية حوالي بين 3 ساعات ل5 ساعات.

مدينة هادية وبسيطة وجميلة. وفيها واحد من أعلى الجبال في تركيا. تقريبا طول السنة عليه تلج.

جوها برد والشتا فيها طويل شوية.

وطابع أكتر اهلها انهم ناس طيبين بس عمليين وبيحبوا الشغل أكتر من غيرهم من الأتراك. لدرجة إنهم مشهورين بالبخل زي ما بيتقال عن الدمياطة عندنا.

مشهورة جدا في تركيا بالبسطرمة والسجق. وهي أحد المدن المشهورة بصناعة الموبيليا هي وأضنة وبورصة. ومشهورة كمان بمزارع الحيوانات.

قيصري فيها عدد من المناطق الصناعية الجديدة والقديمة وأشهرهم منطقة أورجانيزا فيها حوالي 2000 ل3000 مصنع بدون مبالغة. أكترهم بيشتغلوا في مجال الموبيليا ومشتقاتها.

الشغل والمرتبات في قيصري.. تقريبا بتبدأ المرتبات من 900 ليرة الشغلانات البسيطة الي بيشتغلها ستات او رجالة ومش محتاجة حرفة. ومتوسط الأجور تقريبا 1300 ليرة للأجانب.

وبالنسبة لشغل الإنشاءات موجود كتير في قيصري. بس طبعا لإنها بطبيعتها برد وشغل الإنشاءات بيقف في البرد وبيشتغل في غير الشتا.

أكتر الأجانب الي فيها من السوريين والعراقيين والإيرانيين.

​

الإيجارات بتبدأ من 150 ليرة
ايوة فعلا.. فيه بيوت عربية قديمة بتبدأ ايجاراتها من150 ليرة.

وفيه مناطق بعيدة عن وسط البلد بتلت ساعة او نص ساعة متوسط الايجارات فيها 300 ليرة وبيوت وضعها كويس ومقبول وفيها كومبو. زي منطقة سلجقلو و دانشمنت وعثمانلي.

غير المنطق الحديثة البناء ولكنها بعيدة شوية عن مركز المدينة اقصى شيء ساعة بالترماي. إيجاراتها تقريبا 400 او اقل او اكتر

وتقدر ب800 ليرة تأجر بيت نضيف وكبير في وسط المدينة وتقدر تاخد ب 500 و400 في وسط البلد.\

​

بالنسبة لموضوع الإقامة هنا ومدتها صراحة معرفش عنها حاجة  

​

الي بيفكر ييجي قيصري ويشتغل فيها يشيل من دماغه أبدا انه ييجي في الشتا. بسبب انه مش هيلاقي شغل.
لكن في الصيف الحمد لله الشغل كتير ويقدر يثبت في شغلانة ويمسك فيها في الشتا.

​

أحمد عبد الفتاح