مراكز ISMEK هي مراكز تابعة للحكومة التركية , خاصة بتعليم اللغة التركية للأجانب , الحاصلين علي إقامة في البلاد 

​

موقعهم الرسمي هنا , وأماكنهم في اسطنبول هنا 

​

و ننقل هنا منشور مهم لمحمد الكومي يشرح تجربته في المركز 

=======================================================

​

مدرسة اسمك مؤسسة تابعة لبلدية استانبول الكبرى و الدراسة فيها مجانية تماما ( بتشتري الكتاب فقط ) و لغاية السنة اللي فاتت كانت بتدرس مستويين فقط و السنة دي بدأت تدريس المستوى التالت من التيرم التاني 2016\2017 و لاول مرة هتدرس المستوى الرابع كمان من الترم ده و الخطة في ٢٠١٩ تكون بتدرس الست مستويات

القيد في مدرسة اسمك برقم الاقامة فقط و يمكنك القيد اونلاين في موقع المدرسة هنا
 

القيد الاونلاين فيه ميزة كبيرة انك بتختار المواعيد و العناوين المناسبة ليك و متقلقش هتلاقي مواعيد مناسبة مهما كنت مشغول و ممكن يبقى جنب شغلك او بيتك لان المدرسة منتشرة جدًا و لها فروع في كل البلديات و الاحياء

​

بتختار الكورس و المستوى اللي انت عاوزه  , مثلا اما بتختار مستوى B1  , فمن ضمن متطلباته النجاح في امتحان المستوى السابق له A2 , او تجيب ورقة تفيد انك درست و اجتزت المستوى طبعا لو اخترت A1 فانت مش محتاج اي امتحان قياس مستوى لانك بادي من الصفر
 

مدرسة اسمك فيها حضور و غياب و امتحان نهاية المستوى و من يتجاوز نسبة الغياب يفصل من القيد و من يرسب في الامتحان ٣ مرات بيعيد المستوى اللي رسب في امتحانه 
 

الفصل بيكون اما ١٥ او ١٨ او ٢٥ طالب
 

اسمك مش بس بتعلم اللغة التركية للاجانب لا دي كمان فيها تعليم لغات كتير زي الانجليزي و الالماني و العبري و الروسي و الايطالي و الفرنسي و الفارسي و العربي

 

كمان فيها تعليم كبار زي محو الامية كدة و فيها تعليم حرف و صناعات و موسيقى و رسم و تطريز و طبخ و فيها بلايستيشن و ترابيزات بنج و بلياردو 

 

 و كل الخدمات دي مجانية للمواطنين الترك و للأجانب المقيمين بشكل رسمي 
 

اسمك موجودة في استانبول فقط ، معرفش ان كان المدن التانية فيها مراكز لغوية او خدمات مشابهة ولا لا بس الاكيد ان انقرة و ازمير فيهم مدارس تعليم لغة بورصة ممكن نسأل حبايبنا هناك
 

اخيرا انا ممكن اكون باتعلم اللغة في اسمك ببطء عن الناس اللي بتاخد كورسات محادثة او بترمي نفسها في البحر و تتعلم تعوم عشان متغرقش لكن اللي انا واثق منه ان التعليم الاكاديمي هيوصلك لفهم اوسع و اشمل للغة حاجة كدة زي سباق ١٠٠ متر عدو و سباق الماراثون ، طبعا كل واحد حر في اختياراته بس بالنسبة لي سياسة الماراثون و النفس الطويل مناسبة اكتر
 

هنا خريطة عناوين مدرسة اسمك في كل بلديات استانبول 
 

المراكز اللي بتدرس المستوى الاول و منها بتختار كل مركز و بيظهر لك كل انشطته مش بس المستوى الاول للغة التركية
 

بتضغط على علامة اسمك بيطلعلك صورة المركز و عنوانه بالتفصيل
 

و بعدين بتشوف ايه الكورسات اللي بيقدمها و ممكن تعمل قيد مباشر فيها
 

هنا مثلا مثال لمدرسة اسمك اللي في اسكدار , فيها جميع انشطة و صور المدرسة و دي اللي عملت قيدي فيها للمستوى الثالث 

طبعا اسكدار لاهي جنب بيتي و لا جنب شغلي بس هي انسب مواعيد بالنسبة لي و هكذا كل واحد بيختار الانسب له

​

​