بالنسبة للمواليد في تركيا

 

إجراءات استخراج شهادة ميلاد وجواز سفر والتطعيمات للمولود في تركيا :

​

أولا  : لاستخراج شهادة ميلاد مصرية:

===================

• بعد الولادة في مستشفى تركي بتاخد منهم ورقة او اكتر مقسومة نصين كلهم نسخة واحدة هو ده تقرير الولادة اللى بيقول ان في مولود اتولد في يوم كذا الساعة كذا في مستشفى كذا للاب والام كذا وكذا

​

• بتاخد الورقة دي ومعاك جواز سفر الاب والام الى ادارة النفوس اللى فى منطقتك وبتقول لهم عايز اسجل مولود doğum kaydı 

​

• بتاخد دورك وتدخل على الموظف بيبدأ يسجل البيانات وبيطلب منك تكتب له اسم الطفل بالحروف اللى انت عايزها وبيخليك تراجع البيانات وطبعا يوم الولادة مينفعش يتغير عن اللى المستشفى كاتباه

​

• بعد كده بيديك ورقتين ونسختين ليهم ... واحدة بتبقى تسجيل مولود للاستخدام داخل تركيا والتانية للاستخدام خارج تركيا

​

• بتاخد الورقة التركية وتترجمها للعربية عند مترجم محلف وبعدها تاخد الترجمة دي وتصدقها (يعني تختمها) من عند والي اسطنبول وده موجود عند محطة ترام Gülhane  وهنا المكان

​

• هتدخل تقول لهم تصديق (Tasdik) ... هتمشي في طرقة طويلة في اخرها سلم هتطلعه هتلاقي في وشك باب بني كبير عليه لوحة ارقام للدور ...

​

• هتاخد رقم من المكنة وفي الغالب بيبقى عليك الدور على طول بتدخل وتقولهم نفس الكلمة تصديق هيختملك عليها مكتب وتروح لمكتب قصاده يختم برضو او يمضي

​

• تاخد بقى الترجمة للعربي اللى صدقتها وتروح بيها للقنصلية المصرية اللى في (بيبيك) عشان يوثقوها ...

​

• لازم تروح تقدم طلب التوثيق ما بين الساعة 9 الى 12 وبتدفع رسوم 180 ليرة وتستلمه في اليوم التاني ما بين الساعة 3 الى 4

​

• تاخد بقى الورقة دي اللى هي ترجمة للعربي ومصدق عليها من الوالي ومتوثقة من القنصلية وتبعتها مع اول حد نازل مصر

​

• وفي مصر الجد او الجدة ياخدوا الورقة دي ويوثقوها في اي مكتب للخارجية وبعد كده ياخدوا الورقة ومعاهم بطايق الاب والام والجدة او الجد (حسب اللى رايح يعني) وعقد الزواج (انا بقى معرفش اذا كان مطلوب الاصل ولا يكفي فقط الصور)

​

• وتروح على السجل المدني في العباسية عند مكتب مواليد الخارج وتقدم الورقة المترجمة ومتصدقة ومتوثقة وبيقولك بعد اسبوع تقريبا او عشرة ايام بتكون شهادة الميلاد طلعت وتقدر تطلع ليها مستخرج رسمي من اي سجل مدني في اي محافظة من غير ما تحتاج تروح للسجل اللى في العباسية تاني

​

• دي طبعا الطريقة الاسرع بتاخد كلها على بعضها اسبوعين تقريبا ... الطريقة التانية انك تاخد الورقة المترجمة ومتصدقة من الوالي وتروح للقنصلية تخليهم هما اللى يطلعوا شهادة ميلاد بنفسهم ودي أرخص لكنها بتطول جدااا تقريبا شهرين او اكثر

​

• ولازم تبقى عارف ان المولود الجديد بيبقى مسموح ليه انه يقعد داخل تركيا بشكل رسمي من غير إقامة لمدة لا تتجاوز 6 شهور بعدها يعتبر مخالف وميقدرش يطلع إقامة الا اذا كان عنده اقامة انسانية او يخرج خارج تركيا ويرجع يدخل من جديد

​

• عشان كده لازم نطلع شهادة ميلاد بسرعة وبعدها نطلع جواز سفر بسرعة عشان نقدر نعمل له إقامة قبل ما يعدي الست شهور

 

 

ثانيا , استخراج جواز سفر من القنصلية:

====================

 

• بعد ما تطلع شهادة الميلاد وتبقى في ايدك بتروح بيها على القنصلية مع صورة جواز سفر الأب والأم وصورة عقد الزواج وتقدم عندهم طلب في الفترة الصباحية (من 9 الى 12) والطلب ده الاول لازم يبعتوه مصر عشان ياخد موافقة أمنية ودي بتاخد في مصر 15 يوم على الاقل وتقدر تتابعها في مديرية التحرير الدور التالت

​

• لما توصل الموافقة للقنصلية بتروح تاني عشان بقى تقدم الاصول للصور السابقة وتدفع 430 ليرة تقريبا والجواز بيطلع في مدة لا يعلمها إلا الله.

 

===================================

 

هذه تجربتي، وما أعلمه، بخصوص خطوات استخراج جواز سفر مصري للطفل المولود في تركيا لأب وأم مصريين..

​

• التأكد من حصولك على ورقة رسمية من المستشفى بيوم ميلاد الطفل، وجنسه.

​

• ترجمة شهادة الزواج إلى التركية، وتوثيقها من النوتير.

​

• الذهاب إلى مبنى النفوس بورقة المستشفى، وبشهادة الزواج المترجمة، وجوازي سفر الأب والأم، لاستخراج شهادة ميلاد باللغة التركية.

​

• ترجمة شهادة الميلاد المكتوبة باللغة التركية إلى العربية، ثم توثيقها من النوتير.

​

• الذهاب إلى مكتب والي المحافظة -وإن كنت في اسطنبول، فالمبنى قريب من محطة ترام السلطان أحمد- للحصول على تصديق الوالي على الشهادة المترجمة.

​

• الذهاب إلى السفارة أو القنصلية المصرية للحصول على تصديق على نفس الشهادة المترجمة.

​​

•  قدامك طريقتين .

  • تستطيع أن ترسل تلك الشهادة المترجمة المصدق عليها إلى مصر ليقوم الجد، والد الأب فقط، باستخراج شهادة ميلاد مصرية، ورقم قومي.. وتستغرق ثلاثة أسابيع، ثم يرسلها إليك مرة أخرى.​

  • تتقدم بنفس الورقة للقنصلية لاستخراج شهادة الميلاد المصرية. وتستغرق متوسط ثلاثة أشهر

​

• ​تتقدم بشهادة الميلاد المصرية + صورة جواز سفر الأب + صورة شهادة الزواج، إلى القنصلية لاستخراج جواز السفر، وفي الأول تنتظر موافقة أمنية، ثم يستغرق الجواز متوسط شهرين.

​

• ملحوظة مهمة: لمن يريد استخراج الأوراق كلها من تركيا دون أن يسافر بالطفل، فلابد من الانتهاء منها قبل مرور ستة أشهر على مولده، ثم يقدم على طلب الإقامة عن طريق الموقع الرسمي، وإلا يصبح الطفل مخالفا وعليك المغادرة به ثم العودة به مرة أخرى للتقدم للإقامة بشكل قانوني.

​

• وأخيرا: بالطبع من الممكن للأب أو الأم العودة إلى مصر بشهادة الميلاد المترجمة من التركية، والمصدق عليها من الوالي ومن القنصلية، لاستخراج شهادة الميلاد المصرية، وجواز السفر في وقت أقل من ذلك.

​

​

أما بالنسبة لتطعيم الأطفال , فيرجي زيارة الصفحة الخاصة بها من هنا