بخصوص ملابس_الشتاء في تركيا

​

أول ما جيت تركيا نصحني صديق ليا نصيحه قالي ان هدوم الشتا بتاعه مصر دي ولا حتعمل حاجه مع شتا تركيا وشوف الاتراك بيعملوا ايه في الشتا واعمل زيهم 

وكان مع بدايه الشتا كنت الاقي مثلا حد لابس جاكيت انا شايفه خفيف جدا وتحتيه تشيريت او بلوفر خفيف برضو وماشي ولا متاثر زيي - طبيعي ان انسان اتربي واتولد في بيئة كده يكون متعود عليها طبعا ولكن بنتكلم عن تاثر الجسم بالبروده او الحراراة الطبيعية - 

كانت اول حاجه بدات ادور عليها الملابس التحتيه ( الكلاسين يعني ) لقيت حاجه زي بتاعه مصر كده تقيله بس مش بتدفي حلو لحد ما كلمت حد صحبي اقدم مني في تركيا فبقوله على الكلاسين مش بتدفي نصحني اني اروح في ديكاتلون قالي حتلاقي هناك حاجات كويسه 

وبالفعل روحت وكانت اول مره اروح هناك اكتشفت عالم تاني لمعنى ازاي تدفي نفسك بدون ما تلبس دولابك كله كعادتنا كمصريين في الشتا 

وكمان تكون خفيفه جدا علي جسمك فتسهلك الحركة ومتحسش انك ماشي منفوخ زي الدب القطبي

 

• أولا : نبدا بالكلاسين وهي عمليا مش كلاسين بمفهومنا الحقيقي في مصر ولكنها ملابس تدفئة خاصه بمتسلقي الجبال و المتزلجين على الجليد والي بيمارسوا رياضات في الجو الساقعه عموما زي كده مثلا وهي حريمي ورجالى وللاطفال كمان 

  • ​ده رجالي مثلا 

  • وده بالتجربة افضلهم 

  • وده حريمي مثلا 

  • وده مثلا حاجه للرياضه الجري في الاساس بيحتمد على حبس الحرارة وعلى انه يحافظ هلى درجه حراراه جسمك 

  • وده رابط مجمع لملابس تدفئة حريمي ورجالي بدرجات تدفئة مختلفة ​

​

• ثانيا : بالنسبة للجكاكيت كنت اول مرة اشوف ملابس ليها ليمت لدرجة الحرارة وسرعة الرياح وكثافة الامطار ايضا يعني مثلا جاكيت زي ده حتلاقي في قسم مواصفات المنتج مثلا الي مكتوبه في الرابط ده بالتركيه كده ÜRÜN AVANTAJLARI

• مواصفاته وتحمله للعوامل الجويه المختلفة يتحمل لحد درجه سالب ١٠ مع الملابس المناسبة وتحمله لسرعه الرياح والامطار ووزنه كمان 
• الفكره كمان والغريب انك ممكن تمسك الحاجه تلاقي خامتها خفيفه جدا وتقول ازاي تدفي دي يعني مثلا ممكن تمسك الجاكيت تلاقي هوا ورغم كده تلبسه ٥ دقايق تحس انك اتحريت 
• عموما نظرتي للملابس الشتويه كمصري اختلفت تماما وثقافة لبس الدولاب كله دي اختفت
• هذا الرابط به مجموعة متنوعة من الجكاكيت مختلفة الأسعار و المواصفات

​

​

• ثالثا الأحذية :

  • الأحذية هنا في منها عدة انواع الأحذية ضد الماء ( Su Geçirmez ) ومناسبه لكل مكان العمل الخروج وهكذا مع درجات فى عزل الميه زي ده مثلا ( ملحوظة الحذاء الي في الرباط ده ده اقل درجه في العزل ضد الميه في خصائصه تحت حيبان في درجات اعلى هو انا حاطه نموذج فقط ) 

  • وفي منها الي بيمشي على ارض غير ممهده ودي بيكون مكتوب على نعلها من تحت ( cross contact) للجبال والمنحدرات وهكذا مع خاصيه انه ضد الميه ايضا وبدرجات متفاوته للعزل ضد الميه ودي بيكون فيها نوع من المرونه اثناء الحركه ومريحه نسبيا زي ده مثلا 

  • وفي منها الي بتاع التلج بيكون مكتوب على نعلها من تحت (snow) وبتاع التلج ده مش مقصود بيه الي بيدفي بس او الي بيخليك تمشي ع التلج متتزحلقش ولكن الي بيجمع الصفتين مع بعض وده بيكون مختلف درجات التدفئة وبيتحمل درجات حرارة منخفضه جدا يعني مثلا ده بيتحمل لحد سالب ٢٠ مئوية وفي سالب ١٠ وسالب ٣٠ كمان 

  •  رابط لمجموعة من الأحذية الخاصة بالثلج والشتاء وهي مختلفة في درجات التدفئة ودرجات عزل المياة 

  •  وهذه إضافة خاصة للأحذية مانعة للانزلاق للأحذية غير المؤهلة للثلج دي مقاساتها (S = 36 - 38 / M = 38 - 40 / L = 41 - 44 / XL = 45 - 48 ) 

 

 

وكان في عده نصائح بناء على تجربه :-

​

• ​الاسعار ممكن تكون غاليه في بعض المنتجات ولكن انت بتجيب مره واحده تقعد معاك الشتا كله والشتا الي بعده سواء في الجاكيت او الحذاء يعني لو اختارت الحذاء الصح و الملابس الصح الي مناسبه ظورف عملك وطبيعته مش حتحتاج تشتري كل شويه جذمه علشان باظت من الميه مثلا ولا تضطر انك تشتري جاكيت تاني علشان ده بيدفي لكن مش بيمنع الميه مثلا 

•  حاول تقرا مواصفات كل منتج سواء على الموقع او لما تروح المعرض بيكون موجود على الاستاند مع كل منتج خصائصه والي مش بيعرف تركي اوي او بيعرف نص نص ممكن يستعين بالترجمه علشان يفهم 

• اغلب الملابس معموله انها تلائم جسمك وتقفل منافذ الهواء بحيث تفضل محتفظ بدرجة حرارته خصوصا الملابس التحتية فمثلا لما تيجي تشتري متقولش حجيب اكبر نمرة علشان ينفعنى السنه الجايه فيكون واسع فيدخل هوا بارد فتبوظ السيستم بتاعه وكمان لنا تيجي تقيسه حتلاقيه استريتش وماسك جدا عليككانه جلدك هو كده مش صغير يعني فتقول ضيق اجيب الأكبر 

•  شوف وافهم شرح وظيفةالمنتج الي حتشريه فعلا وشوف الفيديو بتاع المنتج من الصفحة بتاعته فى الموقع الفيديو بيكون ملخص خصائص المنتج يعني كان في جاكيت غطا الراس بتاعه في حته طالعه منه في الدماغ من ورا وبتتشد وتترخى مكنتش فاهم ليه يعني ففي الفيديو مثلا لقيت ان الجزء ده لما بتلبس غطا الراس ممكن يكون مغطي عينك مثلا فبتقدر ترفعه عن عينك من خلال شد الجزء ده او انك تعمل زي تنده على عينك زي تنده البلكونه كده لو حتفكه :) ودهمناسب في المطر الشديد لو لابس نضاره مثلا حتحس ان المطر مش مضايقك اوي اتفرج عليه هنا

 

ختاما : ٠

• ممكن حد يلاقي ان البوست ده ترف ملهوش لازمه بس خليني اقولك حاجه انك سعات بتشتري هدوم كتير علشان يا شكلها حلو او علشان بتحس انه مدفياك مثلا وفي الاخر بتطلع مش مناسبه وبتضطر تشتري جديد 

• البوست مهم للي اتلسع من السقعه واتلسع من شراء هدوم كثيره ملهاش لازمه

• ممكن يكون في محلات بتيع الملابس في تركيا بنفس الكيفية لكن حقيقه معرفهاش ونقلت تجربة من استخدامي لديكاتلون

• أماكن ديكاتلون :

  • ​مول مرمرة فورم 

  • مول فورم اسطنبول 

  • مول اوف اسطنبول

​

المصطلحات في البحث :-

•   #ERKEKالرجالي 

• #kadin الحريمي

• الاطفال ( #BEBEK و #ÇOCUK)

• ضد المية SU GEÇİRMEZ 

• حذاء : #ayakkabilar

• جاكيت Montlar

• شتوي Kışlı