​

انا حبيت اني اعمل بوست اجاوب فيه بالحاجات اللي اعرفها مع بعض اللينكات اللي ممكن تساعدكم في الموضوع ده وان شاء الله تفيدكم.

 

اول ما بتحصل علي الجرين كارد فا انت كده بتعتبر تقريبا كده نصف مواطن امريكي. بيكون ليك كل الحقوق وعليك كل الواجبات اللي علي المواطن الامريكي اللي معاه جنسيه ماعدا بس انك متقدرش تشتغل شغل معين خاص بالامريكان بس ودي حاجه متعلقه بالسيكيوريتي ومش موضوعنا حاليا.

​

انا هتكلم في الامثله بتاعتي عن اسره مكونه مثلا من 4 افراد، ايه المساعدات اللي الاسره دي ممكن تحصل عليها وايه الشروط الواجب توافرها في الاسره دي عشان تحصل علي المساعدات اللي هيتم ذكرها.

 

اولا احب اوضح ان كل ولايه مختلفه عن التانيه عشان كده احب اكرر اني مجرد هديكو امثله وانتو عليكو انكو تدخلو علي اللينكات اللي هديهالكو وممكن تحسبو بنفسكو.

 

(الولايه اللي هحسب عليها مثلا هي ولايه اوهايو بما اني عايشه فيها.)

​

لو اسره بتتكون من 4 افراد ودخلهم السنوي لا يتعدي 31,590$ يعني بمعدل دخل تقريبا 2500$ في الشهر الواحد فمن حقهم حاجه اسمها فود ستامبس وسوري لو هكتب بالعربي سامحوني.

 

الفود ستامبس ده بيكون عباره عن كارت بتاخده الاسره بعد ما يملو ابلكيشن ويعملو مقابله في مكان معين ولو الحاله اتوافق عليها الحكومه بتحط للاسره دي مبلغ كل شهر في الكارت ده عشان يشترو بيه اكل فقط.

 

مينفعش في مطاعم، مينفعش في بنزين، مينفعش في فواتير او ايجار. اكل من السوبر ماركت فقط.

 

وتقريبا لو اسره مكونه من 4 افراد ممكن تاخد مبلغ حوالي من 350_450$ ف الشهر لشراء الاكل.

​

نيجي لتاني حاجه. طبعا انتو عارفين الفواتير وقرفها اللي اتكلمت عنه قبل كده. مؤخرا الحكومه مشكوره عملت برنامج اسمه هييب او هوم اينيرجي اسيستانس بروجرام. بالنسبه للمثال بتاعنا بتاع الاسره 4 افراد فبناء عليه لو الاسره دي بتعمل دخل سنوي قدره 42,525$ في السنه ميزيدش عن كده يعني بمعدل دخل حوالي3500$ في الشهر ميزدش عن كده.

 

في الحاله دي بتقدم علي البرنامج ده وهما بيدفعو عنك الكهربا والغاز ويا اما بيخلوك تدفع 10$ فقط في الشهر وهما بيدفعو الباقي مهما كان او بيخلوك تدفع اكتر شويه بس مش هتزيد عن 50$ في الشهر.

 

وده في حد ذاته انجاز لان الكهربا لوحدها زي ما كنت قولت قبل كده ممكن تيجي ب 200$ وحاجه في الشهر. العيب الوحيد في البرنامج ده انه بياخد وقت شويه. يعني الابلكيشن بتاخد من 12 الي 16 اسبوع علي ما يتوافق عليها. بس عادي هي دي امريكا روتين ايفري وير اتعودنا.

​

في كمان برنامج حلو اوي وقريب من قلبي الصراحه بس للاسف معرفتش استفاد منه لاني سافرت مصر ايامها. لما واحده تكون حامل، بتكون مرحله حلوه اوي بعد الولاده بالذات.

 

في برنامج اسمه ويك ده بيكون للام اللي لسه والده واللي دخل اسرتها السنوي لا يزيد عن 44,955$ اي 3474$ شهريا. شروطها ان تكون السيده حامل او ولدت او عندها طفل تغذيته في خطر ويكون مش اكبر من 5 سنين.

 

في الحاله دي بيتم صرف كوبونات ليها اسبوعيه بكرتونه بيض، جالون لبن، علبه كورن فليكس، واشياء اخري مش متذكراها. بالاضافه الي انها لو بترضع صناعي بيتم صرف ليها حوالي 9 علب لبن شهريا اللي هو في مصر ب الوفات مؤلفه ده. طبعا ده حاجه بردو جميله جدا.

​

الكلام ده طبعا مش كل حاجه لينا تكمله ان شاء الله قريب عشان مطولش عليكو وتقدرو تستوعبو كل المعلومات بدون تشتيت او ضغط.

 

و زي ما شرحت ان شروط المساعدات دي انك تكون معاك جرين كارد وسوشيال، وان دخلك السنوي ميزدش عن المعايير اللي هما حاطينها وطبعا دي مينفعش فيها كدب لانك بتقدم ضرايب اول السنه وكله متسجل عندهم.

 

ولازم طبعا يكون عندك دخل تقدرتثبته سواء بنسخه من كعوب الشيكات بتاعه المرتب او ورقه من صاحب العمل لو بتقبض كاش. مينفعش مثلا تكون مش بتشتغل وتروح تقولهم عايز فود ستامب لان هيسالوك امال عايش ازاي وبتدفع ايجارمنين لو مش بتشتغل؟

 

وحصلت مع ناس اعرفهم ومقدروش يحصلو علي اي حاجه. بس لو مش بتشتغل دي ليها بوست تاني ان شاء الله عن ايه هي المساعدات اللي ممكن الحكومه تقدمهالك.

 

في النهايه احب اسيبلكم بعض اللينكات لمواقع عن المساعدات دي لو حد حابب يدخل ويستفسر بنفسه. 
ملاحظه: تقدرجوجل تكتب اسم البرنامج في ولايتك. يعني مثلا فود ستامب في نيويورك وهكذا وبالانجليش طبعا. 

​

Vocabulary:
Food stamp
HEAP (home energy assistance program) 
WIC (women, infants and children)

Links:  

http://www.fns.usda.gov/wic/women-infants-and-children-wic

http://www.snap-step1.usda.gov/fns/

http://development.ohio.gov/is/is_heap.htm

​

احب اضيف حاجه اخيره. الموضوع يبان انه سهل بس بيحتاج ممكن شويه تعب ومتابعه وصبر وشويه زن. يعني متسكتش علي حقك. ده حقك مش حاجه