ونعرض الآن حلقات اللجوء للدكتور أحمد عبد الباسط المقيم بالولايات المتحدة

 

​

الحلقة الأولي

--------------

​

أنا لقيت ناس كثيرة الفترة اللي فاتت في البوستات والتعليقات بتسأل علي اللجوء وشروطة و أنواعه وحبيت أعمل لكم شرح مبسط للجوء في أمريكا

​

• اللجوء في أمريكا لازم تكون حضرتك داخل البلد أي حد يقولك حاجة تاني غير كده يبقي بيضحك عليك وعلشان المعلومة تبقي واضحة وكاملة في فارق بين asylum case وبين ال refugee الأول هو اللجوء اللي بتعمله من داخل البلد وده اللي بينطبق علي المصريين والثاني هو إستقدام الاجئين لأمريكا عن طريق الأمم المتحدة وده مخصص للسوريين والعراقيين والبلاد اللي فيها حرب ومش منطبق علي مصر ... فأي حد يقولك تعالا هقدم لك علي لجوء وإنت في مصر ولا في الخليج يبقي حرامي وبيضحك عليك .

​

• أولي خطوات اللجوء ( ده بعد دخولك البلد ) هو ملء إستمارة التقدم وهو عبارة عن طلب اللجوء من خلال الموقع الرسمىwww.uscis.gov وتعبئة استمارة (Application for Asylum and Withholding of Removal ) استمارة رقم I-589 , الإستمارة دي ممكن أن تقوم بتعبتها بنفسك عادي أو تستعين بمحامي لمساعدتك .

​​

• بعد ما ترسل الإستمارة دي .. بثلاث ايام هيجيلك جواب علي العنوان اللي إنت حاطة هيعطي لك معلومتين مهمين ( المعلومة الأولي هي رقم Alien Number الخاص بك حتي نهاية قضية اللجوء ) و ( المعلومة الثانية هي إنك لك الحق في البقاء في الولايات المتحدة لحين البت في أمر اللجوء ) الوصل ده مهم جداً ولازم تشيله معك علي طول أو تضعه في مكان أمن .

​

• بعد الخطاب ده ب 15 يوم تقريباً هيجيك خطاب أخر يحدد لك موعد ال finger print الخاص بك ... هيديك تقريباً اسبوعين تروح تعمل فيهم البصمة لازم تروح بسرعه ومتتأخرش . ( مجاناً )

​​

• بعد ما تعمل ال finger print هتنتظر 150 يوم ( 5 شهور ) من تاريخ أول خطاب جالك ( موعد إستلام الهجرة للطلب بتاعك ) وبعدها هيكون لك الحق في التقديم علي تصريح العمل Work Permit ( مجاناً )

​​

• لكي تحصل علي تصريح العمل في أمريكا بعد مرور 150 يوم عليك بتقديم طلب ومل إستمارة رقم I-765 وإرسالها إلي مكتب الهجرة والإنتظار من شهر الي 3 شهور للرد عليك .

 

• سيتم إرسال لك تصريح العمل علي عنوانك وبمجرد الحصول علي تصريح العمل هتروح لأي social security office لعمل السويشال بتاعك ( زي الرقم القومي كده وده هيكون معاك لغاية متموت ) ( مجاناً )

 

• السوشيال هيجيلك علي البيت بعد إسبوعين بالكثير وفي اللحظة دي هيكون معاك تصريح عمل وسوشيال وتقدر تشتغل في أمريكا قانونياً لغاية ما ييجي موعد المقابلة بتاعتك في اللجوء .. ( هتأخد من عامين ونصف لثلاثة )

 

• لو معاك الزوجة والأولاد كلهم هياخدوا تصريح عمل وسوشيال معاك ويكون للزوجة أيضا والولاد حق العمل .

 

• الخطوات اللي فوق دي واحدة لكل أنواع اللجوء ( سياسي / ديني / إنساني / جنسي .. إلخ )

 

• لغاية اللحظة دي محدش هيبص في إنت كاتب إيه في أسباب اللجوء يارب تكون كاتب شعر مش هيفرق معاهم .. فحص الورق والحالة بتاعتك هيكون في المقابلة .

 

• كل الخطوات اللي فوق دي ممكن تعملها بنفسك مجانا بدون ما تدفع ولا قرش علشان بس محدش يستغلك أو إنك تروح لمحامي وتتفق معاه علي التكلفة ( ده هنشرحه بالتفصيل لاحقاً )

​

• ده ملخص أول مرحلة من مراحل التقديم للجوء ، أنا حبيت أشرح بالتفصيل خطوات اللجوء المشتركة مع كل أنواع التقدم ... علشان الناس تبقي فاهمة .. وفي الحلقة القادمة إن شاء الله ... هشرح لك الفارق بين أنواع اللجوء المختلفة ... و عدد المكاتب في أمريكا ... وإيه أفضل المكاتب لكل نوع ... والمحامين الكويسين في كل ولاية ... حسب ما تعاملت معهم أو تعامل أصحابي معهم .

​

 

=================================

 

حلقة (2)

----------

 

بعد ما شرحنا في الحلقة السابقة إيه هي الخطوات الأساسية في اللجوء والمشتركة في كل الأنواع ...

 

الحلقة دي هشرحلكم فيها أنواع اللجوء في أمريكا وبالتفصيل وهحاول أشرح بطريقة مبسطة وهنقل لكم خبرتي وما لخصته من موقع الهجرة و المراجع المختلفة , وإليكم أنواع اللجوء حسب ما ذكرت في موقع وزارة الهجرة في الولايات المتحدة

​

1-   Political opinion اللجوء السياسي

اللجوء السياسي أو اللجوء بسبب وجود أراء سياسية مخالفة لحكومة البلد الأصلية شريطة أن تكون هذه الأراء والأفكار عرضت الشخص للمخاطر ( إعتقال / حكم بالسجن / تعذيب / ... إلخ ) يعني لازم يكون معاك حكم أو إسمك جاء في قضية أو الشرطة جت البيت تقبض عليك ولم تجدك وكسروا البيت أو عليك ضبط وإحضار أو إعتقلت فترة وخرجت وخايف من الإعتقال تاني ( الموضوع مش بوستين علي الفيس وخلاص زي ما الناس فاكرة ) ... وطبعا في ناس كثيرة في مصر الأيام دي معارضه أو عامله نفسها معارضه وتقولك هروح أعمل لجوء ... لو مش معاك الشروط السابق ذكرها يبقي متتعبش نفسك أحسن علشان الناس هنا مش عبيطة ... ( اللجوء ده ينطبق علي كثير من المصريين هذه الأيام بسبب الأحداث المختلفة )

​

 

2-  Religion ..... اللجوء الديني

اللجوء الديني هو ثاني أنواع اللجوء و هو لجوء بسبب وجود اضطهاد علي الشخص لإعتناقه دين معين ومخالف لديانة البلد ( زي المسيحيين في مصر ) , واللجوء ده كثير جدا من المسحيين المصريين بيقدموا فيه وغالبا قضاياهم بتتكسب بنسبة كبيرة .. طبعا الآن مع تفجيرات الكنائس وقتل المسيحيين في مصر الفرصة أصبحت أكبر وأكبر فأنا نصيحتي لأي واحد مسيحي في أمريكا يقدم لجوء علي طول . طبعا اللجوء ده مش للمسحيين بس ده ينفع لأي حد خايف يضطهد بسبب فكره الديني ( بهائي / شيعي / ملحد / بوذي ... وهكذا )

​

​

3- Race ... العرق

اللجوء بسبب العرق , ده نوع من أنواع اللجوء بيقدم فيه الأشخاص اللي كانوا موجودين في بلد معين وإتعرضوا للاضطهاد بسبب إن سلالتهم أو عرقهم مخالف عن عرق باقي البلد , وعلشان أبسطها لكم زي النوبيين في مصر , بس طبعا مش أي نوبي ينفع يقدم لازم يكون واقع عليه ضرر بسبب إنه من السلالة دي .

 

​

4-  Membership in a particular social group... الانتماء لجماعة اجتماعية معينة

النوع الرابع من اللجوء هو اللجوء بسبب الإنتماء لمجموعة إجتماعية معينة وده مش زي اللجوء السياسي ولا العرقي , النوع ده حسب تفسير موقع الهجرة هو ينفع لأي مجموعة من الأشخاص اللي عندهم نفس الخلفية أو الوضع الاجتماعي أو النسب أو الخبرات أو العادات أو الجنس أو الميول الجنسية . ومن النوع ده الناس بتقدم لجوء جنسي ( هو مفيش نوع اسمه لجوء جنسي من الانواع الخمسة ولكن هو تحت النوع الراع وهو الإنتماء لجماعة إجتماعية معينة ) واللجوء بسبب الجنس مختلف تماماً عن اللجوء بسبب الميول الجنسية هحاول أشرح الفارق بطريقة مبسطة

 

1- اللجوء بسبب إضطهاد الجنس الخاص بالإعتداء علي النساء ...

واحدة مثلا في مجتمع شرقي وزوجها علشان هو راجل وهي ست فبيعذبها و بيضربها ومثلا طلقها وأخد منها العيال ... وحارمها منهم والحكومة مش عارفه تعمل حاجة معهم و عندها علامات علي جسمها بكده ومحاضر ( الموضوع مش أي واحدة جوزها زعق لها تيجي تعمل لجوء يعني ) ده إسمه لجوء بسبب الجنس وليس لجوء جنسي ده أوقات في العرف أو الدراج بيسموه اللجوء الإنساني

 

2- اللجوء الجنسي ( ربنا يحفظنا ويحفظكم ) هو لجوء بسبب التحولات الجنسية ( الشواذ ) واحد بقي Gay أو واحدة بقت lesbian أو عملوا تحويل جنسي من راجل لست والمجتمع اللي هم فيه مش موافق علي كده ... وولاد اللذينة دولا بياخدوا اللجوء وهم مغمضين ... وبرضه الموضوع مش طالب إستهبال من المصريين لان الناس هنا في امريكا في الهجرة مش عبيطة وبيكشفوا عليك ويتأكدوا انك فعلا شاذ ولا لا .. ( هي حته الستات مش بتتكشف زي الرجالة طبياً ولكن لهم طرق ثانية كثيرة ) ... ربنا يعافينا جميعاً .

​

5- Nationality .... اللجوء بسبب الجنسية

 

اللجوء ده ينفع للسوريين والعراقيين والفلسطنيين وهو إن الشخص معرض للإضطهاد والظلم بسبب إنه يحمل جنسية معينة ... هو ولا معارض ولا حاجة بس البيت بيتهد فوق رأسه والقنابل بتضرب عليه من كل ناحية فهو عايز يحمي نفسه لان الجنسية بتاعته او بلده هي سبب الاضطهاد اللي هو فيه ( وده مينفعش للمصريين علشان نريح نفسنا )

 

ملحوظة هامة

في نوع آخر للجوء بيقدم عليه السيدات ( وموقفة قوي جداً ) وهو اللجوء بسبب الختان وده مواله طويل ..( ممكن نخصص له حلقه لوحده ) ولكن أعتقد إنه يندرج تحت النوع الرابع من أنواع اللجوء .

​

يارب تكون الحلقة دي عجبتكم وشرحت فيها الأنواع بالتفصيل والحلقة القادمة يوم السبت القادم بإذن الله نتكلم عن كيفية التقديم وأفضل المحامبن في كل ولاية ... و الورق المطلوب لكل حالة .

 

=================================

​

( حلقة 3 )

----------

 

كنا قد توقفنا في الحلقة الماضية عند أنواع اللجوء وعرفنا كل نوع من أنواعه بالتفصيل

​

الحلقة النهاردة سريعة وبسيطة , أهم شيء لما توصل أمريكا وتأخد قرار التقديم للجوء تبقي عارف إ،ت عايز تقدم علي إيه كويس لأن الأنواع كثيرة ... مينفعش تروح لمحامي شاطر ( أمريكي وخاصة اليهود ) وتقوله شوفلي نوع من أنواع اللجوء أقدم فيه , غالبا مش هيقبل الحالة لانه هيعرف انك جاي تهزر ومش عندك حالة أصلا ...

 

ولو رحت لواحد عربي هيعرف إنك تايه وهيبدأ للأسف يضحك عليك ويقولك هقدم لك لجوء إنسانس وهظبط لك القصة ( وإنت معندكش حالة تستدعي ذلك إنسانياً ) .

فدي نصائح خاصة للي وصل أمريكا ... وعارف الخطوات التي ستتم أول شهور كما ذكرتها في أول حلقة وأنواعه التي ذكرتها في تاني حلقه 

 

•  أدرس إنت حالتك بهدوء و خد أسبوع كده اقرأ كل أنواع اللجوء بكل تفاصيلها وحاول تتواصل مع ناس قدمت لجوء وخاصة اللي كسب القضية وإسمه منه حصل إيه في المقابلة ( أختار واحد لكل نوع من أنواع اللجوء ) وبعدها طبق هذا علي حالتك وشوف حالتك تمشي مع أي نوع من الأنواع .

 

• بعدها جهز ملفك كامل ( مترحش للمحامي بطولك كده علشان وش هيشتغلك ) وترجمه وحط فيه ما يثبت حالتك ... بحيث تدخل علي المحامي ( سواء عربي ولا أمريكي ) وأنت جاهز هو علي الفور هيحترمك وهيبدأ يتعامل معاك بطريقة مختلفه خالص علي اللي جاي تايه .

 

• لو عايز تقدم لوحدك ومتقدمش مع محامي وكنت مجهز ورقك روح لحد بيعرف يكتب إنجليزي كويس ( مش بيعرف يتكلم كويس ... لان في ناس بتتكلم لغه الشوارع بالممارسة ومبتعرفش تكتب حرفين ) وخليه يساعدك في قراءة الأسئلة كويس الخاصة بالطلب الاول الذي ذكرناه في أول حلقة وتتكل علي الله وتقدم .

 

• لو معندكش حالة وعايز يتألف نصيحة بلاش تعمل كده ... ولو الظروف بتاعتك ملخبطة ومعندكش غير الطريق ده يبقي مترحش لمحامي أمريكي وروح لمحامي عربي وخلاص ... هو أي ينعم هيقعد يألف معاك ويهري معاك ... بس ده للمضطر ومحدش عارف ظروف الناس . ( ولا أنصح بتقديم اللجوء للي معندوش حالة من الأساس )

 

دي بس نصائح سريعة حبيت اقولها للي وصل أمريكا وخلاص أخد قرار إنه يبدأ اللجوء

 

نلقاكم الأسبوع القادم مع تكلمة حلقات اللجوء في أمريكا

 

 

=================================

​

( حلقة 4 )

-----------

 

كل عام وحضراتكم بخير وبعتذر عن التأخير بعد الحلقة الثالثة

 

الحلقة النهاردة هتكون مهمة جداً وهتجاوب علي كل الأسئلة اللي بتشغل بال كل اللي عايز يقدم للجوء ..وخاصة السؤال المعتاد ... ( هو أنا لو إترفضت في اللجوء هيحصل إيه هترحل )

 

وفي الحلقة دي بإذن الله هنشرح كل القرارت الممكنة وطريقة التعامل معها .

إنت بعد ما تقدم للجوء كما شرحنا في حلقة (1) وبعد ما تختار نوع اللجوء اللي هتقدم فيه كما شرحنا في حلقة (2) وبعد ما تتبع الخطوات اللي قولناها في حلقة (3) هنتظر دورك في المقابلة ... ( المتوسط من عامين ونصف لثلاثة ) وهتروح المقابلة في مكتب اللجوء المحلي التابع له محل سكنك في الولاية اللي انت فيها ( موضوع المقابلة وإزاي تجاوب علي أسئلة الOfficer ده عايز حلقات لوحده ) ...

 

المهم بعد المقابلة ما تخلص مع موظف الهجرة ( تستغرق من ساعتين لثلاثة في المتوسط ) إنت مش بتأخد القرار في نفس اللحظة بيديك وصل ويقولك تعالا بعد 15 يوم خد النتيجة ... لو رحت بعد 15 يوم وكان في نتيجة غالبا هتكون الرفض .. لأنه لو وافق عليك هيحولك لل background security check وده بياخد شهور وخاصة للي مقدمين لجوء سياسي .

​

المهم إيه القرارت اللي ممكن يأخدها الأوفيسر واللي هتجيلك علي عنوان سكنك بعد المقابلة بفترة ( مفيش توقع لمدة محدده لها ) :-

 

​

 

1- Grant of Asylum ...منح اللجوء 

ده أفضل قرار علي الأطلاق وهو منح اللجوء من قبل ال officer وده الناس بيسموه هنا بالبلدي ( كسب اللجوء من أول مقابلة ) ونسبة الحصول علي القرار ده للحالات القوية 50% لأن الأوفيسر بيبقي خايف ياخد قرار زي ده لو عنده اي شك ( بالرغم من إن الحاله قوية ) طبعا للحلات الضعيفة النسبة هتقل جداً وهندخل في المراحل الأخري .

​

القرار ده بيجيلك علي البيت ومعه إستماره ال Form I-94, Arrival Departure Record وبيجيلك تصريح عمل دائم وده بيخليك تقدم علي الجرين كارت بعد سنة من صدوره وعلي الجنسية بعد 3 سنوات من الحصول علي الجرين ( الجرين ممكن يجيلك في سنة بعد ما تقدم عليه ) وكمان تقدم علي لم شمل لو الأسرة مش معاك وتجيبهم ( بياخد من سته شهور لسنة )

ربنا يوعد كل المقدمين علي اللجوء بالقرار ده لأنه أفضلهم علي الإطلاق .

​

A grant of asylum allows you to apply for:

 

An Employment Authorization Document (EAD)

A Social Security card

A Green Card (permanent residence)

Immigration benefits for your spouse and unmarried children under the age of 21

​

​

 

2- Recommended Approval ...الموافقة تحت التوصية 

 

دي الحالة التانية من القرارات اللي الأوفيسر بياخدها ودي ببساطة إنه موافق علي اللجوء بتاعك بس منتظر البحث الأمني عنك ( وخاصة للناس اللي من منطاق بيسموها hot region وللأسف مصر منهم ) ... القرار ده بيخليك تقدم علي تصريح عمل عادي إنت وأسرتك عن طريق الفورم Form I-765, Application for Employment Authorization. ونتنظر الجهات الأمنية تعمل عليك security check وبمجرد مييجي رد الجهات الأمنية إنك clear ومش عليك اي حاجة الحالة دي ( مRecommended Approva ) تتحول للحالة الأولي ( Grant of Asylum ) وتأخد كل مميزات الحالة الأولي .

 

 

3- Referral to an Immigration Court ... التحويل لقاضي الهجرة 

ده القرار اللي بياخده 70 % من المصريين اللي مقدمين لجوء وهو أن الأوفيسر مش مقتنع بالحالة بتاعتك ولا بالكلام بتاعك وهيحولك للقاضي ( إحنا هنا في أمريكا بنقولها بالبلدي الأوفيسر رفضه وحوله للمحكمة ) وهيبعت لك القرار و الطلب التالي letter of explanation and a Form I-862 ومع القاضي هتيدأ إجراءات من جديد خخالص وهتاخد فيها عامين ولا حاجة بدء من أول جلسة اللي هتبقي بعد 6 شهور من إعلامك بتحويلك للمحكمة لغاية قرار المحكمة اللي ممكن تطعن عليه . يعني معاك علي الاقل عامين غير ال 2 ونصف اللي في الاول يبقي 4 ونصف محدش هيرحلك من أمريكا فيهم . في خلال الفترة دي ( العامين بتوع المحكمة ) بتقدر تقدم علي تجديد تصريح العمل وتقعد رسمي في البلد بشرط إحترام المحكمة  وحضور كل الجلسات.

 

 

4- Notice of Intent to Deny ... إشعار النية للرفض

 

وده من أسوء القرارت وهو إن الأوفيسر بيقولك إنه عندي نيه لرفضك وبيتركك حوالي 16 يوم تبعت أدله جديدة لو أقتنع بها هيوافق عليكي زي في حاله 1 أو 2 ولو مقتنعش ( أو سيادتك مبعتش أدلة جديدة في خلال 16 يوم ) هتبقي مشكلة و هيروح للقرار الأسوء علي الإطلاق وهو رقم 5 .

​

​

 

5- Final Denial ... الرفض النهائي 

وده بالقطع اسوء قرار إن الأوفيسر رفض تماماً اللجوء بتاعك وده بيرجع انك مبعدتش ادلة جديدة في خلال 16 يوم من أخر قرار رقم 4 أو إن الأدلة ضعيفة ولم يقتنع بها أيضاً والقرار ده للأسف مينفعش تطعن عليه ولكن ممكن تقدم لجوء مرة أخري لأسباب مختلفة كما مذكور بالنص في موقع الهجرة الأمريكي

​

You cannot appeal the asylum officer’s decision. The denial includes any dependents included on your asylum application. If your claim is denied, you may reapply for asylum however, you must show changed circumstances that affect your eligibility for asylum.

​

​

 

دي كل القرارت اللي ممكن الأوفيسير يأخدها في اللجوء موضوع القاضي والمحكمة ده عايز حلقة لوحده لان مواله طويل ...ياريت تكون الحلقة دي مفيدة لكم .واسف مرة أخري علي التأخير وككل عام وحضراتكم بخير

 

ياريت متنسوش تمنشنوا المهتم بالأمر وترسلوا لي أي إستفسارات حضراتكم تحبوها

 لا تنسونا من صالح دعاءكم

 

أحمد عبد الباسط