top of page

البحث عن فرصة عمل بالولايات المتحدة

موضوع كامل عن البحث عن عمل ومعرفه كل انواع العمل المتاح للمهاجرين وانا تعبت لما جمعت الموضوع ده من ردود الاعضاء ومن عضو كان معانا فى الجروب القديم بس للاسف مش فاكر اسمه وكل الشكر ليه طبعا

 

وجمعت كل شئ فى بوست واحد علشان الكل يستفاد، والبوست هيكون فى تحديث مستمر لاى اضافه من اى حد ربنا يوفق الجميع، البوست عباره عن اربع اجزاء اتمنى من الجميع ان يقرأوا ويستفادوا وهيلاقى شغل باذن الله.

​

عايزين بس نأكد إن كل الكلام ده , للي موجود في أمريكا بالفعل , مش للي في مصر و عايز عقد عمل في أمريكا , لأان أصلا مفيش حاجة اسمها كدة 

​

---------------------------------------------------

الجزء الاول في موضوع البحث عن العمل فى امريكا

---------------------------------------------------

​

هتكلم اول حاجه باختصار عن الشغل التقليدى بتاع المطاعم والمولات والبنزينه المتطلبات : ( اقامه + لغه + لا تحتاج خبره )

 

اشهر الاماكن : casey's- Shapko -Walmart - Target - Sam's club - jcpenney( ويوجد مولات واماكن كثيره على حسب كل ولايه مشهوره بايه )

​

المطاعم المأكولات السريعه : mcdonalds - kentucky - taco johns - dairy queen - wendy's-subway ( طبعا تقريبا كل شارع فيه مطعم سواء اكل جاهز او مطعم لاكل العادى يعنى دى مجرد اسامى فيه كتير جدا )

​

طريقه البحث والتقديم : بسيط جدا يأما تسرش بالاسم على جوجل وتشوف اقرب مول او مطعم قريب منك وتملى ابليكشن اونلاين او تتصل بيهم او اصلا هتروح علطول لل ( customer service ) معظم اوقات السنه بيبقوا طالبين ناس

 

المميزات :

  • توافر فرص العمل فى المجال دا

  • موجود فى كل مكان يعنى هيبقى قريب منك

  • سرعه التعين ( ودى ميزه مش موجوده فى جميع المجالات فيه شغل بياخد شهور علشان تتعين )

  • طبعا مش محتاج خبره

  • مش محتاج مساعده من حد ( وهنوضح بعدين يعنى ايه ممكن نحتاج مساعده وعلاقات )

 

العيوب :

  • مش هتكتسب خبره ( ودى مهمه تحاول تسعلها فى الاول علشان تحسن وضعك )

  • الدخل بيبقى من ( 7- 10 دولار فى الساعه ) على حسب المكان وعدد الساعات

  • مرهق احيانا لانك بتبقى واقف على رجلك طول الوقت

  • بالاخص المطاعم ممكن تضطر تتعامل مع مأكولات حرام بالنسبه لينا كمسلمين ( لحم خنزير - كحوليات او خلافه )

 

​

----------------------------------------------------------------

الجزء الثانى عن طرق البحث والتقديم لوظائف للمهاجرين الجدد

----------------------------------------------------------------


​

هنتكلم عن الجزء التانى عن الوظايف الغير تقليديه ممكن المهاجر الجديد يبدأ بيها وظايف ال entry level

 

هتكلم فى الجزء دا عن الشغل التقيل كعمل يعنى هيبقى صعب شويه للسيدات production line خطوط الانتاج فى مصانع الاكل ابعد عن مصانع ومزارع الخنازير زائد انها حرام مش هتستحمل مهما كانت الفلوس المطابع - شركات البترول - مصانع البلاستيك - المخازن الكبيره الى تبع الشركات ( امازون وخلافه )

 

بيبقى فيه مصانع وشركات كتير فى كل منطقه وعلى حسب كل ولايه مشهوره بايه سواء مصانع اكل او منتجات صناعيه او بلاستيكيه او الكترونيه او شركات كهرباء مصانع التجميع الالكترونيات والتغليف كل ولايه مشهوره او كل منطقه مشهوره بحاجات معينه Construction ( البناء والصيانه الاشهر فى المجال دا والى مش بيحتاج خبره هيا صيانه الطرق كعمال او فنين- او فنى كهربى ( بيحتاج خبره باساسيات الكهربا ممكن تتتعلمها من على النت )

 

الشغل الى تبع الحكومه بتبقى مشاريع مؤقته وبيطلبوا فيها عمال لصيانه طرق كبارى والمبانى وكدا او شركات خاصه بتطلب عمال وموظفين امثله : التقديم فى الشركه دى مفتوح دائماً ومش محتاج خبره والدخل كبدايه كويس www.usicinc.source2.com

 

طرق البحث عن الشغل فى المجالات دى : الجرايد اليوميه او الاسبوعيه ( بتبقى مجانا وبتوصلك لحد البيت ) بتبص على اخر صفحتين بتلاقى ديما help wanted او ايا كان الاعلان وتلاقيهم عاده بيبقوا طالبين الشغل والوظايف دى وبيقولك متطلباتهم


 

- بتكلم مكاتب توظيف ( بس حاول تبعد من الى بياخدوا فلوس منك معظمهم بيبقوا نصابين ) الطبيعى انهم بياخدوا من صاحب العمل امثله للمكاتب دى الى بتطلب موظفين فى المجالات دى ( فيه كتير وبالبحث على جوجل هتعرف الى قريب منك بس دم انا اتعاملت معاهم شخصيا )

 

http://www.staffmanagement.com

http://www.aerotek.com/

www.spartanstaffing.com

 

البحث على مواقع الوظايف الاونلاين اشهرهم ( indeed -glassdoor ) ان شاء الله لو ليا عمر هعمل موضوع عن ازاى تبحث فى المواقع دى باحتراف شويه

 

 ينفع تروح على المصنع او الشركه علطول تسأل على ابليكشن التقديم (حاول ديما توصل للموقع الرئيسى للشركه او المصنع او المؤسسه وتتواصل معاهم مباشره )

 

المميزات :

  • توافر الشغل وتنوعه على حسب المكان

  • الدخل بيدأ من 11 او 12 وبيوصل لحد 17 كبدايه بالذات فى الصيانه وخلافه

  • بتكتسب صنعه وخبره فى البلد لانك بتتعامل مع شخصيات كتير سواء خط انتاج او غيره

  • علاقات كتير ودا مهم جدا جدا جدا

  • اى ساعه زياده عن ال 8 ساعات فى بتتحسب مره ونص او مرتين واحيانا اكتر لان الشغل مرهق

 

العيوب :

  • اكتر عيب فى الشغل دا الارهاق لان شغل بيحتاج مجهود بدنى كبير بس المقابل ليه كويس كبدايه

  • مش هينفع تطور نفسك فيه اوى الا اذا قررت تكمل فنى او انت تحمل حرفه اصلا

 

ملاحظات : لو انت اصلا فنى او معاك اى حرفه فا انت بتبحث على الرخصه الرسميه للحرفه سواء كهربى او ميكانيكا بالاخص السيارات او فنى فى المصانع التشغيل وخلافه ... ومرتبات بتبقى كويسه جدا جدا في الشغل دا.

​

​

--------------------------------------------------------------------------

الجزء الثالث البحث على وظائف للمهاجرين الجدد بالنسبه للوظايف المكتبيه

--------------------------------------------------------------------------

 

​

المطلوب

  •  اقامه

  •  لغه ( لازم تكون بتعرف تتواصل مع الناس )

  • اساسيات التعامل مع الكومبيوتر +بدون او بخبره ) التكنولوجيا داخله فى كل حاجه هنا فى امريكا فا لازم تتعلم اساسيات الكومبيوتر ويفضل تتعلم كمان ( Word -Excel ) ..

 

اشهر الاماكن :

  • شركات الاتصالات ( Verizon -sprint -AT&T- الخ )

  • شركات الانترنت ( هتكتب فى جوجل internet providers هتلاقى كل الى موجودين فى المنطقه بتاعك )

  • المصانع والشركات والمكاتب الحكوميه


 

  • وظايف ال Customer service - call center والوظايف دى متاحه طول السنه تقريبا فى الاماكن الى قولتها دى يعنى انت ممكن تروح اى شركه اتصالات او نت او شركات بتقدم خدمات وتسألهم هل بيعملوا مقابلات اليومين دم ولا لاء

  • dispatch : مراقب شاشات ( بتقعد فى مكتب تراقب عمل معين او تتابع العربيات الى تبع الشركه الى بتعمل تصليح او خلافه )

  • office support : زى شغل السكرتاريه كدا

​

افضل مكان انا بفضله فى المكاتب الحكوميه ( الحكومه بتعمل امتحان اختبار لقواعد اللغه واساسيات التعامل مع الكومبيوتر لو عديت فيه بتقدم للوظيفه دى تبع مكاتب الحكومه ) ودا موقع وظايف الحكومه بتعملك اكونت فيه وفيه وظايف كتير غير الوظايف المكتبيه بس اتأكد انها مش تبع الجيش او الشرطه لانهم غالبا بيحتاجوا جنسيه يعنى اقرأ الشروط بعنايه

 

www.governmentjobs.com

 

الشغل مع المكاتب الحكوميه هنا ليه مميزات كتير اولا المرتب واضح والمميزات زى التأمين الصحى والاجازات وخلافه بتبقى مميزه عن الشغل العادى وعمليه التعين فيها معروفه وصريحه مش بيجاملوا حد على حساب حد واى شغل تبع مكتب حكومى خبره كويسه جدا

 

sales representatives ( بس بيبقى فيه تارجت مطلوب منك وبلاش سيلز البنوك لانه كله قروض ربا وخلافه )

زى مبيعات الخطوط او الاجهزه الكهربائيه شغل السيلز فى كل حته بس انا مش بحبذه الا اذا انت حابب المجال عموما


 

لو خدت شهادات زى A+ او N+ دم شهادات التعامل مع اساسيات الكومبيوتر وتصليحه والشبكات فا دم ليهم وظايف تانيه والاجر بيزيد طبعا ( امريكا برضه بتهتم بالشهادات بس الخبره عندهم اهم ) بس انا بحاول اتكلم عن الحاجات العامه جدا الى ممكن تلاقيها فى اى مكان وبدون خبره


 

طرق البحث :

  • الجرايد اليوميه او الاسبوعيه

  • مكاتب توظيف

  • البحث على مواقع الوظايف الاونلاين اشهرهم ( indeed - glassdoor ) ابحث بالاسامى الى مكتوبه فوق واختار مكانك هتلاقى كتير جدا اقرأ الوصف كويس وشوف هما طالبين ايه وافتح موقع الشركه الرئيسى وقدم او اتصل بيهم

 

 

ينفع تروح على المكان علطول تسأل على ابليكشن التقديم (حاول ديما توصل للموقع الرئيسى للشركه او المصنع او المؤسسه وتتواصل معاهم مباشره ) شغل الكول سنتر موجود علطول فا بتروح تقدم علطول فى اى شركه

 

المميزات :

  • توافر الشغل وتنوعه على حسب المكان

  • الاهم بتتواصل مع ناس كتير ( بتقوى لغتك وبتفهم طبيعه التعامل مع المجتمع هنا بتكون علاقات كتير لان بتشتغل مع ناس كتير )

  • مفيش مجهود بدنى ( لانك قاعد على كرسى او فى مكتب طول مده العمل )

  • بتكتسب خبره كويسه فى التعامل مع المجتمع الامريكى والناس وخبره ممكن تضيفها فى السجل الخاص بيك

  • ممكن تطور نفسك وتتعين فى مكان افضل فى نفس الشركه لو عايز تكمل فى مجال التكنولوجيا عموما او الخدمات الى بتقدمها الشركه

  • الدخل ممكن يبقى كويس كبدايه على حسب المكان بس عموما بيبدأ من 10 الى 15 دولار فى الساعه

 

العيوب :

  • اكبر عيب هو الضغط العصبى والذهنى لانك ديما مطالب تتعامل كويس مع جميع انواع ال customers واحد متعصب بقى واحد رخم علشان سمعه الشركه وغير ان عاده المديرين بيبقبوا رخمه علشان تطلع احسن ما عندك بس دا عادى فى كل الوظايف يعنى

  • ممكن يبقى الدخل قليل

  • اوقات كتير بيطلبوا منك تشتغل اوفر تيم او اوقات الاجازات

 

ملحوظه : طبعا الفنين الى عندهم اى خبره فى مجال الكومبيوتر والشبكات والاتصالات بيقدموا على وظايف Technician فى المجال الى انت عندك معلومات او خبره فيه بس ابدأ بحثك بكلمه Entry level

 

الى عنده خبره فى الفوتوشوب او الديزين او اى مجالات التكنولوجيا ابدأ دور فى مجالك علطول مطلوبين جدا وبدون شهادات احيانا المهم تبقى عامل اعمال بايدك وتثبتلهم دا.

​

-----------------------------------------------------------------

الجزء الرابع من مصادر اخرى ومواقع ومن ردود الاعضاء

-----------------------------------------------------------------

 

 

​

bottom of page