ايزك هى أكبر مؤسسة فى العالم للتبادل الطلابى. و تانى أكبر مؤسسة فى العالم بعد الـ UN و موجودة فى 133 دولة.

 

ايزك بتساعك تسافر كمتطوع عشان تفيد ناس غيرك و تستفيد، يعنى بتختار بلد عايز تسافرها و تختار مشروع تشتغل عليه هناك، فى 3 مجالات أساسية للمشروع ده:

1 - Education Field:
ده مشروع بتروح تدرس فيه English _ Math _ Science _ Arts لطلبة فى جامعات أو مدارس لأطفال من سن 8 إلى 13. 

2 - Entrepreneur:
ده بتشتغل فيه فى مؤسسات على Marketing _ Sales _ Fundraising _ Project management.

3 - Health Awareness:
و ده بيعتمد أكتر على طلبة طب أو صيدلة أو أسنان، بتسافر تعمل توعية ضد أمراض مع منظمات فى الدولة دى.

بتسافر تقعد فى guest house أو هوستل تبع ايزك أو عيلة بتستضيفك طول مدة تواجدك هناك. فى أماكن للبنات بس و فى أماكن للولاد بس، و بيبقى فى ناس ايزك البلد دى بتتابع معاك طول الفترة بتاعتك و بيساعدوك فى كل حاجة تحتاجها.

​

بتسافر لمدة شهر و نص لشهرين بتتعرف فيهم على ناس من كل بلاد العالم بيشتغلوا معاك على نفس ال project بتاعك أو على projects تانية. ده بيخليك تحسن ال English بتاعك و بتتعرف على ثقافات و لغات جديدة و بتكتسب Soft Skills جديدة زى communication skills و sales skills و PR اللى اكيد بتحتاجهم و انت بتقدم على أى شغل. و ايزك بتديك شهادة بعد ما بتخلص تثبت بيها انك اشتغلت على ال project ده فى الفترة دى فى البلد دى.

​

​

و طبعاً فى الجزء التانى اللى بتستفيد فيه من سفريتك دى و هو انك بتخرج و تشوف أماكن جديدة بعد مواعيد شغلك و فى الweek end ممكن تسافر تكتشف مدن و أماكن تانية جوة البلد دى. أكيد هتقابلك مشاكل صغيرة هتضطر انك تحاول تحلها و تعتمد على نفسك و دة بيبقى جزء من ال experience اللى بتاخدها من السفر.

​

لو سنك من 18 الى 28 سنة و عايز تسافر مع مؤسسة مضمونة زى ايزك و تكسب خبرة كل الكلام دة بتحتاج انك تتواصل مع حد و بيتعملك info session عشان تعرف details أكتر عن ايزك كمنظمة و تختار البلد و ال project و تدفع 1400 جنيه مصاريف ال contract. الفلوس دى بتبقى شاملة العقد اللى بتمضيه، و الإقامة بتاعتك فى الفترة اللى بتسافر ها هناك و ال invitation letter اللى بيتبعتلك عشان يسهلك إجراءات الفيزا و كمان فى projects بتبقى شاملة الأكل أو المواصلات.

تذاكر الطيران و الفيزا و ال pocket money بيبقوا عليك، و دايما ايزك هناك هتساعدك تعمل كل حاجة بأقل budget ممكنة.

 

البلاد المتاحة: 
 

AFRICA:
Tanzania _ Kenya _ South Africa _ Nigeria _ Ghana
 

ASIA:
India _ China _ Malaysia _ Indonesia _ Thailand _ Cambodia _ Philippines _ Sir Lanca _ Pakistan
 

Latin America: 
Brazil _ Colombia _ Mexico _ Venezuela _ Peru _ Ecuador _ Argentina
 

Middle East: 
Morocco _ Tunisia _ Algeria _ Lebanon _ Bahrain _ Oman
 

Europe:
Ukraine _ Russia _ Romania _ Turkey _ Georgia _ Serbia _ Poland
 

 

أنا سافرت الصيف ده India مع ايزك و روحت أماكن كتير هناك زى Navi Mumbai و Mumbai و Goa و Jaipur و Jodhpur و Agra(اللى فيها Taj mahal). شوفت ثقافات و ديانات كتيرة و كسبت صداقات مع ناس من كل بلاد العالم. و استمتعنا ب activities كتير هناك و الطبيعة اللى فى كل مكان هناك و ال waterfalls و غيرهم .
 

 ===============================

​

​​

ايزيك ما بين الحقيقه والوهم و محشي ورق العنب 
عشان نجيب النهاية في حوار ايزيك ده للابد 
 

ايزيك مش كلها وحشه ليها فوائد بس الانسان المفروض يبقي ذكي ويعرف امتي يطلع معاهم وامتي يفكس ليهم 
.

 

الاول لازم تعرف انك واخدهم كوبري وغرضك من التعاقد معاهم هو " كوبري " مجرد مصلحه عايز تنجزها عشان تسافر

 

مفيش الهري بتاع عايز اروح عشان تبادل الثقافات واني استفيد خبرات تطوع و منظمه شبابيه وملوخيه وعدليه وبتنجانيه والكلام الحمصي اللي ميدخلش ذمتي ب ربع جنيه مخروم دة

 

لو اتفقنا علي المبدأ دة وانهم مجرد كوبري للسفر كمل قرايه البوست لكن لو مش متفق مع المبدأ دة ومتمسك بالشعارات العقيمه بتاعه ابراهيم الفقي يبقي اعمل سكرول داون عشان هتضيع وقتك ع الفاضي

.

 

ايزيك مفيدة في 3 حالات : 
 

1- رايح بلد بتحتاج دعوة والدعوة غاليه جدا .. زي روسيا / اوكرانيا / رومانيا .. وزي تركيا ( لو انت ف باسبورك طالب او حاصل علي )

لو انت عملت سيرش بسيط علي اسعار دعوات روسيا او اوكرانيا او رومانيا او دعوات تركيا هتلاقي انك تتعاقد مع ايزيك ارخص بكتير جدا من انك تعمل دعوة مع شركه سياحه 
يبقي من الذكاء هنا انك تدفع 1400 جنيه وتسافر من خلالهم بس احسن ما تدفع 100 او 150 دولار اونطه مع شركه سياحه

واحنا اتفقنا فوق انك واخدهم كوبري يعني مجرد تقضيه مصالح .. وهنا مصلحتك اكيد معاهم 
.

 

2- في حاله البنات اللي لسه ف الجامعه 
بصوا 99.9% من اهالي بنات مصر مبيرضوش يخلوا بناتهم تسافر بلطيم حتي .. الحل الوحيد واللي البنات كلها بتعملها عشان يسافروا برا مصر انها ب " تحور " علي اهاليهم انهم طالعين مع منظمه عالميه لبتادل الثقافات تبع الجامعه ودي فرصه ذهبيه للتطوع والانترشيب و البلا بلا بلا بلا بلا بلا اللي انتوا بتقولوله لاهاليكم دة 
ف هنا ايزيك احسن " كوبري " للبنات اللي اهلها مبيوافقوش علي السفر .. 
.

3- لو ورقك ناقص 
معندكش حساب بنكي او مبتشتغلش او مش متقيد في اي جامعه 
وقتها دعوة ايزيك والتعاقد معاهم بتغني عن كل دة احسن ما تضرب كشف حساب وهمي وتتحبس او تزور اتش ار ليتر وتتحط بلاك ليست .. في الحاله دي لازم تسافر معاهم والا مش هتعرف تسافر ابدا ..
.

امتي ايزيك بتكون نصب ؟ لما انت تكون مغفل  

ازاي تكون مغفل ؟؟ 

في 3 حالات برضو :

​

1- انك تروح تتعاقد معاهم علي بلد اساسا ملهاش فيزا ..
بلد من غير فيزا زي ماليزيا مثلا او اندونيسيا او بلاد بفيزا اونلاين زي جورجيا او سيريلانكا 
يعني تذكره طيرانك وتخلع من مصر بدون اي ورق زيادة .. يعني بلاد ملهاش اي رسوم او فلوس هتدفعها هناك او اي ورق هتقدمه في سفاره .. تروح انت يابني ادم يا اذكي اخواتك و تدفع معاهم 1400 جنيه اونطه ليه !! ما تسافر يا بني ادم ياللي ربنا ميزك بالعقل لوحدك ومتدفعش اي حاجه ! مهي من غير فيزااا يعني ببلااااااااااااااااش 

من غير فيزاااا يعني ببلااااااااااااش 
 

عليا الطلاق من غير فيزاا يعني ببلاااااااااااااااش 
 

يبقي هتحتاج ايزيك في ايه هنا ! ليه عايز تطلع معاهم في الحاله دي !! 
 

وبتاخد ختم في المطار يسمحلك تقعد هناك 3 شهور مجانا ( لو ماليزيا ) و شهر مجانا وينفع تجددها شهر تاني ( لو اندونيسيا ) لكن ايزيك اخرهم شهر ونص تطوع .. يعني حتي لو الحجه بتاعتك ان المدة بتاعه ايزيك كبيره , الحجه هنا مش نافعه العب غيرها 
.

​

2- انك تكون طالع علي اساس انك هتشتغل وتجيب فلوس ..

بالعقل كدة يابني ادم ياللي ربنا ميزك بالعقل .. بلد زي اندونيسيا مثلا اهلها مش لاقيين العيش الحاف وبيشحتوا في الشوارع هتروح انت بقي يا اجنبي ياللي جاي من دوله في العالم التالت بكل جبروت عشان تشتغل وتجيب فلوس تبع انترشيب كام شهر في شركه هناك !

​

مهو معلش القانون لا يحمي المغفلين .. ازاي الوم ايزيك علي سذاجتك دي ! واحد يجي يقولك انا كنت رايح اشتغل في الهند مثلا كام شهر تبع ايزيك وهما ضحكوا عليا !

​

لا يا راجل ! ضحكوا عليك ؟؟

​

يعني انت كنت متخيل ان الهند اللي فيها مليار بني ادم ونصهم مش لاقيين شغل واهلها بيلفوا علي دول الخليج يشتغلوا خدامين .. شويه ف الامارات وشويه في السعوديه وشويه في البحرين ... هتروح انت بكل بساطه عشان تشتغل في الهند وتجيب فلوس ! مهو اذا كان اللي بيتكلم مجنون فالسامع عاقل

​

لو هما نصابين وبيوعدوك بحاجات غلط .. انت معندكش عقل تفكر بيه ؟؟ معندكش عقل توزن بيه الامور وتعرف الصح من الغلط ؟؟

​

متلومش الناس علي انك مغفل انا اسف يعني 
.

​

3- ايزيك من اسمها منظمه شبابيه .. يعني التعامل بتاعك كله هيكون مع شباب مكملوش 25 سنه 
يعني بالعقل بتتعامل مع شباب في سنك متخيل مثلا هيقعدوك في فندق 5 نجوم والخدمه هتكون فول بورد ! مهو اكيد التعامل هيكون غير احترافي بالمره وهتلاقي ملايين من الاخطاء .. 

​

​

اكبر نقطه بقي بجد دي لازم نقف عندها 

الناس اللي فاكره ان في حد في الزمن دة هيخدمك مجانا او بمقابل رخيص عشان بيحبك وهيموت وعايز مصلحتك

اكيد الناس اللي بتفكر كدة عايشين لسه في مسلسل زيزينيا او ارابيسك او المال والبنون ..
يا ابني يا حبيبي فوق مفيش حد هيعملك مصلحه الا لما ياخد قصادها مصلحه .. عايز تعيش ف الوهم عيش بس انت مغفل مترجعش تشتكي وتعيط ف الاخر .. 
.

دي كل الخلاصه في موضوع ايزيك .. ما له وما عليه .. شوف مصلحتك فين واعملها .. مصلحتك معاهم دوس معاهم .. مصلحتك مش معاهم يبقي متروحش معاهم

اقعدوا بالعافيه