طيران قليل الميزانية
الطيران منخفض التكاليف : يعني الرخيص
ايوا رخيص يعني كام برضه ؟
السلسله ديه هدفها زياده وعي اي واحد عاوز يسافر لاي مكان .
السلسله ديه تقدر تساعد اي حد من اي جنسيه للسفر لأي مكان
.
العالم كبير وجميل . اوروبا و امريكا واسيا وافريقيا وحتى استراليا كلها اماكن رائعه للسفر والسياحه .
احنا ضد فكره ان مكان افضل من مكان . كل مكان له جماله . تاريخه . شعبه . حاجاته اللي تميزه عن اي مكان تاني.
احنا دايماً بندي امثله عن اوروبا لخبرتنا الكبيره في السفر ليها وكمان فكره ان فيزا واحده تديك الإمكانيه لزياره 28 دوله كلهم جمب بعض وهي دول الإتحاد الأوروبي والتنقل بينهم زي التنقل ما بين المحافظات عندنا في مصر ده بيدينا حريه الانطلاق اكتر.
في الحقيقه احنا لينا هدف ونيه شخصيه من السلسله ديه وهو مساعده كل اتنين مخطوبين عاوزين يقضوا شهر العسل او كل زوجين عاوزين يكسروا الروتين والملل بتكلفه بسيطه.
أما الهدف من الحلقه ديه هو انك تعرف ان الدنيا اتطورت . . واحنا قاعدين
ده باختصار ملخص المشهد الحالي في موضوع شراء تذاكر الطيران من خلال الانترنت
مش بس التذاكر ده كمان النقل الدولي بشكل عام تطور سواء كان نقل بحري او بري او جوي
باللنسبه لموضوعنا النهارده هو تذاكر الطيران الرخيصه .
حابب الأول احكلكم ايه اللي حصل في مجال الطيران المدني والسياحي خلال ال 25 سنه اللي فاتت
على مستوى عالمي لقيت تقرير رسمي ل (أياتا) وهو الاتحاد الدولي للنقل الجوي صرح ان عدد المسافرين لسنه 2013 كان 8 مليون شخص "يوميا" باجمالي سنوي 3,1 مليار راكب سنوي
اما على مستوى عربي شركه زي طيران الامارات اللي بدأت من حوالي 25 سنه بطيارتين بس ولما قعدت ادور على احصائيات وفتحت التقرير السنوي بتاعهم لقيت ان في نوفمبر 2014 عدد الطيارات تعدى ال 280 طياره بقيمه 138 مليار دولار وفي السنه الماليه 2013 /2014 نقلت اكتر من 44 مليون مسافر و اكتر من 2 مليون طن شاحنات
الطيران بقا استثمار دول واستثمار ناجح جدا
عشان الدنيا بقت قريبه فعلا والعالم بقا مفتوح والطلب بقا زياده جدا على تنقل الافراد
وده خلق منافسه ضخمه , اي منافسه كبيره بتكون دايماً في صالح المستهلك
عروض الطيران ومواقع الطيران بقت من اكبر الاستثمارات التنافسيه في العالم
ليه ؟ لانها خدمه عالميه . مش محليه . يعني ممكن طيران زي الامارات يتنافس مع طيران الهند على قيمه تذكره و جوده خدمه
مبقاش فيه حدود لشركات الطيران مع وجود اتفاقيات عالميه بتسمح باستخدام اي مطار في العالم طالما بتتبع الاجراءات والسياسيات
يعني ممكن طيران زي الامارات يكون بيدير رحلات في امريكا الشماليه والجنوبيه بعيد خالص عن دوله الامارات ذات نفسها وبينافس الطيران الامريكي ذات نفسه.
الشركات الكبيره ديه في وقت التنافس العالمي ده بتضطر انها تاخد اتجاهين عشان تكسب في المنافسه الكبيره ديه
يا اما تزود جوده الخدمه . وسمعنا عن الطيارات ذات الخدمات المرفه والاسرع واللي فيها انترنت واللي فيها مطعم واللي بأدوار متعدده واللي فيها تلفزيون خاص بيك وقوائم افلام وبرامج واغاني زي ما تحب واللي فيها كرسي مساج . واللي فيها كرسي يبقا سرير .
يا اما تقلل من سعر التذكره بشكل منافس يعمل عمليه جذب للعميل وده بتعمله الشركات الكبيره دايما في بدايه طرح اسعار رحلاتها
مع كل ده كان فيه احتياج اكبر لرحلات بأسعار اقل
الاحتياج ده عمل مجموعه ضخمه من شركات الطيران الجديده اللي تملكها افراد . شركات . مجموعه مستثمرين ودول
وهو الطيران منخفض التكاليف Low Cost Flights
الشركات ديه بقت ضخمه لدرجه انها بقت تاكل من الكيكيه الكبيره بتاعت الشركات العالميه في ديسمبر 2014 بقا فيه 210 شركه طيران منخفضه التكاليف حول العالم . يعني ثوره في عالم الانتقال . تخيل بقا الفرص .
فرص خلت واحد انجليزي اسمه "سام" عايش و بيشتغل في لندن انه ينقل اقامته لبرشولنه في اسبانيا ويروح يوميا من برشلونه لشغله في لندن بالطيران وبيعمل كدا بقاله سنين والسبب الرئيسي ان كدا التكلفه اقل . كإيجار شقه وكمصاريف يوميه عامه مع وجود تذاكر سفر رخيصه جدا مع العلم ان الرحله تقريبا ساعه ونص.
طبعا احنا مش مع فكره عدم الاستقرار ديه لكن بنوضح ان الموضوع بقا موفر لدرجه ان واحد عايش في بلد غير اللي شغله فيها وكل يوم يروح لشغله بالطياره
خطوط الطيران المنخفضه التكاليف بقت كمان ممكن تتحكم في السوق لانها بتضرب السوق بشكل كبير اما بحسن اداره و عمليه تسعير محترمه او بسوء اداره وعلميه تسعير خاطئه
طب ليه الاسعار بتكون رخيصه ؟ مش بيخسروا ؟
الاسباب كتير وهنقولها بس الموضوع بدأ في امريكا تحديدا في التسعينات ما بين الولايات وبعضها مع شركه ساوث ويست الشهيره ومع نجاح الفكره بشكل رهيب اتنقلت العدوى لاوروبا مع ارخص خطوط طيران منخفضه التكاليف وهي ايزي جت الانجليزيه سنه 2000 وبعدها اتنقلت لاسيا مع شركه طيران اير اسيا واخيرا الوطن العربي مع خطوط طيران كتيرا زي العربيه و الجزيره وناس وفلاي دبي
طب الشركات ديه بتقلل السعر ازاي ؟
- تكلفه الانطلاق او الوصول من والى مطار رئيسي بتكون مكلفه وهما استغنوا عن الموضوع ده. يعني الرحله اللي بتطلع من او بتوصل الى مطار رئيسي زي مطار القاهره الدولي بتكون تكلفتها على شركه الطيران اكتر بكتير من الانطلاق او الوصول لمطار ثانوي زي مطار برج العرب في اسكندريه او الغردقه او شرم الشيخ .
- نوع الطيارات اقتصاديه . يعني تمن الطياره كأصول ثابته اقل بكتير من اي طياره كبيره وطبعا مع تزايد احتياج شركات الطيران على طيارات من النوع ده اتأسست مصانع كامله بتقدم طيارات رخيصه التكلفه .
- كمان من الاسباب المهمه ان المقاعد على الأد . يعني من الاخر الناس عمليين عاوز طيران رخيص متقوليش بقا عاوز امدد وشاشه خاصه بيا . هو فيه مكان جيد تقعد فيه كام ساعه وشكرا . كمان مفيش وجبات . الوجبات بتبقا بفلوس . كمان الوزن قليل ممكن من 10 ل 20 كيلو ولو عندك وزن زياده ادفع . مع ان بعض الشركات ديه وصلت ل 40 كيلو وزن في ظل المنافسه الكبيره زي طيران الجزيره الكويتيه.
- مواعيد مختلفه : هتلاقي اغلب مواعيد الرحلات يا اما متأخر او بدري اوي عشان بتكون المطارات خاليه في الوقت ده وبيكون تكلفه دفع الرسوم اقل في اوقات الذروه.
- الترانزيت Transit : ديه كلمه انجليزيه معناها العبور . يعني الرحله مش بتكون مباشره للجهه اللي مسافر ليها . الرحله بتقف في مطار في النص لعدد ساعات بتكون واضحه وانتا بتعمل الحجز .
يعني الموضوع عامل زاي ان بدل ما تاخد تاكسي من اول البلد لاخرها بسعر كبير . لا خود ميكروباص من اول البلد وبعدين تنزل في نص البلد تستنى شويه عقبال ما يجي ميكروباص تاني خالص رايح لاخر البلد وبكدا هتوفر مبلغ كبير .
ديه كانت اهم الاسباب اللي بتخلي سعر رحلات الطيران منخفضه التكلفه مناسبه جدا لناس كتير
دلوقتي هنتكلم عن ايه هيا وسائل او طرق حجز تذاكر للرحلات اللي من النوع ده
مواقع المقارنات :
يعني ايه مواقع المقارنات ؟
الاحتياج . دور ورا اي بزنس ناجح هتلاقي كلمه الاحتياج هي اللي متصدره الموقف. وديه معلومه مهمه لأي حد عاوز يعمل بزنس صغير ويكبره . متعملش منتج او خدمه انتا حاببها او مقتنع بيها . اعمل بزنس او خدمه او منتج الناس عاوزاه . عشان كدا علميه البحث هو اول واهم عامل في اختيار نوع البزنس الخاص بيك.
مع زياده خطوط الطيران منخفضه التكاليف المسافرين بقوا بيبحثوا بشكل كبير جدا جوا المواقع الخاصه بكل شركه طيران
يعني مثلا كان المسافر اللي عاوز يحجز افضل سعر لازم يفتح حوالي 10 مواقع قدامه ويقارن ما بينهم وديه كانت عمليه معقده وطويله خاصه مع بطء سرعات الانترنت في بعض الدول والمدن اللي خلى عمليه الحجز تبقا معقده جدا لاي حد مش متخصص في الحجز عن طريق الانترنت.
الاحتياج لموقع الكتروني او تطبيق على الموبايل يقدر يقارن بين كل شركات الطيران لوحده ويديك نتائج سريعه بقا كبير جدا .
وقد كان
مواقع المقارنات لاحصر لها . كتيرا جدا جدا . بالمئات . وفي منها مستويات من المبتدئين وحتى مواقع لخبراء السفر اللي بيخططوا لسفر حول العالم لمدد طويله تتعدى ال 3 سنين .
اهم وافضل موقع للمبتدئين لسهوله تصميمه وبساطه اجراءاته وذكاء بحثه ومرونته هو skyscanner
ومع ذلك انا ضد انك تعتمد على موقع او تطبيق واحد وده عن تجربه
وديه قائمه باهم وارخص مواقع حجز الطيران :
www.skyscanner.com
www.kayak.com
www.priceline.com
www.expedia.com
www.cheaptickets.com
www.cheapoair.com
www.easyjet.com
www.ryanair.com
طريقه الحجز :
اجراءت الحجز هتنزل في البوم مصور في الحلقه الجايه . خطوه بخطوه بالصور هنتكلم عن ازاي ندور صح لحد اجراءات الحجز الفعليه والدفع اون لاين . 30 صوره توضيحيه . تحت كل صوره شرح مفصل ازاي تنفذ الاجراء وايه الخطوات اللي مطلوب منك تعملها
كمان موضوع الصور ده هيتيح امكانيه انك تستفسر عن اي خطوه مش واضحه في التعليقات اللي تحت الصوره وبالطريقه ديه هقدر ارد على الاستفسارات ديه عشان الفائده تعم الكل ان شاء الله.
نصايح وانت بتحجز تذكره :
- انسى مكتب الحجز اللي جمب بيتكم او اللي صاحبك او ابوك بيقولك عليه ان اسعاره لقطه وانه هيظبطك
خلاص . هتحجز تذكرتك بنفسك . الموضوع مش صعب . هي شويه اجراءات هتتعلمها وهيكون عندك الحريه انك وانتا قاعد في اي مكان على اللاب توب او الموبيل تحجز تذكرتك .
- احجز بدري : من شهرين ل 3 شهور لان في الوقت ده هو افضل وقت لحجز تذكره طيران بسعر رخيص جدا . اثبتت دراسه لمجله النيويرك تايمز قسم السفر ان افضل موعد لحجز تذكره هو قبل الرحله ب 81 يوم بالظبط
- حدد ميعاد سفرك واجازتك على اساس تذكرتك : مش العكس . يعني مش تاخد اجازه وتوقعها وتظبط امورك كلها على ميعاد معين وبعدها تروح تدور على تذكره مناسبه في الوقت ده . انتا كدا بتحدد نفسك بشكل كبير . اعمل العكس . دور على اقوى عرض طيران موجود وعلى الاساس ده احجز التذكره وقدم اجازتك وطبعا ده بالتنسيق مع اللي مسافر معاهم وشغلك .
- التخطيط : كل ما خططت اكتر كل ما اختصرت وقت ومجهود ومصاريف اكتر . خطط كويس اوي لرحلتك . التخطيط للرحله بقا هوايه عندنا. البحث والقرايه عن المدن والدول اللي هنزورها . متابعه احدث العروض الموجوده . متابعه مواقع السفر المفيده واللي بتديك معلومات قيمه جدا بشكل مجاني بقا هوايه عندنا.
- ابحث ثم ابحث ثم ابحث ثم ابحث : متزهقش . متملش . مش من اول ماتدخل على الموقع او التطبيق على الموبايل ومتلقيش سعر كويس تفقد الامل . لأ . فيه مواقع تانيه كتير ولازم تحاول ايام كتيرا عشان تلاقي افضل عرض مناسب ليك ولميزانيتك.
- مش دايما تعتمد على مواقع المقارنات : لما تلاقي سعر جيد لتذكره شوف ايه هيا شركه الطيران وادخل على الموقع الرسمي لشركه الطيران ديه وشيك على سعر الرحله من داخل الموقع . لان الشركات بتعمل عروض بشكل مستمر لجذب العملاء للدخول للموقع بتاعها.
- سجل في خدمه العروض الخاصه للبريد الالكتروني : في كل موقع الكتروني لشركه طيران فيه خدمه مجانيه تحط ايميلك الخاص ولما بيكون فيه عروض بيبعتولك ايميل ينبهك ان فيه عرض الفتره ديه .
- احسبها صح : مش ارخص تذكره هي انسب تذكره ليك . ممكن التذكره تكون رخيصه جدا بس الاقامه فيها غالي . بمعنى انك ممكن تحجز تذكره اغلى شويه بس لمدينه او دوله سعر الاقامه فيها مناسب جدا ليك. عشان كدا لازم تدور بشكل مستمر على كل حاجه .
- ابعد عن الموسم : احجز يا اما قبله يا اما بعده علطول . الموضوع ده كفيل انه يوفر عليك فلوس كل حاجه . التذاكر . الاقامه . الاكل والشرب . الموضوع عرض وطلب . كل ما الطلب كان كبير كل ما السعر كان اكبر . وكل ما الطلب كان قليل كل ما السعر كان اقل .
- الترانزيت : شرحنا يعني ايه ترانزيت بس عاوز اقولك انه بيوفر ساعات 50% من سعر التذكره و خلي بالك الترانزيت ممكن يكون ممل جدا او ممتع جدا . انتا وذكائك وتخطيطك . ازاي ؟
ممل بانك تعود مثلا 8 ساعات في مطار مش عارف تطلع منه عشان معندكش فيزا ليه او الفيزا بتاعته غاليه او ان المطار بعيد جدا عن اي مدينه . تخيل نفسك منتظر 8 ساعات في مطار برج العرب .
وممتع انك ممكن تنزل في مطار مكانه رائع . تخيل عندك 8 ساعات تستمتع بجو شرم الشيخ او الغردقه او اسطنبول.
- الضريبه والخدمات الاضافيه : في بعض شركات الطيران بتلاقي ان سعر التذكره بقا اغلى وانتا جاي تدفع . وده بيكون لسببين اما ان يكون السعر المعلن الاساسي مش متضمن الضرايب وديه حاجه متقدرش تشيلها وعشان كدا لازم لما تلاقي تذكره مناسبه تدخل وتكمل الاجراءات كانك هتدفع عشان تشوف هل هيضيف مبالغ اخرى ولالأ . السبب التاني انه يكون حاطط ليك خدمات زي تامين السفر او وجبه او كرسي مميز وانتا طبعا مش محتاج اي حاجه من دول فا شيل الخدمات الاخرى عشان السعر يرجع للسعر المناسب ليك.
- ابعد : عن مواعيد الاجازات في حجز التذكره. احجز في وسط الاسبوع بلاش ايام السبت والحد لانها الاجازه الرسميه لدول العالم الغربي ده لو انتا مسافر هناك . وبلاش الجمعه والسبت عشان الاجازه الرسميه للعالم العربي.
- يوم التلات : هو انسب يوم حجز تلاقي فيه حجز تذكره بسعر جيد لان يوم الاتنين بليل بيكون بدايه طرح اسعار الرحلات وبتدأ بعدها المنافسه على اقل الاسعار ومع نهايه الاسبوع بتكون كل الكراسي اللي باسعار رخيصه جدا اتبعات .
- الساعه بتفرق : يعني ممكن دلوقتي تدخل تلاقي سعر رخيص جدا لتذكره وبعدها بساعه او اتنين تلاقي السعر بقا اغلى ومش مناسب ليك لان بيكون الاقبال على شراء التذاكر الرخيصه كبير وبتخلص بسرعه . عشان كدا لازم تخطط كويس.
=========================================
يعتقد الكثيرين ان تكاليف السفر غالية لان ايجاد تذكرة رخيصة شيئا صعبا. الخبر السار هنا انه بامكانك ان تجد تذاكر طيران رخيصة الى اماكن كثيرة، ولكن الخبر الغير سار هو انه عليك بذل بعض المجهود وعمل بعد التضحيات حتى تتمكن من ايجاد تذكرة رخيصة.
لحسن الحظ ان مواقع مقارنة اسعار تذاكر الطيران اصبحت في متناول الجميع من خلال الانترنت، واصبح ايضا الشراء اونلاين اسهل و أأمن بكثر عن السابق. بامكانك ان تفتح مكتب حجز تذاكر طيران وانت جالسا على القهوة.
يتحدث الجميع طوال الوقت عن مواقع الحجز الرخيصة المتعددة، ولا نعلم ايها افضل واسهل في الاستخدام. تتشابه جميعها في ما بينها في طرق البحث وعرض النتائج وطريقة الشراء. ولكن قبل ان اخبرك بمحركات البحث الاكثر كفائه في ايجاد التذاكر، فعليك ان تعلم بعض القواعد المهمة قبل ان تجوب محركات البحث بحثا عن تذكرة طيران رخيصة.
(ملحوظة: الاسعار في المقالة قديمة، ولكنها امثلة لتوضيح النقاط الثمانية)
١ـ مرونة الوقت
يجب ان تتمتع بمرونة كافية في اوقات سفرك حتى تنجح في ايجاد تذاكر رخيصة. قد تضطر لان تأجل ميعاد سفرك عدة أيام، او ان تسافر في شهر اغسطس بدلا من يوليو، او ان تختار السفر منتصف الليل بدلا من الاوقات المريحة في الصباح او الظهيرة. حين تتمتع بمرونة في اوقات سفرك واجازاتك، سيساعدك ذلك كثيرا في ايجاد ارخص تذكرة.
٢ـ مرونة مطارات المغادرة والوصول
يجب ان تكون مرنا بالقدر الكافي في مطارات السفر والوصول. قد تجد تذاكر الى اوروبا ارخص من السفر من القاهرة بمقدار 75٪ من مطارات الغردقة او شرم الشيخ. قد تصل الى احد المطارات البعيدة في العاصمة الانجليزية لندن بدلا من مطارها الرئيسي هيثرو حتى توفر 50٪ من تكلفة الطيران الى لندن.
ستجد مثلا طائرة من الطيران الرخيص easyjet تطير بين يومي ٢ مارس الى ١٢ مارس من مطار الغردقة الى جنيف في سويسرا بحوالي ٨٤٠ جنية، مباشرة في حدود الخمسة ساعات. عند مقارنة نفس الفترة بالسفر من القاهرة، تجد ان ارخص تذكرة ترانزيت بحوالي ٣١٦٠ جنية.
٣ـ مرونة في حقائب السفر
جميع شركات الطيران الرخيصة لا توفر لك خدمة شحن حقائب سفرك مجانا. عليك اذا ان تتعلم كيف تسافر 10 ايام الى ايطاليا والا تحمل معك الا حقيبة يد واحدة وزنها 10 كج فقط، حتى تتمكن من السفر الى ميلانو مثلا ب100 يورو على متن شركة رخيصة مثل easyjet. اذا اردت ان تأخذ حقائب كبيرة، عليك اذا ان تشتري لها مكانا، قد يكون اغلى ثمنا من تذكرتك الشخصية.
٤ـ مرونة في ساعات الانتظار
احيانا تُفاجئ بفرصة اجازة لم تحجز لها تذكرة طيران مبكرا، فتجد ان السفر المباشر لوجهتك المرغوبة قد اصبحت اسعار تذاكرها غالية جدا لان جميع ادرجات السياحية الرخيصة قد نفذت. سيكون الارخص حينها ان تسافر ترانزيت عن طريق بلد آخر. قد تقصر ساعات الانتظار في مطار الترانزيت وقد تطول. كن مستعدا اذا اردت ان توفر 1000 الى 2000 جنية في التذكرة ان تنتظر في المقابل عدة ساعات.
قد تقرر فجأة الذهاب الى باريس لمدة عدة ايام، فستجد ان التذكرة في خلال الايام القادمة قد تصل الى ٥٠٠٠ او ٦٠٠٠ جنية اذا سافرت مباشرة اليها من خلال EgyptAir او Air France. ولكنك اذا سافرت ترانزيت من خلال الشركة الاردنية او الايطالية، فان سعرالتذكرة سيكون اوفر بحوالي ٢٠٠٠ الى ٣٠٠٠ جنية، ولكن مع ساعات انتظار طويلة. القرار لك وقتها، ايهما اقيم، وقتك وراحتك ام نقودك؟
٥ـ الحجز مبكرا والبعد عن المواسم
اود ان اذكرك بان التذكرة السياحية بها عدة درجات متفاوتة الاسعار، كلما ابكرت في حجز تذكرتك، كلما وجدت اسعار ارخص. ايضا كلما ابتعدت عن الويك اند والاجازات الرسمية والمواسم، فان فرصك لايجاد تذكرة رخيصة كانت افضل. بعض الدراسات تشير الى ان يومي الثلاثاء والاربعاء هم الارخص للسفر عامة.
٦ـ المرونة في اتجاه رحلتك
يجب عليك البحث على عدة اتجاهات لخط سير رحلتك. قد تقرر زيارة فيتنام يوما ما بعد ان سمعت عنها الكثير من اصدقائك. قررت ان تبدأ رحلتك من العاصمة الجنوية “هوتشي منه” وان تقوم بعمل رحلة بمحاذاه الساحل الشرقي للبلد، حتى تصل الى العاصمة “هانوي”. ابحث عن تذاكر ذهاب وعودة للمدينتين بترتيبين مختلفين. قد تجد انه من الارخص ان تصل فيتنام من خلال الشمال و ان ترحل منها من الجنوب.
استعان بي صديق ذات مرة لحجز تذكرة طيران لزيارة اسبانيا. حجزت له تذكرة أرخص ٢٠٠٠ جنية عندما عكست له برنامج الرحلة ليبدأ من مدريد وان يعود من برشلونة بدلا من العكس. عليك انت ايضا تجربة عدة خلطات من الوجهات حتى تجد الارخص لرحلتك.
٧ـ لا تعتمد على موقع بحث واحد
لا يوجد موقع واحد بامكانك ان تعتمد عليه. عليك ان تجرب اكثر من موقع واكثر من طريقة بحث، لان كل موقع له مميزاته وخصائصه في اساليب البحث. فكلهم يعطون مؤشرات ومعلومات قيمة عن جداول رحلات الطيران. تذكرة الطيران ما هي الا سلعة. يسوق كل موقع نفسه على انه الارخص والافضل والاسهل. اسعار التذاكر ديناميكية و تتحرك سريعا، عليك ان تزور مواقع البحث اكثر من مرة خلال عملية البحث.
بحثت ذات مرة عن تذكرة من القاهرة الى باريس على اربعة مواقع في نفس اللحظة، وكلها مواقع مشهورة ذات محركات بحث قوية. لم يعطني نتائج جيدة غير موقعين من الاربعة. لسبب ما مثلا فشل محركي الاكثر استخداما في البحث Skyscanner عن ايجاد الا تذكرة من الخطوط الاماراتية تتخطى ال٨٧٠٠ جنية، بينما استطاع Kayak ان يجد تذكرة على الخطوط الاردنية في حدود ال٣٢٠٠ جنية.
فشل ايضا المحرك الشهر Expedia في ايجاد تذكرة اقل من ٨٠٠٠ جنية، بينما نجح Orbitz في ايجاد نفس التذكرة التي وجدها Kayak على الخطوط الاردنية.
٨ـ اشتري من الموقع الرسمي لشركة الطيران
في اغلب الاحيان ، اشتري تذكرة الطيران من الموقع الرسمي لشركة الطيران، لانها توفر اختيارات اخرى لا تظهر في مواقع البحث، وتوفر لك مزايا مجانية تحاسبك عليها مواقع الحجز الاخرى، وفي النهاية تكون التذكرة ارخص.
بحثت عن تذكرة الى من القاهرة الى الهند ذات مرة على موقع Skyscanner، واقترح على تذكرتين رخصيتين على متن شركة الاتحاد، ولكن من خلال موقعين حجز مختلفين Travelstart و GotoGate. استمريت في عملية الشراء من خلال الموقعين و انتهى بي الامر ان ارتفع سعر التذكرة حوالي ٨٠٠ الى ١٢٠٠ جنية عن السعر الرسمي المتوفر مباشرة من الموقع الرسمي لشركة الاتحاد.
المواقع المقترحة للحجز من محركات البحث عادة ما تقوم “ببيع الهواء” كما نلقب النصابين. موقع GotoGate الذي يقترحه دائما Skyscanner يعرض عليك خدمة تغيير التذكرة مقابل رسوم تأمين قدرها ٩٩ يورو. بامكانك اصلا ان تغير التذكرة الاصلية على موقع الاتحاد مقابل ٦٠ دولار، اذا احتجت ان تغيرها، ولكن هذا الموقع يعرض عليك دفع غرامة التغيير “الآن” ولكن تحت مسمى انيق يدعوه Flexible Ticket.
تجد مثلا بعد ان تذهب الى موقع Travelstart لشراء التذكرة المقترحة من Skyscanner ان السعر قد تغير اذ فجأة وزاد بمبلغ ٨٠٠ جنية. بعد ثواني معدودة فقط. فتعتقد ان الاسعار تتغير حقا وتنفذ سريعا، فتهرول لشرائها قبل ان تزيد مبالغ اخرى.
يعرض عليك الموقعين خدمات اخرى مثل امكانية اختيار الكرسي، الوجبة، تأمين على الحقائب، ولكن مقابل مادي لكل خدمة منفصلة. الموقع الرسمي ايضا لشركة الاتحاد يتيح لك اختيار الكرسي والوجبة مجانا، بينما التأمين على ضياع الحقائب هو امر مفرغ منه في كل شركات الطيران الدولية.
احيانا، توفر هذه المواقع حقا تذاكر ارخص من مواقع شركات الطيران الرسمية. عليك قراءة الشروط جيدا قبل الدفع حتى تتأكد من انها توفر لك سعرا منخفضا. اشترى صديق لي تذكرة للبرازيل من موجع gotogate على الخطوط الاثيوبية، ارخص ٢٠٠٠ جنية من موقع الخطوط الاثيوبية نفسها. ظل متشككا حتى بعد ان اشتراها واتصل بالخطوط الاثيوبية للتاكد من الحجز.
================================
طول عمرنا نسمع عن حاجة في تذاكر الطيران اسمها NO SHOW , لكن حد قبل كدة سمع عن الGo Show ؟
يعني ايه NO SHOW ؟
تذاكر اغلب شركات الطيران بيكون فيها ميزة No Show …. يعني لو حصل ليك ظروف وملحقتش طيارتك في ميعادها, التذكرة مش بتروح عليك, بتدفع غرامة علشان “لم تظهر يوم رحلتك” No Show Fees . تقدر بعد كدة بعدها بيوم او يومين او حتى سنة انك تاخد رحلتك في اي وقت يناسبك.
خد بالك اغلب شركات الطيران الاقتصادي في اوروبا ,Easy Jet & Ryan Air مثلا, لايوجد عندهم غرامة No Show. يعني لة فاتتك الطيارة يبقى راحت عليك.
غير غرامة No Show ممكن تدفع فرق درجة التذكرة. يعني لو كنت شاري التذكرة بدري على كلاس رخيص وجيت تاخد تذكرة غيرها في يوم تاني وملقتش نفس الكلاس, هتدفع “فرق الكلاس” كمان.
تأكد من وجود غرامة No Show عند شرائك اي تذكرة طيران من المواقع الوكلاء اونلاين (Skyscnner Agents)
طيب عرفنا دلوقتي No Show , معناها ايه بقى Go Show ؟
يعني ايه GO SHOW ؟
هي غرامة لتغيير ميعاد تذكرة الطيران ايضا, ولكن في الاتجاه المعاكس, من المستقبل الى الآن ولا يمكن تفعيلها الا يوم السفر في المطار على الكاونتر كمان!! يعني ايه الكلام ده؟؟ خليني احكي ليكم الي حصل معايا واحدة واحدة.
موقف حقيقي حصل
نظرا لظروف عائلية طارئة, قررت الرجوع من اسطنبول الى القاهرة فجأة. بحثت على الانترنت على تذكرة طيران طويلا املا في ايجاد سعر رخيص. افضل سعر توصلت اليه كان طيران الاردنية ب230 دولار من احد وكلاء skyscanner. كنت مضطرا لاستخدام كريت كارد خاص باحد اصدقائي لعدم توفر اي رصيد في الكروت الخاصة بي.
غلطة كبيرة لم اكن اعلمها !!
اخدت شنطتي وتوجهت الى المطار في صباح اليوم التالي لركوب طائرتي. وصلت الى كاونتر شركة الطيران الملكية الاردنية لأُفاجئ بعدم وجود تذكرة. اكتشفت حينها ان التذكرة الي اشترتها اونلاين لم تكن بعد تأكدت من وكيل شركة الطيران وانه تم رفض شراء التذكرة. (وصلني ايميل برفض اصدار التذكرة في الصباح ولكني لم اقرأه).
درس مهم جدا
اغلب الظن ان سبب رفض الشراء اونلاين هو ان اسم صاحب الكرديت كارد مختلف عن اسم التذكرة المصدرة. بيتم رفض اصدار هذه التذاكر اونلاين خوفا من استخدام كروت الائتمان المسروقة في الشراء اونلاين. علشان كدة اي حد بيشتري تذاكر اونلاين من احد وكلاء طيران skyscanner, غالبا هيكون محتاج يستخدم بطاقة بنكية (كريدت كارد) مكتوب عليه اسمه شخصيا.
سألت عن امكانية الشراء نقدا من كاونتر الخطوط الملكية الاردنية مباشرة وكانت التذكرة بحوالي 600 دولار …..”هااااااارسود!!!”
خطة بديلة
لحسن الحظ انه يوجد رحلة مباشرة الى القاهرة من مطار اسطنبول على خطوط مصر للطيران تقريبا في نفس التوقيت. حملت حقائبي وتوجهت الى كاونتر مصر للطيران للسؤال عن امكانية توفر مقاعد على رحلتهم القادمة ….. اجاب الموظف “موجود 4 مقاعد فارغة فقط على الرحلة دي يا فندم وارخص واحد فيهم ب560 دولار” … طبعا خراب بيوت مستعجل!!
حاولت جاهدا من خلال مكالمة استغاثة لاحد الاصدقاء ان اجد تذكرة ارخص من كدة ولكن دون جدوى. فاضل ساعة والطيارة تطير ولازم اخد قرار بسرعة. تشاء الاقدار انه يكون موجود عند كاونتر مصر للطيران احد ركاب الرحلة الي قرروا يساعدوني. اخدني على جنب بعيد عن الكاونتر وعرفني بنفسه انه موظف سابق في شركة طيران وعنده حل ممكن يساعدني بيه:
” اشتري تذكرة رخيصة في تاريخ مستقبلي لنفس الرحلة دي وبعدين هات التذكرة على الكاونتر واطلب تغيير التذكرة لتاريخ النهاردة مقابل دفع غرامة Go Show الخاصة بتقديم ميعاد الرحلة الى نفس يوم طلب التغيير” …. اعتلت وجهي علامات ذهول وعدم تصديق …. “لو مش مصدقني, روح اسأل الموظف!!”
كانت معلومة جديدة عليا كليا. شكرته و توجهت الى موظف مصر للطيران لسؤاله عن قيمة غرامة Go Show والتي كانت 50 دولار فقط. يبقى الكلام ده بجد فعلا!! دخلت موقع شركة مصر للطيران وبحثت عن ارخص تذكرة موجودة لهذه الرحلة في المستقبل. وجدت نفس التذكرة (اسطنبول-القاهرة) اتجاه واحد يوم 30اكتوبر , اي بعد اكثر من 3 شهور من الآن. نظرا لتوفر الكثير من الدرجات السياحية الرخيصة كان سعرها 230 دولار فقط.
توفير 50% على سعر التذكرة
قمت بشراء التذكرة ب230 دولار وطلبت على الكاونتر تقديم ميعاد الرحلة الى رحلة اليوم ودفعت غرامة Go Show قيمتها 50 دولار. اصبح تكلفة التذكرة كلها 280 دولار, يعني 50% ارخص من شراء تذكرة اليوم نفسه ب560 دولار. ….”مش مصدق نفسي يا لمبي!!”
شروط GO SHOW
سألت موظف مصر للطيران عن شروط تعديل التذكرة بطريقة Go Show وعرفت منه الآتي:
– يجب طبعا ان تكون التذكرة المراد تغييرها محجوزة على نفس الرحلة في المستقبل
– ان تكون مصدرة من مكاتب مبيعاتهم المباشرة (مكتب او اونلاين) الخاصة بمصر للطيران وليس عن طريق وكلاء طيران اونلاين …”يعني رقم التذكرة يبدأ برقم 077 الخاص بمصر للطيران”.
– يجب ان يكون التغيير لتاريخ رحلة اليوم فقط. ما ينفعش تقديم ميعاد الرحلة الى اي تاريخ اخر غير تاريخ اليوم. لانه لو عايز تغير ميعاد تذكرتك لاي يوم اخر هتخضع لمصاريف اخرى خاصة بتغيير ميعاد التذكرة وايضا مصاريف اخرى لاختلاف درجة التذكرة.
– يجب توفر اماكن على رحلة اليوم او الانتظار على قوائم الانتظار الخاصة بالرحلة.
ازاي ممكن نستفيد من الاوبشن ده؟
– لو انت شاري تذكرة في ميعاد معين وقررت تقديم ميعاد سفرك لاي سبب من الاسباب, قدامك حل من اتنين:
الحل الاول اقل بخطوة بكثير ولكن تكلفته اعلى هو انك تطلب من “بائع تذكرتك” تغيير ميعاد تذكرتك الى الميعاد الي انت عايزه وتدفع غرامة تغيير تذكرة وتدفع كمان فرق درجات سياحية.
الحل التاني الاكثر خطورة ولكن الارخص, هو انك تاخد شنطك وتطلع على المطار في اليوم الي عايز تسافر فيه وتشوف لو في امكانية على الطيارة وتدفع غرامة Go Show فقط (بتختلف من شركة للتانية. الرجاء سؤال شركة الطيران). تكمن الخطورة في انك ممكن تروح المطار وتلاقي الطيارة مكتملة او “مفولة” – يعني Full ومش فيها ولا مكان. لكنك ممكن تتأكد من موقع الشركة اونلاين (اطلب شراء تذكرة اليوم اونلاين وشوف في اماكن ولا مفيش. بسيطة.)
حالات الطوارئ
في اعتقادي الطريقة دي ممكن تكون الحل المثالي في حالات الطوارئ لو قررت فجاة تسافر الى مكان ما والاسعار الفورية المباشرة غالية جدا, يبقى اشتري تذكرة مستقبلية وروح المطار لو في اماكن متوفرة وادفع Go Show واركب طيارتك بالسلامة.
مين ملحقش الطيارة بتاعته قبل كدة ودفع غرامات No Show ؟؟؟
ومين حصل معاه موقف مشابه للموقف بتاعي وكان مضطر يسافر فجاة واضطر يشتري تذكرة غالية جدا ومكنش يعرف عن Go Show ؟؟