بِسْم الله الرحمن الرحيم

 

الصين الصين الصين 

 

الصين يعني مفيش Google مفيش Facebook مفيش youtube    اه والله.

 

 

أنا اتبعتلي علي الانبوكس اسئله كتيره علي الصين فحابب أكلمكم علي الصين علشان سافرت كذا مره في نقاط سريعه و اللي عنده اي استفسار، يتفضل طبعا.

​

أولا الطيران: تجربتي مع مصر الطيران كانت عاديه و لا حلوه و لا وحشه، الطيران حوالي ١٠ ساعات من القاهره لبكين و نفس المده بزيادة بسيطه لجوانزو.

مفيش مصر الطيران لشنغهاي، لكن لو عايز شنغهاي فقدامك قطريه او إمارتيه او اتحاد.. انا اخدت الاتحاد قبل كده و استمتعت عن مصر الطيران كتييير طبعا.

رحله مصر الطيران لبكين مفيهاش تلفزيون الا لو انت بيزنس  يعني بتقعد ١٠ ساعات ملل جدا، اما لجوانزو ففيها شاشه.

 

ثانيا: العمله هي اليوان الصيني او ال RMB و ده كان يعتبر نفس الجنيه المصري قبل التعويم لكن دلوقتي بقي اكتر من ٢ و نص مصري.

 

ثالثا: تاشيره الصين سهله و بتاخد ٣ ايام عمل و اللي بياخد الورق بيبقي متعامل جدا و تكلفتها كانت ١٥٠ قبل التعويم و ٥٣٠ بعد التعويم و بيختلف السعر حسب النوع، بتاخد الورقه و تروح تدفع في بنك ال CIB.

- لو سياحه يبقي تتعامل مع شركات سياحه و التاشيرة مدتها شهر

- لو بيزنس يبقي لازم معاك دعوه والمده بتبقي علي حسب الدعوة و الظابط اللي هناك برده.

و علي فكره انا سافرت تبع aiesec و لوحدي برده علشان اتسالت في الانبوكس برده.

- لو دراسه يبقي لازم ال admission letter و JWR form

 

الورق المطلوب هو باسبورك و صورتين و كشف حساب و حجز طيران مبدئي + الدعوة او الورق اللي يثبت غرض السفر و ده لو مش سياحه. ( علي فكره فيه شركات سياحه ممكن تطلعلك التاشيرة بالباسبور و صورك بس هتدفع اكتر)

 

رابعا: الصين كبيييييييييره جدا و طبعا عدد سكان عالي اكتر من مليار و ٣٠٠ مليون ،، لكن عمرك مبتحس بزحمه خالص لان فيه نظام هناك.

 

أشهر ٤ مدن في الصين هم: بكين 北京 و شنغهاي 上海 و جوانزو 广州 و شينجين 深圳 .. طبعا بجانب هونج كونج لكن بتعتبر مدينة خارج الصين، و المصريين مسموحلهم ٣ شهور بدون فيزا.

 

احلي مدينة بالنسبالي هي شنغهااااااي 😀 و هي فعلا مدينه الأحلام لناس كتيره خصوصا اللي جاي من أوروبا بيعشقوها جدا ، مدينه وهم و هي المدنيه الاقتصاديه الأولي في الصين.

 

لو رحت سياحه يبقي الوجهه الأولي لازم تبقي بكين:

 

بالنسبه لبكين فأنا شايف ٥ ايام تزور فيهم :

 

• يوم لل Great Wall of china و ده بيبقي يوم عظيم جدا، و سُوَر الصين العظيم ليه اجزاء فأنت بتروح جزء منه و لحد دلوقتي فيه كذا جزء ممنوع ليها الزياره

• يوم لل Forbidden city & Tiananmen Square

• يوم لل Nanluoguxiang و Wangfujing و Xidan

• يوم لل summer palace و temple of heaven

• يوم لل zoo و ال national museum

 

بعد كده عندك اختيارات كتيره، لو هتقعد يبقي لازم تروح شنغهاي، و تقدر تقعد فيها ٤ ايام تزور المدينة و هي مدينه روعه جدا، و ناس كتير جدا بيفضلوها عن أماكن كتير في اوروبا، و ده لانها تاريخ و خصوصا المباني هناك مبنيه علي شكل مباني اجنبيه و ده لانها كانت قطاعات من ايام الحرب العالميه.

لو عايز سقعه و كده يبقي تطلع فوق ل harbin city في heilongjiang province

 

لو عايز حضاره صينيه و تاريخ، يبقي تروح Xian و هي بتمثل تاريخ عظيم للصين، و Sichuan برده و تقدر تشوف الباندا

 

لو عايز طبيعه جميله يبقي تروح Hangzhou و تزور west lake و برده تقدر تشوف suzhou و Nanjing

 

فيه ناس برده بتزور Fujian و انا كنت فيها حوالي ١٠ ايام و كانت جميله برده

 

و لو نزلت الجنوب بقي يبقي هتروح لمدينه كبيره اسمها guangzhou و برده تروح Shenzhen و متروحش Dongguan علشان سمعتها مش كويسه   بجد هي سمعتها مش كويسه خالص بس طبعا فضولي خلاني اروح هناك  

 

الاكل: انا واجهتني مشكله كبيره علشان اعرف اتعامل مع ال chopsticks اللي هما العصايتين دول، بس بعدكده بقيت محي الشرقاوي   

​

المطاعم الحلال كتييييييره جدا جدا جدا و ده لان فيه مسلمين في مدينه في غرب الصين، فالمطاعم منتشره متقلقوش. و أنا بصراحه كنت في الاول مقضيها ماكدونالدز و سبحان الله تحس ماكدونالدز اللي في مصر هو الوحيد اللي غالي.

 

و النبي يا جماعه اللي يلاقي مطعم عربي يشوف الأسعار الاول، فيه في شنغهاي مطعم الف ليله و ليله، طبق الكشري كان ب ١٣٨ يوان يعني بعشرين دولار، انا اتصدمت  

 

المواصلات: ال subway عظيييم جدا و مريح و مغطي أغلب الأماكن.

 

- اه صحيح انت هناك أول لما بتقول انك مصري بتلاقي الصينين قالولك ايه ده واااو و oh my god و يا الهي و تحس الشوالي بيظهر قصادك و ده لان مصر بالنسبالهم دوله غامضه و فيها ٧٠٠٠ سنه حضاره.  

 

والله يا جماعه ورتلهم صوره ميدان طلعت حرب، قالولي what!! Oh my god!! ميدان طلعت حرب بقي wow يا جماعه

 

في مره اديت لواحد هرم كنت جايبه من خان الخليلي ب ١٥ جنيه، كان مش مصدق نفسه و حس انه بيحلم و اصر انه يعزمني

 

- يا جماعه والله الصينين مش قصيرين زي ماحنا ما فاكرين و مش كل واحد بيلعب كونغ فو  

 

- الصين معندهاش فيس او جوجل او يوتيوب لكن عندها wechat و QQ بس ممكن لو معاك vpn تفتح المواقع عادي.

 

- انت بتخش اي مكان في الصين تدفع بال wechat او alipay فمش لازم يبقي معاك كاش كتير.

 

-اكتر من صيني لما يتعرف عليك في البدايه بيسالك: هل كلت 😀؟

 

- اللي بيروح الصين بيقدر يعمل شوبنج طبعا لان الدنيا رخيصه و في أماكن معينه بيحصل فصال.

 

- نقطه اخيره بتضايقني ان مفيش استخدام موبايل طول الرحله في الطيران الداخلي و ده قانون في الصين

 

==============================

​
 

انا سافرت الصين كذا مرة بس عمرى ما فكرت اتكلمها عنها مش عارف لية بس المرة دى حبيت انى انقل تجاربى للناس عشان الكل يستفاد

​

انا واحد من الناس بنبسط فى الصين اكتر من الامارات ، فى الصين انا ممكن اقعد شهر انما فى الامارات اخرى اسبوع بالعافية

​

الصين الفيزا سهلة جدا و مش معقدة و بتطلع بسرعة و ب ٥٠٠ جنية فقط و كانت ب ٢٥٠ جنية قبل التعويم

​

التذكرة دايركت على مصر للطيران ذهاب و عودة ب ٨٠٠٠ جنية و قبل التعويم كانت ٥٠٠٠ ، طبعا فيه شركات تانية ارخص بس ترانزيت وانا بصراحة بحب الدايركت عشان انجز و الرحلة ذهاب ٩ ساعات و عودة ١١ ساعة و لو انت من الناس الى بتعرف تنام بسرعة مش هتحس بالرحلة انما لو انت زى حالاتى بتفضل تفرك فى مكانك هتبقى رحلة مملة جدا لحد ما تنزل من الطيارة

​

الصين سهلة جدا و مش صعبة و التعامل هناك سهل مش مستحيل زى ما الناس كانت بتقول ان ماحدش بيتكلم انجليزى و الجو دة انا فى الاغلب بروح جوانزو و روحت مدن تانية زى تشينزن و تشانجو و دونجوان بس الاساس الى فيها كل حاجة هى جوانزو

​

الفنادق هناك فيه كل الاسعار الى تتخيلها من اول ١٢٠ يوان الليلة وانت طالع و عندهم الاوضة السنجل زى الدبل نفس السعر و التربيل بيبقى فرق بسيط جدا يعنى لو طالعين ٣ هتوفروا فى الاقامة

​

اليوان النهاردة تقريبا ب ٢ جنية و نص بس عماتا احنا فى الصين مش بنقول كلمة يوان دى خالص بنقول رممبى و ماشوفتش حد خالص بيقول يوان

​

المواصلات هناك زى اى دولة فى العالم مترو و اوتوبيس و تاكسى و توكتوك بس انا الصراحة مادوستش فى حوار المترو و الباصات دة و كنت بركب تاكسيات و اشترى دماغى بس نصيحة ماحدش يركب التوكتوك لان التاكسى ارخص منه التوكتوك بيقاولك على المناطق القريبة ممكن يقولك ٢٥ و ٣٠ رمببى و بالتاكسى نفس المشوار يعمل ١٥ مثلا مع العلم ان فتحة العداد ١٠ رممبى

الاكل هناك ماتشلش همه خالص لان مافيش اكتر من المطاعم الحلال هناك

افضلهم

​

• مطعم السلطان "تركى"

• مطعم الباشا "اكل مصرى و تركى و تايلاندى و صينى و سعودى "

• مطعم البسفور "تركى"

• مطعم الاندلس "سعودى"

• مطعم السدة "يمنى"

• مطعم حضر موت "يمنى"

• بيتزا ٢ بيتزا

• مطعم كبابجى المنوفى طبعا مصرى

 

 

انا بقى فى كل دول بفضل مطعم الباشا بس اكتشفت مؤخراً مطعم روسى حلال اسمه المريديان تقريباً بقيت باكل فيه على طول اولا لان اكله حلو جدا و خفيف مش مسبك زى اكل العرب ثانيا اسعاره ارخص من كل المطاعم التانية دى لان المطاعم التانية دى عارفة انك مش لاقى غيرهم و لازم تاكل عندهم و كمان المكان قعدته لطيفة و فيه كل حاجة مطعم و كافيه و حلويات و شيشة فمش محتاج تروح مكان تانى

لو انت بقى من الماس الى عايزه توفر جامد فى السفرية و ماتاكلش برةفى سوبر ماركت كتير جدا حلال و بتبيع بقى الجبن و التونة و المربى و الحاجات الى موجودة فى اى بقال

​

​

روحت حديقة الحيوان و مش هطول فيها عشان البوست مايبقاش طويل اكيد اتفرجت على الحيوانات و هتشوفها فى الصور 😂و التذكرة ب ٢٠ يوان

​

​

روحت جبل بصراحة مش فاكر اسمه 😄بس هبقى اجبلكوا اسمه الجبل دة فيه كذا اوبشن ممكن تفضل ماشى فيه على رجليك لحد ما يبانلك صاحب زى ما حصل معايا و جبت جار الصراحة و قررت اركب العربية الى شبه عربية الهوكى دى و اكتشفت ان العربية دى ليها رحلتين رحلة يمين الجبل و رحلة شمال الجبل تتفرج على الجبل و تشوف المدينة من فوق ب ١٠ يوان بس و طبعا الجبل دة جواه بحيرات و شلتلات و مناظر طبيعية كتيرة جدا و فيه كمان تليفريك ب ٢٠ يوان بس و الصراحة ممتع جدا

لهواه السهر النايتات هناك رخيصة و نضيفة و حتى لو مالكش فى الجو دة هتحبه لانه هناك نضيف و مش زى الى بنشوفه فى مصر و مش لازم تشرب حاجة حرام انا كنت بشرب عصير برتقال و بيبسى و باكل فاكهة و مزاجى عنب

​

​

لهواه الشوبينج بقى مش هقولكوا يعنى دى الصين اساس كل حاجة و متقسمة اسواق لكل منتجات يعنى كمثال سوق للملابس و سوق للساعات و سوق للجلود و هكذا و طبعا مش هوصيكوا فى الفصال لانهم خلاص حفظوا الموضوع دة فينا و بقوا بيغلوا على اى حد عربى لانهم عارفن انهم بيفاصلوا

و فى خروجات تانية زى مثلا ممكن تركب مركب فى النهر باليل و ممكن تروح تعمل شوبينج فى شارع بكين دة شارع مشهور جدا هناك و كل الناس بتروحه و فيه كل حاجة من الابرة للصاروخ

​

​

تحديث :

مافيش هناك اى ابلكيشن بيشتغل من بتوع السوشيال ميديا زى الفيسبوك و انسجرام و تويتر و يوتيوب و جوجل و غيرهم و لازم يستغلوا بال VPN و لازم تنزله من مصر قبل ما تسافر لانه مش بيشتغل من هناك

​

و نسيت اتكلم على المساج هو من اجمل الحاجات الى موجودة فى الصين و فيه منه انواع مختلفة زى المساج الصينى و التايلاندى و بالاحجار و هكذا و بيبقى سبا كامل ساونا و جاكوزى سخن و ساقع و ستيم و لونچ و اوبن بوفيه يعنى بتبقى قاعد فى مكان كامل بتروق على اعصابك بكل هدوء

​

و اهم حاجة خدوا بالكوا من الفلوس المزورة لانها هناك كتير جدا خصوصا مع سواقين التاكسى و انا فلوسى كنت بصرفها من واحد صينى مسلم اسمه قاسم كان بيختم كل فلوسه عشان يميزها و يدهالى مختومة عشان ماحدش ينصب عليا

​

و من اجمل الحاجات هناك الصراحة الاناناس كل ما امشى و الاقى حد بتاع اناناس اقف اكل منه 😂

مشكلة البلد دى ان الرطوبة عالية جدا و جو غريب مطرة فى الصيف و برق و رعد بس الجو حر بس برضة حلوة

​

انا عن نفسى ماشوفتش خالص جو الصراصير و الجراد و الحاجات الى دايماً بيقولوا عليها دى ممكن تكون فى مدن تانية

​

تحديث ٢ : اسعار التذاكر دلوقتى بقت من ١١ الف ل ١٢٥٠٠مصر للطيران

 

الصين كلاكيت تانى مرة

​

​

استكمالاً لبوست الصين لانى حاسس ان فيه حاجات كتير ماقولتهاش فحابب انى اشارك الجروب بيها

بالنسبة للناس الى حابة تستورد من هناك عشان ناس كتير سألتنى على الموضوع دة فى البوست الى فات فاغلبية الشغل بيتجاب من جوانزو و شغل الرفايع بيتجاب من ايوا بس انا ماروحتش ايوا فهتكلم على جوانزو

​

الدنيا هناك متقسمة اسواق بمعنى ان فيه سوق للملابس و سوق للانجيرى و سوق للساعات و سوق للنظارات و سوق للشنط و سوق للاحذية و سوق للملابس الشعبى و سوق لعب اطفال و سوق سيارات و سوق موتوسيكلات و سوق اثاث و سوق اليكترونيات بس الى حابب يشتغل فى اليكترونيات يبقى مدينة تشنزن افضله

​

انت بتروح السوق الى انت هتشتغل فيه هتلاقيه كله مولات و محلات بتبيع جملة و فيه محلات بتبقى بتبيع جملة من كذا مصنع و فى محلات بتبقى تابعة للمصانع دايركت فانت الاول بتلف السوق كله على قد ما تقدر و يبقى مقلا معاك كشكول بتشوف كل محل اسعاره اية و تكتبها فى الكشكول و تدبس كارت المحل دة فى صفحته و هكذا ، انا بعمل كدة ممكن حد يبقى له طريقة مختلفة ،

 

فبتيجى فى الاخر بتقارن كل الاسعار و تشوف الارخص مع الجودة الكويسة الى مناسبة ليك و تروح بقى تتكلم معاه فى الكمية و الاوردر و تفاصل معاه على قد ما تقدر بس ما تخنقش عليه عشان الصينين لما بيتقفل منك ممكن مايبعلكش خالص اصلا فخليك ودود و لان كله دة اسمه تفاوض مش خناقة هى

نظام الدفع بقى انت بتسافر بحد اقصى ١٠ الاف دول و انت مثلا هتشترى بضاعة ب ٣٠ الف دولار طب هتدفع الباقى ازاى ؟؟

​

دى بقى وظيفة المكاتب فى الصين المكتب بتروح تديلة الفلوس الى معاك ممكن مثلا تديلة ٦ او ٧ و تسيب الرقم الباقى المناسب ليك لمصاريفك و كدة و بينزل معاك حد من المكتب دة بيبقى وظيفته مترجم و بيعملك الفواتير و فى الاغلب بتبقى بنت و فى الاغلب كمان بتعمل عليك مصلحة بس انت مثلا بتبقى متفق على السعر و مرضى ف مش هتفرق يعنى هى مثلا بتقولهم هاخد من البيعه دى ١٪‏ ٢٪‏ او ١ يوان فى القطعة حسب يعنى المنتج ( كلهم بيعملو كدة ماتفكرش انك مش هيتعمل عليك مصلحة) بس زى ماقولتلك انت مرضى خلاص

​

المكتب بقى وظيفته انه بينسق مع الاماكن الى انت عملت منها الاوردرات و بيديهم العرابين و بيبعتوا الاوردرات على المخزن بتاعه بس المكتب مالوش دعوة بالى جوة الكرتونة كمثال هو هيستلم ٥٠ كرتونة فبيستلملك ال ٥٠ كرتونة المتفق عليهم انت بقى وظيفتك تبقى موجود ساعة الاستلام تتاكد ان الى فى الكرتونة المواصفات الى انت طالبها لان احياناً بتيجى حاجات مختلفة بس قليل لما بتحصل يعنى بس الامان افضل

​

المكتب بيوفرلك عربية تجيبك من المطار و توديك المطار فقط

​

و بيحملك الحاوية و يرص البضاعة و بيحاسب الناس كل دة فى مقابل ٥٪‏ من تمن الاوردر بتاعك و مش بيحولك ورق الحاوية غير لما تحوله باقى حسابه كله فيبعتبك الورق بتاع الحاوية

​

فى مكاتب تانية هتشد رجلك و تقولك هناخد منك ٣٪‏ بس و تعالى و مالكش دعوة

​

دول بقى بيعملوا اية ، بيحاسبك على العربية بتاعة المطار ، بينزل البنت معاك اول يومين ببلاش و بعد كدة يحاسبك اليوم بفلوس ، بيحاسبك على ارضيات المخزن يعنى من الاخر بياخد منك برضة ال ٥٪‏ و يمكن اكتر بس بطريقة تانية ، و حاول تتعامل مع مكاتب كبيرة بلاش المكاتب الصغيرة لانه مش هيبقى معاه راس مال و هيقولك مش هينفع اشحنلك الحاوية غير لما تجيب فلوس انا معيش فلوس ادفع للتجار و كلام من دة انما المكاتب الكبيرة بتدفع و بتحاسب و بتخلص بس برضة للزم يبقى فيه ثقة او عن طريق حد معرفه انه يضمنك انك هتحول الفلوس فى الميعاد مش هتتاخر لانك برضة بتعطل فلوسهم ، بس عماتاً الموضوع بتاع انك تشحن حاوية من الصين سهل مش صعب

​

لازم تبقى مظبط مع المستخلص بتاعك فى مصر قبل ما هتسافر انك هتجيب اية عشان يقولك اية الى هيخش و اية الى مش هيخش و تبقى متواصل معاه وانت فى الصين تقوله جبت اية و يقولك هترصهم ازاى فى الحاوية

​

ممكن حد يقولى انا ينفع اجيب جزء فى حاوية مش حاوية كاملة ؟

​

هقولك اه ينفع بس دى بتبقى وظيفة المكتب بيشوف صنف شبه بتاعك و رايح نفس الجمرك سواء بورسعيد او سخنة او اسكندرية او دمياط وهكذا عشان يبعت كله مع بعضه

​

بس لو هتسافر الصين تجيب شغل لازم تحاول تجيب شغل كتير عشان تقدر تقسم عليه مصاريفك و البضاعة ماتقفش عليك غالية

​

انا زمان كنت بسافر ب ٥٠٠٠ و ب ٥٥٠٠ دلوقتى لو هتحجز قبلها بشهر تقريبا هتبقى ب ٨٠٠٠ و لو متاخر وصلت ل ١٢ و ١٢ ونص و نصيحة ماحدش يسافر الصين فى وقت معرض

​

لان البلد بتبقى زحمة جدا الفنادق غالية و مليانة على الاخر المطاعم بالحجز ، مش هتلاقى تاكسيات فى الشارع ، هتتبهدل كتير

​

الكلام الى فوق دة كله بالنسبة للناس الى هتلم شغل من السوق

​

بالنسبة لو انت رايح لمصنع واحد و هتاخد منه كل حاجة مش هتحتاج للمكتب و هتوفر ال ٥٪‏ لان المصنع هو الى هيعملك الحاوية و يشحنهالك بس المصنع مش هيحرك الحاوية غير لما ترجع مصر و تحول الفلوس او حد يحولها على حسابهم وانت عندهم بس الفلوس مش بتتحول كدة فى بنك عادى ، فى جزء بيتحول رسمى فى بنك و فى جزء بيتحول سوق سودة عن طريق بتوع الصرافات و بياخدوا نسبة تحويل النسبة دى مش ثابتة حسب جو السوق اية و صعوبة التحويل

​

و فى مرة كنت محظوظ كنت فى الصين و راجع مصر و كل مرة بعمل الحركة دى اسال وانا فى المطار لو عدلت التذكرة و خلتها فيرست كلاس هدفع كام كنت بسمع ارقام كبيرة ٥٠٠ و ٦٠٠ و ساعات الف دولار ، فى مرة قالولى رقم كان ساعاتها بما يعادل ٣٠٠٠ جنية وافقت على طول و عدلت التذكرة و قولت تبع مصاريف الشغل مش مشكلة

​

القعدة فى الفيرست كلاس كانت مريحة جدا الصراحة و نمت مصحيتش غير على الفطار قبل ما ننزل مصر و ماحستش بالرحلة الى هى ١١ ساعة خالص

​

الجو هناك مشكلته رطوبة عالية جدا جدا بتبقى ماشى ملزق و مش طايق نفسك و نفسك تستحمى كل شوية و لو روحت فى الشتا لازم تاخد معاك لبس تقيل لان الجو ساعات بيبقى رصاص بمعنى الكلمة

لازم تشترى الشطافة المحمولة لانك لو اتزنقت وانت فى الشارع مش هتلاقى الى ينجدك

​

الفنادق الى نزلت فيها كلها كانت فى شارع واحد و هو الشارع الى فيه سوق الملابس الى قدام محطة القطر و كلهم كان فيهم شطافات الحمد لله بس انت لازم تقولهم على الشطافة لان عندهم اوض من غير شطافات و احسنلك ابقى خد صورة للشطافة الهاند فرى عشان يفهموا

​

لو دخلت مكان مش بيتكلم انجليزى و عايز تسال على حاجة معروضة بكام هتشاوره تقوله بكام دى و تشاورله على الاله الحاسبة هيمسك الاله الحاسبة و يكتبلك سعرها انت طبعا هتقوم كاتب سعر تانى و تفضل تفاصل معاه

​

فى الجملة لما بتسال على سعر اول حاجة هيسالك عليها هيقولك how many عايز منها اد اية هتقوله الكمية عشان يديك سعر

​

يفضل يكون معاك صور للمنتجات الى عايز تشتريها عشان تسهل عليك الموضوع و توريها للمحلات لو حد عنده هيقولك have have يعنى عندى وانت تاكد عليه تقوله same same يعنى زى دى بالظبط هيقولك ايوة same same 😂 لو معندوش هيقولك mayo يعنى مافيش بالصينى او هيقولك no have انجليزى من غير جرامر من الاخر يعنى هتعرف تتعامل عادى

​

يفضل الناس الى هتطلع الصين تحاول تعمل الفيزا دبل انترى يعنى دخول مزدوج عشان لو حبيت تروح تزور هونج كونج و ترجع تانى لانك لو روحت هونج كونج و جيت ترجع الصين تانى هتحتاج الفيزا تانى كانك داخل من اول و جديد فعشان كدة بيعملوها دبل انترى ، و بالنسبة لهونج كونج انا روحتها باوتوبيس من عند فندق الماريوت و فى نفس الوقت بيقولوا عليه China hotel مش عارف ليه بس هو له الاسمين و الفندق دة الى بينزل فيه كباتن و مضفين مصر للطيران يعنى ممكن تسال حد منهم وانت على الطيارة حتى و هو عماتا ٥ دقايق بتاكسى من سوق الملابس يعنى مش بعيد بس بصراحة مش فاكر التذكرة كانت بكام بس مكانتش غالية يعنى تقريبا ٥٠ ٦٠ يوان

​

من الحاجات الى لفتت نظرى فى الصين الاهتمام بالاشجار و الزرع كما هو موضح بالصور

مش عارف حاسس انى لسة ناسى حاجات كتير بس مش فاكر اية هى بس دة الى انا فاكره دلوقتى 😂

يارب اكون قدرت افيدكوا