و ننقل هنا عددا من المقالات الهامة عنها 

​

فرنسا فعلا تستاهل كل ما يقال عنها بلد الرومانسية و الجمال, لكن معظم اللى بيسافر لفرنسا بيكون حاطط توقعات خياليه اكتر من المعقول فبيتصدم من الواقع لما يروح باريس بس ويرجع.

باريس الوجهه الاشهر و الاهم للمسافرين مدينة جميله و رائعة و مليانه تاريخ و ثقافة و مزارات جميله الا انها برضه عاصمه اقتصادية زى اى عاصمه فى العالم.طبيعي انها تكون زحمه و طبيعي تكون نسبة تلوث بسيطه موجوده فيها.لكن ده برضه مينسيناش انها باريس متحف اللوفر و برج ايفل والحاجات اللى كل الناس حافظاها دى

 

انا شخصيا بنصح اللى عايز يتعرف على فرنسا بجد انه بعد ما يتعرف على باريس ينطلق للغرب او للجنوب او للشرق.فرنسا الحقيقيه بتظهر كل ما نبعد اكتر عن العاصمة.

 

انا شخصا تجربتى كانت للشرق زورت المدن اللى كل اللى راحوها شهدوا لها انها رائعة فوق الخيال.
اكتر مدينة حبتها فى شرق فرنسا ليون لانى حسيت انها فعلا بتمثل الطابع الفرنسي الحقيقي وهى تانى اكبر مدينة فى فرنسا و مش مستهدفة من السياح بقوة زى باريس فتتتعرفوا فيها على فرنسا بجد

 

شرق فرنسا فى حدود مع المانيا و سويسرا و ايطاليا و لوكسمبورج و بلجيكا
 

كل منطقة حدوديه فيهم بتتميز بطبع جميل و مختلف مثلا ستراسبورج على الحدود مع المانيا هى مزيج من الثقافة الفرنسية و الالمانية و كذلك ميتز بالقرب من لوكسمبورج.
 

آنيسي بالقرب من سويسرا وايطاليا عبارة عن جوهرة سياحيه تخيلوا مدينة اسمها فينيسيا فرنسا شبيهه جدا بمدينة البندقيه العائمه على الماء وان كانت اجمل وانظف بكتير كمان و بتطل على جبال الالب و بحيرة آنيسي

وعلى المنطقة الحدودية بين سويسرا و ايطاليا و فرنسا اعلى نقطة من جبال الالب فى مدينة فرنسية اسمها شامونيه دى لمحبى التميز فعلا انا ازعم ان دى اجمل مدينة فى جبال الألب الاوروبيه كلها الجمال لا يوصف و المغامرات جميله فيها ما بين زيارة لاعلى قمم الالب مونت بلانك و تسلق الصخور و التزلج الخ.

 

انا متاكد ان لو رحلتى كانت لباريس بس مكنتش حمر بنفس التجربة دى فعلا من اجمل السفريات و احب البلاد لقلبى, واللى بيعرف يتكلم الفرنسية حتى لو بسيط حيحب البلد دى و هى كمان حتحبه :D
المره الجيه حسافر ان شاء الله للجنوب الرفيفرا الفرنسية الشهيرة و جزيرة كورسيكا الرائعة.
واكيد حيجي يوم ازور كمان الغرب اللى متاثر بالثقافة الاسبانية خصوصا فى اقليم الباسك و مدينة بوردو الرائعة.

 

ملحوظة:
فى كام حاجه كده فى باريس لاحظ ان قليل جدا اللى بيزورهم مع انهم مهمين جدا

• اولا المتحف الحربى الفرنسي اللى فعلا اكتر مكان شاهد على تاريخ الحرب العالمية كلها و فيه قبر نابليون

• متحف فيرساي بالقرب من اللوفر لازم الناس تروحه

• الكاتاكومب او مقابر باريس تجربه غريبه بس جامده

• المنطقة المحيطة بكنيسة القلب المقدس و الحى اللاتيني

• المناطق الشعبيه و الاسواق الشعبية 

• قصر فيرساي

 

وكل ده الوصول ليه سهل جدا لان باريس فيها اقوى شبكة مترو فى العالم.

 

فعلا فرنسا رقم واحد فى اوروبا

رحله الي باريس البلد الاشهر علي الجروب....اول حاجه هنعملها اجرات السفارة...مكتب تي ال اس التابع لسفارة فرنسا لتسهيل اجرات الفيزا
 

• كشف حساب بنكي عليه عمليه سحب وايداع آخر 3 شهور

• حجز فندف مؤكد

• ابليكاشن 

• صورة شخصيه 

• باسبور

• طيران 

• عمل برنامج للرحله في باريس 

• جواب من جهه العمل .....في حاله طالب : شهادة قيد من الجامعه ..بدون عمل جواب تكافل والد اة الولدة

اول ما نوصل المطار ونخروج الي الصاله ندور علي المصاعد واحنا في المصاعد حنلقي في الادوار الدورالثالث صاله الوصل مثلا اللي احنا فيه عند الوصول الدور الثاني صاله السفر الدور الاول المترو ..شبكه الموصلات في باريس منقسيمه الي 3 اشياء ..

M__RER__T
T التيوب TRram way
RER القطار 
M المترو

وياريت ننزل البكشن شركه الموصلات هناك لمعرفه الاتجاهات في المترو واسمه RATP من علي بلاي استور هننزل بعد كدة تعمل الاشتراك بتاعنا ولو يكون اسبوع وياريت يكون السفر يوم الاثنين لان دة بيتعبر اول الاسبوع عندهم في الاشتراك حنروح سبت او الاحد هنشتغل تذاكر كا توفير طبعا الاشتراك وناخد معنا صورة شخصيه 

نبتدي الرحله ..........

​

يوم الوصول بعتبرة يوم معرفه الوصول الي الفندق ثم بعد ذلك الذهاب الي برج ايفيل....شانزليزيه .. قوس النصر متحف اللوفر .......
 

أول يوم :الذهاب الي برج ايفيل وياريت نروح بدري علي الساعه 8 ونص علي شان الزحمه اقرب محطه لبرج ايفيل (BIR-HAKEIM)....خط مترو 6.
لو عاوزين نشتري برج ايفيل في ناس بتبيع البرج تحت ايفيل تاور حيقولك البرج 20 يورو فاصل معه ممكن تاخد برج ايفيل الكبير بحاوالي 10 يورو بالكتير 12 .بعد ما نخلص برج ايفيل نايل كروز في نهر السن من امام برج ايفيل ومانساش الساحه اللي امام البرج كاتصوير فيو مع البرج ساحه ساحة Trocadéro ( حديقة برج ايفل ) ...بعد النايل كروز الذهاب الي كنسيه الثاكركير في وقت الغروب علي الساعه 4 او 5 واحنا في الثاكيركير في هناك حي الرسام اقرب محطه مترو ( Anvers ) خط مترو رقم 2)بعد ما نطلع من المحطه علي ايدينا اليمين علي طول اعلي قمه في باريس الثاكير كير وحي الرسامين خلف الكنسيه 

ثاني يوم متحف اللوفر ...ملاحظه متحف اللوفر يوم الاحد من اول اسبوع من كل شهر ببلاش محطه متحف اللوفر (LOUVIR RIVOLI>>>PALAIS ROYAL MUSEE DU LOUVER >>>>)خط مترو 1 ) وطبعا منساش ساحه الكونكورد اللي بطلعنا الي الشانزليزيه وباريس اي ...جنب متحف اللوفر ممكن نتمشي الي النورتردام قريبه من المتحف ومنطقه النوتردام تحفه التمشيه فيها وممكن نتمشي الي متحف البنثيون جنب النوتردام لو عاوز اروح الي النوتردام علي طول (Cité) خط مترو 4

 

ثالث ,ورابع يوم ..لو هنروح ديزني لاند نبعد عن السبت والاحد 2 DYAS 2 PARK محطه ديزني ( Marne-La-Vallee_Chessy) خط (RER A4),,,( يوجد اويت ليت قبل محطه ديزني لاند (VINCENNES)(RER A4

 

خامس يوم قصرفرساي ( versailles - rive gauche ) (RER C5) قصر فرساي والساحه بتاعته تحفه والصور فيه حكايه بجد

 

سادس يوم شوبينج... مولات لبس وعروض شيكولاته حكايه مول لاديفانس في منطقه لاديفانس من اجمل مناطق باريس وقريب من الشانزليزيه اخر محطه في مترو 1 واحنا في محطه المترو نمشي قدام شويه بعد الصعود من السلم علي الشمال فيه سلم علي الشمال بيطلع علي المول علي طول ندور علي طول علي H&M >>>>C&A بعد ما نشوف اللبس ندور علي هايبر ماركت اسمه auchan دة بقي بيعمل عروض علي الشيكولاتات مالهاش حل 
 

نيجي بقي لمنطقه مولات تانيه وهى منطقه الاوبرا ( Opéra ) خط مترو 3 / 7 / 8
 

نيجي بقي للشغل العالي بما اننا مش عرفين نشتري لبس من باريس مول كورتز نروحه ازاي خط مترو 13 اتجاه SAIN- UNIVERSLTE ) تمام هنزل محطه (MAIRIE DE SAINT OUEN ) اول ما نطلع من محطه المترو هنلقي محطه اتوبيسات نركب اتوبيس 137 او 177 محطه كارفور اول ما ننزل من الاتوبيس علي نفس الرصيف نتمشي قدام شوي بعد كدة ندخول المول نركب الاسانسير الدور الاول بعد كدة ندخول شمال نطلع بعد كدة السلم او لو الوصف مش واضح اسال علي (بريمارك) ......وفيه كمان في محطه سوق في نفس محطه المترو ماري دي سانت
 

فيه بريمارك تاني فى السنتر دا فى حجات اكتر واكتر من دور والسنتر دا بردو كويس اوى وفى محلات اكتر من كوارتز 

Créteil Soleil, Centre Commercial Régional

Créteil Soleil, Avenue de la France libre, 94000 Créteil
..................... 
 

عاوزين سوق مستعمل وجديد في منطقه Barbès Rochechouart خط مترو 2 / 4 بس ياريت نروح السوق دة بدري ةنمشي منه بدري علي شان باربيس من المنطاق اللي فيها حراميه 
بس نبعد عن القلق في الصبح مافيش اي مشكله وفي محل هناك اسمه Tati (تاتي) République خط مترو 3 / 5 / 8 / 9 / 11 الاسعار هناك رخيصه جدا 

من الاسواق والمحلات الرخيصه Strasbourg Saint-Denis والاسواق اسمها سوق الهيود مستعمل وجديد بردة خط مترو 4 / 8 / 9 علي فكرة منطقه سانت دوني فيها محلات اكل منطقة مطاعم عربية ( مشويات واكلات عربية - هندية - تركية)

نيجي بقي لاكبر محطه تجاريه في باريس وهى منطقه Châtelet شتليت جميع المحلات والمركات اول ما نخروج من مترو Châtelet خط مترو 1 / 4 / 7 / 11 / 14 
وانجوي 

 

===================================

​

لو بتحلم تزور ديزني لاند باريس ( لازم تقرا الموضوع ده الأول ) 

أسرار ديزني لاند باريس :
بجد الواحد بيبقى مبسوط و هو بيكتب تقرير زي ده , كل الذكريات الحلوة بترجع له تاني :) .
مين فينا و هو صغير متخيلش نفسه شخصية من شخصيات ديزني أو اتخيلت نفسها اميرة من أميرات ديزني . و كل واحد مننا عنده فيلم بيفكره بطفولته سواء كان Lion King أو علاء الدين أو سندريلا أو سنووايت أو توي ستوري . أفلام كبرنا و احنا بنتفرج عليها , و لحد دلوقتي لو شفناها كل ذكرياتنا عن الطفولة بترجع تاني :) . 

ايه رأيك ترجع للذكريات الحلوة دي و تقابل كل أبطال ديزني و تعيش جوا القصص الل كبرت و انت بتتفرج عليها ;) ؟ كل ده ممكن في مكان واحد بس ( ديزني لاند ) أرض السحر و الخيال و الأحلام . :)
أول ما تدخلها بتحس كأنك رجعت 20 سنه لورا حتصحي الطفل اللي نايم جواك, حتنقلك لعالم خيالي كل حاجه حواليك بتحكي قصه من قصص ديزني و طول ما انت ماشي فيها بتسمع موسيقى أفلام ديزني بتحسسك بجد كأنك جوا فيلم كارتون .

لو انت في باريس متفوتش التجربة دي , ديزني لاند بيزورها كل سنه حوالي 15 مليون زائر , مع العلم ان كل السياح اللي بيزوروا مصر 6.6 مليون فقط 
 

طيب أزاي ننظم رحلتنا لديزني لاند علشان منفوتش اي حاجه فيها ؟؟
 

أسرار ديزني لاند ( باريس ) :
 

أولا التذكرة: 
تذكرة ديزني لاند مش رخيصه و لكن تستحق كل يورو فيها , أسعار الدخول مش ثابته طول الأيام , فيه 3 أنواع من التذكر بتختلف سعرها حسب اليوم و الشهر ( mini , magic , super magic ) كل تذكره ليها سعر مختلف , لكن انا أنصحك لو حتروح يبقى تروح الوقت اللي بيكون مش زحمة و تذكرته بتكون mini و دي معناها أنك تقدر تدخل في أيام معينه من السنه و كل ما السعر بيزيد بيسمحلك تدخل في أي يوم في السنه و ده بيتوقف على الويك اند و المواسم الزحمه زي الصيف مثلا

​
 

الانتقال الى ديزني لاند باريس : 
ديزني لاند تقع خارج باريس و أسهل طريقه عن طريق القطار RER A الأحمر.... اتجاه (Marne-la-Vallée (RER line A4 و ده تقدر تركبه من أي من محطات المترو التاليه :

Charles de Gaulle Etoile, Auber, Chatelet Les Halles, Gare de Lyon, Nation ,
 

سعر التذكره اتجاه واحد 7,6 يورو و للطفل 3,8 يورو . مدة الرحلة حوالي 40 دقيقة , أول قطر الساعه 5:22 صباحا و أخر واحد الساعه 12:39 مساءا ( خلي بالك أوي من المعلومه دي و حقولك ليه في النقطه الجايه ) , الوقت ما بين كل قطر و التاني حوالي 15 دقيقة 

نقطة مهمه : خلي بالك أوي من اتجاه القطار لأن غلطه واحده ممكن توديك اخر الدنيا , و خلي معاك دايما التذكرة بتاعة المترو علشان لو حد سألك و طلعت مش معاك حتدفع غرامة 40 يورو يا جميل 😊. الصفحه دي حتقولك بالتفصيل توصل ازاي
 

الوصول الى ديزني لاند: 
أول ما تطلع من القطار اطلع على السلالم متحركه و اطلع بره المحطه , حتلاقي البوابه الرئيسيه لديزني لاند ,أدخلها حتلاقي نقطة تفتيش و بعدها على ايدك الشمال ديزني لاند ستوديوز و أمامك ديزني لاند بارك , حندخل بنفس التذكره اللي طبعناها من بوابه خاصه للحجز اون لاين , ديزني لاند عباره عن حديقتين ( ديزني لاند بارك , و ديزني لاند ستوديوز ) و التذكره ممكن تشتريها لحديقة واحده او الاتنين و انصحك ادخل الاتنين, قبل ما تدخل أي واحده حتلاقي بوروشورات فيها مواعيد العروض بتاعة اليوم كله و مواعيد الحفلات و اوقات العمل للحديقة و خريطة الحديقة كمان , خليها معاك حتفيدك أوي . 
 

 

رابعا: نصائح تنظيم الوقت داخل ديزني لاند :

​

• روح بدري أول ما الحديقة تفتح و هي بتفتح الساعه 10 الصبح علشان تقضي اكتر وقت في الحديقة و تركب أغلب الالعاب و بتقفل 10 بليل في الشتا و 11 بليل في الصيف

• خلي زيارتك تكون يوم وسط الاسبوع و ابعد عن الويك اند و ايام الاجازات علشان متقفش في طوابير طويله لانتظار الألعاب ( في أيام الزحمه ممكن تقف 3 ساعات عادي على لعبه :) ) و حقولك تحل الموضوع ده ازاي في أخر نقطة ;)

• لو معاك أطفال أبدأ بالبارك لأنها كلها ألعاب أطفال أكتر و لو كنتوا كبار أبدأ بالستوديوز لأن ألعابها للكبار وهمممم 

• أبدأ بالألعاب اللي بتاخد وقت انتظار طويل علشان بتكون لسه الحديقة فاضيه شويه فتدخل بسرعه

• حدد الألعاب اللي انت حتلعبها في زيارتك لديزني لاند , لأنك لما تدخل حتوه وسط كترة الألعاب و صعب أوي تركب كل الألعاب , و تقدر تعرف الألعاب من موقعهم و من البروشور اللي انت أخدنه قبل ما تدخل

• فيه مطاعم كتير بس الصراحه غاليه , فممكن تاخد معاك أي أكل و دخولة مسموح , فخد معاك شوية سناكس و ساندوتشات و انت رايح

• ساعات بتبقى الطوابير طويله و مكتوب بره الوقت المتوقع لوصولك للعبه و ممكن يبقى بعد 40 دقيقة مثلا , متتوهمش و أدخل عادي الطابور بيمشي بسرعه و مش حتحس بالوقت لأنك و انت واقف في الطابور نفسه حتكون عايش جوا قصة اللعبه اللي حتركبها .

• لو معاك أطفال خليهم دايما تحت عنيك و لو لا قدر الله طفل تاه , أطمن مش حيعرف يطلع لوحده و الأمن في كل مكان و فيه مكتب خاص بالأطفال المفقودين

• بلاش حركات لطيفة أنك تزاحم حد في الطابور أو تنظ السور مثلا :D لأن هناك حتلاقيهم محترمين جدا و كل واحد بيحترم دوره :)

• فيه عرض مش طبيعي و هو العرض الرئيس لديزني لاند بيبدأ الساعه 11 بليل عند قصر ديزني و ده لا يفوتك مهما كنت تعبان لازم تتفرج عليه ( أحنا خلصنا لعب الساعه 8 و فضلنا قاعدين ل 11 بليل علشان نتفرج عليه و الصراحه لم أندم على اي ثانيه أنتظار علشان أشوف العرض ده لأنه ابهار بمعنى الكلمة ), بجد من احلى العروض اللي حتشوفها في حياتك , العرض مدته تقريبا نص ساعه , أول ما تخلص لعب و على الساعه 9 كده مثلا روح اختار مكان مناسب امام القصر و اقعد هناك و متتحركش لأن على الساعه تقريبا حتلاقي المكان بقى زحمه جدا. بس نصيحه أول ما يخلص العرض تطلع بسرعه على القطار لأن لو أتاخرت في الطلوع حتلاقي زحمه جدا عند القطار للعودة الى باريس , أسرع طريق أنك تمشي عبر المحلات باتجاه بوابة الخروج لأن حتلاقي الشارع الرئيسي طوفان من البشر :D

• لو حتروح مع أولادك , نصيحه أخوية أشترلهم ملابس الشخصيات للي بيحبوها قبل ما تروح هناك و خليهم يلبسوها في الحديقة لأن الأطفال هناك أغلبهم بيبقوا لابسين زي الأميرات ( كان على وقتنا أميرات فروزن ايلسا و أنا ) و لو فكرت تشتري اللبس من هناك فأعمل حسابك على فستان ب 1400 جنيه أقل حاجه  

 

 

خامسا : ال Fast Pass ( أحسن استغلال له ) :
دي خدمة عملاها ديزني على بعض الألعاب اللي بيكون عليها انتظار طويل جدا , حتلاقي جهاز خارج اللعبه مكتوب عليه fast pass بتمرر تذكرتك المطبوعه عليه و بيطلعلك تذكره صغيره بتسمحلك أنك تدخل اللعبة مباشرة في وقت معين . خليني أقولكم مثال : يعني مثلا وصلت لعبة بيتر بان الساعه 11 الصبح حتلاقي عندها fast pass حتمرر تذكرتك المطبوعه على الجهاز و حيطلعلك تذكره مكتوب فيها الموعد اللي تيجي فيه تدخل اللعبه على طول بدون ما تقف في طوابير, مثلا حيكون مكتوب عليها الدخول الساعه 1 الظهر , حيبقى امامك ربع ساعه فقط من 1 الى واحده و ربع لازم تكون متواجد عند اللعبه علشان تدخل من مدخل خاص و متقفش في طوابير , هي دي فكرتها .

 

حتقولي طيب ما اعمل كده في كل الألعاب ؟ للأسف ما ينفعش لأنك لو طلعت fast pass بتذكرتك متقدرش تطلع واحده تانيه الى بعد انتهاء وقت الأولى و هكذا , بعني في المثال الأول كان لازم تدخل اللعبة الساعه 1 الظهر مثلا , من الساعه 11 الصبح الى الساعه 1 الظهر مش حينفع تاخد أي fast pass جديد لحد ما الأول موعده يعدي .

 

نصيحه : لو خلصت مثلا لعبتك اللي أخدت عليها fast pass و دخلت و لعبت , أول ما تخرج اتجه مباشرة على اللعبه الجديدة اللي عاوز تركبها و عليها فاست باس و خد واحده جديدة و روح ألعب أي العاب لحد ما يجي وقت دخولك ليها, وفيه حاجه كمان ممكن تاخد فاست باس للعبه و لو ملقتش عليها زحمه ادخلها عادي بدون الفاست باس و لما يجي وقت الفاست باس بتاعها أدخلها مره كمان بدون طوابير :) . فيه ألعاب تستاهل تتركب مرتين زي Rock' n Roll مثلا و لعبة Twilight
 

​

و ده لينك لخريطة ديزني لاند باريس و عليه كل الألعاب , ممكن تقف على بالماوس على أي لعبة و يجيبلك كل تفاصيلها
 

انا أسف على الاطاله بس حبيت اعمل تقرير وافي لزيارة ديزني لاند لأنها بجد تجربة خسارة انك متستمتعش بكل لحظه فيها