السلام عليكم ورحمه الله وبركاته

​

النهارده هتكلم عن تجربة جديده من تجارب السفر وهي عن دولة جورجيا ، طبعا البعض ميعرفش عنها حاجه والبعض الاخر يعرف ولكن خلينى اوضح الاول ان فيه اتنين جورجيا في العالم ، الاولي دولة وهي بين قارتي اسيا و اوروبا والتانيه في قارة امريكا الشمالية ، واحنا محور كلمنا هيكون عن الدولة ان شاء الله.

 

 اولاً / تعريفات بسيطة وعامة عن دولة جورجيا

.....................................................

- جورجيا تبلغ مساحتها حوالى69.700 كم2

- عدد سكانها حوالى4.385.000 نسمة

- اللغة الرسمية هي الجورجية والقليل يتحدثون الروسية وللاسف اللغة الانجليزية معدومة

- الدين الرسمي هناك المسيحي الأرثوذكسي بنسبة 90%

- العملة هي الاري ( الدولار الواحد = 2.70 لاري )

 

​

ثانياً / طلبات الفيزا والمستندات المطلوبة والخطوات بالكامل

...................................................................

الفيزا ب 20 دولار + تأمين اوروبي 180 جنية والسعر بيتحدد حسب العمر والمهنه في جواز السفر وباقي الطلبات سهله جدااا حجز فندق وطيران مبدئي + حساب بنكي اقل شئ 10 الاف جنيه مصري وغير مطلوب اثبات وظيفه زي الاتش ار او السجل التجاري والبطاقة الضريبية وهتلاقي هنا شرح كامل للطلبات وملئ الابلكيشن وده شرحي اللي عملته واخدت بيه الفيزا الحمد الله.

​

 

من طلبات الفيزا حجز فندق وده شرح ليها

 

وهنا هتلاقي كيفيه عمل حجز طيران مبدئي

 

​

ثالثاً / التصريح الامني

.........................

التصريح الامني هو طلب أساسي من اى شخص تحت سن 45 سنه لو مش معاك التصريح الامني ده مش هتطلع الطياره ولو عملت ليهم ايه في المطار وهتروح عليك تذكرة الطيران يبقي خلينا متفقين انك اول ما تحصل علي الفيزا تطلع علي مجمع التحرير تستخرج التصريح علطول.

التصريح الامني بيكون مدته شهرين فقط او مدته حسب مدته الفيزا يعني لو الفيزا مدتها 10 ايام هيطلع بعشر ايام فقط ودى حاجه رخمه جداا وعلشان كده لازم تكون دقيق جدااا فى تواريخ السفر بتاعتك ، بمعني تخلى سفرك مثلا بعد شهر او شهرين علشان تقدر تطلع التصريح ويكون معاك وقت كافي.

​

التصريح الامني / تكلفتة حوالي 50 قرش فقط

​

التصريح الامني / هتستلموا بعد مده عمل حوالي 4 ايام فقط

​

العنوان / هتروح مجمع التحرير مكتب ظابط الإتصال رقم 23 - الدور الأول خارج المجمع

هتاخد معاك جواز السفر وتصور اول صفحه فيه وتصور التأشيره + تحضر معاك اثبات الوظيفه اللي مكتوبه فى جواز السفر يعني لو انت مكتوب مندوب تجيب ما يثبت انك مندوب وهو خطاب الاتش ار ولازم يكون متأمن عليك وتجيب بوليصه التأمين بمهنه مندوب ولو انت صاحب محل او شركه لازم تجيب السجل التجاري والبطاقه الضريبية ومتنساش حاجه مهمه جدااا لازم يكون رأس المال بتاعك في السجل التجاري فوق ال 100 الف جنيه لو مش مكتوب كده فى السجل التجاري مش هتعرف تستخرج التصريح الامني للاسف.

 

​

ثالثاً / التجهيز للسفر وحجز الفندق والطيران

..................................................

الحمد الله ربنا كرمني وحصلت على الفيزا والتصريح الامني ومن هنا تبدء بقي تبحث عن سعر رخيص ومناسب ليك للطيران وافضل اسعار هتلقيها في طيران اير كايروا من الغردقة وفيه من الاسكندرية فلاى دبي ولكن شنطه واحده 7 كيلو وفيه الطيران اليوناني وهتعمل ترانزيت اثينا ولكن هتحتاج فيزا ترانزيت لليونان ودى هتكون صعبه لو جواز سفرك ابيض ومفهوش سفريات كتيره او مفهوش شنجن بالاخص.

انا سفرت علي طيران اير كايروا هو طبعا زى ما سمعت انهم مش ملتزمين بمواعيد يعني تأخير ساعه او ساعه الا ربع فى الذهاب والعودة تأخير ساعه وهو طيران بسيط وعادى جدااا طبعاا علشان رخيص واقتصادي.

 

اما بالنسبة للسكن انا قعدت فى هوستيل واتكلمت قبل كده عنه هو عباره عن شقه فيها غرف فيها سراير كتيره ومعاك اجانب وناس من مختلف العالم وبيكون عامل زى بيتك بتصحوا تفطروا وتشربوا وتقعدوا مع بعض وتسهروا وتخرجوا وعلى حسب بقى انت والناس اللى معاك وتعودك والتأقلم بينك وبينهم ، هي الفكره حلوة وافضل من الفندق انك تصحى تلاقى حوليك ناس غريبة واجانب وتتكلم وتتعلم لغه وتعيش يوم مختلف.

​

انا نزلت فى شارع روستافيلي لانه شارع مشهور جدااا واصلا هو محطه متروا وقريب من كل البزارات والاماكن السياحية وفيه كل الخدامات الحمد الله وانصح اى حد نازل ينزل الشارع ده او شارع مرجان شفلي وهو محطه واحده بالمتروا بعد روستافيلي يعني حوالى 10 دقائق.

 

​

رابعاً / الوصول الي جورجيا

.................................

شوف بقي اول ما توصل المطار هناك فيه شوية حاجات لازم تعرفها ودى قاعده تمشى عليها.

​

- هتلاقي هناك خط اسمة Geocell ده ببلاش يادوب بتختار الباقه اللى عايزها وتدفع تمنها وتاخد الخط هدية. انا جبت باقه ب 25 لاري فيها 3 جيجا ونص و30 دقيقة هديه.

​

- فك اى مبلغ صغير فى المطار قبل ما تطلع علشان تعرف تركب مواصلات او لو هتاخد تاكسي علشان الاسعار فى المطار بتكون اقل من برا ، يعني فك مثلا 20 دولار ولما تدخل البلد فك المبلغ اللى عايزة برحتك.

​

- انصحك اول ما تطلع من المطار تركب باص رقمه 37 وده من خلاله هتقدر تروح شارع روستافيلي و مرجان شفلي ب نصف لاري فقط وبيروح اماكن كتيره جداا واصلا هو مواصلات عامه تبع الحكومه وموجود فى البلد كلها ب نصف لاري فقط.

​

- فى مدن كتيره فى جورجيا ولو انت هتلف بقي وعايز تروح مدن معينه فيه محطه اسمها ديدوباي ودى تركبها من اى محطه متروا ولما تنزل هتلقيها زى موقف عبود  بتاعنا والله بالضبط وفيها ميكروبصات كتيره لونها اصفر وكل ميكروباص مكتوب عليه اسم المدينه او المنطقه اللى عايز تروحها والمواصلات بتكون مش غاليه وعلى حسب المسافه لكل مدينه بتدفع، بس المشكله انهم هناك مش بيفهموا انجليزى خالص انت قوله اسم المدينه وهما هيشوروا ليك وانت اتعامل بقى بالاشارات ولو لقيت شباب صغيره اتكلم معاهم بيكونوا فاهمين انجليزى هيوجهوك بردوا.

​

- دي أشهر الأكلات الجورجية وعبارة عن معجنات بس معمولة بطرق مختلفة Khinkali, Khachapuri ولازم تجربوها وبالنسبة للخنكالي Khinkali قبل ما تطلبة قوله انا عايز لحم بيف او لحم لام مش عايز لحم خنزير ، وخلي بالك حتي ماكدونالدز هناك اللحم فيها خنزير ومش بيضبحوا علي الطريقة الاسلامية للفراخ يعني تقوله بالانجليزي no ham no pork, I need halah food I want beef

​

- بالنسبة للشوبنج والحاجات الحلوة موجود كلها عند مترو Merjanshevili و Rustaveli وفي تبليسي مول وفي محل مشهور جدااااا اسمه HM ده هتلاقيه في روستافيلي ولكن اسعاره زى مصر مش رخيص يعني وبالاضافه لمحل LC WAIKIKI وهو تركي.

 

​

خامساً / الحياه في جورجيا والعمل

.......................................

من جولتي فى جورجيا لبعض المدن والامكان والشوارع ، تتمتع جورجيا وبالاخص مدينه تبليسي وهي العاصمه بنفس جو مصر فى الصيف وبالتقريب في الشتاء ، ممتلئه جورجيا بالاماكن السياحة المعتمده علي الجبال والكنائس والحدائق العامه والخاصه،

 

يقول البعض ان جورجيا دولة فقيره ولكن المتضح ان الحياه رخيصه هناك جداا لاهل البلد من حيث الاكل والشرب والمواصلات ومختلف الاسعار بخلاف اسعار الملابس نفس اسعار مصر او اغلي وهى دولة مستقله بنفسها فى المعيشه والرواتب يعني هما عجبهم نفسهم كده وموافقين على الحياه والرواتب كده حيث ان اعلي سعر للرواتب هناك بيصل ال 200 دولار بالشهر ومع العلم ان سعر الاري ( دى اسم العمله بتاعتهم او الجنية بتاعهم ) امام الدولار = 2.72 لاري بسعر اليوم او بتاريخ المقال.

 

ناس كتيره سألتني علي الاقامه والعمل في جورجيا ، من المؤسف ان الاقامه هناك كانت مفتوحة الفتره الاخيره ولكن حاليا علشان تعمل اقامه اتقفلت او بقت صعبه جدااااااااااا وغير متاحه فى الوقت الحالي او حتي لو معاك اقامه في صعوبة في تجديدها خلال الفتره دى وده بسبب ان جورجيا هتنضم للإتحاد الاوروبي ، نرجع تاني ازاى تحصل علي اقامه بيكون من خلال الاستثمار في اى مشروع او تعمل ليك بيزنس هناك علشان تعرف تاخد الاقامه وطبعا بالاضافه انك تتزوج للحصول علي الاقامه ودي اسرع حل فى اى دوله مش فى جورجيا.

 

انا بصراحه مشفتش عرب بيشتغلوا هناك فى محالات او الاماكن اللى انا زورتها نهائى ولكن انت لو معاك مهنه او صنعه وبتتكلم جورجي هيكون فرصتك كبيره جدااا وده اللى سمعته من ناس مقيمه هناك من زمان. لكن لو انت عايز تشتغل هناك وانت ابيض مش معاك لا لغه ولا صنعه هتتعب اوى وحتى لو اشتغلت يادوب هتكفى مصاريف السكن والاكل والشرب ولكن هتعيش كويس جداا فى خدمات وحياه نظيفه ونظام.

 

نسيت اقؤلكم اني قبلت شباب مصريين بيدرسوا هناك هندسه تكاليف السنه حوالي 4 الاف دولار بيقولوا احسن من مصر فى الدراسه والاسعار وكمان شهاده معتمده دولياً بخلاف شهادات مصر.

 

​

سادساً / اهم الاماكن في العاصمة تبليسي

..............................................

- هتركب التلفريك من منطقة Old city وتزور تمثال ام الجورجين Mother of Georgia وهتشوف منظر مدينة تبليسي من علي قلعة ناريكالا Narikala من ارتفاع 200 متر واللي بتوصل ليها عن طريق التلفريك.

 

- منطقه الحمامات الكبريتيه Sulfur bath وهتلاقي عندها حديقة National Botanical Garden فيها ازهار كتيره وكل زهره وشجره مكتوب عليها نوعها واسمها وهتلاقي شلالات روعه وسعر الدخول 2 لاري وانصح بيها للعائلات هادية وجميلة جداا.

 

- حديقه متاتسميندا Mtatsminda Amusement park جميله جدااا بتطلعها عن طريق قطر جميل جداااااا وسعر الدخول 2 لاري ويمكن الوصول ليها من خلال شارع روستفالي سيرا بالاقدام او عن طريق تاكسي وانصح بيها للعائلات والاطفال وهي على علو 600 الى 800 متر عن سطح الارض.

 

- ميدان الحرية Freedom Square محالات وماركات عالمية وميدان كبير وفيه انترنت ببلاش مفتوح لاى حد وعيش ياريس.

 

- مسجد تبليسي الوحيد Jumah Mosque وموجود فى Old city وللاسف مسجد شيعي.

 

- جسر السلام او الجسر الزجاجى The bridge of peace وموجود فى Old city

 

- للتسوق وكارفور وايست بوينت East point mall & carrefour للذهاب تاخد من المترو محطه varkatili وتنزل تاخد ميكروباص اصفر رقم 224 وانت بتركبه اساله بردوا قوله east point ب نصف لاري فقط. او تركب باس الازرق اللى رايح المطار رقم 37 وتقوله نزلني عند كارفور او ايست بوينت.

 

- في المساء جولة في شارع روستافيلى الشهير حيث دار الأوبرا والبرلمان القديم ومجمع السينمات حتى الوصول لميدان الحرية وتمثال القديس ماري جرجس.

 

​

سابعاً / الذهاب الي مدينة كازبيجي

.......................................

​

زورت اعلي جبال في كازبيجي يرتفع إلى 4551 متر (14600 قدم)

الذهاب اللى كازبيجى تركب المترو وتنزل محطة ديدوباي Didube ومنها تاخد منها ميكروباص واسمه عندهم مارشوتكا وتركب كازبيجى ولما توصل تاخد عربية تطلعك الجبل ونفس الكلام وانت نازل من فوق ، هتشوف بقي جبال القوقاز أعلي قمة في جورجيا طول الشتاء متغطية بالثلج وعلشان تطلع لازم تاخد عربية دفع رباعي ب 50 لاري ولو انتوا اشخاص ممكن تقسموا ال 50 لاري بينكم وهو بيطلعك لجزء من الجبل والباقي تطلعوا ماشي هتشوفوا فوق جورجيا كلها وفي كنيسة انانوري فوق أعلي تلة هناك تقدروا تزورها.

​

ولكن انا افضل انك تطلع تبع شركه سياحه وانا عملت كده وشركه السياحه اخدت 45 لاري فقط وطلوع الجبل كل فرد 15 لاري وزورت معاهم

​

1- Zhinvali reservoir

2- Ananuri fortress

3- Source of mineral water

4- Gudauri

5- Stepantsminda

6- Gergeti trinity church

7- Black and white aragvi

 

ثامناً / الذهاب الي مدينة جودوري

.......................................

دي فيها الثلج بقي ومنتجع للتزحلق Guduari Ski resort لمحبي التزحلق والتلفريك

على اعلى قمم الجبال وعيش جو الساقعه وكمان ممكن تركبوا jet ski او snowmobile واختصار لكل الكلام ادخلوا على اليوتيوب واتفرجوا بقى علي جمالها وجمال الانشطه.

 

تاسعاً / الذهاب الي كوتايسي

...............................

مكنتش في خطتي للاسف ولكن دا افضل الامكان اللي ممكن تزورها وممكن تركبلها من محطه ديدوباي بتاخد ميكروباص او المارشتوكا وده اسمه عندهم وتبعد عن تبليسي حوالى 3 او 4 ساعات.

​

1- Prometheus Caves

2- Okatse Canyon

3- Martvili Canyon

4- Martivili Monastery

5- David Agmashenebeli Square

 

عاشراً / اي سؤال انا تحت امركم

===========================
 

شرح كامل للتقديم علي فيزا جورجيا + طلبات السفاره + التصريح الامني

هتلاقي شرح كامل في الفيديو ده

​

واسأل اي سؤال وانا تحت امركم فيه ان شاء الله.

 

الخطوات المطلوبة :

​

• ايداع 20 $ ( عشرون دولار ) في حساب السفارة ببنك CIB حساب رقم 5360300106

• تحميل upload ايصال البنك بالايداع .

• تحميل upload صورة جواز السفر.

• تحميل upload حجز مبدئي طيران .

• تحميل upload حجز مبدئي فندق .

• تحميل upload صورة شخصية خلفية بيضاء 80% وجه مقاس 4 في 5

• تحميل upload كشف حساب لاخر 3 اشهر لايقل عن 10 الاف جنيه .

• تحميل upload شهادة التأمين السياحي خلال فترة البقاء بجورجيا .

• بعد ملئ الاستمارة يتم طباعها والتوقيع باليد على اخر صفحة واعادة تحميلها على الموقع مرة اخرى بالتوقيع .

 

خطوات استخراج الموافقة الأمنية:

​

1- لو انت / انتي سنك من 18 ل 40 سنة لازم تعمل موافقة أمنية علشان تسافر جورجيا بغض النظر عن مهنتك.

2- بعد استلام الفيزا من السفارة بتروح مجمع التحرير وتصور الفيزا والباسبور وتكلفتها نص جنيه (لازم تكون عارف اسم والدك خماسي وتاريخ ميلاده لأنهم بيطلبوهم منك هناك)

3- الموافقة الأمنية بتستلمها بعد 4 أيام

4- الموافقة الأمنية صلاحيتها شهرين من تاريخ الإستلام .

5- مواعيد العمل من السبت للخميس من 8 صباحا ل 1 ظهراً.

6- العنوان : مكتب رقم 23 - مكتب ظابط الإتصال - الدور الأول خارج المجمع - مجمع التحرير- ميدان التحرير

 

مهم جدا قبل التقديم علي الفيزا:

لازم الأبليكيشن والحجوزات والتأمين الطبي يكونوا كلهم بنفس المدة اللي هتقصيها فى جورجيا لأن الفيزا بتطلع بعدد الأيام اللى كاتبها فى الأبليكيشن.

 

عنوان السفارة:

11 ميدان اسوان، الحويتية، الجيزة، مصر / رقم التليفون : 0020233044768

او تنزل الدقي وتاخد من كوبري الدقي اى مشروع رايح عبد المنعم رياض وتنزل تمشى خمس دقائق لحد ما توصل للسفاره.