هونج كونج
رحلتي ل هونج كونج
* الطيران : الرحله كانت من مطار چاكرتا اندونيسيا إلي مطار هونج كونج علي طيران Scott السنغافوري
سعر التيكت كان ١٢٠$ ونزلت ترانزيت مطار سنغافوره
حاجه كده فوق الروعه والوصف ،، ٧ ساعات ترانزيت محسيتش بيهم خالص وبعدها وصلت هونج كونج الساعه ٦ الصبح اول اليوم بدري بدري
* التأشيره : هونج كونج بدون فيزا للمصريين ولاغلب الدول العربيه وبتاخد حاجه اسمها Travel Document وبيكون مدتها ٩٠ يوم ولازم يشوفوها وانتا خارج تاني ومش بيتختم لك عليها دخول ولا خروج يعني لو ضاعت منك بعد كده مثلاً ف مفيش اي اختام ع الباسبور تثبت انك دخلت او خرجت من البلد دي اساساً .
* العمله : دولار هونج كونج وده سعره مقابل الجنيه المصري = ٢ جنيه وربع
* التنقلات : قدامك ٣ اختيارات للتنقل من المطار لوسط البلد ،،
المترو
الباص
التاكسي
طبعاً هانبعد عن التاكسي علشان غالي جداً وهانختار الباص وده سعره بيكون ٣٠ دولار هونج كونج او المترو
انا عملت اشتراك في المترو وكان سعره ١٥٠ دولار هونج كونج
والحمد لله كفاني اسبوع تنقلات وما احتاجتش اني اشحنه تاني
وللعلم تقدر تستخدم الكارت ده ف الباص وبيتخصم منه ثمن الباص او لو مش معاك فلوس فكه تقدر تحاسب بيه في السوبر ماركت او تقطع بيه تيكت ف الاماكن الي بتقبل الكارت ده .
ركبت المترو من محطة المطار Airport لمحطة Central ومنها غيرت المسار لخط اسمه Tsuen Wan Line ونزلت محطه اسمها Prince Edward ودي الي سكنت فيها 👌
* الاقامه : عملاق الاستضافه والتوفير Couchsurfing
عملت Request لشخص اسمه Chris طلبت منه اني اقيم عنده ال ٦ ايام بتوع الرحله وهو رحب جداً وكان شخص لطيف وبقينا اصحاب جداً دلوقت
ال ٦ ايام دول اقل هوستل لقيته كان سعرهم ١٥٠$
وبكده قدرت اوفر فلوس الاقامه
وصلت تعبان جداً كانت الساعه ٧ الصبح نمت علي الكنبه وصحيت الساعه ١٠ علي ريحه غريبه وصوت حد بيصحيني عشان اقوم من النوم افطر
الفطار كان رز ابيض مع قطع لحم احمر صغير جداً ،،
فسألته ايه ده
قالي دي لحمة خنازير مع ارز وسلطه .
قولتله لا يانجم مع نفسك مليش ف السكه دي والله
قالي انتا مسلم صح ؟؟
قولتله الحمد لله ايوا
قالي انا بتأسف لك جداً والموضوع مش هايتكرر طول مانتا موجود .
* الأكل : أغلب المطاعم هناك اكلها حرام ولكن فيه مناطق فيها مطاعم حلال زي مثلاً محطة مترو Tsim sha Tsui فيها مطاعم هندي وباكستاني وتركي كلها حلال وسعر الوجبه بيبدأ من ٢٥ دولار هونج كونج .
* شوارع التسوق في هونج كونج :
* Sham Shui Po
* Hollywood Road
* Mongkok
* Causeway Bay
* Admiralty, Central and SoHo
* Sheung Wan
* المزارات السياحيه
قمة فيكتوريا Victoria Peak
ديزني لاند
حديقة المحيط أو ocean park
عجلة مراقبة هونج كونج
ممشي Tsim Sha Tsui Promenade
ممشي النجوم أو avenue ofstars
سيمفونية الأضواء أو symphony of lights
تيان تان : تمثال بوذا
جزيرة لانتو وجزيرة لاما
متحف الشمع
برج الساعه
شارع هوليوود
* هونج كونج دي تزورها مره واحده في حياتك وماتتكررش تاني عشان من اغلي البلاد في العالم حرفياً
===================================
هونغ كونغ
تجربتى هناك ..
هونغ كونغ بلد جميلة جدا وصغيرة وتقدر تلفها كلها فى خمس ايام
*الفيزا : ابشر يا تيمور :D هونغ كونغ لو انت مصرى فمش هتحتاج تقدم على فيزا وكل اللى عليك انك تحجز الطيران وعلى المطار عدل، واول ما هتوصل مطار هونغ كونغ هتاخد تأشيرة دخول البلد لمدة 90 يوم وببلاش
*العملة : الدولار الهونج كونجى HKD وكان بيساوى جنية تقريبا " ده من شهرين "
*المناخ : الجو فى الصيف الرطوبة عالية وفى اوقات بتنزل امطار
*المواصلات : المترو اسهل وسيلة هناك ومتوصلة فى كل البلد وجوه محطة المترو هتلاقى مكاتب خدمة عملاء هتساعدكم فى اى حاجة، وكمان الاتوبيسات العامه حلو ومنظمة وموجوده محطات ليها كتير، ووممكن كمان بقى تستخدم رجلك " مهو المشى حلو بردوا وهيساعدك انك تشوف اماكن كتير فى البلد " واوعى اوعى تركب تاكسى لان اسعارهم نـــار
*الاماكن اللى مينفعش تفوتها هناك :
1- سيمفونية الاضواء : مبهرة لاقصى مدى، وده عرض ليلي بكشافات الليزر وبيغطي أكثر من ٤٠ مبنى على جانبي الميناء وموجود على ساحل Tsim Sha Tsui والعرض ده اتصنف كأكبر عرض دائم للأضواء والصوت في العالم علشان بتشتغل بتناغم هائل مع الموسيقى. العرض بيبدأ 8 مساءا يوميا والدخول ببلاش.
2-ديــــــــــــزنى لاند : ايه الجمال اللى فيها ده، دى بقى تذكرتها فى حدود 500 HKD وبتدخل بها تلعب كل حاجه جوه والله بقى على مزيج الخيال والحقيقة اللى هتعيشوا فى ديزنى وهتلاقيها فى جزيرة Lantau، وهناك ولد بنت شاب عجوز طفل الكل بيلعب :)
3- حديقة المحيط Ocean Park : الحديقة دي موجودة على أرضين في هونغ كونغ وهتتنقل بينهم بالتلفريك او بقطر أوشن العجيب، وهناك هتشوف الحيوانات الآسيوية المدهشة زي الباندا العملاقة وأعماق البحار وهتشوف المئات من أنواع القروش واحواض السمك التي تضاهي المستوى العالمي وهتلعب ألعاب جميلة جدا وكمان هتشوف حيوانات أستراليا الفريدة “دب الكوالا هتشوفه مسترخي على أغصان الشجر والكنغر” قمة المتعة في المكان ده وتذكرتها فى حدود 350 HKD
4- دير 10،000 تمثال بوذا : من اشهر المعابد هناك ومفيهاش تمثال شبه التانى، ودى عايزه نفس طويل :) لانك هتطلع اكتر من 430 سلمه ولما بتوصل للنهاية بتوصل لأعلى قمة في المنطقة وبتشوف مناظر طبيعية قمة الروعة
5- التسوق ( هونغ كونغ جنة لعشاق التسوق ): هناك في أسواق كتيرة ومتعددة ولكل المستويات والأذواق وفيها كل ما قد تحتاج إليه، ومن أشهر مراكز التسوق Sogo Mall (Causeway Bay)، iSquare في شارع Tsim Sha tsui
** امشى كتير فى شوارع هونج كونج بجد هتنبسطوا من اد ايه هما شعب منظم وشوارعه جميله ومليانه علامات ارشادية وفى كتير اشارات مرور بجرس علشان تعرف هتعدى الشارع امتى وهتلاقى انترنت فى كل مكان وهتبص للناس فى الشارع هتحس انك عايش فى فيلم من افلام ديزنى
** نصيحة : متغيروش دولارات فى المطار لانه بياخد عموله وهتلاقوا صرافات كتير فى شارع Tsim Sha tsui وكمان حاولوا تنزلوا Guesthouse هتوفروا كتير او hostel
** بصوره عامه البلد غالية شوية بس سهل انك متصرفش كتير وتستمتع اكتر
** يا رب اكون قدرت أفيدكوا
=================================
هونج كونج ... بلد المليون بوذا
على غير العادة هبدا بشوية معلومات اساسية مهمة قوي تدخلنا في مود هونج كونج ويستفيد بيها برضه اي حد بيفكر يروح هونج كونج وبعد كدة هحكيلكو تفاصيل اكتر رحلة مسخرة في الدنيا 😂😂
المعلومة الاولى الي ناس كتير ماتعرفهاش هي ان هونج كونج دولة مستقلة عن الصين واستقلت سنة 1997 وشعب هونج كونج مافيش بينه وبين الصبنيين عمار تحس انهم شايلين الصينيين فوق دماغهم عشان كدة كل رعايا الدول تقدر تدخل هونج كونج بدون فيزا الا الصينيين لازم يطلعو فيزا
الفيزا
هونج كونج من البلاد الي مش بتطلب فيزا مسبقة وكمان دخولها بدون رسوم بس بتخضع لمقابلة واستبيان من ادارة الجوازات والهجرة في المطار عشان يعرفو انت جاي ليه... ولازم يكون معاك على الاقل الف دولار امريكي يشوفهم او كريدت كارد اسمك عليه ... وبتكون مقابلة ذكية جدا وهما مذاكرينا جدا بيسال جاي كام يوم وبتشتغل ايه وجاي مع مين وهتتفسح فين ويقارن الاماكن دي بمستوى مكان الاقامة مسالة اجرائية محتاجة هدوء وثبات
المناخ والجو
هونج كونج بلد استوائي مطير ... حرا جدا جدا في الصيف ورطوبة عالية بتوصل لنسبة 98% فاوعوا تفكروا حتى تقربو لهونج كونج في الصيف ... واحسن وقت ليها هو من شهر 11 لحد 2
الطيران والتذاكر
السفر لهونج كونج حوالي من 12 ل 15 ساعة بترانزيت من الامارات ... او قطر بس قطر واقفة دلوقت وجبنا التذكرة بحوالي 8500 دلوقت تعلى شوية وتنزل شوية حسب الشهر الي مسافر فيه
مدة الرحلة
هونج كونج بلد صغيرة مش كبيرة اقصى مدة تقعدها فيها 6 ايام وفي بلد اسمها مكاو جنبها ساعة بالفيري بتاخد فيزتها من الميناء .. مكاو مشهورة بال night life وفيها اطول قفزة بانجي في العالم ممكن تحط لمكاو يومين او تلاتة
العملة والمصاريف
عملة هونج كونج الدولار الهونج كونجي ودا بحوالي 2.4 جنيه مصري والدلار الامريكي الواحد بحوالي 7.7 دولار هونج كونجي .. البلد غالية نسبيا مش رخيصة قوي بس لورحت في موسم sale هتنبسط
احسن مكان للاقامة
هونج كونج عبارة عن 3 جزر اساسية مربوطين ببعض بشبكة طرق ومترو ومواصلات ذكية ومتطورة وغاية في الراحة .. احسن مكان للاقامة حتة اسمها كوزواي باي دي قلب البلد بالزبط شبه التايمز سكوير فيها كل الخدمات والشوبيج الي ممكن تحتاجة
البداية
جت الفكرة لينا في ساعة صفا انا واصحابي كنا قاعدين فيهم على القهوة وذاكرنا كويس البلد وخلال 3 ايام كنا جاهزين ... وكان كل يوم بيقرب للسفر بطننا بتكركب اكتر .... احنا رايحين بلد غريبة وناسها غريبين مريبين جدا ولا معانا فيزا ولا يحزنون ... غير احساسنا اننا عمالقة بجد بالنسبالهم اول ما نزلنا المطار لقيناكل الناس حوالين صغننين وحبتهم قليلة ياعيني والرجالة شبه الستات والستات شبه الرجالة بشكل مريب وتحسهم كلهم عيال ما بيكبروش وكلهم شعرهم حلو ومافيش عواجيز ولا كروش زينا 🤐 ... تحس انها مدينة اطفال ... ظباط الجوازات عندهم ستات ورجالة وكلهم شكلهم بتاع 12 سنة قطعية واحدة شبه ماتريكس
دخلنا الجوازات واتنفضنا بس الحمد لله دخلنا البلد وبمجرد ماطلعنا الرطوبة سيحتنا وكان طبيعي جدا اول حاجة تسب لصاحب الشورة الهباب دي
ركبنا المترو للبلد وهناك المترو بينركب بالتذكرة او بتجيب كارت اسمه octopus card ب 50 دولا بتشحنة جول منتا هناك وبتستردهم لما تيجي تمشي ... الكرت دا فئات اعلى فئة فيه ب 350 دولار هونكونجي دا احسن واحد لانه بيديك 3 ايام فري ومواصلة رايح جاي للمطار الاكتوبوس كارد دا بيعمل كل حاجة في الدنيا ي من المطاعم وبتاحب بيه السوبر ماركت وعاملينه عشان يختصر وقت الحساب على اي حاجة بمجرد ما الكاشير يخلص تحط بس الكارت
نزلنا في هوستيل اسمه هونج كونج هوستيل في وسط البلد كان معقول والليلة بحوالي 300 جنيه وواحنا عشان كنا احنا التلاثة من ملحنين الشخير قررنا ناخد اوضه 4 لوحدنا عشان ماحدش يقاطعنا
بدانا اول يوم بمكان اسمه victoria peek المكان دا هو اعلى نقطة في هونج كونج بتطلعلها بترام راسي فوق سطح البحر بحوالي 4كيلو والمنظر من فوق وهمي وفي مطاعم كتير وكفاتيريات وكافيهات بالعبيط .... ركوب الترام ودخول التراس ب 90 دولار يعني حوالي 200 جنيه ... وفي كمان متحف الشمع "madame dusso" بحوالي 240 دولار يعني 600 جنيه تقريبا ...
ومدا تسود بتاع هونج كونج وهمي احسن من بتاع نيويورك بمراحل بس مزودين العيار شوية في الشخصيات الصينية ... كان وقت لطيف خلصنا وروحنا ريحنا شوية ونزلنا بالليل نلف في المنطقة بتاعتنا وهي منطقة عالية قوي في كل محلات اللبس العالمية والمستوى العام بتاع الناس هناك ممتاز قوي .... الاكل هناك كارثي بمعني الكلمة هو كله سمك ومشتقاته ونودلز ورز بس كله مسلوق في مسلوق وبدون ملح ولا سكر حاجة يعني كدة تشل 😂😂 عشان كدة كلهم رفيعين جدا جدا وسمانتهم هي اتخن حتة لحمه فيهم من كتر المشي عليها 😂😂 احنا في الاول انا وحمدي قضينها تونة وتونة وتونة لحد ما انهرنا توجهنا بعدها لماك وبقينا نسمي وامرنا لله ... ومؤمن من اول لحظة كان واخد القرار بتاع انه هياكل صراصير ولحم كلاب فاتعملنا كانه مش معانا خالص وكنا بنروح معاه نتفرج عليه بس
اليوم الثاني
قمنا على صوت رعد ورزع وهبد كان يوم الاعصار الي هناك فنزلنا لقينا الشجر بيطير والشاشات بتاعت المحلات بتتكسر والناس عمالة تجري والبوليس بيحلق عليهم ... طبعا ولان الانسان المصري جبروت واحنا عايشين في اسكندرية فواخدين على الجو دا قضيناها جري وتصوير مع الجو الغريب دا ... بيتهيالي اوحش حاجة قي الدنيا انا الدنيا تكون بتشتي والجو حر ... عدى اليوم على خير الحمد لله
اليوم الثالث
الجو كان حلو جدا نزلنا روحنا متحف ال 10 000 بوذا وهو متحف في عشرتلاف تمثال لبوذا في قمة جبل عالي جدا وفي اعلى قمته في زي مقابر بس مش زي بتاعتنا ... التربة عندهم صندق بتاع 20 ×20 سم ... اه والله ... عندهم بيحرقو الموتى بتوعهم وياخدو الرماد يحطوه في العلبة او فازة ويبقى معاهم عادي شغال او يتحط في المعبد يقرولو الفاتحة ... الغريبة ان كل حاجة في البلدي فوق لازم تاخد مليون فرسخ سلالم عشان تطلع ... طلعنا صلينا ركعتين ودعينا على الكفرة دول ونزلنا طلعنا على ميدان اسمه the golden bohimi ودا زي ساحة على البحر مباشرة فيها نصب تذكاري على شكل تمثال ذهبي بريطانيا سابوه للصينين لما انجلى الاستعمار الانجليزي ...
وهو مكان برضه دمه خفيف من على المرفا كدة تقدر تشوف مباني هونج كونج العالية كانك في منهاتن من على بروكلين بريدج ... وفي شخصيات كرتون كدة في صورة تماثيل تحفة في التصوير .... وبعدها روحنا حتة اسمها سوق الليل ... وهو سوق بيفتح من 6 لحد 12 بيبيع حاجات شعبي و وسوفونيرز وكدة وكالعادة مؤمن ما حرمناش من فقرة العك اليومية وقعد كل مش عارف ايه كدة بس هو حاجة شبه الفار
اليوم الرابع قررنا نلف شوية ونعمل حبة شوبينج ... عندهم شوية outlet 0 جميلة ونظيفة ... الاسعار مش رخيصة ومش غالية في المعقول اقل من مصر شوية بس في لقط تحفة طبعا واشهر مولين outlets هناك seegate ومول اسمه Olympic 2 خلصنا ورجعا تاني برضه سوق الليل دا وادينها برضه شوية هدايا وسوفونيرز
اليوم الخامس "تمثال بوذا" "Tian Tan Buddah "
ابعد مكان ممكن تروحه في هونج كونج بالباص حوالي ساعة ونص وبعد كدة بتركب تليفريك حوالي ساعو وسط غابات وطبيعة وشكل المحيط حاجة كدة اكتر واحسن من الخيال ... الراجل بودا دا صاحب مزاج راح في الرايق وقالك الناس تيجي تعبدنا هنا احسن 😂😂😂 رحنا طبعا كالعادة ام التمثال ينطلعة فرسخ فوق الارض وسلالم سلالم للابد هو بصراحة تمثال عملاق وغريب بس قاعد قاعدة مريبة قوي قاعد مربع فارد ايد لفوق والايد التانية ماددها وعامل حركة بصوبعه مش تمام لومؤاخذة تدل على انه شخص مش محترم
المهم طلعنا ونزلنا رحنا بيت كدة واضح انه المعبد بتاع البوذيين سميناه "بيت السحيمي" 😂😂 .. دخلنا برضه صلينا ركعتين وتوكلنا على الله وطبعا فقرة بالليل اليومية مؤمن والضفاضع والسوق بالليل 😂😂😂
اليوم الاخير كنا ما بين ديزني لاند وبين اوشن بارك ... عملنا مقارنة من على اليوتيوب طلعت اوشن بارك افرس بكتيير جدا فرحنا ديزنا اتورنا صورتين برة عشان نحلف اننا رحنا وطلعنا بعد كدة على اوشن بارك ... ندينة ملاهي وهمية ... متقسمة مناطق ... كبيرة لدرجة ان فيها تلفريك ... العاب كلها ادرينالين ... خلصنا ورجعنا اخدنا دش واخدنا شنطنا وعلى المطار
نصايح مجملة
-اوعوا تنسو ال buzz fresh الي هي الشطافة
-مهم قوي قوي تاخدو معاكو اكل ونواشف وجبن ومعلبات زي الفول والحمص وكدة ومايمنعش لو بنعرف نطبخ ناخد معانا حاجة تنطبخ
- لازم لازم لازم يبقى معانا شمسية عشان المطر المفاحئ او الشمس القوية
- اوعو حتى مجرد ان الفكرة تيجي في دامغكو انكو تروحو هونج كونج في الصيف
-هونج كونج بلد غنية ومستوى المعيشة فيها عالي مش زي الصين عشوائيات ومناكق شعبية
- احذر من الاستهانة بيهم او بديانتهم او اماكن العبادة بتاعتهم هم من الشعوب المحترمة جدا الي بيحافظ على تقاليده وبيحترم كل الناس وما بيحبوش حد يساهين بيهم
تقريبا دي كل حاجة افتكر انها مهمة عن هونج كونج .. اتمني للجميع سفر علطول واتمنى يكون التقرير فاد لو حتى بمعلومة صغيرة
=============================
هونج كونج مدينه جميله جدا و فيها اجانب كتير جدا جدا و غاليه نسبيا للصين . التاكسي فيها غالي جدا . انا فاكر كنت ركبت تاكسي كان العداد بيفتح من ٢٢ هونج كونج دولار و تروح مشوار تلت ساعه تلاقي نفسك دفعت مش اقل من ٨٠ هونج كونج دولار، اللي هو ممكن يبقي تمن ليله في هوستل.
الأماكن اللي تقدر تزورها هي: ocean park و harbour city و Disney land و the peak و شارع هناك مشهور جدا مليان اجانب، و the temple street و ده شارع مشهور جدا و ليه تاريخ كبير و فيه أفلام كتيره هناك بتتصور و فيه أماكن تانيه حلوه جدا.
ناخد بالنا ان هونج كونج ملهاش تاشيره للمصريين لكن لو خرجت من الصين و دخلت هونج كونج مش هتعرف تدخل تاني الا لو معاك Chinese visa with multiple entries.
الناس في هونج كونج بيتكلموا انجليزي حلوه جدا لانها لغه أساسيه و بيتكلموا Cantonese و ده بيختلف شويه عن الصيني ال mandarin اللي اللي شعب الصين بيتكلمه.
هونج كونج للأسف فيها عنصريه خصوصا للصينين العاديين و دايما بيحبوا ال white people, لكن مع ذلك فيه ناس هناك كويسين جدا.
و أخيرا هونج كونج بيسموها shopping paradise لان اي حاجه بتلاقيها هناك و رخيصه عن الصين، خصوصا الإليكترونيات.