تقرير رقم ٤ (الاكل الهندي)

 

ناس كتير خوفتني من موضوع الاكل سواء الحلال و الحرام و البهرات الكتيره جدا.

انشاء الله هغير وجهت نظركم و نجرب الاكل الهندي و نشوف ايه المناسب لينا كمصريين.

 

خليني هقسم البوست ده لجزئين:

 

* الجزء الاول و هو (سر الثلاث دوائر الملونه علي الاغذيه و المشروبات)

 

هتلاقي علي كل حاجه مغلفه دائره خضراء او حمراء او بني

العلامات ديه اغلب الناس فهماها غلط علي انها معموله لمسلمين عشان الحلال و الحرام.

المعلومه ديه غلط جدا عشان العلامه ديه معموله لديانه الهندوس و الي بيعتنقها الكثير من الهنود و الي مش بياكلي غير المنتجات النباتيه فقط و منتجات الالبان يعني مينفعش ياكلوا لحوم.

ذبح البقر حرام عشان كده مش هتلاقي غير فراخ و سمك

 

طيب العلامات ديه يعني ايه؟؟

 

العلامه الخضراء:

تعني ان المنتج ده Veg يعني نباتي و لا يحتوي علي زيوت او دهون حيوانيه و خاليه من جميع انواع اللحوم (البسكوتات_ الزبادي_ الجبن_ الشكولاتات_الشبس_ ......)

 

العلامه البني:

تعني ان هذا المنتج يحتوي علي بيض و هتلاقي كلمه Eggless بجانب العلامه

(الكيك)

 

العلامه الحمراء:

تعني المنتج يحتوي علي لحوم او زيوت او دهون حيوانيه و ديه هتلاقيها في بعض الادويه و المطاعم الاجنبيه زي ماكدونالز و كنتاكي و بيتزا.

 

اعتقد كده العلامه الخضراء و البني بالنسبه لمسلمين مفيش مشاكل

 

طيب العلامه الحمراء حلال؟

 

ديه مش هقدر احللها او احرمها بالنسبه لمسلمين لسبب و هو:

مطعم زي ماكدونالز او كنتاكي الفراخ يتذبح بالالات و ليس بالصاعق الكهربي فبالتالي تكون خاليه من الدم الملوث و بتكون حمراء و ليس زرقاء و طالما انها خاليه من الضرر فالمفروض محلله لمسلمين بس سبب عدم ايجازتها عند المسلمين انه لم يتم التسميه عليها قبل الذبح

(النقطه ديه ليها حريه الاختيار بس انا نصحتي الشخصيه ابعد عن الشبهات و كل سمك لو محتاج لحوم)

 

*الجزء الثاني و هو الاكلات الهنديه و البهرات

 

المصريين بيسمعوا حاجتين عن الاكل الهندي حراق جدا او خالي من النظافه.

​

طيب خلينا متفقين علي حاجه

ان الناس الي بتاكل بره بتها حتي لو في مطاعم معروفه و مشهوره فهي متعرفش مستوي النظافه زي العامل غاسل ايده و لا لأ او الخضار اتنضف كويس و لا لأ و الكلام الذي منه

فمعلش المبدا واحد

 

طيب الاكل حراق؟؟

مش كل الاكل الهندي حراق هي درجات

 

زي ما احنا اساس اكلنا و خصوصا الفطار (الفول و الطعميه و البيض)

 

هما اساس اكلهم اليومي لازم يدخل فيه البطاطس و البصل فعشان كده بينوعوا في اكلاتهم مع دخول العناصر الرئيسيه بطاطس و بصل في وجباتهم زي:

 

السمبوسه: مفيش حاجه اسمها سمبوسه بالجبنه او اللحوم

هي نوع واحد في الهند كلها و هو سمبوسه بالبطاطس و الفاصوليا و ديه حجمها بيكون كبير اكبر من المتعارف عليها في مصر و ممكن اتنين منها يكونوا وجبه تصد معاك لساعات

سعرها بيتراوح من ١٠ الي ١٥ روبيه لقطعه الواحده و مش حاميه.

 

فطيره البصل

مش اشهر الفطائر الهنديه  و ديه فطيره كبيره مقليه محشيه بصل بالبهارات و ديه بتكون حاميه بس لو انت بتحب الشطه فهتعجبك جدا سعرها من ١٥ الي٢٥ روبيه

 

فطيره بيض اومليت

ديه محشيه بيض امليت و مش حاميه خالص

و سعرها من ١٠ الي ١٥ روبيه

 

دول اهم ٣ معجنات هناك

 

ندخل علي انواع العيش

هناك هتلاقي انواع كتير جدا لعيش زي:

 

_البوري و ده عيش مقلي زي بتاع مطعم تكا و في مطاعم بتحت فيه جبنه مبشوره و مطاعم ساده

سعره من ٢٠ الي ٣٠ لخبز الواحد

 

_النان و ده عيش بيكون خفيف بيستخدموه مع العدس الاسود و بيكون عليه بقدونس خفيف جدا و سعره بيطراوح من ٥ الي ١٠ روبيه

 

_الشباتي و ده بيكون تقيل عشان بيتسيح عليه ذبده و بيتقدم فبيكون دسم و سعره حوالي ٢٠ روبيه

 

_البراتا و ده في منه نوعين

براتا عادي و ده بيكون شبه الفطير المشلتت بس الرقايق بتعته قليله جدا

و في نوع اسمه الو براتا و ده بيكون محشي بطاطس بالبهارات و حلو جدا و سعر الواحد من ٢٥ الي ٥٠ روبيا

 

_في نوع تاني عامل زي الشيبس بس علي كبير و هتلاقيه بيتباع في اسبته في الشوارع و بيكون معمول بدقيق الحمص و بيسالك عايزه بالشطه و لا ساده و ده بيكون ب حوالي ١٠ الي ٢٠ روبيه

 

ندخل علي الاكل الهندي الشعبي

الهند هتلاقي اكلها الاساسي عدس اسود و حمص شام بالبهارات و ديه اطباق رئيسيه شعبيه و ده بيقدم مه العيش البوري او الشباتي و سعر الوجبه ٦٠ الي ٩٠ روبيه

 

في وجبه شهيره جدا اسمها Thali southen india و ده اكبر طبق ممكن تاكله و مش هتعرف تخلصه و ده عباره عن صنيه فيها اطباق تحتوي علي جميع الاكلات الشعبيه زي الارز البسمتي المسلوق و العيش الشباتي و مجموعه صوصات مختلفه و حلويات سواء تفاح مقلي او حاجه شبه الكنافه المشوحه و حاجه شبه المشبك

​

هو عموما يحتوي علي ١٥ طبق في الصنيه الواحده و سعره من ١٢٠ الي ٢٠٠ روبيا

 

في حاجه هتلاقيها منتشره في الهند و خصوصا الشوارع

هتلاقوا حاجه شبه البطاطس الصغيره

بس ده نوع شبه العيش البوري بس بيكون صغير و ناشف و بيكسره من النصف و بيحط جواه خلطه شبه الدقه الي بالثوم الي بتتحط في البتنجان المخلل عندنا في مصر و التلاته منه ب ١٠ روبيه و ديه بعتبرها مقبلات

 

في حاجه برده شبه البوري و ديه بيحط جواها عدس و بطاطس و فجل مبشور و صوص شبه الذبادي و مسالا و المسالا ديه بتكون حاميه شويه بس الذبادي بيخففها

و ديه سعرها من ٦٠ الي ٨٠.

 

البرياني و ديه اكله هنديه معروفه عباره عن ارز بالفراخ هتلاقيها اكتر مدينه ديلهي بس اتاكد من صاحب المكان انه الفراخ حلال و سعرها حوالي ١٢٠ روبيه بي هيسالك هايز ربع او نص او فرخه كامل بس خد بالك ان النص عندهم عباره عن قطعتي صغيرين من الفراخ يعني دبوس و جناح ده النص فرخه عندهم

 

الحلو الهندي

هتلاقي في اي مطعم او مكان شعبي حاجه لازم تنزل علي الطرابيزه و هي ينسون مع سكر النبات

 

الجيلابي و ده شبه المشبك بس بيكون مقرمش من بره و محشي عسل و ده بيكون بالجرام مش بالكيلو و سعر ال ١٠٠ جرام حوالي ١٠٠ روبيه

 

الكالابي و ده شبه لقمه القاضي شكلا بس حشو زي عجينه الباباظ و الكارمل

ده الكبير منه ب ٢٥ الي ٣٥ روبيه

الصغير منه الكيلو ب ٣٥٠ روبيه الي ٤٠٠

هتلاقي منه الابيض و الاصفر و البني و البني المحمر و الفرق هيكون في العسل و السكر

 

في حاجه شبه الكاستر بالمنجه بس مش نفس الطعم هتحس فيها طعم زبادي و مانجو و عليها فسدق و بتقدم في طبق صغير ب ٣٥ روبيه بس دسمه جدا.

 

عسليه الفول السوداني ديه هتلاقيها مع الباعه الجائلين في الشوارع علي عربيه المكسرات الهنديه.هتلاقي منها صوابع او اقراص

ال ١٠٠ جرام ب ٤٠ روبيه

في منها اطباق في محالات البقاله النص كيلو ب ١٥٠ روبيه

 

شويه معلومات في اسعار البقاله

 

زجاجه المياه و ده سعرها ثابت في كل الاماكن سواء داخل المزارات السياحيه او الشوارع او المحلات و بتكون ب ٢٠ روبيه اللتر و ٣٠ ال ٢ لتر فاشتري من اي مكان متشلش هم

 

العصائر المعلبه

هتكون من ٣٥ روبيه الي ٨٠ روبيه

 

العصائر الفرش في محلات العصائر

كوب الاناناس او الرمان او الاستفندي

الصغير ب ٣٠

الوسط ب ٥٠

الكبير ب ٨٠

 

عصير الليمون بالصودا علي عربيات الشوارع ب ١٥ روبيه

 

اسعار الفاكهه

الموز الكيلو من ٤٠ الي ٥٠

الاناناس بالتقشير ١٥٠ و حجمها كبير جدا

الباباي سعر الكيلو ٦٠

التفاح سعر الكيلو ٦٠

​

=====================================

 

تقرير رقم ه (التسوق و المشتريات)

 

خليني في الاول هكتب كام ملحوظه عشان محدش ينضحك عليه هناك و يتعامل معامله السياح.

 

*في محلات بتفتح من ١٠ الصبح و في من ١١ و في من ١٢ بالرغم انهم نفس المكان فانت روح من ١٢ احسن

 

*الاجازه الاسبوعيه يوم الاتنين

 

* اياك تشتري من اي محل او مصنع (Factory or Gov) يودهولك سواق التوك توك او سواق العربيه الي طالع معاك عشان الاماكن ديه غاليه جدا و بينضحك عليك في الاسعار لكذا سبب اولهم ان السواق بياخد عموله و البائع بياخد عموله غير انه بيغلي عليك عشان اما تيجي تفاصل و هيفضل يقولك ده مكان حكومي و المواطنين الهنود بيشتروا منه فكل ده هجس فبتخليش هندي يلبسك العمه.

 

* البائع الهندي صايع و بيحب يلعب بالكلام عشان يلبس الزبون زي مثلا اما تيجي تفاصل معاه يقولك ثمن الحاجه ١٠٠٠ روبيه و انت تقوله ٦٠٠ روبيه فيقولك انا كنت ممكن اقولك ١٥٠٠ و انت تقول ١٠٠٠ فتاخدها بالسعر بتاعه فده كده بيعاملك معامله الزبون بيلبس .

 

* في حركه بتتعمل في محلات الشيلان و البنجابي و الساري و هي بيكون حاطت زي تيكيت علي اللبس بسعر محدد زي مثلا ٥٠٠٠ و يجي يقولك ده سعر السياح بس انا قلبي حبك و هعتبرك مواطن هندي و راضع معايا من نفس البقره و هحسبهالك ب ٢٠٠٠ فده كده بيركبك الفيل و انت واقف عشان أنت ممكن تاخد الحاجه ديه ب ٦٠٠ روبيه بالرغم انه كاتب ٥٠٠٠.

 

* في جمله هتلاقي البياعين الهنود بيستخدموها و هي

We r in the morning and u r first customer so I want sell for you so I will give u the best price

​

الترجمه بالمصري

احنا بنستفتح الصبح و بنرش ميه و عايزين فلوسك

 

فطبعا مينضحكش عليك بكلام الموسكي و الهبل ده

 

* سيبك من كلمه Best Quality و ده قماش كشميري

عشان احنا اصيع من غاندي نفسه.

 

*اتعامل معاهم بكل ثقه و اقفش و امشي و قوله ده السعر بتاعي مش عاجبك خلاص سيبني و هتلاقيه هيوافق علي سعرك

 

*التيشيرتات الي بيكون عليها طباعه زي تي شيرت علم الهند الي اتصورت بيه ده هيقولك سعره ٣٠٠ خده انت ب ١٥٠

التيشيرتات الي فيها خياطه ديه هيقولك ب ٣٥٠ خده انت ب ٢٠٠

 

 

​

_اماكن الشراء في (جايبور)

​

في منطقتين معروفين

 

واحد عند (Hawa Mahal) و التاني اسمه (Johari bazar)

 

انا بفضل Johari لسبب ان hawa mahal في هناك مزار سياحي فهتلاقي الفيصال رخم جدا

 

ده يعتبر السوق الشعبي لهند هتلاقي الملابس الهنديه و البهارات و الهدايا

 

في حاجه مهمه و هي المصنوعات الجلديه الجمليه و ده من اجمل المنتجات هناك لازم تيجيب منها

 

البهارات :

*ملحوظه مهمه مفيش حاجه هناك اسمها كاري مش هيعرفوها و مش هتشوفها هناك

الي يعرفوه هو المسلا و الشطه و الكوركوم

في خلطه بهارات حلوه جدا قله عايز spices for beriani

الكاجو رخيص بالنسبه لمصر و سعره 1200 الكيلو.

 

الشال و البنجابي

هتلاقي انضف نوع هو الكاشميري بي فاصل جامد و اخسف بيها الارض

هيقولك ١٥٠٠ قله ٦٠٠ و سيبه و هو هيجيلك لوحده.

 

_اجرا

مفضلش حد يشتري منها هناك عشان ميضيعش وقت عشان وقتها قصير

بس عموما sadar bazar ده اسواق شعبيه

 

_نيو ديلهي

 

شوفي بقي ده اهم حاجه في البوست كله و اهم مكان عشان مش اي حد بيروح الهند يعرفها.

 

اهم سوق هو Sarojeni Nagar

ازاي تروح السوق ده؟؟

هتركب المترو و تنزل محطه AIIms

تخرج تركب التوك توك

قوله عايز اروح Sarojini nagar

هيقولك ٥٠ او ٤٠ روبيه قوله مفيش غير ٣٠ روبيه

​

ملحوظه

* خد شنطه ظهر معاك عشان هتشتري من المكان ده كتير جدا فبدل ما تفضل شايل في ايدك

 

ايه الي يميز المكان ده؟؟

انه اولا يعتبر سوق حكومي و خاص بالتصدير و اهم من كده ان هتلاقي يفطه عليها Fixed price

فمش هتتعب في الفيصال و اسعاره حلوه جدا

 

ملحوظه

*في باعه جائلين بيكونوا قاعدين قصاد المحلات مش حطين fixed price

,فاصل معاهم

 

هتلاقي بنطلون الرياضه ب ١٥٠ الي ٢٠٠ روبيه

البنجابي بيبدا من ٣٥٠

البنطلون بتاع البنجابي يبدا من ٢٥٠

شنط الضهر بتاعت الرياضه فاصل لحد ما تخدها ب ٥٠٠

الشنط بتاعت الرحلات فاصل لحد ٧٥٠

 

اتمني يكون البوست مفيد و سلام مؤقت حتي تقرير الرحلات في جايبور

============================
 

تقرير رقم ٦ جايبور (راجستان)

 

و المدينه ديه يطلق عليها المدينه الزهريه عشان اغلب المباني فيها باللون الزهري

 

انا قعدت في المدينه ٥ ايام ٤ ليالي (عدد الايام اختياريه بالنسبه لمسافر طبقا لما يحتاجه من المدينه)

 

* هتكلم عن تقسيم الرحلات في المدينه

 

اليوم الاول

صعب انك تقوم برحلات اليوم الكامل في اول يوم وصول فممكن تقوم برحله واحده فقط بعد الساعه الخامسه مساءا

 

_(Chokhi Dhani)

كيفيه الذهاب : بالتوك توك او ب Uber

 

*ملحوظه مهمه : uber رخيص جدا و بيتعامل كاش.

 

سعر التذكره :

 

في تذكرتين في واحده ب ٦٠٠ روبيه و واحده ب ١٠٠٠ روبيه

الاتنين نفس المميزات و شامله الاكل بس الفرق ان الاكل ب ١٠٠٠ روبيه بتقعد تاكل في مكان مقفول و بيكون بوفيه مفتوح و جو رومانسي انا شايف ملوش لازمه

 

لكن ال ٦٠٠ هتاكل في مكان مفتوح و بينزلك صنيه فيها ١٥ طبق و استحاله تخلصه و اسم الصنيه الي بتنزل Thali و ده بيكون شامل كل الاكلات الشعبيه الهنديه.

 

*ملحوظه مهمه

كل نوعيات الاكل الي هتنزل حلال عشان نباتيه كلها فمفيش خوف

 

وصف المكان

 

ديه تعتبر زي مدينه سياحيه بتجمع كل العادات و التقاليد الهنديه من اكلات و رقص واشهر المصنوعات الي بتشوفها قصادك و هي بتتصنع زي الغوايش الهندي.

 

هتحس المكان شبه المولد في الاماكن الشعبيه في مصر و ميزه المكان ان ليه فتره صباحيه و فتره مسائيه فخليك في الفتره المسائيه.

 

اول ما تخش هيقدمولك شوربه هندي في فخار و هتحس طعمها شبه شوربه الكريمه بس حلوي جدا و ممكن تاخد زي ما تحب Free

 

هتلاقي اكلات بس بفلوس و بيكون سعرها محلي مش سياحي فممكن تشتري منها.

 

المكان هتلاقي فيه قسم خاص لتسوق و اسعاره متوسطه و مسعره.

 

عدد الساعات داخل المكان: من ٣,٣٠ الي ٤ ساعات.

 

*ملحوظه مهمه

اذا رايح بتوك توك متخليهوش يستناك عشان يرجعك عشان هيكون غالي بحوالي ٤٠٠ روبيه

خلي احسن يوصلك و يمشي و انت هتلاقي توك توك امام المكان و اتفق علي السعر قبل التوصيل.

 

-تاني يوم

 

*ملحوظه مهمه

انا اجرت عربيه بسواق و كان سعرها ١٠٠٠ روبيه و لو كان بتوك توك هتكون ب ٤٠٠ روبيه يوم كامل

 

معبد (Birla Mandir)

الدخول مجانا و هو معبد لهندوس و يعتبر تحفه معماريه

عدد الساعات حوالي ٣٠ دقيقه

 

متحف (Jaipur museum)

و ده من اهم و احلي المتاحف الي ممكن تزورها و هتلاقي اثار من كل دول العالم هناك حتي مصر و مراحل تطور العمله و الالات الموسيقيه و كل حاجه ممكن تتخيلها.

 

سعر التذكره : ٣٠٠ روبيه

عدد الساعات: من ١,٣٠ الي ٢ ساعه

 

حديقه حيوان (Jaipur zoo)

سعر التذكره :٦٠٠ روبيه

الموقع : امام متحف جيبور

انا شايف ملهاش لازمه تضيع وقت هناك عشان مفيش حاجه تجذبك خصوصا انك هتلاقي كل الحيوانات جنبك في الشارع ما عدا الاسد و كام حيوان كده اكيد شفتهم في حياتك.

 

منطقه (Hawa Mahal)

ده مبني اثري يعتبر وسط الاسواق و مجانا

الوقت : ٥ دقائق تامل.

 

متحف قصر المدينه (City palace)

المكان مقسوم الي قسمين

المتحف و ده سعر التذكره ٥٠٠ روبيه

و القصر نفسه و ده سعره ٢٠٠٠ روبيه

بس شايف انك مش مستاهل تدخل القصر نفسه يعني كفايه تتفرج عليه من بره

بس ادخل المتحف

عدد الساعات : ساعه

 

المتحف العلمي (Jantar Mantar)

التذكره ب ٢٠٠ روبيه

المكان علمي بحت و ملوش لازمه تضيع وقت غير لو ناوي تحضر دكتوراه و تكون زي احمد زويل عشان هناك هتتفرج علي حاجات فيزيقيه معقده تعتمد علي وحدات القياس البدائيه و هتلاقي المكان ده في كل مكان في الهند

عدد الساعات: ٤٥ دقيقه

 

متحف (Gaitor )

مش متذكر سعر التذكره بس عموما لن تتعدي ٣٠٠ روبيه

الساعات :٣٠ دقيقه

و ده مكان اثري معماري

 

القصر المائي (Jal Mahal) الشهير ب Water palace

و ده عباره عن قصر وسط المياه و لا يمكن العبور اليه

الساعات : ٢٠ دقيقه

لا يوجد تذكره (مجانا)

 

-ثالث يوم

قلعه(Amber fort)

و ديه مم الاماكن المهمه جدا و هتتفرج علي القلاع وسط الطبيعه

الصعود الي القلعه يكون مشي او ركوب الفيل

 

*ملحوظه مهمه

سعر تذكره الفيل ثابت ١١٠٠ سواء كان فردان او فرد

هتلاقي ولد طالع مكاك و بياخد الكاميرا يصورك و انت علي الفيل و اول ما يدخل القلعه هيقولك جيب فيلوس ااكل الفيل

اياك تديله حاجه عشان فوق في اعلان ان متديش لاي حد فلوس و قوله مش معايا او هنديلك البوليس

 

سعر تذكره القلعه حوالي ٥٠٠ روبيه

عدد الساعات ٢ ساعه

 

قلعه( Naharagarh fort)

 

بتتفرج علي مدينه جايبور من اعلي قلعه

سعر التذكره :٥٠ روبيه

عدد الساعات : ساعه

 

قلعه (Jaigarh fort)

بتتفرج علي القلعه و اول مدفع مستخدم لحمايه هذه المنطقه

سعر التذكره 200 روبيه

عدد الساعات: ساعه

 

حديقه (Sisodiya Rani garden)

مش مستاهله تضيع وقت عشان انت اتفرجت علي الخضره و الطبيعه طول اليوم

التذكره: مش متذكر

الساعات: ٤٠ دقيقه

 

حديقه (Vodhyadhar Ka Bagh)

مش مهمه

التذكره: مش متذكر

الساعات: ٤٠ دقيقه

 

معبد القرود (Galta Temple)

ده لازم يكون قلبك جامد و متخفش من شكل المكان عشان هتحس انك في مكان نائي جدا و حواليك المتسولين و القرود و الخنازير و الماعز و الجاموس ابو ٥ ارجل

هتطلع جبل عشان تتفرج علي معبد من فوق.

 

*ملحوظه مهمه

يفضل و انت طالع المكان تطلع مع مجموعه سياح يشجعوك من الخوف الي هيجيلك من المناظر الي حواليك و لو ملقتش متخفش برده عشان المعبد بيكون امان و محدش هيحاول يتعرضلك.