إيطاليا
برنامج الرحلة الي ايطاليا : (روما-فلورانسا-بيزا- فينيسيا ) بعد كدة سويسرا وفرنسا بس التقرير دا ايطاليا بس
اماكن الاقامة (روما _هوستيل نيكا ) فلورانسا(هوستيل تيدي )
حجزت كل رحلاتي الخارجية من موقع ترافل ستارت وهو موقع طيران اماراتي رائع مليان خطوط طيران عالمية وبتقدر تعمل كذا رحلة قي تكت واحدة ... والرحلات الداخلية حجزت على ريان اير
في البداية بس قبل ما اتكلم عن الرحلة كمعلومات عايز اقول ان السفر حياة وفوايد ... , السفر ناس جديدة وخبرات كتيرة ... ااسفر اصحاب من كل حتة واتساع في الافق ... السفر نفس جميل بدقة قلب بيطلع مرة واحدة اول ماتوصل لارض البلد الي انت رايحها وبسمة لازم تصورها اول ما تحسها اترسمت على وشك من اول ختم الباسبور لحد ما ترجع البيت
متطلبات الرحلة واي رحلة عشان تبقى معاك طول عمرك لو امكن
لو انت مسافر لوحدك :(كاميراجوبرو تصور بيها نفسك جنب اي حاجة كبيرة - كاميرا عادية خالص او كاميرة الموبايل عشان لو حد صورك - لبس او شنطة بجيوب كتير قوي عشان الفلوس والفكة والباسبور والتذاكر - باور بانك - كابلات كتير لكل حاجة بتتشحن معاك - خريطة ورق للمكان ومن غير تريقة -ادوية الحاجات الدارجة زي دوخة صداع مسكن -شوز مريحة )
كبداية قبل السفر لازم تبقى عندك فكرة انت مسافر فين ... ومسافر ليه ... اعرف المكان قبل ماتروحه عشان ماتتصدمش باي حاجة او تتفاجئ .... انا قريت كتير عن ايطاليا وعن اغلب اثارها وطبيعة شعبها والجو والاكل ودي حاجة هياتني نفسيا جدا قبل ما اسافر
بروجرام الرحلة كنت مرتبه بشكل اتغير تماما لما قعدت مع الناس الي كانو معايا في الهوستيل وشفت فكر الناس هناك والمواصلات ... رتبت من اول وجديد و الجروب فادني جدا الموضوع دا ودي الميزة الرهيبة بقى ..وبرضه مهم قوي قوي نتكلم مع الناس ونكسر حاجز الخوف ومانتكسفش .
اولا :روما :
المواصلات
اول وسيلة مواصلات هنصح بيها على عكس ما ناس كتير شايفة هي البيج باص .. الباص السياحي المفتوح انا شايف ان لازم نفهم اننا رايحين نتفسح واننا سياح مش قصدي سياح بمعنى اننا ينضحك علينا لكن بمعني اننا لازم مانفقدش احساس انننا اجانب عن البلد ... ويمكن اقل ترجمة ليها انك لازم اول ماتوصل تلف المكان كله و تجيب التيكت بتاعت البيج باص الي هو عندنا الطفطف المفتوح . هتقولي ليه .. لكذا سبب :
اولا انه بيروح كل الاماكن السياحية الي انت ممكن تبقى محتاجها تشوفها حتى لو لمحة فاحتمال توهانك او قلقك قليل جدا غير متعة الفسحة ...
ثانيا : بيكون فيه دليل صوتي بالعربي وكل اللغات بتسمعه بسماعة بيدهولك وبيديك شوية معلومات عن المكان الي في المحطة الجاية لو انت مش كييف قراية ...ثالثا : احساس ان كل الي حواليك سياح زيك بيخلي عنيكو تتيادل نظرات السعادة والاستغراب الي مش ممكن هتلاقيها في عين اهل البلد ... وما يمنعش انك تجيب تذكرة مواصلات
1. تذكرة البيج باص كفاية انها تلففك كل الامكان السياحية لانها بتتياع ليوم او اتنين او تلاتة بحسب وميزته انه هيب هوب يعني تركب وتنزل وليه مواعيد ... بس برضه مع البيج باص جبت تذكرة المترو والترام والباص 3 ايام ب 18 يورو عشان لو حبيت اروح اتسوق او الف مع حالي ...
2. اول ما وصلت المطار ركبت القطار لمحطة تيرميني في روما الي هي زي رمسيس عندنا فيها كل حاجة منكن تعوزها كبداية زي خط تليفون او تشرب حاجة او تذاكر او استعلامات ... ورحت بعدها هوستيل نيكا في محطة سان جيوفاني و بيبعد بالزبط 500 متر من الكولسيوم اشهر معالم روما واخترت الهوستيل دا بالذات لانه في منطقة هادية جدا جدا والريفيوهات بتاعته عالية ومتسنتر جنب كل المواصلات .. وصلت واستقريت وارتحت بنومة حلوة واول ما صحيت الصبح انطلقت ...ونلاحظ ان لازم اليوم يبدا بدري جدا لان طوابير الدخول والتذاكر بتاخد وقت
اليوم الاول كان ترتيبه (الكولوسيوم - ألتارا ديلا باتريا"نصب الجندي التذكاري"-نافورة تريفي )
: كولوسيوم مكان روعة ... ضخامة المبنى وتفاصيله والاثار حواليه دليل على العراقة ... حاجة زي معبد فيلة واللهرامات ...ليه نيبة ورهبة ... وهعيش جو تروي جدا ... ومعلومة قد تكون صادمة اول ما هتوصل هتنهار من شكل الطابور بتاع التذاك
بس مش هتتخيل حجم واشكال الجنسيات والبشر الي هتشوفها .. نصيحة نصحهاليا موظف الهوستيل ... اني لما اوصل اطلع على اعلى هضبة منطة الكولوسو لحد كنيسة مشهورة هناك عندها شباك تذاكر بيبقى فاضي تماما وكلامه طلع زي الفل .دخلت وشفت بعيني وهم ... وجوايا سعادة رهيبة اني شفت الاماكن الي كنت بشوفها في الافلام التاريخية وعشت فيها ... وصلت واتصورت وانطلقت بعد كدة على متحف الكابيتولين و ألتارا ديلا باتريا "مذبح الوطن" وهو نصب تذكاري أتعمل وفاءً لذكرى ملك إيطاليا وزي الجندي المجهول عندنا ... مبنى عملاق ظاهر من كل اماكن روما ولما تطلع فوق بيبقى ماشف مل روما ...
دخلت المتحف الاول وكان في اثار من هوية تانية تماما ... نحت الاشخاص بكل تفاصيلها ... مقتنيات ملوك العصر الروماني كان تحفة ونزلت ورحت على النصب بعد ما وصلت واتصورت وطلعت السلالم كنت استويت من حجم المشي الجديد عليا تماما فطلعت استريحت هناك ...تقريبا كان نص اليوم خلص و كان لازم اقفله باكله متينة بيتزا ايطالي من القاتلة الي كلها نكهات غريبة وجميلة جبنة وسبانخ ... خلصت ورجت الهوستيل ونمت وقررت ااجل تريفيني لليوم التاني ... وقمت بالليل نزلت مع الشباب الي كانو معايا في الهوستيل و تجولت في الاسواق كدة معاهم ... كان غريب قوي انك تبقى مع ناس ماتعرفهاش من امريكا واستراليا والنمسا ونيجيريا وكلنا بنتجول ونايمين في اوضه واحدة
اليوم التاني ( نافورية تريفي - السلالم الاسبانية -ميدان بيازا نافونا )
فطرت مع الشباب وانطلقت على تريفيني نافورة الامنيات ... رغم ان الجو كان حر جدا في الصيف بس الميزة ان الهوا منعش ونضيف و الشوارع فيها مساقي مية متلجة .. رغم اني مش مؤمن بالحظ والجو دا بس رميت 3 جنية مص ي في النافورة و بعد ماعملتها حسيب بالذنب . وخفت لعنت الجنيه تحل عليا 😍 فرجعت رميتلي يورو وليرة تركي جايز اكفر عن ذنبي ...
اتصورت وقعدت في كافيه حلو قوي واخدت اسبرسو في الجو الجميل ورحت سلالم اسبانيا وطلعت على ميدان بيازا نافونا . ميدان كلير في كتدرائية وامثال كبير ومليانه محلات اكل ورسامين ... اكلت سناك خفيف كدة ورحت اترسمت كريكاتور وانا قاعد واتصورت وطلعت بعد كدة على على البنثيون وهو نصب الجنود الطليان ونفس جو بيازا نافونا ... واليوم اتقفل زي الي قبله
اليوم التالث :(كان متحف ليوناردو دافينشي وميدان بيازا دي بوبولو -الفاتيكان -قلعة سان انجلو )
متحف ليوناردو دافنشي فيه كل تحفه الفنية وحاجات خاصة عن حياته ودخوله بحوالي 8 يورو ولفيت في الميدان ورحت على قلعة سان انجلو ... قلعة وهمية وعالية جدا وكاشفة كل روما وفيها عدد مش بطال من الاسلحة والحاجات الي كانو بيستخدموها في الحرب ... ونزلت كانت جنب الفاتيكان... دخلت الساحة الكبيرة في النص وماحبيتش ادخل المتحف كنت اتخنقت من جو الاثار الكنسية والرومانية ... ودي كانت اخر جولتي في روما وكانت معقولة جدا قلت اوفر طاقتي لاني كنت رايح بلدين بعد كدة ...
روحت حوالي الساعة 6 وكنت حاجز قطر على فلورانسا 8 بحيث اوصل بالليل وماضيعش يوم وقلت هقعد هناك يومين واطلع يوم على بيزا ويوم على فينيسيا ....
اليوم الرابع (كاتيدرائية سانتا ماريا -مرتفع مايكل انجلو اعلى نقطة في فلورانسا -متحف الفنون الجميلة )
اليوم الخامس (رحت منطقة اسمها توسكاني حيث الريف والطبيعية الوهمية الي احنا ما بنشفهاش عندنا ابدا ... رحت مزرعة ابقار هناك وكان شعال فيها واحد قدي صمم انه يتبناني اليوم دا ... شربت لبن معسل محلزب طازة واكلت فواكه غريبة جدا حاجة كدة شبه القنفد وشوية حاجات زي الخوخ والبابايا وهم ... واخدنا لفة في حقول الرز بالجرار الزراعي ... كان يوم كله او اغلبه استجمام واسترخاء
اليوم الخامس :بيزا ... منطقة المعجزات في بيزا بتبعد حوالي ساعة بالقطار من فلورنسا والتذكرة بحوالي 18 يورو رحت منطقة المعجزات ورحت برج بيزا واتصورت واتغديت هناك ورجعت بعد كدة على فلورنسا نمت كتيييير جدا لاني بدات اموت من التعب ...
اليوم السادس : فينيسيا
فينيسا حوالي 3 ساعات بالقطر من فلورنسا وصلت طبعا وانا في دماغي شوية صورة اتصدمت لما لقيت عكسها ... مسالة التحرك بالمراكب دي متعبة جدا ومزعجة جدا ...الابوان الخطيرة الي بنشوفها في الصور مش موجودة على الحقيقة ... البلد كلها سياحة فتحس انهم بيقلبوك بس ... اخدت تيكت مواصلات عامة ب 20 يورو بس دي فلطة لان في مركب بيج بوت برضه بتروح الاماكن السياحية بس اجتهدت على قد ما اقدر اني اروح اغلب الاماكن بس كانت مخيبة لامالي مش زيي ما توقعت خالص بس قلت ماكنش ينفع اجي ايطاليا من غير ما اروح فينيسيا
رجعت تاتي فلورنسا نمت لان كان عندي طيارة الساعة 8 لسويسرا فاكتفيت بالسهر في ساحة الكتدرائية بتفرج على العروض والحاجات الي بيعملها الناس هناك
يمكن تعبت قوي في السفر وصرفت نوعا ما كتير بس كنت سعيد اني كسرت خاجز خزف السفر ... كنت سعيد جدا اني كسرت حاجز خوف اني اصاحب نفسي واكون مع نفسي واتاقلم في الفسحة لوحدي ... يمكن ليها عيوبها بس ليها مميزات كتير .. بتصفي ذهنك وبتتحرك براحتك وترتاح براحتك هتكتشف بعدها ان نفسك احسن صاحب ليك .
السفر فعلا كله فوايد ومن امتع الحاجات اني اتعرفت على ناس كتير من جنسيات كتير قوي قوي من البرازيل وامريكا واليابان واستراليا كوبة وايطاليا وفرنسا والجزائر اوعي تفوت الفرصة دي ...
======================================
ازاي تسافر روما و تتفسح بمبلغ 80 يورو فقط
تصدق انك مش محتاج أكتر من 80 يورو علشان تتفسح و تتبسط في روما و تزور أشهر معالمها
أسرار الفسح في روما :
-
أولا أستعد أنك تمشي كتير فحت لأن روما عبارة عن متحف مفتوح , كل مكان فيه عبارة عن تحفة فنية سواء ميدان او نافورة أو كنيسة أو متحف أو حتى مول .
-
أرخص وسيله للتنقل من المطار الى محطة تيرمني ( المحطة المركزية في روما ) هي الباص سعره 4 يورو, على شركة باصات Terravision ( يعني كده رايح جاي 8 يورو ) .
-
نصيحه بخصوص روما الأحسن متشتريش كارت روما باس ( كارت بيخليك تدخل متاحف ببلاش ) بعد دراسة عميقة جدا و قراءات كتير عن أراء الناس في الكارت في منتديات أجنبية زي TRIPADVISOR , قررت أني مشتريش الكارت لأنه مش حيفيدني أوي. و قررت حجز الأماكن السياحيه اون لاين
-
الكولسيوم و المنتدى الروماني : حتحجز الكولسيوم+ الميدان الروماني أون لاين و سعر التذكرة كانت 14 يورو فقط , و دي بقى يا حلو حترحمك من عناء الطوابير و الزحمه , كل اللي عليك تطبع الورقه بتاعت الحجز و تدخل بيها الكولسيوم يدون ما تقف في أي طابور ( بس خلي بالك علشان التذكرة ليها وقت معين للدخول ) .
-
بعد الكولسيوم حتطلع تتمشى 5 دقايق حتلاقي نفسك امام بوابة المنتدى الروماني ( اللي فيه هضبة البلاتين ) و دي الهضبة الأقدم من هضاب روما السبعه و تعتبر الهضبة دي مهد الأسطورة اللي بتحكي قصة انشاء مدينة روما ( و ده مشمول في سعر تذكرة الكولسيوم )
-
الفاتيكان : و بردو حتحجزها أون لاين من موقعهم الرسمي و سعر التذكرة 32 يورو ( مع المرشد ( قصدي مرشد سياحي محدش يفهمني غلط 😂) , خلونا نتوقف شويه عند الفاتيكان علشان ده قصه لوحده , أولا أنصحك انك تحجزه أون لاين طبعا و يكون الحجز مع مرشد سياحي و حقولك ليه
-
السبب الأول: ده حيرحمك أنك تقف في طابور لا يقل عن ساعتين منتظر أنك تدخل الفاتيكان في طابور لا ينتهي
-
السبب التاني: فيه معلومات رهيبه لازم تسمعها من مرشد محترف و ده حيكون أحسن كتير من انك مجرد تتفرج و خلاص , لأنك بجد حتتفرج على كنوز و ثروات تاريخية .
-
السبب الثالث : أن ده حيرحمك من النصابين اللي واقفين على باب متحف الفاتيكان عاوزين يبعولك تذاكر الدخول بضعف ثمنها . و كمان حتقدر تدخل كنيسة سيستين بنفس التذكرة و دي تحفة فنية , و في الكنيسة دي بيتم أختيار البابا الجديد . سقف الكنيسة لوحده ابهار و ده رسمه الفنان مايكل أنجلو
-
ملحوظة: خلال حجز متحف الفاتيكان بيتم تحديد وقت معين بالدقيقة و تقدر تدخل قبلها عادي , بس نصيحه أحجز بدري على أد ما تقدر , المتحف عادة بيفتح 9 الصبح , بس لحسن حظي علشان كنت حاجز مع مرشد فبدأت الرحله 8 و نص الصبح , و ده قبل المتحف ما يفتح بنص ساعه و ده أدلنا ميزة اننا نتفرج على المتحف و هو فاضي مش زحمه نص ساعه قبل ما أي حد يدخل . ( توقع تلاقي المتحف زحمة جدا جدا في الصيف )
زيارة الفاتيكان لا تكتمل بدون زيارة كنيسة القديس بطرس , و دي بتعتبر مركز الكاثولكية في العالم , بعيدا عن قدسية المكان , فالمكان بجد تحفة معمارية و فنيه تستحق الزيارة , برنيني و مايكل أنجلو من أهم الفنانين اللي حتشوف أعمالهم داخل الكنيسة. ( الخبر الحلو أن دخولها مجانا ) و بما أنك داخل متحف الفاتيكان تقدر تدخل من الباب الخلفي للكنيسه بدون ما تقف في أي طوابير تانيه لأن الطوابير أمام الكنيسه بالساعات يا حلو , كل اللي عليك أن بعد كنيسة سيستين حتلاقي بابين , اللي على الشمال يطلعك بره المتحف خالص و يخليك تمشي نص ساعه و تقف في طابور طوييييل علشان تدخل كنيسة القديس بطرس أو تاخد المعلومة الحلوة دي مني و تدعيلي
حتدخل من الباب اللي على اليمين و ده حيدخلك كنيسة القديس بطرس مباشرة و بدون أي طوابير و لا مشي ( ممنوع التصوير داخل كنيسة سيستين )
بما انك مصري متنساش تتصور أمام أكبر مسلة مصرية في العالم و دي موجوده في ساحة القديس بطرس أمام الكاتدرائية.
معلومة ذهبية : جميع متاحف روما مجانا أول كل أحد من كل شهر
في روما متشتريش مياه معدنيه , لأن طول ما انت ماشي في الشارع حتلاقي حنفيات مياه عذبة تقدر تشرب منها ببلاش.
ايطاليا مشهورة بالشياكة و مصممين الأزياء العالميين ,و علشان تتفرج على احدث خطوط الموضة في روما يبقى لازم تزور شارع كوندوتي و ده فيه أرقى الماركات الايطاليه , طبعا كفاية تتفرج مش لازم تشتري يعني
لو بتحب الحدائق و المنتزهات متفوتش زيارة حدائق بورجيزي و دي كمان مجانا.
الهدايا التذكارية : أوعى تشتري من المحلات اللي أمام المعالم السياحيه المشهورة , حتلاقي محلات كتير و انت ماشي في الشارع بعيد عن المعالم المهمه و أسعارها أرخص كتير.
نصيحة أوعى تركب تاكسيات و خلي أغلب تنقلاتك بالمترو و الباص . و فيه تذكرة اسمها C.I.S و دي بتكون لمدة اسبوع سعرها 24 يورو , بس أغلب الناس بتشتري مدة أقل لمدة 3 ايام مثلا و بتكون بسعر 18 يورو , لكن الصراحه أنا كنت بشتري التذكرة الفرديه و دي مدتها 100 دقيقة و سعرها 1,5 يورو لأني لاقيتها أوفر لو مش حتركب مواصلات كتير .
ملحوظه حلوة للعائلات: الأطفال أقل من 10 سنوات مجانا في كل المواصلات العامة .
بخصوص الأكل مش حجيب سيرته و لا حقولك تدفع كام علشان مش حخلص من الكومنتات :D , لكن أحب أفيد الناس اللي عاوزه تستفيد أن البيتزا المارجريتا أو الباستا من المطاعم العاديه بتبدأ من 6 يورو و الجيلاتو ( ايس كريم الايطالي 🍦 ) بيبدأ من 2 يورو , و عيش مع نفسك
خلينا بقى نراجع الحسابات بتاعتنا : 8 يورو انتقالات من و الى المطار + كولسيوم 14 يورو + 32 يورو فاتيكان + 5 يورو جولة سياحيه + 24 يورو مواصلات و انتقالات = 83 يورو