ماليزيا
ننقل هنا عددا لا بأس به من المقالات و التدوينات عن ماليزيا
خلونا متفقين انها من الدول اللي بدون اي تأشيرات تماما للمصريين .. يعني تذكرة طيرانك و جواز سفرك و انطلق! و علشان كدا هاقولكم ازاي تتفسحوا في اهم المناطق في العاصمة كوالالمبور ب ١٥٠ جنيه و انتوا حاطين رجل علي رجل!
أما توصل مطار كوالالمبور ارخص مواصلة من المطار هى الاتوبيس و دا بتحجز التيكت بتاعه من كشك جوا المطار و تكلفة الاتوبيس 12 رينجت للفرد يعنى 3 دولار بنا يعادل 54 جنيه تقريبا ... ساعة بالظبط هتبقى فى وسط البلد ... الاتوبيس مكيف و نضيف جدا ميقلش نضافة عن الطيارة!
اول مكان ممكن تروحه هو Batu Caves و دا المعبد المشهور بالتمثال الذهبي الكبير اللي هتلاقي كل اللي سافروا ماليزيا متصورين قدامه!!
و علشان تروحه من محطة مترو KL Sentral هتحجز تذكرة لمحطة اسمها Batu Caves بنفس اسم المكان و سعر التذكرة 2.60 رينجت بما يعادل ١٢ جنيه مصري نص ساعة و هتكون هناك و الرجوع نفس الشئ 2.60 رينجت يعني ١٢ جنيه مصري اما توصل هتخرج من المحطة هتلاقى Batu caves قدامك علطول .. المنطقة اللى فيها التمثال دى مجانا بدون تذكرة ... لكن الكهف بتحتاج تقطع تذكرها سعرها 5 رينجت للشخص يعني تقريبا ٢٥ جنيه
تاني مكان تروحه هو ال Twin Towers البرجين المشهورين في ماليزيا لانهم تحفة معمارية و من أهم المعالم ! و علشان تروحهم ممكن تركب المترو من نفس المحطةKL SENTRAL لمحطة اسمها KLCC سعر التذكرة 2.40 رينجت بما يعادل تقريبا ١١ جنيه مصري هتوصل محطة KLCC والمحطة دى اصلا عبارة عن مول كامل فيه محلات للشوبينج هدوم و اكل و هدايا ... اول اما تخرج من المحطة و المول دا هتلاقى ال Twin Towers قدامك علطول .. اتصو
تالت مكان ممكن تروحه بقي هو China Town
و المنطقة دي تقريبا موجودة فى معظم دول اسيا و بيكون عبارة عن تجمع للتجار فى شارع معين و بيبيعوا كل انواع الفاكهة و الاكل و الحلويات الاسيوية و خصوصا الصينية و كذلك المنتجات الالكترونية البسيطة و الملابس! و علشان تروحها ممكن بالمترو تحجز تذكرة من محطة KLCC لمحطة اسمها Pasar Seni سعر التذكرة 2.10 رينجت يعني ٩ جنيه تقريبا !
رابع مكان بقي هو Little India و دى منطقة عبارة عن تجمع للتجار الهنود فى شارع كبير فاتحين فيه مطاعم اكل هندى و حلاقين و بياعين توابل و سوبر ماركت
و انت ماشى هناك هتسمع الاغانى الهندية فى كل حتة و حتى ديكور الشارع على النظام الهندى
و للبنات اللى بتحب المنتجات الهندية الصابون و الزيوت و الكريمات للبشرة و للشعر المنطقة دى كل اللى فيها محلات بتبيع المنتجات دى و التوابل الهندية و الاسعار هناك اغلى بفرق بسيط عن الهند !! و ممكن تروحها بالمترو من محطة Pasar Seni تركب لمحطة لمحطة Bangsar سعر التذكرة 1.60 رينجت يعني اقل من ٩ جنيه !!
(((اجمالى تكلفة اليوم تقريبا ٣٠ رينجت يعنى قول تقريبا ١٥٠ جنيه 😱))
و كمان المفاجأة في اتوبيسات قدام مدخل ال Twin towers اسمها GO KL بتعمل جولة City Tour بالاتوبيس و ممكن تعمل كل دا ببلاش!!!
دا غير انك بقي لو في شهر عسل يبقي لازم تروح Langkawi و Penang و تسمتع بالشواطئ و الطبيعة الوهمية هناك بس طبعا دا بتكلفة تانية
هتكلم دلوقتي عن رحلتي لماليزيا (كوالا و ملاكا و كاميرون و لنكاوي ) 8 ايام
اول يوم : وصلت كوالامبور(مطار KLIA2) الساعه 12 الظهر .سحبت فلوس من ( ATM) و نزلت (level 2) في المطار اخدت باص لوسط البلد (KL Sentral ) بياخد ساعه ب 11 رينجت
كنت حاجزة هوستيل ( كان اول تجربة ليا اني اقعد في هوستيل و نظامه مكنتيش متقبلاه اوي (التواليت المشترك دة كان بالنسبالي ازمة كبيرة ) بس عادي اخدت علي الجو لان الصراحة الهوستيل كان مكانه حلوه جداااا خمس دقايق مشي من المحطة KL Sentral
الهوستيل اسمه (pods-the-backpackers) ب 30 رينجت في اليوم بالفطار كمان (الفطار من 6 ل 10 الصبح )
وصلت الهوستيل الساعه 1 تقريبا سبت الشنط و نزلت اكتشف البلد اللي انبهرت بيها جداا اكتر من تايلاند بكتير و ابدء يومي الاول في كوالامبور
تحت الهوستيل فيه سوبر ماركت صغير كدة و محل موبايلات ( الراجل بيحب المصريين جداا و بيتكلم عربي كمان ) جبت من عنده خط تيلفون بالنت ب 20 رينجت ( النت خلص مني علي انص المدة كدة و شحنته تاني ب 20 رينجت )
معلومه كدة علي السريع : محطة (KL Sentral) مش مجرد محطة عاديه كدة ديه محطة زي الشهداء عندنا كدة فيها تبديل كل الخطوط المترو غير كدة ديه محطة جوه مول كبير مول فيه محلات كتير و لبس و اكل و بقي و كل حاجة
رجعت محطة (KL) اخدت المترو لمحطة (Bukit bintang) ب 2.5 رينجت اول لما بتنزل من المحطة بتعدي الشارع بتلاقي شارع العرب دة شارع طويل اووي و كله محلات لبس و ساعات و شنط و كل حاجه تتخيلوها (دة لمحبي الشوبينج )
لفيت شويه و رجعت المحطة تاني اخدت المترو ل محطة (Majid Jamek) ب 1.20 رينجت بتمشي شويه بتلاقي ميدان كبير اووي كدة في جوامع و متحف و حاجات تانيه كتيير .............. الصور كلها تحت خلصت الفه بتاعتي كانت الساعه 6 تقربيا و جعانه جداا رجعت محطة (KL) و نزلت الدور الارضي في المول بتاع المحطة فيه سوبر ماركت كبير اوي زي كارفورعندنا اسمه (SAM'S GROCERIA ) فيه اكل كتير اغلي وجبة اللي هي سي فود و سلطات و عصير كمان ب 15 رينجت و فيه من اول 10 رينجت كمان
و بعدين ركبت المترو لمحطة (KLCC) ب 2.30 رينجت قعدت في حديقة هناك و اتفرجت علي النافورة الراقصة و كانت تحففة و روحت علي الهوستيل علي 8 بالليل كدة
تاني يوم فطرت و نزلت علي المحطة اخدت باص ل ( Genting Highlands) ب 10.20 رينحت رايح جاي بالتلفريك كمان الساعه 11 الصبح الطريق ساعه و صلت 12
نصيحة : خلو بالكو يكون فرق حوالي من 3 ل 4 ساعات بين الباص رايح و راجع و احجزو راجع علشان ساعات بيخلص و مش بتلاقو راجع غير اماكن تانيه مش (KL sentral) بعيدة عن وسط البلد
معلومة : لما تنزل من التلفريك هتلاقي مول كدة في ملاهي اطفال حلوة ( فيديو جيم و بلياردو بقي و كدة ) و اكل برضوة و رجعت وسط البلد 4 العصر
و نزلت اتمشي باليل لقيت باص كدة لونه بينك دة ببلاش بيلف كل الاماكن السياحية (بتنزل في اي حته عايزها و لما تحب تكمل اللفه تستني الباص اللي بعدها و تاخده و تكمل لفتك عادي ) روحت اماكن كتير بيه وبعدين اخدت المترو لحد محطة (TBS ) ب2.40 رينجت و حجزت باص لملاكا الصبح ب10 رينجت و حجزت كاميرون لبعدها بيومين ب 35 رينجت و بعدين روحت
الصبح بدري ركبت الباص لملاكا وصلت في ساعتين تقريبا وصلت المحطة الساعه 10 و نص كدة و اخدت تاكسي للهوستيل اللي كنت حاجزه ب 20 رينجت
وصلت الهوستيل كان حلو جدااااااا و مكانه رائع اسمه (The Riverside) ب 25 رينجت في اليوم
ملاكا بلد تتلف كلها في برجلك نزلت اتمشيت شوفت متاحف و حاجات كتيير كلهم في ميدان كبير كدة و فيه عجل هناك علي شكل ديزني كدة تحفففففة (لو حد حابب يركبها ب 25 رينجت ) بتلف بيك البلد بس هي اصلا مش مستهله ممكن تتلف مشي
و فيه شارع هناك اسمه ( Jonker Street) كله اكل حلو جداااا ممكن تعقد 5 ساعات تجرب كل الاكل بس دة لمحبي الاكل كدة زي متوسط اي حاجة هناك 3 رينجت
و جمب (Christ Church ) شارع بتجيب منه هدايا من المدينه متوسط السعر 5 رينجت و فيه حاجات هاند ميد غوص حلوة اووي متوسط الاسعار 20 رينجت
تاني يوم في ملاكا دة كان استجمام بس تمشية و ركبت مركب في النهر هناك ب 21.20 رينجت بيلف بيك البلد كلها بياخد حوالي ساعه و نص
اقتراح : لو حد حابب يروح منتجع افوماسا (ديه الالعاب مائية )
الصبح رجعت تاني كوالا و نفس الهوستيل برضوة و نزلت اخدت المترو ل محطة (Batu Cave) ب 2.60 رينجت (بوصو علي المعلومه اللي تحت ) و روحت تاني البرجين (محطة KLCC ) لانهم بيفرقو الصبح عن باليل في الشكل خالص
و بعدين روحت بالمترو لمحطة (Pasar seni ) جمبها شارع (Chinatown ) في كل حاجة ممكن تحتاجها من لبس و شنط و هدايا و كل حاجة و اسعاره حلوه بس فاصلو كتير جبت هدايا (متوسط اسعار الهدايا هناك لو حاجات بسيطة كذكري 10 رينجت )
و بعدها ( Center ) فيه حاجات كتير هاند ميد شنط و ديكورات و كدة و جمبه شارع طويل فيه فاكها كتير و اكل حلو و بعدين رجعت الهوستيل تاني
معلومه كدة :
ملاكا من اجمل المدن اللي زرتها و نفسي اعيش فيها جداا البلد كلها حوالين النهر و الناس بتصحي الصبح تتمشي جمبه او تركب عجل و كافيهات حوالين الميه الببدد كلها الالوان و كل البيوت مرسوم عليها البلد كلها مبهجه بمعني الكلمة دة غير المزيكا اللي في كل مكان و الناس هناك حلوة اوووي فيه ناس وقفتني هناك اتعرفت عليا و اتصوره معايا و عزمو عليا باكل كمان
اقتراح : لو حابين تقضو يوم في (Sunway lagoon) التيكت كانت ب 45 اطفال و 55 كبار بس معرفش دة سعر العيد و لا هو كدة علي طول (لاني روحت في العيد)
الصبح خدت باص للكاميرون الساعه 8 الصبح ب 35 رينجت بياخد حوالي 4 ساعات وصلت 12 الظهر (ممنوع الاكل في الباص بتاع الكاميرون ميه بس ) و صلت هناك كنت حاجزة فندق (هو غالي شويه بس قريب جدا من المحطة ) ب 130 رينجت اسمه (Meiko Hotel) نزلت جمب الفندق كشك سايحي كدة اخدت رحلة بتلف فيها كل المزارع ب 25 رينجت الساعه 2 الظهر
طلعت الفندق ريحت من الطريق و نزلت علي المعاد الرحلة
روحنا مزارع الفراوله وو هناك في فراوله و منتجاتها حلوة جداااااااا احلي فراوله ممكنن تاكلها في حياتك متوسط الاسعار 10 رينجت
و بعدين مزارع الشاي بتنزل المزرعة ب 2 رينجت تقريبا و بعدين روحنا شلالات كدة تحفففة
تاني يوم عملت (Hiking) بتجيبه من كشك برضوة ب 35 رينجت تقريبا بتتطلع الجبل بقي و تسلق حلوة جدااا بس خدو البسو تقيل شويه مش صيفي يعني او خد شال معاك و كوتشي مريح و ناشف من تحت
-الصبح بقي حجزت باص لبينانج ب 37 رينجت الساعه 8 الصبح و اتعرفت علي واحده في الباص فغيرت الخطة كلها و نزلنا من الباص الساعه 11 الظهر كان معاها ناس مستنياها وصلونا الميناء علشان نروح لنكاوي و من هناك اخدنا عباره ب 32 رينجت قعدت 3 ساعات تقريبا و وصلنا لنكاوي
معلومه : معرفش نركب للميناء ازاي ولا بكام علشان روحنا بعربية
اخدنا هوستيل هناك اسمه (P Motel Langkawi ) ب 50 رينجت مكانه حلو و مش بعيد عن البلد ريحنا علشان المشوار و نزلنا قاعده علي كافيهات في الشاطئ هناك و فيه شارع موازي ليه فيه لبس و حاجات لو عايزين هدايا من البلد و جمبنا هدايا متوسط الاسعار 15 رينجت
الاكل هناك غالي شويه ممكن الوجبه ب 20 رينجت تقريبا
تاني يوم روحنا التلفريك ب 15 رينجت حجزنا و كان لسه فاضل عليه كام ساعتين تقريبا روحنا الشلالات و المنظر تحففة
نصيحة خدو معاكو مايوة او فوطة (علشان مكتيش عامله حسابي )
سوال هتساله : مفيش مكان تغيروا فيه
و بعدين روحنا التلفريك و كان احلي كتير من (Genting ) و طلعنا الجسر الهوائي اللي في السماء و اتغدينا فوق ب 23 رينجت و بعدين نزلنا و قضينا باقي اليوم تمشية
الصبح اخدت طياره لبانكوك ( مطار Suvarnabhumi ) و بعدين اخدت برضوة (Shuttle bus ) لمطار (muang amari don) ببلاش و من هناك اخدت طيارتي لمصر بقي و كدة خلصت الرحلة لاسف في انتظار تكملة حلمي ( 50 دولة )
شويه معلومات كدة :
-خطوط المترو كلها زي عندنا بيجي مترو كل 5 دقايق تقريبا معادا اللي بيروح ( باتو كيف ) بيجي كل 45 دقيقه ناخد بالنا و احنا رايحين فيه نشوف المترو الل بعده الساعه كام علشان متعقدوش كتير في المحطة منتظرين
-الفاكهة هناك بال100 جرام مش بالكيلو في حدود 2 او 3 رينجت
-احجزو الباص بتاع ملاكا و كاميرون قبلها بيوم او انزلو بدري اوي قبلها بساعتين او حاجة علشان تلاقو حجز الصبح بدري (8 الصبح )
-الكاميرون بالذات لازم توصل بدري علشان تلحق الرحلات في الاكشاك علشان ماتخدو تاكسي ب 25 رينجت في الساعه الواحدة علشان يلف بيكو البلد (خدو باص الساعه 8 الصبح )
-في ملاكا مفيش باصات لازم تركب تاكسي من محطة الاتوبيس للهوستيل و التسعيره ثابتة لكل الاماكن (20 رينجت )
-استخدموا (Grab Car) لو محتاجينو ضروري ارخص كتيير من التاكسي
-ماليزيا (كوالا ) المواصلات سهله اووي مش محتاجين تاكسي نهائي
-الباصات اللي بتروح المطار بتكون 24 ساعه كل 20 دقيقة بيطلع باص من محطة (KL sentral) الدرو اللي تحت الارضي
- باصات ملاكا الساعه 8, 11 ,2
-باصات كاميرون 8و11 من كوالا .و من الكاميرون رجوع الساعه 8 و 11 و 5
-طيران الداخلي من (Airasia ) احجزو قبلها بفتره
اسمحوا لي انقل لكم تجربتى فى لانكاوي -ماليزيا
أولا: عاوزه اقول للناس اللى نفسها تروح تايلاند وعندها مشكله فى الحساب البنكى نصيحتى لك روح لانكاوي هتحس انك فى تايلاند بالضبط .. لا وكمان ممكن تشوف الشواطئ التايلاندية أثناء مرورك حول الجزيرة فى رحلة بحرية.
10 معلومات عن لانكاوي..
1- لانكاوي لو هتروح طيران داخلي من مطار كوالالمبور فالرحلة هتستغرق ساعة، طيب لو باص!! فلازم تخلى بالك الباص مواعيده من الساعة 7 صباحاً للساعه 12 ليلاً.. لأنك لو وصلت الساعه 1 بالليل مثلا هتستنى للساعة 7 الصبح!.
2- تكلفة الباص 50 ريجنت، الباص ممتاز جدا هتحس انك نايم على سريرك.. مريح وبصراحة مختلف تماما عن الباصات اللى بشوفها فى مصر.
3- هتوصل بينانج وهتاخذ الفيرى وسعره 18رينجت، ومواعيده من الساعه 6 صباحا للساعه7مساءًا
4- أول ماتروح لانكاوي فى تأجير عربيات وسعرها حسب نوع العربية والمواسم وبتبدأ من 60 رينجت إلى 150 رينجت فى اليوم. الفندق اللى كنت فيه كان يعتبر فى وسط الجزيرة وقريب جدا من الشاطئ.
5-اول يوم روحت الابار السبع” السبع عيون” والدخول كان بسعر رمزى جدا .. منظر بديع كونته الطبيعة من ملايين السنين، عباره عن شلالات من مياه الامطار بتجمع في مكان يشبه الحوض لتنحدر وتروى سلسلة من البرك ويحاط بها غابات من كل جهة. المنظر تحفة فنية فريدة.
6- فى رحله بحرية اسمها ” رحلة المانجروف” لازم تجربها، لانها ممتعة ومثيرة.. انت بتروح بقارب بحرى الى اماكن مختلفه هتشوف “كهف الخفافيش، كهف التماسيح، والنسور، والقرود وهتزور حقل الاسماك”.. باختصار هتشوف طبيعة كاملة متكاملة 😊
7ملحوظة: بمناسبة القرود.. أي مكان هتروحه هناك هتلاقي القرود فى استقبالك.. فلازم تفرحهم بأي حاجة ومتدخلش عليهم فاضى كده 😃
8- أما ميدان “النسر” يعتبر من أهم معالم الجزيرة ولونه بيتغير مابين الاحمر والبنى وهتلاقى هناك مطاعم وحدائق وهتقف عند البحر كانك واقف على الكورنيش بالضبط ..
9- خلي بالك جزيرة لانكاوي منطقة حرة معفاه من الضرائب والجمارك فهتلاقى هناك مصانع الشيكولاته والملابس بأسعار مناسبة.
10-اما الجسر المعلق وتلفريك لانكاوي .. بصراحة أنا عجبنى أكتر تلفريك مرتفعات جينتنج، لكن المنظر وانت واقف علي الجسر حاجه تانيه خالص..
-كان من ضمن تكت التليفريك حضور عرض فيلم ماليزى وزيارة لـ”معرض الفنون” المعرض فكرته ممتازة وهو عرض كل الاعمال الفنية بطريقه ثلاثية الابعاد.
-للاسف مكنش فى وقت انى اروح واشوف مقام ماهسورى
انا مشفتش فى لانكاوي غير تلال وجبال خضراء وشلالات وشواطئ ومطر. هى فعلا خطفت قلبى بمناظرها وطبيعتها الساحرة
تقرير مفصل عن رحلتى الى جزيرة لنكاوى بالتكاليف.... ماليزيا :
سؤال وجواب:
ما هى أجمل الرحلات إلى ممكن تعملها فى جزيرة لنكاوى فى ماليزيا؟ وما هى اسعارها؟
الإجابة: قبل الإجابة توجد بعض الملاحظات:
1- ماليزيا بدون تأشيرة للمصريين لمدة 90 يوم......التصريح الأمنى للطلبة ومن مصر فقط...ويراعى التأكد قبل السفر.
2- الرنجت الماليزى سعره الحالى 4.5 جنيه مصري.
اما بخصوص جزيرة لنكاوى فهى تقع على الحدود الماليزية التايلاندية وفيها اماكن وانشطة عديدة مثل:
1- يوجد العديد من الشواطىء فى جزيرة لنكاوى اهمها شاطىء الرمال السوداء (مجانا)
ويوجد ايضا شواطىء اخرى بمنطقة البارون (مجانا).
2- يوجد تلفريك لنكاوى الرائع (مغامرة شيقة ومرعبة فى نفس الوقت) حيث تصعد بالتلفريك الى ارتفاع حوالى 800 متر تقريبا وهو ارتفاع يساوى تقريبا ارتفاع برج خليفة بدبي واحيانا تمر بين السحب وده الشيء المرعب لان السحب بتحرك التلفريك يمينا ويسارا احيانا خصوصا ان التلفريك يصعد للاعلى بدرجة ميل 42 درجة (التلفريك ب 45 رنجت للشخص ونصف تذكرة للطفل والرضيع مجانا).
3- يوجد فى اعلى الجبل بجوار التلفريك (sky bridge) او جسر السماء وهو جسر يربط بين جبلين ويهتز احيانا من شدة الهواء (مرعب جدا جدا)(15 رنجت للشخص).
4- توجد شلالات عديدة فى لنكاوى.(اغلبها مجانا)
5- يوجد مزار العيون الساخنة وهى عيون مائية ساخنة (15 رنجت للشخص).
6- الرحلة النهرية فى نهر كيلم بلنكاوى (المانجروف وإطعام الصقور) (100 رنجت للشخص بالغداء)(مدتها 6 ساعات).
7- اكثر الاشياء روعة من وجهة نظرى هى الرحلة البحرية حيث تتجول بمركب وسط العديد من الجزر فى البحر اهمها جزيرة بيزار وجزيرة العذراء ويراعى اختيار مركب كبير (للأمان) والابتعاد عن المراكب الصغيرة (40 رنجت للشخص بدون وجبة فى المراكب العادية)(مدتها 5 ساعات) وقد يزيد السعر فى حالة اختيارك مركب كبير.
8- يوجد نشاط ركوب طائرة هليكوبتر والطيران حول الجزيرة وهى ذات تكلفة عالية لمن يرغب (1000 رنجت فى 15 دقيقة).
9- لا تنسي زيارة ميدان الصقر وسط لنكاوى (مجانا)
10- يوجد ايضا العديد من الانشطة الرياضية فى لنكاوى سواء كانت انشطة برية مثل ركوب الدراجات(الساعة 10 رنجت تقريبا) او انشطة بحرية.
11- اسواق لنكاوى وهى اسواق عديدة فيها العديد من السلع والفواكة الاستوائية والخضروات.
12- بارك الحيوانات فى لنكاوى (25 رنجت تقريبا للفرد).
13- حديقة الفواكة الاستوائية فى لنكاوى (20 رنجت تقريبا للفرد).
14- توجد اماكن عديدة اخرى مثل القارب الزجاجى و حديقة التماسيح --- و حديقة ليجيند (اشجار استوائية -- مجانا ).
15- يمكنك ركوب الفيل بالقرب من محطة تلفريك لنكاوى ولكن تكلفته عالية حيث يصل الى 150 رنجت لمدة زمنية بسيطة وهذه التكلفة تشمل ركوب الفيل والتصوير.
16- يمكنك السفر الى لنكاوى بالطائرة من كوالالمبور (ساعة تقريبا) او بالطرق البرية ايضا مع استخدام العبارة.
17- يمكنك ايضا التوجة الى مرسى العبارة فى لنكاوى والسفر بها الى بينانج او كوالا برليس او حتى الى تايلاند حيث تبعد ساعة عن ساتون التايلاندية وتذكرة العبارة الى تايلاند حوالى 20 رنجت تقريبا مع
ملاحظة اننى قد سالت على تلك الرحلة وابلغونى فى لنكاوى انه يلزم فيزا للمصريين للتوجه الى تايلاند.
رحلة سعيدة للجميع...
ده تقرير عن رحلتي لماليزيا لمده اسبوعين تقريبا استحملوني عشان انا موسوسه شويه وبهتم بالتفاصيل و دعا اول رحله ارتبها لوحدي بمساعدتكم
1-اولا( الطيران) انا حجزت على الطيران العماني وكانت الرحله حوالي 12 ساعه تشمل ساعتين ترانزيت في مسقط الرحله كانت كويسه جدا و الخدمه عموما كانت ممتازه علما باني باسفر كتير على مصر للطيران و الطيران السعودي و مره سافرت على لوفتهانزا فهو فعلا يعتبر طيران كويس في الرحلتين ما عدا الطياره من مصر لعمان كانت صغيره شويه
2-ثانيا انا وصلت الاول لمطار كوالامبور وخلو بالكم من فرق التوقيت عشان دي حاجه لاسباب مجهوله ما اخدت بالي منها و فوجئت اني لما وصلت كانت الساعه هناك 9:30 مساء
المطار منظم جدا وسهل تعرف انت هتتحرك ازاي بدلت من المطار 50 دولار بس ودول كانوا بحوال 196 رينجت و طبعا ما تبدلوا اكتر من كده عشان المطار بيبدل باقل كتير و اشتريت خط موبايل من هناك اسمه umobile تقريبا لومنه اورانج كده اداني 2.2 جيجا و 60 دقيقه مكالمات غير الفيسبوك والواتس اب ب 30 رينجت و احنا كنا محملين ابليكشن grabمن مصر و اتصلنا بيه كان عندنا خلال 4 دقايق
ودي ارخص طريقه للخروج من المطار لانهم موحدين السعر 65 رينجت و بتدفع حاجه شبه كارته المطار ممكن توصل 75 اي حاجه تانيه بقي اسعار اعلى كتير لو حد مستنيك مخصوص 125 وانت طالع.. اوبر و تاكسي المطار ممكن يوصل ل 200 حسب المكان طبعا على ما وصلنا الفندق كانت الساعه عدت 11 و كل حاجه قافله
3- ثالثا تاني يوم انا الناس قالتلي ابدئي يومك من 7 عشان تعرفي تشوفي كل حاجه اول حاجه محلات الصرافه مش بتفتح قبل 10 و كدلك المولات فما لقينا اي حاجه نعملها غير اننا نفطر في ماك انا كنت ساكنه في فندق اسمه ancasa express pudu sentral 3*
الحقيقه هو رخيص و مستواه مش قد كده اكبر ميزه فيه مكانه انا بروح للبرجين مشي حوالي 20 دقيقه و بروح لشارع العرب بوكيت بينتانج برده مشي حوالي 10 دقيق غير انه تحته محطه باص لو تهت من اي مكان هتوصل بس كان في فنادق جنبنا ممكن لو حد مهتم بالفندق يجرب يشوف انا كنت بخرج من 7 و اروح انام فمش فارقه كتير
بالنسبه للصرافه اسال في كدا واحده لحد ما تلاقي احسن سعر احنا كنا بنلاقي من 3.9 ل 4.3 و طبعا لو هتحول مبلغ كبير هيفرق معاك انا بصراحه كنت بحول على قد احتياجي ليومين لان السعر بيتغير من يوم ليوم و من سوبرماركت تحتنا اشترينا خط موبايل تاني ادانا 3 جيجا ب 35 رينجت
4-اول يوم رحنا البرجين و في مكان جوه KLCC mall اسمه Petrosain مدينه العلوم ده موجود في الدور الرابع مكان تحفه كده واللي معاه اطفال هينبسط قوي احنا 2 كبار وكان مسلي بالنسبه لينا التيكت ب 30 و احنا اخدنا خصم يومها و اخدنا 2 تيكتت ب 38 ة بتقعد جوه حوالي 3 ل 4 ساعات بتلف ععلي حاجات زي العاب و معلومات للفضاء و جغرافيا و العاب ذكاء مكان ظريف
ممكن في نفس اليوم تروح الاكواريوم ده على بعد 5 دقايق مشي الدخول للفرد ب 69 برده ده مكان جميل و هتقضي فيه برضه حوالي 3 ساعات و في فود كورت بره ممكن بعد ما تخرج تتغدي اسعاره مش عاليه بعد ما تخرج قدام المول في باص بينك اسمه goKL ده ليه كذا خط بتركبه بتروح اماكن كتير مجانا جميل و مكيف و فيه واي فاي انا كنت بركب green line كان بيوديني الفندق و بيعدي على شارع العرب
5- تاني يوم اجرنا عربيه مخصوص ب 225 رينجت رحنا باتو كيف Batu cave و اتصورنا هناك و طلعنا السلالم
و بعدين اتجهنا للجينتنج هايلاند من هناك بتركب التلفريك التذكره بحوالي 16 للفرد رايح جاي ..يفضل ما تروح في الويك اند لاننا وقفنا في الطابور ساعه ونص لحد ما ركبنا بعد ما بتركب في محطه في النص اسمها chin swee templeلازم تنزلوا تشوفوا المعبد ده عشان ناس كتير مش بتاخد بالها منه وفي صور كتير و حكايات عن غرف التعذيب العشره في حكايات بوذا
و بعد ما تخلصوا تركبوا التفريك تاني هتوصلوا جينتينج و هناك في كدا مول كبير و فود كورت و مطاعم للي يحب يقعد هناك و بنفس التذكره بترجع بالتلفريك مكان ما بدات
اليوم ده هيخلص بدري حوالي 6 او 7 لو ما قعدتوا في المول ممكن بالليل تنزلوا تتمشوا في شارع العرب هتلاقوا ناس بتغني و عروض و مولات فاتحه لحد 11 مثلا و ده اكتر ناس شفتهم بيسهروا في البلد
6-ثالث يوم ركبنا جراب grab ب 20 رينجت و رحنا صن واي لاجون دي مدينه ملاهي جميله جدا واللي يروح لازم ياخد معاه مايوم وفوطه ومياه عشان كل حاجه هناك غاليه و فيها اكوابارك ف هتحتاجوا المايو التذكره ب 170 رينجت شامله كل حاجه من العاب و عروض في لوكر بيتاجر ب 22 رينجت تحط فيه حاجتك انا حظي كان حلو لقيت واحد عربي معاه تذكره زياده كسبها في مكان ما باعها لاي بسعر ارخص
7- اليوم اللي بعده رحنا سافاري افاموسي و برضه ده مكان ما يتفوت فيه حاجه زي افريكانو كده غابه مفتوحه و جزيره قرود و عروض كتير التزكره ب 168 شامله وجبه الغداء و ممكن تبقي اقل لو مش هتاكل النمر اللي هي حاجه ملهاش لزمه بس احنا عشان موسم بيبعوا كل التذاكر كده دي رحناها بعربيه مخصوص ب 300 رينجت مع مرشد هناك الي هو اسامه وبصراحه قالنا ازاي نقضي يومنا من غير ما يفوتنا اي حاجه و بعدها اسامه ودانا المول الفرنسي ده اوتليت اسعاره اقل حاجه شفتها فعلا وانا لفيت تقريبا على كل مولات كوالالمبور فانا عارفه اللي بقوله فاللي بيحب الشوبينج هينبسط هناك
8-اليوم اللي بعده رحنا لينجكاوي وده هكمله يوم تاني عشان البوست كده بقي طويل قوي
لينجكاوي
1- انا رحت بطيران داخلي على الطيران الماليزي malindo airlines
انا حاجزه اونلاين و دي احسن بكتير من اير اسيا و بتديك 30 كج وزن للتذكره غير شنطه الطياره فتعتبر اوفر انا حجز التزكره للفرد رايح جاي بحوالي 230 رينجت بتطلع من مطار كوالا و مطارتاني مش فاكره اسمه الرحله حوالي 50 دقيقه بس اهم حاجه تروحوا بدري لاني رحت قبلها بساعه لقيت الكونتر قفل و ما رضيوا يطلعوا شنطي الطياره وعملت مشكله لان مش مكتوب انهم بيقفلوا الكونتر بدري بس هم محترمين طلعوني على حسابهم على الطياره اللي بعدها
2- نزلت هناك في فندق 4 نجوم اسمه adya فندق رائع جدا سواء الغرف او الخدمه او الفطار عيبه الوحيد انه بعيد شويه عن سينانج اللي هي تعتبر منطقه مركزيه والناس بتسهر فيها للساعه 1 الصبح و اكتر كنا بناخد جراب بحوالي 23 رينجت
3- لو مش هتاكل من ماك وكنتاكي الاكل هناك اغلى شويه من كوالامبور خصوصا اني مش باحب الاختراعات قوي
4-هناك في رحلات بتطلعها ممكن تكلم مرشد او حد انت تعرفه انا اسامه ادني رقم مرشد سوري و اصحابي ادوني ارقام ناس ماليزيين ممكن تطلعوها من الفندق او من شينانج ...بس كل ما تركب تاكسي هتلاقيهم بيعرضوا يوصلوك دول افكسلهم لو مش عارف الاسعار
عامه الرحلات اللي ممكن تتراح في رحله المانجروف دي لو طلعتها لوحدك برايفت بتكون بحوالي 400 رينجت فلو معاك مجموعه تعرفهم ده افضل..او لو طلعت مع مجموعه من الفندق بتكون من 200-300
في رحله تانيه اسمها island hopping دي مركب بتاخدك بتلف بيك 3 جزر بتنزل كل جزيره تقعد ساعه تنزل المياه او تتفرج هناك بجد جميله جدا اسعارها من 35 ل 90 انا طلتعها مع الفندق عشان اتحرك من الفندق و ارجع عليه كانت بحوالي 55 رينجت للفرد
في رحلات كتيره تاني بس بصراحه انا ما حبيت اتنطط كتير في لينجكاوي كنت عايزه اريح
لينجكاوي منطقه حره الاسعار فيها جميله جدا اهم حاجه تتجاب من هناك قهوه ونيسكافيه و شوكلاته بنص ثمنها تقريبا و اغلب الاسعار قريبه من بعض.. كان جنب الفندق في مول اسمه lankgkawi pradaيعتبر اكتر مكان لقيت فيه لبس و شنط و هدايا بس عامه لو هتعمل شوبينج محترم يبقى كوالا
في هناك كذا شاطئ مفتوح ممكن تطلع يوم من الصبح تاخر كرسي و شمسيه ب 20 رينجت وتقعد هناك طول اليوم او في بقي العاب و انشطه مائيه و حاجات بتتاجر هناك بس غاليه شويه فلازم تفاصل
انا قعدت هناك 5 ايام ورجعت كوالامبور و قضيت اليومين الي فاضلين بعمل شوبينج و اروح حدائق زي حديقه البرجين و الطيور و رجعت على مصر تاني للاسف
السؤال المهم بقي بتاع الرحله اتلفت كام انا صرفت حوالي 2400 دولار في 13 يوم لفردين بس ده مش مقياس و هقولكم توفروا ازاي اولا انا كنت حاجزه في شهر 3 الطيران ب 5200 جنيه للفرد واضطريت اغير الحجز لظروف عندي وده خلاني ادفع غرامه و فرق تزكره وطيران داخلي ضاع عليا فده لوحده حوالي 8000 جنيه فرق:’(
و شوبينج وهدايا باكتر من 500 دولار و رحنا وقت كوسم كل حاجه اغلى و كنا بنتحرك بجراب او عربيه مخصوص فانا حسبتها لو حضرتك قضيت مده اقل وما عملت شوبينج كتير الرحله ممكن تكلف حوالي 1500 دولاراو اقل بنفس الكواليتي ولو حد حب يسال عن حاجه انا موجده
اولا تجربتى: هنا Review عن رحلتى فى ماليزيا وهحاول اجاوب على كل التساؤلات اللى بدور فى دماغ كل واحد بيفكر يروح ماليزيا الخضراء
مقترحات ونصائح هامة جداااا:
- افضل وقت تسافر فيه ماليزيا من شهر فبراير الى سبتمبر (مع تفضيل شهر 3 و 4)
- حاول تخلي رحلتك لماليزيا لاكتر من جهه يعنى كولالمبور العاصمة وجزر مثل لنكاوى ... بينانج... وممكن بالى كمان (ايون بالى بتاعت اندونسيا بنفس التأشيرة) ...الخ
- خد بالك تأشيرتك لماليزيا بتاخدها من المطار هناك وتقدر بيها تدخل جزيرة بالى (اندونسيا) انا عرفت كده هناك
-التصريح الامنى لو مكتوب وظيفه ف الباسبور (وظيفه مؤهل عالي مثل دكتور ، صيدلي ، مهندس …… ) مش محتاج تصريح امني. , طالب او حاصل ع بكالوريس محتاج دعوة من اي حد ف البلد نفسها او تكون مرافق لزوجك او ابوك
- اختار الفندق بالفطار فقط وبلاش بلاش يبقى غداء وعشاء ابداااااااا وخليك فاكر انى قولتلك بلاش(بصوت هنيدى) اكلهم صعب جدا مش هيعجبك لكن الفطار مفهوش فن (بيض وجبنة وبطاطس...الخ)
- اوعى تحجز فندق جانب المطار لانه بعيد جدا من المزارات ..فاختار فندق فى الدوان تاون افضل.
- خد معاك تونة وجبنة بس مش كتير ومتقلقش هتلاقى مطاعم عربية كتير هناك واخونا السوريين مسيطرين برضو هناك.
- ابعد تماما عن فاكهة هناك اسمها الدوريان شبهه الاناناس كده ولكن طعمها صعب جدااا وهتلاقى دايما تحذير منها فى الفنادق بعدم اكلها داخل الفندق علشان ريحتها رغم انها مشهورة جداا هناك وفى ناس بتعشقها!!.
- حاول قبل لما تروح اى حديقة ترش اللى ظاهر من جسمك بأووف بتاع الناموس او اى حاجة مثيله (احطياتى لكن مش اساسى يعنى)
- القرود هناك مش كيوت خالص زى دلال بتاعة احمد زكى .. ابداا.. دول حرامية وممكن يسرقوا شنطتك علشان ياكلوا اللى فيها .. فتعامل معاهم بحذر.
الجولات والفسح:
انا سافرت بالترتيب (كولالمبور – لانكاولى – بينانج - كولالمبور تانى علشان ارجع بلدى)
1- كولالمبور : المده المقترحة (3 -4 ايام)
- حديقة الطيور – حديقة الزهور – حديقة الفراشات (كلهم جنب بعض ممكن فى يوم واحد) موجودين فى مكان اسمه بردانا بارك.
- البرجين التؤام twin towers ودول لازم تاخد جوله فيهم تقريبا ب 60 رنجيت وهتقعد ساعة بالكتير.
- مرتفعات هاى لاند وفيها التلفريك ومولات ودى جميله ويوم واحد علشان المشوار.
- اى سيتى ICity لازم تروحوها فيها حديقه كلها الشجر بتعها كله منور وفيها ملاهى وكهف الثلج والRed Carpet ودى تحفه وفيعا معظم تماثيل المشاهير بالشمع وحاجات كتير
- بتروجايا فكرتها زى العاصمة الادارية الجديدة مثلا وفيها بحيرة كبيرة ومسجد تحففة وممكن تاخد جوله حول جميع المبانى والمعمار اللى فى بتروجيا بالقارب
- السوق الصينى China gate مكان للتسوق رائع بس نصيحة فاصل كويس جداااا جدااا لان هما بيضربوا السعر 70% تقريبا ...بس روح هناك اخر يوم علشان لو هتسافر اماكن تانية متشلش معاك الهدايا والشوبنج وكده.
2- جزيرة لنكاوى المده المقترحة (2 -3 ايام)
- بحر واستجمام وممكن تركب برشوت وكده وتنطيط فيها كل حاجة
حديقة تقريبا اسمها Taman park حلوة وممكن هناك تركب الفيل
- الاكواريم (متحف الاحياء المائية) جميل جدا
- رحلة المنجروف (كهف الخفافيش – جزيرة النسور – رحله بحرية ...الخ)
يوجد السوق الحرة هناك ولو بتحب الشوكولاته تبقى هتهيص لانها بكل الانواع وسعرها معقول
لو بتحب القهوة انصحك بال White coffee☕ جربها وهتدعيلى.
3- جزيرة بينانج المده المقترحة (2 -3 ايام)
دى جزيرة للاستجمام اشهر الاماكن هناك (حديقة الفواكة – مصنع الشوكولاتة – مصنع الشاى – مرتفعات بينانج..الخ)
جرب تروح Upside Down Museum penang البيت المقلوب بينانج 🙃تجربة انصحك بيه والصور هتلاقيها مع البوست
دى تجربتى الشخصية ولكن يوجد اماكن كتير ممكن تروحوها هناك
الجزء الثانى:- ازى توفر
- اول لما تروح كولالمبور اشترى خط ماليزى بالباسبور وسعرة رخيص.
- نزل ابكيشن اسمه Grab Taxi زى اوبر كده وبصراحة ممتاز وسعرة تحفة وممكن تختار ان تاكسي يوصلك او شخص عنده عربية مشغلها زى اوبر وكريم وده ارخص طبعا
- سافر بدولارات او ريالات سعودى وهتغيرها هناك بالرنجيت (عملة ماليزيا) وبسعر حلو لان صعب تلاقى رنجيت فى مصر بس برضو جرب صرافات وسط البلد انا لاقيت هناك مبلغ بسيط.
- حاول لما تغير الفلوس اللى معاك لرينجت(عملة ماليزيا) تكون فى العاصمة كولالمبور هتاخد سعر احلى من باقى الاماكن والجزر.
- احجز تذاكر الطيران✈️ بدرى على قد ما تقدر لو انت محدد هتسافر امتى وتقريبا الفرد هيكون فى حدود 6500 الى7000 كأفضل سعر لو حاجز بدرى وممكن ارخص كمان.
- الطيران الداخلى احجزة قبل ما تسافر افضل بكتير على skyscanner وخد بالك لازم تحجز وتدفع الشنط بتاعتك علشان الطيران هناك من غير شنط (فقط هاندباج 7كيلو) لكن فى اوبشن انك تضيف شنط وارخص كتير لما تحجزة قبل السفر وانصح بطيران AirAsia للداخلى.
- حجز الطيران الدولى والداخلى عن طريق www.skyscanner.net بصراحة ملقتش ارخص منه.
- لما تروح الجزر مش هتعرف تشتغل بال GrabTaxi كتير لانه معظمه فى العاصمة ... بس ممكن توقف تاكسي وتتفق معاه (مقاولة وبلاش يفتح العداد) ولو لاقيته كويس خد رقمة وهو هيجيلك فى المكان اللى انت فيه.
-كمان فى كولالمبور فى باص اسمة هوب اون هوب اف بحوالى اربعين رنجيت لل ٢٤ ساعة بيوديك اهم المعالم وهو عبارة عن باص بيلف بيك كولالمبور وتنزل تتصور وتتفرج وترجع تاخد الباص اللى بعده بنفس التذكرة وبين كل باص والتانى ٣٠ دقيقة.
نصيحة: استمتع برحلتك واستعن بالله وتفكر فى خلقه واحمد ربنا على النعمة واقراء دعاء السفر وافتكر ان الاماكن دى هتشهد عليك بانك صليت هناك وذكرت الله وتفكرت فى خلقه ولما تشوف حاجة طبيعية عجبتك قول ( ربنا ما خلقت هذا باطلا سبحانك فقنا عذاب النار).
اى سؤال انا تحت امركم ان شاء الله
تقرير عن cameron highlands في ماليزيا
مينفهش تروح ماليزيا و متزورش cameron highlands لانها بالنسبالي اهم من بينانج و لانكاوي و انا عن نفسي اتبسطت فيها جدا جدا جدا
هتكلم في التقرير ده ازاي نروح من كوالا لامبور لكاميرون هايلاند هتستخدم الاتوبيس
و علشان تحجز تذكرة الاتوبيس قدامك حاجتين :
1_اول حاجة تحجزها اونلاين من اللينك ده
http://www.busonlineticket.com/
و ده بيظهر لك كل مواعيد الأتوبيسات اللي بتطلع من كوالا لكاميرون و سعر التذكرة بيبقي غالبا 35 رنجنت one way و لووهتحجز رايح جاي بتبقي ب70رنجنت
2_ تاني اختيار لو ملقتش تذاكر متاحة اولاين روح محطة الاتوبيس و اسمها TBSدي برة كوالالامبور و احجز من الشبابيك هناك بس روح قبلها بيومين علشان تلاقي مواعيد مناسبة هيديك تذكرة بboarding علي طول لكن لو هتحجز اون لاين لازم تروح المحطة قبلها تعمل boarding زي في المطار بالظبط علشان تروح تركب الأتوبيس بتاعك
نتكلم ع محطة tbs شوية دي بقي عبارة عن مطار متنكر في هيئة محطة اتوبيس في شبابيك لقطع التذاكر و شابيك boarding و يديك boarding pass زي بتاع الطيارة كدة و فيه رقم البوابة بتاعك انت مفروض بتروح البوابة اللي مكتوبة في التذكرة و تشوف الرصيف اللي بيقف عليه اتوبيس شركتك و تركبه
ملحوظة: المواعيد دقيقة جدا جدا متتاخرش
ازاي اروح محطة tbs في طريقتين:
1_اول حاجة اخد ktm من kl sentral التكرة ب2.5 رنجنت
بس خد بالك ان ktm بيجي كل نص ساعة و مواعيده بتتغير في weekends اللي هما السبت و الاحد
2_ او لفة اطول شوية تاخد monorailو تنزل في محطة اسمها هانج توا و من هانج توا تاخدlrt الخط البرتقالي "مش البني" و ينزلك tbs بس دع بياخد وقت
3 _ لو اتزنقت خالص و حسيت ان الاتوبيس هيفوتك خد تاكسي بعداد او uber
ركبنا الاتوبيس خلاص اعمل حسابك انك لازم تاخد اي اقراص للغثيان سواء بيجيلك motion sickness او لا
الطريق حوالي 5 ساعات و نصه تقريبا عبارة عن طرق مدقوقة في الجبال و دائرية و كل شوية بترتفع هن سطح البحر علشان كدة بيجيلك احساس الغثيان فظبط نفسك بس المناظر اللي بتشوفها تستحق الصراحة
ملحوظة طيب لو انا مش عايز ارجع كوالا لامبور اعمل ايه
ممكن تاخد اتوبيس من كاميرون هايلاند لبينانج في اتوبيسات بتطلع من هناك و هتكلم عنها بالتفصيل في تقرير تاني
خلاص ركبنا الاتوبيس من كوالالامبور و انطلقنا في اتجاه cameron highlands بتوصل لموقف اسمه tana ratah
انا كنت حاجزة في هوستل اسمه snooze cameron Highlands
و ده اللوكشن بتاعه Brinchang, 39000 Brinchang, Pahang, Malaysia
اول ما تنزل المحطة هتلاقي شبابيك لشركات تحجز منها tours و ده هنتكلم عنه في تقرير لوحده
و هتلاقي تاكسيات كتير هتشاور لتاكسي يوصلك للهوستيل بياخد 15 رنجت او اقل كمان فاصل انت و شطارتك لانه بيبعد 5 دقايق بالتاكسي من محطة الاتوبيس
بس خد بالك في 2 هوستيل بنفس الاسم فلازم توريله العنوان اللي انت حاجز فيه
مميزات الهوستيل ده:
-رخيص انا كنت حاجزة اوضة double انا وصاحبتي بحمام داخلي الليلة ب16 دولار يعني كل واحدة وقعت عليها الليلة ب8دولار يا بلاش
_نضيف و امين هو عبارة عن عمارة تملكها ام من اصول صينية و ابنها و عندهم سوبر ماركت تحت العمارة دي و هي دي الريسبشن اصلا و هي اربع ادوار اخر دورين هما اللي مشغلاهم هوستيل
في كل دور في صالة كبيرة و سفرة و مطبخ يعني ممكن تشتروا اكل من السوبر ماركت و تسووه و توفروا مصاريف
في الدور التالت في washing machine, dryer بفلوس لكن لو حسيت ان عندك غسيل كتير و هيكلفك في مغسلة صاحبها هندي في الشارع اللي ورا الهوستيل علي طول تكلفته اقل و بتاخد لبسك في نفس اليوم
كمان في ورا الهوستيل ماكينات atm علشان تسحب فلوس براحتك
بالنسبة للمطاعم معظم المطاعم اللي حواليه صيني بتاعة steam boat "و في ناس هتقول انها حلال و ناس زيي بتتحسس من حوار الصوصات اللي بتتحط و ممكن يبقي فيها حاجات حرام او مشبوهة" فانا مجربتهمش"
البديل الحلال السوبر الماركت اللي تحت الهوستيل كله منتجات حلال
و كمان علي بعد مترين من الهوستيل في كنتاكي وواخد رخصة حلال امشي دقيقتين تاني في مطعم تايلاندي حلال
قدام الفندق في موقف تاكسيات تقدر تاخد منه تاكسي لاي مكان انت عايزه
و كمان في شركة تحجز منها اتوبيسات تروح لبينانج علي طول لو خط سيرك تروح بينانج زي مانا عملت
بصراحة الفندق ده ارشحه بقوة فعلا و لو عايز تحجز في فندق تاني متدورش علي اوضة بتكييف مش هتفرق لان الجو هناك برد و بتتغطي بلحاف فمتدفعش فلوس في حاجة مش هتستخدمها
كاميرون هايلاند ع الاقل تقعد فيها يومين من الاماكن المريحة للاعصاب فعلا و نفسي ارجع ماليزيا علشان اقعد فيها تاني
الصور في التقرير من شباك اوضتي في الهوستيل و من المنطقة اللي فيها الهوستيل نفسها
ارجو ان التقرير يكون مفيد و انتظروا التقرير اللي جاي عن tours اللي ممكن تتعمل
خلاص بعد ما وصلنا و ريحنا شوية من المشوار بتاع الاتوبيس نيجي للانشطة اللي ممكن نعملها هنا:
بصراحة الانشطة كتيرة جدا و الافضل انك تحجز tour مع شركة
في شركات كتير جدا بتقوم بالرحلات دي و تقدم package مختلفة و بتبقي في حدود من 4 ل7 ساعات حسب الانشطة و المبلغ اللي هتدفعه
معظم الشركات ليها مكاتب في المكان اللي بينزلك فيه الاتوبيس عن tanah ratah تقدر تشوف الشركات المختلفة و تحجز التور اللي انت عايزها
او انا افضل انك تحجز tour مع شركة eco tour cameron highlands
الشركة دي انا مطلعتش معاها بس انا شفت العربيات بتاعتها نضيفة و المرشدين بتوعهم كويسين جدا جدا فارشحها بقوة
في عندهم tours مختلفة فيهم واحدة explore tour ب100 رنجت 7 ساعات حلوة مغطية معظم الحاجات في cameron highlands
نيجي للانشطة:
1_مزارع الشاي tea plantation:
اصلا كاميرون هايلاند قايمة علي مزارع الشاي بس احساسك انك تدخل جوة مزارع الشاي و تتحرك و تتصور و تشم ريحة الشاي غير ان المرشدين بيقعدوا يشرحوا عن تصنيع الشاي و يا سلام كمان لو لسة ممطرة و الورق يبقي لونه اخضر و ريحة الشاي تطلع في الهوا
2_مصنع الشاي:
كاميرون هايلاند مليانة مصانع شاي بس اكبرهم و اشهرهم مصانع BOH" best of highlands"
دي اقدم مصانع شاي اتعملت ايام الاحتلال الانجليزي
مفروض انك هتطلع فوق لحاجة زي كوفي شوب معمول من ازاز علي مرتفع كدة و تطلع له بسلم خشب جميل وسط مزارع الشاي
لما تدخل بقي هتلاقي شاي و حلويات مختلفة
جربوا الكيك بالشاي الاخضر جميييل
كفاية انك تبقي قاعد وسط الخضرة دي يااااه قمة الانسجام و الصور بقي بتبقي تحفة تحفة
و متنسوش تخشوا المتجر اللي هناك و تشتروا من منتجات المصنع " انواع شاي ملهاش حل احنا كان بيضحك علينا السنين اللي فاتت و يقولنا ده شاي "
ملحوظة: المصنع بيقفل يوم الاتنين من كل اسبوع فحاول متعملش tour يوم الاتنين لانك هتاخدها ناقصة زيارة المصنع و بصراحة خسارة جدا جدا انك متروحش
3_mossy forest:
و ده بياخدوك لجبل تعمل trekking نص ساعة تقريبا وسط الادغال و بعدين تروح الغابة دي
حاجة كدة وهم كانك وسط السحاب فعلا لانها علي ارتفاع 2000 متر فوق سطح البحر و مش مخيفة و لا فيها حيوانات مفترسة علشان محدش يخاف
الاجانب كانوا بيدخلوها باطفال بتحبي عادي
4_حديقة الفراشات:
و دي بقي حديقة مليانة فراشات اشكال و الوان بتتنطط حواليك
مبهجة جدا الصراحة و الناس اللي ليها في التصوير هتتبسط خالص
5_ مزارع الفراولة:
و زي ما كاميرون هايلاند مشهورة بالشاي برضه مليانة مزارع فراولة
تجربة لطيفة تقدر تدخلوا المزارع و ممكن تساعدوا في جمع الفراولة و هتلاقوا محلات بتبع فراولة من المزارع "بصراحة بتاعتنا احلي لانهم بيستعجلوا عليها تقريبا قبل ما تتسوي فتبقي مش محلية" بس متفوتش تشتري مربي الفراولة سواء من المحلات دي او اي سوبر ماركت "جميلة جدا و مختلفة عن المربي بتاعتنا"
في محلات بتبيع شيكولاتة جنب مزارع الفراولة و مش فاهمة ايه العلاقة بس متجيبوش اسعارها زي السوق الحرة فهيبقي شيل ع الفاضي
6 _ مزارات تانية زي معبد بوذي مشهور عندهم و حاجات تانية
ممكن تروح مكان تاني انا كان نفسي اعمله بس مكنش في وقت:
في شلال قريب اسمه lata iskandar
ده مسافة ساعة بالعربية فلو انت عندك وقت و مفيش في tour زيارته ممكن تتفق مع تاكسي يوديك و يرجع ياخدك بعد ساعتين او تلاتة و فاصل معاه في السعر
في كمان night market مشهور بيتعمل تقريبا السبت او الاحد مش فاكرة برضه ملحقتوش
كدة اكون غطيت Cameron Highlands علي قد ما اقدر
لو حابين تسالوا علي اي حاجة ده يسعدني
السلام عليكم و رحمة الله ..
انا لاقيت إستفسارات كثيرة عن ماليزيا .
انا مقيم حاليا فى ماليزيا .. هقول المعلومات اللى اعرفها .. لعل يكون فيها نفع ان شاء الله .
-
السفر لماليزيا من غير تأشيرة ... بتقطع التذكرة و تسافر علطول .
-
التصريح الامنى ,, مش مطلوب لو مكتوب فى باسبورك مهنة ,, زى صاحب شركة او مهندس أو محامى او صاحب ورشة ... كل دى مهن .. لكن لو مش مكتوب مهنة ..او مكتوب مؤهل .. بيشترط التصريح الامنى .. و الكلام ده من مجمع التحرير لما كنت بسأل .
-
و انت بتحجز التذكرة ,, لازم طبعا تكون ذهاب و عودة .. عشان يوافقوا يطلعوك من المطار فى مصر .. و عشان برده يوافقوا يعطوك التأشيرة فى المطار فى ماليزيا .
-
يفضل انك تخللى العودة بعد 15 يوم او 17 يوم بالكتير ,, فى التذكرة يعنى ,, و لما تيجى ماليزيا تبقى تكنسل أو تاجلها ,, و ده بيتكلف حوالى 300 رنجت .. طبعا الرنجت بيساوى حوالى 4.5 مصرى .. و الدولار بيساوى حوالى 4.5 رنجت ماليزى .
-
تكاليف التذكرة ,, تقريبا حوالى 6000 الى 7000 جنيه مصرى .
-
العيشة فى ماليزيا الى حد كبير متوسطة .. مش غالية و مش رخيصة .. لكن تقدر ان شاء الله انك تلاقى أكل نضيف و ممتاز و رخيص ,, سكن نضيف و ممتاز و رخيص .
-
تكاليف شهر ,, سكن و مواصلات و اكل و شرب ,, تقريبا 700 $ ,, يزيد او ينقص قليلا ..حسب مصاريفك انت ... و طبعا الشهر ده بفرض انك مش بتشتغل .
-
و طبعا ( و دى نقطة مهمة جدا جدا ) كلامى ده على العاصمة ,, لكن فيه أماكن تانية فى ماليزيا تقدر تعيش فيها و تسكن تقريبا ب 400 $ .. زى مثلا مكان اسمه شاه علم او جوهور ... امكان بعيدة عن العاصمة يعنى .
-
بالنسبة للشغل ,, النقطة دى مش هقدر أفيد فيها اوى .. لانى جاى عشان اعمل شغل للشركة اللى انا شغلا فيها فى مصر ,,, لكن من خلال الفترة اللى قعدتها هنا عرفت الاتى .
-
انك تفتح شركة هنا ,, تتكلف حوالى 1000 $ ... شاملة كل المصاريف الإدارية ,, طبعا بخلاف مصاريفك الشخصية .
-
عشان تشتغل فى مكان او محل ,,, طبعا لازم يكون معاك إقامة ,, يعنى اكتر من 3 شهور .. طبعا ممكن تشتغل بتأشيرة الاقامة ال3 شهور اللى انت اخدتها فى المطار .. بس ده غالبا هيكون فى محلات العرب و مطاعم العرب ... و طبعا هيكون شغل فحت .. يعنى لازم تستحمل شوية ..
-
أفكار ممكن تفيد ان شاء الله .
-
لو كل مجموعة من الشباب او الرجال عملوا تكتل مع بعضهم .. و قدروا يعملوا بيزنس خاص بيهم هنا ... زى مثلا
-
انك تفتح محل بقالة هنا ,, فكرة ممتازة و شغالة كويس .,, انك تستورد حاجة من مصر و تشتغل على البقالات العربية .. زى الجبنة و الحلاوة الخ .. برده دى فكرة ممتازة .
-
فيه شغل ممتاز هنا برده ... و هو تعليم القرءان و اللغة العربية و طبعا كما قال النبى عليه الصلاة و السلام ( خير ما أخذتم عليه الأجر ,,كتاب الله ) .
-
تعليم القرءان و اللغة العربية اللى بارعين فيه هنا ..الاخوة اليمنين ..لكن انا لاحظت ان المصريين لهم قبول قوى هنا فى هذا الامر ... يعنى بنفس فكرة المجموعة .. لو مجموعة محفظين و محفظات و معلمين لغة .. قدروا انهم يجيبوا تمويل لدار تحفيظ هنا و يعملوا الموضوع ده .. هيكون شغل و دخل ممتاز جدا جدا ان شاء الله .
-
بالنسبة للأكل هنا .. طبعا الأكل هنا فيه حاجات غريبة .. ابسطها .. انهم بيحطوا السكر على الشطة .. لكن الاكل الهندى و الماليزى الى حد كبير جدا مضمون و طعمة كويس .. و سعرة كويس جدا .
-
بالنسبة للمواصلات .. فيه هنا ( طبعا انا كل كلامى على العاصمة ) شبكة مواصلات من المترو و القطر ..ممتازة جدا .. الاتوبيسات مش مغية معظم البلد .. فهيبقى معظم إستخدامك هو المترو و القطر .. و التاكسى .. و التاكسى هنا بعداد طبعا . .
-
بالنسبة للإقامة .. طبعا لازم تكون بتدرس او عندك بيزنس .. عشان يعطوك الاقامة .. و من خلال ما سمعت ( و اؤكد ..من خلال ما سمعت ) .. ان الاقامات هنا شوية فيها صعوبة .. شوية ..لكن مش مستحيلة .
-
مفيش حاجة هنا اسمها اتجوز ماليزية و اخد الجنسية .. إنسى دى خاالص .
-
نقطة مهمة .. و دى وجهة نظر شخصية .. مالزيا دولة فيها مسلمين .. مش دولة إسلامية ,, يعنى و انت ماشى عادى جدا جدا هتلاقى معابد بوذا .. و هتلاقى مساجد .. هتلاقى بنات سافرات عاريات ...و هتلاقى محجبات محتشمات ... هتلاقى كل حاجة ..وانت و زوقك بقى .
-
الاكيد ..انك ان شاء الله هتقدر تقيم شعائر دينك بدون اى مشاكل ..( ماعدا ان خطبة الجمعة بالماليزى ) .
-
انت ك عربى .. و خصوصا ك مصرى .. ليك ترحيب هنا .. عجيب فعلا .. بيعتبروك حفيد الصحابة ( اه والله .. ميعرفوش اللى فيها ) .
-
أكتر ناس وقفت جمبى فى رحلتى و اجدع ناس انا قابلتهم هنا .. هما المصريين والله العظيم .
-
ممكن انك تيجى و تنجح ... واارد و ممكن تيجى و تفشل .. برده وارد .. لكن رجاءا بلاش تعمم تجربتك ..انها التجربة الوحيدة , لان بمنتهى البساطة .. مادام عندك يقين فى تقدير و تدبير ربك .. و انت مستخير و بتأخذ بالاسباب .. يبقى أكيد كل قدر ربنا خير .
أعتذر على البوست الطويل .. بس حاولت أوضح فيه كل النقط تقريبا ..و لو فيه إستفسار عندى إجابة ليه ..ان شاء الله أجوبه .. و لو معنديش إجابة .. هقول معرفش .. أو هسأل لصاحب الاستفسار .
و اسال الله تعالى أن يلهمنا رشدنا و يعيذنا شر أنفسنا