المغرب
النهاردة هاحكي ليكم عن تجربة السفر لمراكش وماقلتش المغرب لأنة كان سبب رئيسي لسفري المغرب هو مراكش دة بغض النظر أني زرت كازابلانكا - الرباط - فاس - مكناس - افران .. كنت دايما بسمع مقولة ان اللي سافر المغرب وماراحش مراكش هايبقي ولا كأنة زار المغرب أصلا بالضبط زي اللي بيزور مصر ومايروحش الأهرامات وفعلا إتأكدت من المقولة دي أما سافرت المغرب ...
ملحوظة مهمة ::: الاسعار كانت قبل التعويم وقتها كان الدرهم المغربي ب90 قرش فكنت بتحس بالضبط انك بتتعامل في مصر ..
هابدأ الأول بتأشيرة المغرب
وهي سهلة نوعا ما وليها نفس طلبات التأشيرات للدول التانية وهي :
1- حجز طيران وحجز فندق
2- خطاب من جهة العمل او خطاب قيد من الكلية لو كنت طالب
3- كشف حساب بنكي
4- ملأ الاستمارة الخاصة بالتاشيرة في السفارة ودفع 205 جنية تمن الفيزا
طلبوا برضة في السفارة وثيقة تأمين عملتها من الشركة السعودية للتأمين بس ماحدش بص فيها هناك في السفارة ..
بالنسبة لتذكرة الطيران
1- فنصيحة لأي حد مسافر أحجز قبل رحلتك بشهرعلي الاقل لانة مثلا تذكرة المغرب قبل ميعاد سفري بشهر تقريبا كانت علي الملكية المغربية ب3350 جنية ووصلت وقت الحجز قبل السفر بأسبوع ب6500 جنية .
2- ابعدوا عن الترانزيت لو معاك شنط فيها حاجات مهمة وممكن تقف حياتك عليها اما توصل لأنة اما سافرت وقتها ماكانش في اي حاجة غير ترانزيت في تونس ومنها لكازابلانكا والشنط ضاعت يومين لغاية ما اخدتها تاني بعد لفة طويلة .
3- ماكنتش عاوز اتكلم عن الموضوع دة وفعلا مكسوف من نفسي فعلا وانا بتكلم علية بس بلاش مصر للطيران لانة فيها إهمال في كل حاجة في التوقيت وفي الضيافة علي الطائرة وفي الأهتمام بالشنط . أنا اخدت مصر للطيران لتونس ومن تونس اخدت الملكية المغربية
وأنا راجع أخدت مصر للطيران دايريكت لمصر فأنا رايح الشنط بتاعتي ضاعت والطيارة فعلا كأنك قاعد في اتوبيش شرق الدلتا ودة انعكس تماما اما نقلت علي الملكية المغربية في النص التاني لرحلة الذهاب مع انها كانت ارخص من مصر للطيران بس كانت الخدمة والطيارة والضيافة افضل . وأنا راجع برضة كنت راجع علي مصر للطيران دايريكت للقاهرة فميعاد الرحلة أتأخر 4 ساعات وسمعت وقتها اكتر من 5 اسباب منها :: حمام البيزنس مسدود - الموتور بايظ - عجل الطيارة فية مشكلة )
هاتكلم بقي عن مراكش بصفتها كانت أجمل حاجة عملتها في المغرب ولولاها ماكنتش اصلا هاحس بمتعة انك تسافر المغرب ...
مراكش بتربطها بكل مدن المغرب شبكة طرق وسكك حديد عالمية . ممكن توصل ليها من اي مكان من المغرب عن طريق القطار اللي هو بالمناسبة زي قطارات اوروبا ومختلف تماما عن اللي عندنا بس طبعا كان أغلي .. أنا اخدت درجة تانية من الرباط لمراكش دفعت 127 درهم = 125 جنية تقريبا وكانت المسافة تقريبا 5 ساعات من الرباط لمراكش .
*** هاتشوف اية في مراكش ؟؟؟؟
1- لو بتدور عن الطبيعة والشلالات والجبال الخضراء يبقي هاتروح شلالات أوزود وهي بتبعد عن مراكش حوالي ساعتين وفي شركات سياحة كتير بتنظم ليها رحلة ليوم واحد شاملة الانتقالات بأتوبيسات مكيفة والفطار والغداء ب200 درهم وبرضة ممكن تروح منطقة سيتي فاطمة بس طبعا شلالات اوزود حاجة كدة من الخيال وهاتعدي علي غابة فوق فيها قروج وخلي بالك وانت هناك من القرود لأنها دايما بتسرق حاجات من الزوار خصوصا الموبايلات والكاميرات هههههه .
شلالات اوزود عشان تشوفها بتطلع حاجة زي جبل سانت كاترين لغاية اما توصل للقمة وتشوف اجمل منظر ممكن تقع علية عينيك في حياتك وكمان هاتقابل هناك القرود اللي موجودة بكثرة وبتيجي ليك وبتلعب معاك عادي جدا
2- لو بتدور علي الحياة التقليدية والمواقع التاريخية والحارات القديمة وكانك في الف ليلة وليلة يبقي هاتلاقي اللي انت عاوزة في مراكش ودة كان سبب رئيسي اني رحت مراكش وهناك في اماكن ماتتفوتش زي :
1 - ساحة جامع الفنا :
هناك بقي هاتحس نفسك في عالم تاني خالص هاتشوف حلقات بيكون فيها راجل قاعد وحوالية مجموعة من السياح بيتفرجوا علية .
هاتشوف اللي بيلعب مع التعابين والكوبرا ولا كانك في الهند
هاتشوف اللي بياعب بالودع والصدف
هاتشوف اللي بيلعب بالسخر
هاتشوف اللي بيغني قصص قديمة زي ابو زيد الهلالي والشاطر حسن .
هاتشوف اللي بيقول نكت بالدارجة المغربية والناس حواليك تضحك وانت مش فاهم اي حاجة من اللي بيقولة هههههههههه .
هناك هاتلاقي بسطات عليها كل الاكلات الشعبية المغربية من الطنجية والبابوش وبمناسبة البابوش فاي حد هايروح مراكش لازم يجربة ودة عبارة عن الحلزون اللي بيكون موجود عندنا في المناطق الزراعية بس بياخدوة بيطبخوة وبعملوا لة شوربة زي البقلويز كدة عندنا في المناطق الساحلية .
أفضل وقت للزيارة ليها في الليل ....
2- قصر الباهية :
ودة من أعظم وأحلي القصور اللي انا زرتها في حياتي حاجة كدة من الخيال .هو مش قصر زي مثلا قصر القبة ولا قصر عابدين عندنا لا هو قصر قديم مبني علي الطراز الاسلامي بيرجع لعهد الاسرة العلوية في المغرب سنة 1880م .بس بيحتوي علي ساحات مزخرفة بشكل بديع جدا مش هاتشوفة في اي مكان في العالم الا الاندلس .
3- قصر البديع :
دة من روائع الهندسة المعمارية في المغرب وهو اقدم شوية من قصر الباهية بس بيتميز بالضخامة بتاعتة واسوارة العالية بدأ السلطان السعدي أحمد المنصور الذهبي في تشييدة سنة 1875م لمدة 16 سنة .
4- مدرسة بن يوسف
لما هاتزور المدرسة دي هاتحس نفسك فجأة اتنقلت للأندلس نفس الزخرفة البديعة ونفس تقسيم المدارس الاسلامية في الاندلس وهي من اشهر مدارس المغرب الاقصي وبيعود تاريخها للدولة المرينية شيدها السلطان ابو الحسن المريني سنة 1346م وأعاد بنائها واتجددت سنة 1565 م في عهد الدولة السعدية ومن الطرائف بتاعتها اما تعرف انها اتحولت بعد كدة لسكن للطلبة بس وفيها 132 غرفة للطلبة .. بجد انا بحسد الطلاب اللي كانوا قاعدين في مكان بالجمال والروعة دي .
5- متحف مراكش ( قصر المنبهي )
وكان شيده المهدي المنبهي، وزير الدفاع على عهد السلطان مولاي عبد العزيز سنة 1908م .ودة بيعرض مجموعة من القطع المتحفية اللي بتحكي عن تراث وتاريخ المغرب وخصوصا المشغولات الخشبية الرااائعة .
في أماكن تانية كتير زي حدائق المنارة - حدائق ماجوريل - ضريح السعديين - جامع الكتيبة - بيت تسكوين .
هانقعد فين في مراكش ( دي أهم نقطة ) لأنة بسببها ممكن تقضي أجازة سعيدة وممكن بسببها تكون عاوز ترجع بلدك تاني بأي شكل .
قبل ما اسافر لمراكش دورت كتير عن افضل هوستيل بأفضل سعر وخدمة ممكن أقعد فية والحمد لله عرفت هوستيل Young & Happy ونصيحة لأي حد هاسافر هناك دة من أفضل الهوستيلز اللي موجودة في مراكش وكمان واخد أعلي تقييم للهوستيلز علي بوكينج .
1- الهوستيل في وسط المدينة القديمة وقريب من قصر البديع و قصر الباهية وضريح السعديين وجامع مولاي يزيد وساحة جامع الفنا وبيت تسكوين .
2- الهوستيل لية رووف رائع بيطل علي قصر البديع ومنة ممكن تشوف كل مراكش القديمة .
3- الهوستيل نظيف جدا من جوة والغرف مكيفة ومفارش السرير نظيفة جدا وكمان الحمامات نظيفة جدا وبتتنظف بأستمرار .
4- خدمة الاستقبال في الهوستيل رائعة جدا وموجودة في اي وقت . يعني انا مثلا واصل هناك الساعة 2 بليل ولقيت الحجز بتاعي موجود واستلمت السرير بتاعي والاجراءات خلصت بسرعة وكمان بيتكلموا عربي وانجليزي وفرنسي ولو أحتجت منهم اي حاجة بيوفروها .
5- الهوستيل في واي فاي سرعتة مقبولة جدا وكمان الاقامة بتكون شاملة الافطار اللي هو فعلا وجبة مميزة ممكن تبدأ بيها يومك .
6- الهوستيل هاتلاقي فية خرائط لمدينة مراكش وكمان بينظموا رحلات سياحية لشلالات اوزود وسيتي فاطمة وسفاري في الجبل .
7- الهوستيل عنوانة سهل جدا وممكن توصل لية من اي مكان .. يعني مثلا انا وصلت لة الساعة 2 بليل وكنت واخد الطريق من محطة القطر لمراكش لغاية عندة مشي كنت بتفرج علي المدينة ومشيت علي الجي بي اس ووصلت الحمد لله بسهولة وبكل أمان .
الليلة في الهوستيل انا كنت حجزتها ب78 جنية بالافطار والفطار عندهم حاجة كدة لذيذة في الروف فوق ومنظر المدينة القديمة ادامك . دلوقتي تقريبا السعر اتضاعف مرة ونص بسبب التعويم .
ملحوظة :: أكتر حاجة نكدت علي هناك موضوع الأكل وممكن تستغربوا !! بس فعلا أنا تعبت هناك من موضوع الاكل هو طبعا في ناس كتييير بتحب الاكل المغربي بس حاسيتة تقيل اوي علي معدتي وخصوصا الكسكسي وحساء الحريرة ومن عاداتهم انهم بيهضموا بعد الاكل باللبن فطبعا كان الموضوع صعب شوية بالنسبالي . بس عموما هي بلد غاية في الروعة والشعب بتاعها بيرحب جدا بالضيوف وخصوصا لو عرف انك مصري .. الحالة الاقتصادية عندهم هي تقريبا نفس الحالة الاقتصادية عندنا بس طبعا دلوقتي كل حاجة اصبحت الضعف بسبب موضوع التعويم ...
====================================
المغرب.....سحر الشرق!!
وانا في مطار كوالالمبور مستني الطيارة اللي هتوديني علي دبي ومنها علي القاهرة كنت بفكر: الرحلة الجاية هتكون فين؟
مكنتش متردد ولا الاجابة احتاجت تفكير طويل...قلت لنفسي انا رحت اسيا واوروبا وعايز اروح قارة جديدة واماكن جديدة ، الاجابة ببساطة كانت افريقيا..
بعد الاستقرار علي القارة..الوقت جيه عشان احارب علي اجازة طويلة في الشغل وعرفت اخد اجازة اسبوعين ودورت علي تذاكر طيران من يوم الخميس بليل للحد اللي بعد ١٧ يوم الصبح، رحلة لمدة ١٧ يوم في افريقيا، وكنت وقتها بفاضل بين كينيا وتنزانيا وتونس والمغرب
بعدها قررت تونس والمغرب، قدمت علي فيزا تونس، ولسبب ما، لسة معرفوش اخدت رفض :D
بعدها قدمت علي فيزا المغرب وده الورق المطلوب للفيزا:
١-hr letter
٢- كشف حساب لاخر ٣ شهور
٣- حجز فندق مبدئي
٤- حجز طيران مبدئي
٥- تأمين سفر شامل المدة اللي انت هتسافرها
٦- صورتين بخلفية بيضا مختلفين عن الصورة الموجودة في الباسبور
واخدتها بسهولة وقررت اقضي ال١٧ يوم في المغرب، الِف فيها من جنوبها مرورا بوسطها واختم بالشمال
بدأت ابعت لمغاربة علي كاوتش سيرفنج وعملت صداقات مع مغاربة قبل سفري ب٣ اسابيع، وعرفت اني هقابل مشكلة وحيدة ،الا وهي، اللهجة لانها مختلفة تماما عن اي لهجة عربية واللهجة المغربية مختلفة من مدينة لمدينة فابتديت اتعلم من علي يوتيوب كلمات مغربية واساسيات اللهجة عشان اقدر اتحرك بشكل اسرع في المغرب وابقي اقرب للمغاربة وللثقافة المغربية،
كانت خطتي كالتالي: كازابلانكا - الرباط - مراكش - اوريكا - مكناس - افران - فاس - شفشاون - تطوان - طنجة
لقيت تذاكر طيران علي المغربية ب٤٢٠٠ جنيه ولقيت الهوستيلز رخيصة في كل المدن اللي هزورها باستثناء الرباط وكازا، المهم وصلت لكازابلانكا ودورت علي هوستيل ولقيت هوستيل رخيص ودي كانت اول مرة اسافر وانا مش محدد هقعد فين بس اكتشفت ان الاسعار الموجودة علي بوكينج ممكن تلاقي ارخص منها بكتير لو دورت علي رجلك بنفسك في المدينة اللي هتزورها
المهم عشان في تفاصيل كتيرة اوي ممكن اكتبها عن كل مدينة زرتها من ال١١ مدينة اللي زرتهم والناس الكتيرة اوي اللي قابلتها في رحلتي، فانا هكتب ٣ مقالات تانيين واحدة عن مدن الشمال اللي زرتها والتانية عن مدن الوسط والاخيرة عن مدن الجنوب وفي المقالة دي هكتب ملاحظات عن تجربتي في المغرب،
ملاحظات سريعة عن المغرب:
١- انا زرت اكتر من بلد في اوروبا واسيا بس المغرب اجمل بلد زرتها لغاية دلوقتي وده بسبب التنوع الكبير اللي مش موجود في اي بلد زرتها قبل كدة ولقيته في المغرب
٢- المغاربة اطيب واجدع واكتر شعب مضياف شفته بجد، ٣ مغاربة استضافوني في بيتهم في تطوان ومكناس وفاس، عرب وامازيغ ناس طيبين وروحهم جميلة واللي عايز يعرف معني كلمة الكرم يروح المغرب
٣- اللهجة المغربية او زي ما بيسموها (الدارجة) مش صعبة، انا اتعلمت الاساسيات قبل ما اسافر، بعد ما سافرت عانيت اول يومين عشان عقلي كان عقبال ما يترجم الكلام من المغربية للمصرية كان بياخد وقت :D بعد كدة بقت سهلة بالنسبالي اني افهمها، لهجة جميلة جدا. فيها مفردات عجبتني جدا مثلا لو حد سالك انت اتولدت فين؟ في المغرب بيقولوا بدل اتولدت ( اتخلقت ) وبيستخدموا كلمة بصير بدل اعمي..انا حبيت اللهجة المغربية لان مفرداتها جميلة جدا
٤- تمشي من مدينة لمدينة مسافة ٥٠ كيلو بس تحس انك رحت دولة مختلفة!
علي سبيل المثال من مكناس المدينة القديمة الرائعة لمدينة افران سويسرا المغرب لفاس المدينة القديمة اللي مختلفة عن مكناس تماما!
الدارجة كمان مختلفة من مدينة لمدينة!
٥- بلدين زرتهم وحسيت ان البلد والحكومة بتعمل كل اللي تقدر عليه عشان السائح يتبسط ويرجع تاني للبلد المغرب وتايلاند
٦- الدنيا منظمة في المغرب بالنسبة للمواصلات، فمثلا التاكسي عندهم نوعين:
تاكسي كبير وده بيكون خط سيره من مدينة لمدينة وبيكون ليه محطات اسمها المحطة الطرقية ودي زي موقف الاتوبيس بتاخد منها التاكسي وبيكون عربية مرسيدس قديمة وبيشتغل بالنفر لما يكمل ٦ اشخاص بيتحرك، اما داخل المدينة فموجود تاكسي صغير وده خط سيره بيكون داخل المدينة بس وبتحاسب بالعداد
عموما المغرب فيها شبكة مواصلات كويسة جدا وتقدر تروح كل المدن عن طريق القطار او الباص
٧- الاكل المغربي رهيب رهيب رهيب!
اعملوا حسابكم انكوا هترجعوا مصر زايدين في الوزن بسبب الاكل المغربي!
٨- انا قابلت في ال١٧ يوم اكتر من ٤٠ مغربي اغلبهم عرفتهم من couch surfing واحتكيت بالمغاربة في المواصلات وفي جولاتي بكل مدينة، اقدر اقول بكل ثقة ان اغلب المغاربة بيحبوا مصر جدا، كان احساس جميل جدا اني اصحي من النوم في شفشاون او كازابلانكا وانزل ادور علي مكان افطر فيه اسمع في الطريق وانا ماشي ام كلثوم!
علي فكرة عادل امام ليه شعبية رهيبة جدا في المغرب وناس كتير قابلتهم حافظين افيهات الافلام بتاعته :D
٩- لما كنت بتوه في مكان واسال الناس علي الطريق فيسالوني انت منين اقولهم انا من مصر، مش هقولكم كمية المحبة اللي كنت بشوفها في عيون المغاربة قبل ما اسمع منهم ان شاء الله مصر ترجع زي الاول.
الشعب المغربي شعب طيب ومعندوش احقاد علي اي شعوب تانية وبيتمنوا الخير للكل ومحبين لكل الشعوب مش المصريين بس، المغرب بصراحة جميلة بشعبها!
١٠- المغرب علي عكس اغلب الدول اللي زرتها قبل كدة الواقع احسن من الصور مليون مرة، انا بصراحة خصوصا في اسيا كنت بشوف صور وهمية لاماكن كتير ولما اروح اتصدم ان الواقع مش حلو زي الصور عكس المغرب بصراحة الطبيعة اللي شفتها في المغرب طبيعة بكر مشفتهاش في اي مكان زرته قبل كدة!
١١- المغرب بلد رخيصة سياحيا، الهوستيلز هناك رخيصة، المواصلات معقولة، الاكل رخيص والطيران كمان مش غالي، فلو بتدور علي تجربة جديدة انصحك جدا بالمغرب بس اتعلم الدارجة شوية قبل ما تسافر
١٢- المغرب دولة مش كبيرة من حيث المساحة بس فيها اكتر من ٩ او ١٠ مدن يستحقوا الزيارة فحاول تزروها اقل حاجة ١٠ ايام ومتقعدش كتير في كازا والرباط.
١٣-سفارة المغرب من اكتر السفارات المحترمة اللي اتعاملت معاها لانهم مش بياخدوا منك تمن الفيزا الا لو خدتها، انت بتقدم ورقك ومش بتدفع حاجة لو خدت الفيزا بتدفع تمنها لو مخدتهاش بتاخد باسبورك ومبتدفعش حاجة
١٤- مرة تانية اتعلم بعض الكلمات من اللهجة المغربية ( الدارجة ) قبل سفرك عشان تجربتك تكون ممتعة وتحتك بالمغاربة بشكل افضل وتقدر تفهم ثقافتهم واسلوب حياتهم ودي متعة السفر الحقيقية
١٥- الموسيقي الامازيغية روعة!
١٦- الجميل في المغرب ان الطبيعة منوعة هناك، يعني عايز جبال هتلاقي جبال، عايز شلالات هتلاقي، بحيرات، لاندسكيب، والاجمل ان كل مدينة ليها طابع خاص بيها في المعمار، يعني شفشاون مدينة كل مبانيها وبيوتها وحتي عمدان النور باللون الازرق، مراكش المدينة الحمراء، كازا المدينة البيضاء، شفشاون مدينة مبانيها باللون الابيض والازرق! انا عيني استمتعت بالالوان اللي انا شفتها في ال١٧ يوم دول!
١٧- اخيرا، متحكمش علي مكان قبل ما تزوره، انا مكنتش مقتنع مثلا بماليزيا انها جميلة قبل ما ازورها ولما زرتها حبيتها جدا جدا :D، كل واحد فينا عينه بتشوف الجمال بشكل مختلف وعنده معايير معينة للجمال، اللي بالنسباله الجمال في الشواطئ الجميلة واللي بيحب الجبال واللي بيحب الnight life مش شرط المعايير دي تتطابق معاك، سافر وشوف الجمال بعينك انت بس، كمان متحكمش علي شعب قبل ما تتعامل معاه، الsterotypes دي اغبي حاجة ممكن الواحد يصدقها، انا بحب دايما الناس اللي بتستخدم جملة "انا شفت" مش بيقولوا!!!
الناس اللي بيحبوا يقابلوا locals في كل بلد بيسافروها والناس اللي عايزة تتعلم من السفر زي حالاتي، اللي بالنسبالها السفر وسيلة انها تعرف ثقافات، اسلوب حياة وعادات وتقاليد مختلفة وتتحط في مواقف صعبة وتقدر تتخطاها. وتتحدي نفسها وتوظف خبرتها اللي خدتها عن طريق السفر عشان تخليها افضل في حياتها بعد ما ترجع من السفر، انصحكم بزيارة دول مختلفة في قارات مختلفة وخلي عينك تشوف اماكن مختلفة وودنك تسمع لقصص مختلفة واستمتع بجمال واختلاف البشر والعالم،
عموما انا هتكلم عن مدن الشمال ومدن الوسط ومدن الجنوب اللي زرتها بالتفصيل في البوستات الجاية
انا اخترت مجموعة صور انا صورتها في المغرب من مدن مختلفة وكتبت تحت كل صورة اسم المدينة اتمني تعجبكم واي اسئلة عندكوا انا هجاوب عليها
=============================
برنامج مقترح للسياحة في المغرب
* طبعا الفيزا سهلة جدا للمصريين ويتم استخراجها خلال أسبوع.
* حجز الطيران وهو ٥ ساعات من القاهرة للدار البيضاء (كازابلانكا) ، أنصح بمصر للطيران حيث كانت تجربتي معها جيدة جدا ، وسعرها ٤٢٠٠ جنيه تقريبا على T class ذو الشنطة الواحدة فقط.
*فور الوصول الى المطار تأخذ خط موبايل مجانا ويمكن عمل باقة ب ٢٠ درهم 2 جيجا لمدة أسبوع ، ثم تحجز القطار من المحطة داخل المطار وتتجه مباشرة الى مراكش جنوبا وهي المدينة الحمراء وفيها ساحة الفنا والبازارات والكتبية وقصر بديع وحديقة أوجوريل ( فيديو الحديقة والساحة في التعليقات ) ، وأقترح قضاء يومين في مراكش.
* ثم الاتجاه شمالا 5 ساعات نحو العاصمة الرباط بالقطار أو بالباص وأنظف نوع باصات CTM ، وهناك القصر الملكي وصومعة حسان ومصب نهر أبي رقراق في المحيط الأطلسي والسويقة وهو رخيص جدا لمن أراد التسوق وأقترح لها يومين أيضا . ( فيديو المحيط في التعليقات )
*الاتجاه شمالا 3 ساعات نحو طنجة وهي مدينة ساحلية رائعة تطل على مضيق جبل طارق وبها مغارة هرقل وغابات كاب سبارتيل والمينا القديم حيث محلات الاسماك الرخيصة جدا (الفيديو في التعليقات) والكورنيش المميز وهي أشبه بالاسكندرية على نظيف ، وبينها وبين أسبانيا ربع ساعة بالباخرة والتذكرة ب ٤٠ دولار تقريبا. وأقترح لطنجة يومين.
* ثم الاتجاه جنوبا ساعتين إلى المدينة الزرقاء شفشاون حيث الطبيعة الجبلية ، وهدوء الأعصاب والناس المبتسمة ، وفيها مزار جبل الماء والسوق حيث الصناعات الجلدية والملابس الرخيصة ، ثاني يوم يمكن أخذ تاكسي الى شلالات أقشور حيث الطبيعة الساحرة. ( فيديو الشلالات في التعليقات )
* الاتجاه جنوب غربي الى الدار البيضاء (كازابلانكا) العاصمة الاقتصادية في رحلة 8 ساعات تقريبا حيث المحيط الاطلسي ومسجد الحسن الثاني والمولات والكورنيش ، ولا أنصح بالسكن في المدينة القديمة حيث انها تشبه الى حد كبير حواري مصر ... ويكفي في كازابلانكا يوم واحد ( ما قبل ) العودة للقاهرة.
* توجد مدن أخرى جميلة وعريقة كفاس ومكناس وأغادير وتطوان ، ولكن ضيق الوقت لم يساعدني في زيارتها.
*المغرب بلد سياحي ورخيص وممكن تعيش ب ٢٠ دولار في اليوم أكل وشرب ومواصلات ، من غير الهدايا .
*الهدايا من المغرب كتير مثل الكسكسي ( ١٢ درهم الكيلو) والميداليات (من ٥ الى ١٠ درهم) والعبايات والجلاليب (ابتداء من ١٥٠ درهم) والبلغة والشنط الجلدية والتحف الخشبية ...
*هذه النقطة خاصة بالشاي ( الأتاي ) المغربي لأنه يستحق كتابا في الحديث عنه حيث أنه شاي أخضر بالنعناع مضاف إليه عشبة اللويزا ، وهو إدمان وبديل الماء في بلاد المغرب ،بجانب عصر البرتقال المميز.
*الأكل المغربي بالنسبة لي متعة وجزء أساسي في الفسحة بداية من الكسكس والطاجين واللحم بالأراسيا والبسطيلة ، والسمك خصوصا في طنجة ، وبسكوت يسمى فقاس مسوس ، ولم أفضل الرفيسة لأن بها حلبة ، ولم يعجبني كثيرا الببوش وهو اكلة الحلزون مع الأعشاب.
* أجمل ما في المغرب أهله الطيبون المرحبون بالسياح ، ولهجتهم الممتعة بمفرداتها المميزة مثل وخا ، صافي ، مزيان ، شحال (للسؤال عن السعر )وأيضا عشقهم لمصر وللمصريين
ولهجتهم ، وشوارعهم النظيفة والبنية التحتية المبهرة.
* مفيش في المغرب شطاف built in ههههخخخ فياريت ال Freshbuzz تبقا معاكوا عشان متتسوحوش
*المغرب ليس كما يصورها الإعلام الكاذب أنها بلاد السحر والخنا والمخدرات ... لا يخلو مكان في العالم من الخير والشر ، ومن أراد الخير تمسك باصله وتربيته ، ومن أراد الشر سعى له ولو في مكة المكرمة.
ده برنامج سياحي مقترح أنا جربته شخصيا ولو حد عنده أي استفسار ... نحن في الخدمة