التصريح الأمني
القول الفصل في التصريح الأمني
لو عاوز تعرف أنت مطلوب منك تصريح أمني و لا لأ قبل السفر , لازم تقرا الموضوع للأخر
أولا : ايه هو التصريح الأمني ؟ ده تصريح بالسفر مطلوب منك سواء كنت ولد أو بنت سنك من 18 الى 40 سنه و حتسافر من مصر ( فقط ) لبعض الدول و بيتم استخراجه من مجمع التحرير
ثانيا: هل فيه فرق بين التصريح الأمني و تصريح السفر من الجيش ؟ أه طبعا تصريح السفر من الجيش ده خاص بالشباب فقط اللي مكتوب في جواز سفرهم انه مطلوب للتجنيد أو خلص جيش و مازال في فترة الأحتياط
ثالثا : هل مطلوب مني تصريح امني للسفر ؟ كوباية شاي و ركز في الكلمتين اللي جايين فيهم الخلاصه
حنقسم دول العالم لقسمين
القسم الأول: دول بدون تصريح أمني زي أوروبا كلها و امريكا و كندا و أستراليا و هونج كونج و الصين و سنغافورة و امريكا الجنوبية و المالديف و الهند و سيريلانكا و نيبال و فيتنام و المغرب و تونس و الجزائر غيرها
القسم الثاني: دول تحتاج تصريح أمني و حنقسمهم نوعين :
النوع الأول ( الدول الصريحة ) تركيا و جورجيا : لو مسافر تركيا أو جورجيا فمطلوب منك تصريح أمني للسفر حتى لو كنت وزير بس حتقابلك حالتين :
الحالة الأولى : لو مكتوب في باسبورك مهنه محددة بمؤهل عالي يعني مهندس , دكتور , محامي , طبيب , ظابط , محاسب و غيرها ( تقدر تطلع فيزا سياحة ) و بيها تقدر تاخد تصريح أمني بسهولة
الحالة الثانية : لو مكتوبلك طالب أو حاصل على مؤهل عالي فلازم الفيزا بتاعتك تكون فيزا زيارة ( عن طريق دعوة من البلد المسافر اليها ) أو فيزا مرافق ( يعني تكون زوجه أو ابنه مثلا مسافرة مع زوجها أو والدها المكتوبله مهنه في باسبوره) علشان تقدر تاخد التصريح الأمني , و لو قدمت بفيزا سياحه للأسف مش حتاخد تصريح أمني
الحالة الثالثة : لومسافر تركيا و معاك إقامة في تركيا مش محتاج تصريح أمني و لكن لو مسافر جورجيا و معاك إقامة في جورجيا حتحتاج تصريح أمني بردو
دي حالات تركيا و جورجيا فقط و اتمنى تكون واضحه للجميع , الكلام اللي جاي مالوش اي علاقة بتركيا و جورجيا
النوع التاني باقي دول العالم و بسميها (الدول المايعه) و أهمهم : لبنان و الأردن و تايلاند و ماليزيا و أندونيسيا و دي بردو حتقابلك حالتين :
الحالة الأولى : ان يكون مكتوبلك مهنه محدده أو مكتوبلك حاصل على مؤهل عالي في الحاله دي مش بيكون مطلوب منك تصريح أمني بنسبة 99% و تقدر تسافر عادي جدا و لكن يفضل لو مكتوب عندك انك حاصل على مؤهل عالي أنك تاخد معاك ما يثبت انك بتشتغل زي شهادة لمن يهمه الأمر ( اتش ار ليتر ) , مع العلم أن كلمة ( صاحب شركة , أو صاحب محل أو صاحب مكتب استيراد و تصدير , أو صاحب صاحبه لا تعد مهنة و فيه احتمال 10% أن لا يتم الموافقة على سفرك و حيرجع الموضوع لرؤية ظابط الجوازات )
الحالة الثانية : أن يكون مكتوبلك طالب أو حاصل على مؤهل متوسط أو مهنة فنية مثل ( نجار أو طباخ أو سواق أو عامل أو فني أو نقاش ) في الحالة دي بتحتاج تصريح أمني للسفر بنسبة 99% , و علشان تاخد التصريح الأمني لازم يكون معاك فيزا زيارة ( عن طريق دعوة من البلد المسافر إليها و دي للأسف مش بتطلع الا في حالة أنك رايح تدرس أو تشتغل و معاك ما يثبت ذلك و بيتم توثيقه من السفاره نفسها و تاخد بيه فيزا زيارة للدوله ) بعدها تقدر تاخد تصريح أمني
حالة خاصة ( بالدول المايعه فقط ) : لو بنت و متزوجه و مسافره شهر عسل مع زوجها و مكتوبلها طالبة فتقدر تسافر بدون تصريح أمني و لكن لازم يكون معاكم عقد زواج أو ما يثبت أنكم متزوجين فعلا و مسافرين شهر عسل , أو بنت و مسافرة مع اهلها سياحة و مكتوبلها طالبة في الحالة دي بردو مش بيكون ضروري الحصول على تصريح أمني
الخلاصة : التصريح الأمني ده من وجهة نظري المتواضعه تم وضعه للتحكم في سفر بعض الفئات و منع سفرهم لو اقتضى الأمر ( و كله بالقانون 😠 ) و الأمر بشكل كبير متروك لرؤية و وجهة نظر ظابط الجوازات علشان كده قلت ان فيه ( دول مايعه نسبة الموافقه على السفر فيها 99% ) , و للأسف ليومنا هذا لو سألت بنفسك عدة أشخاص مسؤولين مختلفين ما بين مجمع التحرير , و ظباط جوازات في مطارات مصر المختلفه كل واحد حيقولك كلام مختلف تماما عن الأخر لأن التصريح الأمني مالوش قانون ثابت للأسف , لكن الكلام المذكور في البوست ده ينطبق على 99% من الحالات اللي بتسافر بالفعل و بعد ألف تجربة حقيقية
أتمنى أن يكون الموضوع ده وضح استفسارات كتير و مفاهيم مغلوطة و الناس مش لاقيه ليها اجابات محددة و كل سنة و أنتم طيبين
===========================
مساء الخير
الفتره الاخيره لقينا اسئله كتيره بخصوص التصريح الامني و اذن السفر عشان كده كان لازم نتكلم عن الموضوع ده.
ديه كل المعلومات الي قدرت اجمعها و لو حد عنده معلومه اضافيه ممكن نعمل لبوست تحديث عشان يشمل كل حاجه عن المعلومه ديه.
خلينا نبدا
ما هو الفرق بين تصريح اذن السفر و التصريح الامني؟
اولا:تصريح اذن السفر
هو عباره عن تصريح يصدر لذكور فقط الذين يخضعون لسن التجنيد و لم يحصلوا علي الاعفاء النهائي من التجنيد
يتم إستخراج تصاريح / أذونات السفر للخارج من إدارة التجنيد والتعبئة أو مناطق التجنيد والتعبئة للحالات الآتية :
◦المؤجل تجنيدهم للدراسة بالخارج فى أى وقت .
◦المستثنون مؤقتاً من أداء الخدمة العسكرية .
◦الحاصلون على إعفاء مؤقت .
◦الموضوعين تحت الطلب لمدة ثلاث سنوات .
◦الذين أدوا الخدمة العسكرية ولم تنته مدة خدمتهم بالاحتياط .
◦الطلبة المؤجل تجنيدهم للدراسة بالداخل خلال أجازة نصف العام ونهاية العام عدا طلبة السنوات النهائية .
الاوراق المطلوبه لحصول علي اذن السفر:
◦شهادة تأدية الخدمه / شهادة المعاملة التجنيدية/إثبات قيد للطلبه.
◦أصل البطاقه الشخصيه.
◦إيضاح موقف فرد الإحتياط من الأستدعاء للشبان الذيـن أدوا الخدمــة العسكريــة من مكتب التجنيد التابع لة الشاب ويتم هذا الاجراء بواسطة مكتب تصاريح السفر بمجمع خدمة المواطنين.
◦طلب حصول على تصريح سفر من مجمع خدمة المواطنين .
◦بالنسبه للطلبة الدارسين بالداخل يقوموا بتقديم شهادة قيد من المدرسة أو الكلية أوالمعهد مبين بها رقم وتاريخ قرار التأجيل والرقم الثلاثى للبطاقه العسكريه (6جند) والسنه الدراسيه ومدة الأجازة ويتم منحهم إذن سفر خلال مدة الأجازة ( نصف العام / آخر العام ) ولايمنح لمن هم بالسنه النهائيه فى أجازة نهاية العام .
◦بالنسبه للدارسين بالخارج يقوموا بتقديم طلب أستخراج أذن سفر وخطاب بوضعهم تحت الأشراف العلمى من الادارة العامة للبعثات والاشراف العلمى بوزارة التعليم العالى وكذا بطاقة تحقيق الشخصيه ويتم منحهم أذن سفر حتى نهاية العام الدراسى.
للطلبة اللى عايزة تسافر
طبعا بيطلبوا منك تصريح سفر ومبيطلعش غير فى الاجازات طب ركزوا بقى
لو حضرتك مالكش جيش اصلا يعنى
- كنت وحيد اخواتك " معندكش اخوات " او اخواتك كلهم بنات
- او لو باباك و مامتك منفصلين وانت الاخ الكبير حتى لو ليك اخوات ولاد
ف حضرتك كدة مش محتاج تصريح سفر اصلا انت تروح فى 3 تخرج ورقة اسمها قيد عائلى و بيها تروح منطقة التجنيد اللى انت تابع ليها و يكون معاك 6 صور وتاخد الاعفاء و بيها تقدر تخرج تصريح سفر فى اى وقت فى السنة و تسافر لاى مكان حتى وانت طالب حتى لو كنت فى الامتحانات
ملحوظة :
◦مكاتب تصاريح السفر بإدارة التجنيد والتعبئة ومناطق التجنيد تعمل على مدار (24) ساعة .
مصدر المعلومه وزاره الدفاع
--------------------------------------------------------------------------------
ثانيا التصريح الامني
هو قانون يطبق علي المصريين فقط سواء ذكور او اناث من سن 18 الي 45 سنه المسافرين من مصر الي 16 دوله و التي شملها القانون المصري و هم:
السودان واليمن والأردن وماليزيا وكوريا الجنوبية وغينيا كوناكري وإسرائيل وإندونيسيا وتايلند وجنوب أفريقيا وتركيا وقطر وسوريا ولبنان والعراق وليبيا
طبعا ناخد بالنا ان سفارات الدول المذكوره مش هتطلب منك تطلع التصريح عشان تديك الفيزا بتاعتها و ده عشان خاص بالقانون المصري فقط
و لو انت مسافر من مكان تاني بره مصر فمش هتحتاج التصريح و لو انت مقيم في دوله و نازل ترانزيت في مصر و مش خارج من المطار فملكش تصريح لكن لو خرجت يبقي كده لازم التصريح.
*خلينا نتكلم الاول عن كيفيه استخراج التصريح و من فين :
التصريح الامني بيطلع من مكان واحد بس في جمهوريه مصر العربيه و هو مجمع التحرير في القاهره يعني لو انت من اسوان لازم تيجي لمجمع التحرير في القاهره-
تدخل المجمع تطلع علي الدور الاول مكتب رقم 15
-لازم تتواجد بشكل شخصي و مينفعش حد يقدمه عنك بس الي يستلمه ممكن و الوالد او الام لو اي حد غيرهم لازم يكون في توكيل
الاوراق المطلوبه -
*فيزا للدوله اللي حتزورها و جواز السفر و جواب من جهه العمل التي تعمل بها (HR) و برنت تامينات مختوم و بتستلم التصريح بعد 4 ايام أو اكتر شويه. و تاخد معاك صور الباسبور و الفيزا و برينت علشان متتعطلش هناك في مجمع التحرير . و نص جنيه
* حتملى الاستمارة في مجمع التحرير و لازم تحط أسم الأب رباعي في الاستماره حتى لو مش مكتوب في الباسبور رباعي و تاريخ ميلاد الوالد.
*هتاخد رقم في دفتر كبير و تاخد الباسبور معاك, تيجي بعد 4 ايام تقدم الباسبور تاني و تقعد كام ساعة و بعدين ينادي عليك و تاخد التصريح
*التصريح ساري للسفر لمدة شهرين من اصداره لسفره واحده
*لو مسافرة مرافق لجوزك فيحتاجوا صورة الفيزا وصورة الباسبور فقط.
التصريح الامني
:انا هتكلم عن اكتر وجهات السفر بالنسبه لمصريين بالترتيب و هم
تركيا - ماليزيا - تايلاند - اندونيسيا - لبنان - الاردن - جنوب افريقيا - كوريا الجنوبيه
- خلينا نعرف ان في دول ممكن تعدي من غير تصريح امني و دول مش هينفع تعدي حتي لو انت رئيس وزراء
****تركيا و جورجيا
تركيا و جورجيا هي الدول الي مهما اتكتب في باسبورك في مكان الوظيفه اي منصب فبرده هتطلعها بس هنا هتختلف نوع الفيزا بتاعتك يعني:
لو شخص مسافر لوحده تركيا او جورجيا :
الحالة الأولى : لو هو مكتوب في الجواز طالب او طالبه أو مؤهل عالي فلازم تاخد الفيزا من تركيا او جورجيا زيارة او مرافق مش سياحه و كده تقدر تاخد التصريح الأمني
الحالة الثانية : لو مكتوب في المهنة وظيفة : تقدر تاخد أي نوع فيزا و منها السياحيه طبعا و تقدر تطلع تصريح أمن.
الحاله التالته : لو هتقدم سجل تجاري و بطاقه ضربيه مش هينفع تاخد التصريح امني غير لو حسابك في السجل و البطاقه مش اقل من ١٠٠ الف جنيه.
-ماليزيا - تايلاند - اندونيسيا - لبنان - الاردن - جنوب افريقيا - كوريا الجنوبيه
الدول ديه لاسف بقي ( عليها اقاويل ) كتيره جدا و خصوصا لو مكتوب طالب علي الباسبور و طالع دوله من الدول الي من غير فيزا فهنا لازم تيجيب دعوه من الدوله الي عايز تسافر ليها_
- لو مكتوب في الباسبور مؤهل عالي زي حاصل علي بكاليريوس او مكتوب موظف مش بيحتاج تصريح امني لسفر ليهم و بتعدي عادي
بس لاسف من اسبوعين تقريبا بدا ظباط الجوازات يمنع الناس ديه من السفر و يرجعهم عشان مش معاهم تصريح امني و ديه حالات فرديه و مش كتيره يعني الطبيعي صاحب الوظيفه يعدي بدون مشاكل و المؤهل العالي (ولكن) لو الباسبور ابيض و شاب ممكن يطبق عليق القانون.
فالموضع ده لاسف يخضع لاهواء ظابط الجوازات اذا هو مرتحلك شخصيا او لا و الكلام ده من ظابط الجوازات نفسه في مطار القاهره ان ليه مطلق الحريه انه يطبق عليك القانون طبقا لهيئه الخاصه بالمسافر و المهنه
يعني انت ممكن تلاقي قصادك مكتوب في الباسبور موظف بشركه بيبسي فيعدي عادي جدا و شخص مكتوب في الباسبور كوافير حريمي و ميعديش
لاسف ده الي بيحصل فعلا لناس الي بتسافر دوله من الدول ديه
بس في حل بديل لو عايز تهرب من التصريح لماليزيا و تايلاند و اندونسيا ايه هو
انك تسافر دوله من دول الجوار ليهم زي الهند و فيتنام و هونج كونج و ساعتها ظابط الجوازات مينفعش يمنعك لو مش معاك التصريح
و بكده جمعنا مختلف المعلومات و اتمني انه يكون مفيد لجميع.
==================================
التصريح الامنى ، مفهوم وشويه معلومات للجميع اتمنى الناس تستفيد منها
- المطلوب منك لاستخراج التصريح
-
جواز السفر الحالي و تاخد معاك الباسبور وصوره منه وصوره من التأشيره للدوله اللى انت هتسافرها وبتدفع نص جنيه بس رسوم الاستخراج و بتستلم التصريح بعد 3 الى 5 ايام عمل ومتنساش شوف انت كاتب ايه المهنه فى جواز السفر بتاعك وتجيب ما يثبت المهنه دى لانك بتدخل عند ضابط الاتصالات يسألك على المهنه ويشوف الورق سواء سجل تجارى وبطاقه ضريبيه او خطاب اتش ار ووثيثه التأمين.
-
- وانت واقف حتملى الاستمارة في مجمع التحرير و تقدم الباسبور و فيه التاشيرة بتاعة تركيا و هتاخد رقم في دفتر كبير و تاخد الباسبور معاك , تيجي بعد 3 او خمس ايام تقدم الباسبور تاني و تقعد كام ساعة و بعدين ينادي عليك و تاخد التصريح.
-
- هام جداا وانت بتملئ الاستماره لازم تحط أسم الأب رباعي في الاستماره حتى لو مش مكتوب في الباسبور رباعي و تاريخ ميلاد الوالد.
-
- بخصوص تركيا : لو البنت مسافره لوحدها ففي حالتين : الحالة الأولى : لو هي مكتوب في الجواز طالبة أو مؤهل عالي فلازم تاخد الفيزا من تركيا زيارة مش سياحه و كده تقدر تاخد التصريح الأمني , الحالة الثانية : لو مكتوب في المهنة وظيفة : تقدر تاخد أي نوع فيزا و منها السياحيه طبعا و تقدر تطلع تصريح أمني عادي.
-
- لو انت طالب و عاوز تسافر دوله محتاجه تصريح امني و ملهاش فيزا أصلا , فلازم تجيب دعوة من سفارة الدوله اللي حتسافرها وللاسف الموضوع صعب جدااا
-
- التصريح الأمني مطلوب لسن من 18 الى 40 سنه , اكبر من كده أو أقل من كده ملكش تصريح امني . لأي دوله فى العالم ومده التصريح بتكون شهرين من تاريخ الاستلام-
-
المكان الوحيد في مصر اللي بيطلع التصريح الأمني هو مجمع التحرير فقط , يعني لو انت من الصعيد و مسافر تركيا مثلا , تروح القاهره الأول تطلع التصريح الامني ، ومينفعش حد مكانك يقدمه لازم انت بنفسك بطول وعرض وبشخصك. مينفعش حد تانى حتى لو معاه توكيل.
-
- التصريح للمصريين المسافرين من مصر فقط , يعني لو مسافر من اي دوله في العالم مش محتاج تصريح.