التظلم لقرار رفض الشنجن
لدي التقديم لتأشيرة الشنجن , قد يصلك الرد برفض الفيزا , وقتها يكون لك الحق في إرسال خطاب تظلم بصيغة محددة , خاصة اذا ما كان ورقك سليم بالفعل, و قد يتم قبوله و تحصل علي الفيزا
نري في هذا الفيديو الخطوات كاملة
ونقوم بنقل منشور هام لهند سالم , تشرح فيه الخطوات
================================
طبعاً الرفض من أصعب المواقف اللى ممكن حد فينا يتعرض لها خصوصاً مع صعوبة الإجراءات و التعقيدات اللى بنواجها و المجهود اللى بنبذله فى تجهيز المستندات المطلوبة للتأشيرة.
طبعاً بيكون الإحباط رهيب جدا لما تستلم الباسبور و بدل ما يكون عليه استيكر التأشيرة تتصدم بوجود خطاب الرفض و طبعاً الأسباب من وجهة نظرنا بتكون غير منطقية و تلاكيك. لكن فى الواقع إن فى أحيان كتير بيكون الغلط من عندنا و ممكن نعمل غلطة بسيطة جداً عن عمد أو عن جهل و تكون السبب فى رفض التأشيرة.
قبل ما نبتدى خلينا ننوه إن الكلام الجاى خاص بتأشيرة الشنجن فقط، لأن قانون التظلم خاص بالشنجن
سفارة أمريكا على سبيل المثال مافيش تظلم على قرار رفض التأشيرة.
كذلك بريطانيا لغت موضوع التظلم على تأشيرات الزيارة سنة 2013 و أصبح التظلم قاصر على أنواع معينة فقط من التأشيرات.
خلينا نتكلم على خطاب الرفض، خطاب الرفض موحد فى كل السفارات و لكن طبعا بيكون مطبوع بلغة السفارة فأنا بحثت عن نسخة بالإنجليزية عشان تكون سهلة فى الفهم و هاكتبها بالعربى عشان الناس اللى الإنجليزى عندها بعافية تقدر تتابع معانا
1- وثيقة السفر/ جواز السفر مزور
2- عدم تبرير الغرض من الزيارة / عدم إستيفاء شروط الإقامة
3- الموارد المالية المقدمة غير كافية لتغطية فترة الإقامة المطلوبة
4- إستنفدت فترة الـ 90 يوم /180 المسموح بها / أو تعديتها
5- وجود إنذار على نظام الفيزا الألكترونى بعدم منحك فيزا
6- صدور قرارمن أحد الدول الأعضاء/أو أكثر من دولةأنك تشكل تهديدا للسلامة و والأمن والصحة العامة وفقا للمادة 2 (19) من اللائحة (المفوضية الأوروبية) رقم 562/2006
7- عدم تقديم تأمينى طبى مناسب
8- المعلومات المقدمة لتبرير الغرض من الزيارة وشروط الإقامة لا يمكن الاعتماد عليها
9- عدم التأكد من مغادرتكم منطقة الشنجن قبل إنتهاء التأشيرة
10- عدم وجود دليل كاف يدل على أنك فى وضع يسمح لك بالحصول على الفيزا مقدما / عدم تقديم دليل يبرر تقديمكم فى الفيزا عند الدخول (بصراحة السبب ده مافهمتهش معناه)
11- طلب صاحب التأشيرة إلغاء التأشيرة
الرفض ممكن يكون لسبب واحد بس و ممكن يكون لعدة أسباب مجتمعة , و الأسباب (2)،(3)،(8)،(9) هم اللى يهمونا لأنهم الأكثر شيوعاً
السببين (2) و (8) دول توأم ممكن يكون الرفض لسبب واحد فقط منهم او بيكونوا مع بعض و هم خاصين بالإقامة و حجز الفندق و ده ممكن يكون ناتج لعدة أسباب منها إنك عملت حجز مع شركة سياحة و اتلغى تلقائى بعد 48 ساعة و لما السفارة شيكت مالقتش حجز أو إنك تكون عملت حجز على بوكينج و لغيته قبل ما التأشيرة تطلع أو إن ورقة الحجز مش مكتوب فيها الإسم أو إنك عامل حجز غير مدفوع و السفارة طالبة حجز مدفوع ...
دى نوعية الأخطاء فى حجز الفندق اللى ممكن تؤدى للرفض للأسباب (2) و (8)
بالنسبة للسبب (3) خاص بالحساب البنكى و غالبا السبب ده مش بييجى لوحده لأن ناس كتير بتقدم كشف حساب محترم و بتترفض فدايما بيلزقوا معاه أى سبب تانى سواء السبب رقم (9) أو السببين رقم (2) و (8) بس ده لا يمنع إن فى بعض الأخطاء اللى ممكن تؤدى للرفض للسبب ده
منها إن بعض الناس بتودع مبلغ كبير قبل إصدار كشف الحساب و طبعا لما يكون حد مقدم كشف حساب كان فيه 10 آلاف و بعدين يودع فجأة مبلغ 100 ألف جنيه و هو مقدم كشف خطاب من جهة العمل بأن راتبه 2000 جنيه و مافيش أى بيان إن فى مصدر تانى للدخل طبعا لازم السفارة تشك فى مصدر الفلوس.
بالنسبة للسبب رقم (9) و الخاص بالشك فى إنك هترجع بلدك طبعا لازم نعذرهم مع عدد الناس اللى بتسافر و تكسر فهم فقدوا الثقة فينا عشان كده بيطلبوا انك يكون عندك روابط تربطك ببلدك زى إنك يكون عندك وظيفة ثابتة مستقر فيها بقى لك كذا سنة و ياسلام لو تكتب الرقم التأمينى فى خطاب العمل أو عندك بيزنس خاص و عندك بطاقة ضريبية و سجل تجارى من سنين (مش من 6 شهور) أو إنك تكون طالب فى الجامعة و لازم ترجع لدراستك أو حالتك الإجتماعية ..... إلخ
الأسباب (1)،(5)،(6) ربنا معاهم
السبب (7) نادر الحدوث عشان كده دايما الشركات بتطلب الباسبور عشان تنقل البيانات بالظبط لأن أى خطأ فى البيانات على وثيقة التأمين بيؤدى للرفض (7)
السبب (4) إحنا عارفين إن قانون الشنجن بيسمح بالإقامة 90يوم كل/180 يوم متفرقين أو مجتمعين فنفرض إن واحد أخد تأشيرة مالتى 6 شهور و أقام ال 3 شهور بتوعه المسموح بيهم و خلصهم و رجع ثم قدم أنه عايز يسافر تانى خلال الست شهور نفسهم الفيزا هتترفض ممكن يقدم طبعا بس يخلى تاريخ السفر بعد إنتهاء ال 6 شهور / أو أنه يكون تعدى فترة ال 90 يوم إقامة المسوح بيها داخل الشنجن ده برضو هيترفض التأشيرة
السبب (10) زى ماقولت لكم مش فاهمه عايزين إيه بالظبط
و السبب (11) إن الشخص طالب بإلغاء الفيزا بعد الحصول عليها
ده كان ملخص نموذج الرفض
==========================
طيب بالنسبة للإجراء نفسه بيتم إزاى ؟ فى الواقع إن إجراء التظلم بيختلف من سفارة للتانية و الشخص اللى أخد رفض بيقدر يقدم تظلم خلال 30 يوم من إستلام خطاب الرفض
أنا هنا هذكر كيفية عمل تظلم فى بعض السفارات اللى أنا متأكدة منها
1 – سفارة ألمانيا:
بتسمح بتقديم طلب تظلم باليد الى السفارة او من عن طريق ارساله بالفاكس أو إيميل السفارة
و ذلك خلال 30 يوم من إستلام الرفض و بيتم دراسة ملف المتظلم عن طريق موظف قنصلى آخر لضمان الحيادية فإذا تم قبول التظلم بيتم الإتصال لإرسال جواز السفر للسفارة لأخذ التأشيرة و فى حالة الرفض بيتم رفع دعوى قضائية فى ألمانيا للتظلم ضد قرار السفارة (2)
ملحوظة: التظلم لازم يكون موقع بخط اليد من صاحب التظلم (فى حالة ارساله بالفاكس أو الايميل يتم طباعته و التوقيع ثم سحبه سكانر) و يجب ان يكون مكتوب باللغة الألمانية
2 – سفارة فرنسا
بتسمح بتقديم تظلم من خلال إرسال إيميل إلى السفارة
admin-etrangers.le-caire-fslt@diplomatie.gouv.fr
Bta.scec@diplomatie.gouv.fr
Cgfcaire@link.net
هتستلم ايميل منهم انه فى حالة الموافقة هيتم الاتصال خلال ٤٨ ساعة طبعا لو ماسمعتش منهم حاجة يبقى التظلم اترفض
و فى حالة القبول يتم الإتصال بالمتظلم عشان يودى باسبوره للسفارة
فى حال الرفض يبقى بتنقل على المرحلة التانية انك بتبعت خطاب التظلم باللغة الفرنسية إلى العنوان المكتوب فى خطاب التظلم
(مشكلة فرنسا ان ممكن مايردوش على الايميل و بيعتبروا عدم الرد رد)
3- سفارة أسبانيا
بيتم تقديم التظلم على نموذج مخصوص من خلال مكتب BLS فى القاهرة أو القنصلية فى إسكندرية
4- سفارة المجر
بيتم تقديم التظلم خلال 8 أيام من إستلام خطاب التظلم إلى السفارة نفسها و بيتم دفع 30 يورو مصاريف و هم بيقوموا بارسال الطلب للمحكمة عن طريقهم و فى حالة القبول بيتم الإتصال لإرسال جواز السفر للسفارة
5- سفارة اليونان
القنصلية فى إسكندرية بتقبل التظلم من خلال محامى يونانى بمصاريف (ماعنديش فكرة عن المصاريف)
6- سفارة هولندا
بيتم إرسال الخطاب بالبريد إلى العنوان المكتوب فى خطاب التظلم
و ده أعتقد اللى بيحصل فى باقى السفارات
7- سفارة ايطاليا (المصدر أ/ شروق الخطيب)
بيتم ارسال ايميل الى
info.italyegypt@vfshelpline.com
او
و بيتم تواصل السفارة مع المتقدم فى حالة قبول التظلم
8- سفارة التشيك
بيتم تسليم الخطاب باليد شخصيا إلى السفارة
9- سويسرا
بيتم كتابة خطاب تظلم باحد اللغات الاربعة الرسمية المستخدمة فى سويسرا و ارساله عن طريق الشخص نفسه او من ينوب عنه (شركة او شخص داعى) فى خلال ٣٠ يوم من الرفض الى العنوان التالى
the State Secretariat for Migration (SEM) CH-3003 Bern-Wabern.
و بيتم دفع مبلغ ٢٠٠ فرنك سويسرى رسوم ادارية
10- بولندا بيتم تسليم خطاب التظلم باليد إلى السفارة
ملحوظة الخطاب اللى بيتبعت على الايميل بيكون باللغة الانجليزية لكن الخطاب اللى بيتبعت على عنوان المحكمة فى البلد نفسها بيكون باللغة الرسمية للدولة , والخطاب يكون موقع باليد من صاحب التظلم
هنا هتلاقي نموذج الرفض , و إجراءات التظلم فى السفارة الألمانية
طيب عايزين نعرف خطاب التظلم و إزاى ممكن نكتب خطاب قوى نفند فيه بالشرح و بالمستندات إن قرار الرفض كان خاطىء و إن المستندات المرفقة كاملة و سليمة
فى ناس كتير بتستهون بخطاب التظلم رغم أنه أهم جزء فى الإجراء كله
السفارة أو المحكمة أو الإدارة اللى بتنظر فى طلبك مش عايزاك تبعت نفس المستندات اللى أرسلتها للسفارة لأنهم بالفعل عندهم ملفك كله
و لكنهم عايزين تفنيد لأسباب الرفض من خلال خطاب و من خلال أى مستندات إضافية ممكن تدعم موقفك
بمعنى إيه ؟
بمعنى إن لو كان الرفض للسببين (2) و (8) الخاصين بالإقامة و حجز الفندق يبقى نشوف الغلط عندنا فين عشان نعرف نرد عليه
يعنى لو كنت عملت حجز مبدئى من شركة سياحة و اتلغى بعد 48 يبقى نعمل حجز مؤكد و نضمن أنه مش هيتلغى قبل نظر قرار الرفض
لو كنت عامل حجز من بوكينج و الإسم مش ظاهر يبقى نراسل بوكينج أو الفندق و نطلب حجز ظاهر فيه الإسم
و ممكن كمان نجيب الغلط عليهم بالأدب يعنى لو كان الموقع نفسه كاتب إن المطلوب هو حجز مبدئى هتكتب لهم إنك عملت حجز مبدئى (غير مؤكد) بناء على التعليمات المكتوبة على الموقع بتاعكم و أنك عملت تأكيد للحجز لإظهار الجدية
طيب لو كان سبب الرفض هو (3) الخاص بإن المبلغ الموجود فى الرصيد غير كافى يبقى ممكن نرفق كشف حساب تانى سواء للمتقدم نفسه أو للوالد أو الوالدة أو للزوج ومعاه خطاب تحمل بنفقات السفر
لو كان السبب رقم (9) اللى الكل تقريبا بيترفض عشانه يبقى هنكتب التالى
لو طالب هتكتب إنك قدمت شهادة قيد من الجامعة اللى بتدرس فيها
لو كنت موظف بتكتب إنك أرفقت خطاب من جهة العمل موضح فيه الوظيفة و الراتب و تاريخ التعيين (طبعا كل ما يكون تاريخ بدء العمل قديم يكون أفضل لأنده دليل إستقرار) و تاريخ الأجازة الممنوحة و تاريخ مباشرة العمل و ياحبذا لو تكتب الرقم التأمينى فى الخطاب
و طبعا لو صاحب بيزنس بتقدم سجل تجارى و بطاقة ضريبية و كل ما يكون تاريخ مزاولة النشاط قديم يكون أفضل
فى مستندات إضافية ممكن تتقدم عشان عامل الإرتباط زى عقود الممتلكات – عقد الزواج – شهادات ميلاد الأبناء و لو ممكن إثبات إنهم مقيدين فى المدارس
لو فى تاريخ سفر travel history بنتكلم عنه و نذكر البلاد اللى تمت زيارتها سابقا و خصوصا لو مش أول مرة شنجن أو أمريكا سارية و نركز على موضوع إنه خلال السفريات السابقة تم الإلتزام بتواريخ الفيزا و الخروج قبل إنتهائها
طبعا أضعف حلقة هنا هى الطلبة لأن فى طلبة كتير ممكن تكسر و مش بيهمها الدراسة عشان كده هم بيقلقوا منهم أكتر من الموظفين و أصحاب البيزنس
ملحوظة : العبرة مش بكتر المستندات المرفقة مع خطاب التظلم ... العبرة انك ترفق المستندات المتعلقة بأسباب الرفض نفسها ... يعنى مايبقاش سبب الرفض متعلق بالاقامة و ترفق كشف حساب تانى مثلا !
طيب ندخل على المهم إزاى نكتب #خطاب_التظلم
1- أول جزء فى الخطاب طبعا التاريخ و اسم السفارة (و لتكن سفارة ألمانيا) و موضوع الخطاب ثم إلى من يهمه الأمر
May 22, 2017
The German Embassy – Cairo
The consular section
Subject: Appeal against visa refusal
To whom it may concern,
2- مقدمة الخطاب بتكون عبارة عن تعريف بنفسك الإسم و رقم الباسبور و تاريخ الميلاد و ورقم الأبليكيشن إن وجد
I am Mohamed Mohamed Mohamed, born on September xx, 19xx in Egypt with passport number A0xxxxxxx and application number xxxxxxx.
3- بعد كده بندخل فى صلب الموضوع و هو سبب كتابة الخطاب و هو بغرض التظلم ضد قرار رفض الفيزا (و نكتب تاريخ الرفض) و نكتب أسباب الرفض المتعلم عليها فى خطاب الرفق اللى استلمته و لتكن الأسباب مثلا (2) و (8)
I am writing this letter to appeal against the rejection of my visa application I received from the German Embassy dated May 18, 2017. My visa application was refused for the following reasons:
(2) “Justification for the purpose and conditions of the intended stay was not provided” and
(8) “The information submitted regarding the justification for the purpose and conditions of the intended stay was not reliable”.
4- ثم نبدأ فى تفنيد الرفض زى ما قولنا بالمستندات و لو فى كان فى خطأ فى الحجوزات ممكن نصلحه بفرض إن الحجز كان غير مؤكد يبقى هنعمل حجز مؤكد و نرفقه بخطاب التظلم لو كان الإسم مش مكتوب نعدل الحجز و نظبطه
As I understood that the Visa was refused due to a problem in my hotel reservation that the name of the traveler is not mentioned in the hotel reservation and the booking was not confirmed. I would like to inform you that I made a new reservation. Hence, I am writing to appeal my visa application and I have attached the following document:
1- Confirmed hotel reservation with the name of the traveler.
2- Payment invoice
5- و بعدين بنعمل لستة بالمستندات اللى تم تقديمها بالفعل للسفارة
This is in addition to the previously submitted documents which are
1. Filled and signed application form,
2. Current passport (Original & Copy),
3. Previous passports (Original & Copy) Or certificate of movement
4. Two photos,
5. Flight reservations,
6. Travel insurance covering the stay period in Schengen,
7. Bank statement with a closing balance xxxx LE
8. HR Letter (or Commercial record, Tax Card & Import card)
6- طبعا لو فى تاريخ سفريات سابق بنذكره و بنذكر أسباب السفر طبعا للسياحة و زيارة بلاد جديدة و التعرف على ثقافات البلاد المختلفة ... الخ
In the previous years I visited many countries like Georgia & Turkey 2013, Indonesia 2014, Hong Kong 2015 and Morocco 2016 . Also, I wish to point out, that I always followed the dates of my visa and left the visited countries before visa expiry. I like travelling and I wish to be able to visit Germany and many other countries around the world.
7- و بنختم الخطاب بالتمنيات طبعا أن يتم إعادة النظر فى الرفض و منح التأشيرة
Thank you so much for considering my appeal and I hope to hear a positive response from you.
Sincerely,
8- طبعا فى أخر الخطاب بنكتب الإسم و نوقعه بخط اليد لو كان التسليم شخصى أو لعنوان فى البلد نفسها و بنكتب رقم الموبايل و الإيميل للتواصل فى حالة قبول الطلب
Mohamed Mohamed Mohamed
Mobile: 012xxxxxxx
Date: 22 May, 2017
دى كانت طريقة إسترشادية لكيفية كتابة خطاب التظلم طبعا كل حد بيظبط الخطاب بما يتفق مع أسباب رفضه
و طبعا يجب التنوية إلى إن كتابة و تقديم خطاب التظلم مش بالضرورة يؤدى إلى قبول الطلب و الحصول على التأشيرة
غالبا الموضوع بينجح فى حالات الرفض التعسفى الغير مبرر و حالات الأخطاء البسيطة اللى ممكن تدراكها لكن فى حالة إن الورق المقدم و موقف الشخص المتقدم بالأساس ضعيف فغالبا بالتظلم بيكون غير مجدى
أنا بأقول كده مش إحباط و لكن عشان لو عندنا نقطة ضعف معينة نشتغل عليها بدل ما نضيع وقتنا فى الإحباط و الحزن إننا أخدنا رفض
طيب إحنا بنعمل تظلم ليه ؟ إحنا بنعمل تظلم لأن ده حق كفله لك القانون ليه ما تستخدمش حقك طالما إنك شايف إن ورقك سليم و موقفك قوى ؟
لو موقفك مش قوى و عايز تسافر الدنيا فيها 200 دولة أجمل من أوروبا و يستحقوا الزيارة السفر مش أوروبا و أمركيا بس فمتصعبهاش على نفسك
** الخطاب اللى بيتبعت على الايميل بيكون باللغة الانجليزية فى حالة الدول اللى بتقبل التظلم فى السفارة لكن فى حالة إن الخطاب بيتبعت على عنوان المحكمة فى البلد نفسها بيكون باللغة الرسمية للدولة