سريلانكا
سيرلانكا .. اولا خلونا متفقين أن تأشيرة سيرلانكا ممكن تعملها اونلاين من ع النت ب ٣٥ دولار بدون اي اوراق كمان!
سيرلانكا واحده من ارخص الدول اللي تتخيلها في حياتك!
مثلا تذكرة القطر من مدينة لمدينة ! سعرها بيبتدي من نص دولار ل ٢ دولار! يعني من ٩ ل ٣٦ جنيه و تشوف مناظر طبيعية من احلي المناظر في حياتك لان خط السكك الحديدية للقطر بيطلع فوق الجبال و بيكون القطر وسط السحب و علي يمين و شمال القطر تقدر تتفرج علي الشلالات اللي نازلة من فوق الجبال !!
السكن سعره بيبتدي من ٩ دولار في الليلة يعني ١٦٢ جنيه و دي بتبقي غرفة لشخصين بحمام خاص كمان! الهدوم هناك رخيصة جدا .. يعني ممكن تلاقي في أسواق شعبية الجينس او الجاكت باسعار تبتدي من ٣ دولار و الفستان ب ٤ دولار لحد ١٠ دولار ..
دا غير الأعشاب الطبيعية و زيوت جوز الهند و كريمات البشرة و الشعر و كلها طبيعية و اسعارها بتبدي من نص دولار! و كمان الشاي السيرلانكي اشهر و انضف شاي في العالم لان سيرلانكا اكتر دولة مشهورة بصناعة الشاي حتي شاي ليبتون و حقول الشاي في كل حتة في سيرلانكا !!
الشاي في سيرلانكا بيتباع بالجرام ال ١٠٠ جرام بيبدأ من نص دولار يعني كيلو الشاي يعمله ٥ دولار تقريبا فيما فوق تقريبا حسب النوع !! الجبال و المناظر الطبيعية في كل حته بس علشان تروحهم شوف لو في محطة اتوبيس أو قطر قريبة منهم و اركب مواصلات عامة و لو مفيش حل يبقي لازم تاجر توك توك بسواق و فاصل معاهم لانهم غاليين جدا و نزل السعر للربع كمان! أو ممكن تأجر توك توك و تسوقه انت لو بتعرف تسوق التوك توك
أو ممكن تأجر موتوسيكل ب ١٠ دولار و هيكون معاك طول اليوم ! و فاصل في الأسعار و انت بتشتري لان هناك بيزودوا الأسعار علي السياح بطريقة اوفر .. مثلا الحاجة اللي ب ٢ دولار بيقولك سعرها ١٠ دولار و انت و نصاحتك بقي تعرف تشتريها بسعرها أو ينضحك عليك و تشتريها بالسعر السياحي و اتعود تنزل سعر كل حاجة للربع أو اقل و صمم علي رايك أو غير المكان و اشتري من محل تاني!!
لو بتحب جوز الهند فهو موجود في كل مكان هناك مفيش اكتر منه و مش لازم تشتري! أنا جمعت كذا ثمرة جوز هند من ع الشط أو واقعين تحت الشجر 😅 انا اشتريت شاي من هنا اللي هو ورقة الشاي كاملة و مجففه ! شفت ليه اعلان ع التلفزيون العبوة بتتباع ب ١٤٠ جنيه !! لكن انا كنت اشتريتها ب ١٨ جنيه من مصنع الشاي نفسه يعني ممكن تسافر تشتري شاي و هدوم و ترجع تبيع لاصحابك و تلم الفلوس اللي صرفتها هناك كمان! هتلاقي كومنت تحت في البوست باهم المدن و الاماكن السياحية هناك!
هنزلكم بوست بأسماء الفنادق و المحلات و اسعارها و تقييمي ليها و تشتروا الشاي و الهدوم منين بالاسعار دي و التنقلات ! علشان يكون في مصداقية للبوست!
سافر و عيش حياتك, متضيعش يوم من عمرك و شئ في ايدك دلوقتي!
============================
سيريلانكا ❤️
البوست ده بقى مش بس للناس اللي بتسافر بفلوس قليله..ده للناس اللي عاوزه ترجع فلوسها وهي مسافره
ازاي دي يبقى تابع البوست للاخر خصوصا لو انتي بنت
*اولا الفيزا ل سيريلانكا اون لاين بتقدم عليها وبتجيلك بسهوله جداا تكلفتها 35$
*العمله هي الروبي السيريلانكي "1$=150 روبي" والدنيا هناك فعلا فعلا رخيصه ما عدا الاقامه شويه
*المواصلات ببلاش هناك حرفيا يعني اي قطر حوالي 1$ او اي باص سفر بين البلاد
*الاكل هناك ارخص من اي مكان تتخيله ممكن الوجبه ب خمسين سنت وانت طالع على حسب المكان
طبعا انا بتكلم على اللي بيسافرو بمبلغ قليل
(مره طلبت انا وواحده ف كاندي 8 اطباق كبار جدا وفيهم كل حاجه ودفعنا 2.5$ ومقدرناش نكمل ربعهم اصلا)
المدن اللي تستحق تتزار من وجهه نظري ف خلال اسبوع ايلا...نوارا ايليا... وادام بيك و كاندي وسيجيريا وطبعا السفاري هناك
خلينا نبتدي انا السفريه اللي فاتت عامه كانت بفلوس قليله جدا قعدت شهرين ونص زرت اربع بلاد منهم ماليزيا مرتين فكان لازم استغل اي حاجه توفرلي
اما رحت سيريلانكا لقيت القطر رخيص جداا جداا من 10 ل 30 جنيه ده اما يسافر بيك مسافه
فكنت بروح ازور المدينه اللي عاوز ازورها وادخل القطر اسافر 8 ساعات انام فيه وابقى الصبح في مدينه جديده ازورها وهكذا...
اول مدينه روحتها اسمها كاندي مدينه جميله جدا وفيها بحيره مليانه اسماك ومعبد بوذي كالعاده فوق اعلى نقطه في المدينه
خلصتها وسافرت مدينه اسمها ايلا وده المكان اللي في الصوره تحت مكان اسمه قمة أدم الصغير
مكان حلو جدا ومنظر الجبال هناك بجد حلو جدا اتصورت وبعد كده رحنا لمنطقه الشلال هناك وبدانا العوم
عامه من احلى الحاجات في حياتك انك تعوم في شلال سواء في الهند او سيريلانكا بقى اللي تحبه
بعد كده طلعنا نشوف مكان اسمه Arch bridge
وكان فوق جبل برضو اتعرفت على ناس هناك ونمت عنده شويه
تاني يوم خدنا القطر ابو عشره جنيه برضو وكنا رايحين قمة أدم
( بس نصيحه لازم تحجز القطر قبل ما تسافر علشان تضمن أنك تلاقي كرسي , غير كده أنت و حظك ;) لأنه ممكن يطلع زحمه)
المكاان ده عباره عن سانت كاترين مضروب ف 2 او 3 هو 5500 سلمه بتطلعهم علشان تشوف معبد بوذي فوق المدينه وانت في الطريق بتعدي على شلالات كتير واماكن حلوه جداا ممكن تعمل كامبنج هناك
قعدت اطلع من 2 الفجر ونزلت 10 الصبح مش شايف قدامي وركنت في الاوتيل ابو 500 روبي اللي كنت حاجز فيه
رجعت على مدينه اسمها هاتون وكان في ناس مستضيفاني هناك فلاخر الرحله كنت بسافر اروح ازور مكاان وارجع تاني على بيت صاحبي
نيجي بقى لاحلى حاجه وهي القطر من هاتون او ادام بيك ل نوارا ايليا
علشان تبقى معايا في الصوره لو كتبت ايه احسن حاجه ممكن اعملها في سيريلانكا هيتقالك اركب القطر
فجربت الموضوع مرتين بين هاتون و نوارا ايليا ووالله مزهقتش خالص, واخر مره جربته بالباص
الباص تكلفته المكيف كان 1$ ودي اغلى حاجه هناك
نرجع لموضوع ازاي اعوض مصاريف في السفريه
بص بقى اللبس الشتوي في نوارا ايليا دي رخيص جداا جداا يعني اي جاكت قبل التعويم الكلام ده كنت بجيبه ب 50-60 جنيه واي جاكت بناتي كنت بجيبه ب 70-100 جنيه ووالله ماركات next وحاجات عظيمه
فأنت سهل تتفق انت واصحابك تشترو لبس من هناك بما ان الارقام في مصر بقت في مستوى ابو هشيمه وتوفر من فلوس سفرك اكتر , المكان اللي رخيص هناك بس للشتوي هو نوارا ايليا بس برضو هو مكان كله عرب فلازم تفاصل جامد وتطلع المصري اللي جواك
اخرحاجه انا كنت موفق بفضل ربنا في الاقامه بس على بوكينج سعر الليله حوالي 125 جنيه انا مدفعتش في ال 10 ايام غير 65 جنيه اقامه
حوشوا وسافرو يا جماعه الموضوع حلو جداا والله ومتعه بجد