مساء الخيرات 
الطبيعي انك لما بتسافر أى بلد بتصرف فلوس كتيره، لكن تعرف إنك ممكن وإنت راجع تاخد جزء من اللي صرفته وتسترده 

 

ايه الموضوع بقى

زي ما عندنا في مصر فيه ضريبه تقدر بــ 14% بتدفعها على أى حاجه بتشتريها ( اكل - شرب - هدوم - اجهزه ) 
برضو في اوروبا والدول المتقدمه عندهم ضرايب محطوطه على الحاجات دي 

فلو حضرتك سافرت أى بلد واشتريت منها أى حاجه بتدفع الضريبه زيك زي أى حد، الفرق بقى الوحيد بينك وبين صاحب البلد هو إنك تقدر وإنت راجع بلدك تاني إنك تسترد الضريبه اللي انت دفعتها تاني ( ما عدا الأكل والاقامه مش بتسترد منه حاجه )

 

نوضح بمثال سريع 
اشتريت مثلا موبايل قيمته ( 500 يورو ) عليه ضريبه ولتكن ( 10% ) يعني حوالي 50 يورو ... وإنت راجع بلدك بقى تقدر تاخد المبلغ ده من مكتب موجود في المطار مخصص لهذا الغرض 

أهم حاجه يكون معاك 4 حاجات عشان تخلص الموضوع ده  :

​

• جواز السفر بتاعك

• فاتورة الشراء مختومه

• المشتريات نفسها

• استمارة الاسترجاع ودي بتطلبها من المحل اللي انت اشتريت منه وبدونها مش بتاخد حاجه

 

طبعا الموضوع ليه شوية جوانب هوضحها في هيئة سؤال وجواب بسرعه :

​

س1: هل الكلام ده بيطبق في كل بلاد العالم ؟
ج1 : ما أعرفش حقيقة، لكن أنا أعرف انه بيطبق في اوروبا كلها وجربته بنفسي وكمان جربته في تركيا وفيه ناس جربته في تايلاند وماليزيا وسنغافوره ( لو جربته في بلد تانيه غير دول بلغنا عشان نضيفها )

​

س2 : هل أى حاجه أشتريها بقدر استرد الضريبه بتاعتها؟
ج1 : لاء طبعا مش كل حاجه بتشتريها بتقدر تاخد الضريبه بتاعتها تاني، لازم تكون الفاتوره معديه مبلغ معين والمبلغ ده بيختلف من دوله للتانيه ... يعني مثلا ممكن تلاقي المبلغ ده في اسبانيا قيمته 100 يورو وفي فرنسا قيمته 175يورو وهكذا ...

 

وبالتالي قبل ما تسافر اعرف قيمة الفانوره اللي بتقدر تسترد ضريبتها ، بالإضافه الى ان مش كل المحلات بتقدر تديك فاتوره تسترد بيها فبالتالي برضو لازم تسأل قبل ما تشتري هل فيه ( tax free ) ولا لاء، الحاجه الأخيره بقى إن لازم الفاتورة اللي معديه المبلغ تكون من محل واحد فقط ...

 

يعني مثلا انت رحت H&M واشتريت شوية هدوم وبعدين رحت مشوار ورجعت تاني للمحل اشتريت كمان شوية هدوم في نفس اليوم، تقدر تخلي المحل يعملك فاتوره بكل اللي انت اشترتيه ويديك استمارة الاسترداد

​

​

س3 : لو أنا بعمل رحله لأكتر من بلد واشتريت حاجات من أول بلد زرتها هل أقدر اخد الضريبه بتاعتها من المطار وانا مسافر البلد اللي بعدها؟؟
ج3 : لاء ما ينفعش، استرداد الضريبه بيكون من مطار أخر بلد إنت مسافر منها لبلد الاقامه الأصلي بتاعتك، الكلام ده طبعا على اوروبا وبالأخص دول الشنجن ( جربت اروح مطار شارل ديجول واسترد الضريبه .. سألني انت مسافر فين، قلتله طالع على ايطاليا .. رفض وقالي تاخدها من ايطاليا )

لكن مثلا لو انت في تايلاند ورايح بلد تانيه فأكيد هتسترد من تايلاند نفسها وهكذا بقى

​

​

س4: طيب انا وصلت المطار وعاوز استرد الضريبه بعمل ايه بقى؟
ج4 : بص يا سيدي بتسأل على مكان ال ( tax free ) وبتروح هناك ومعاك فواتير الشراء واستمارك الاسترداد وجواز السفر والحاجات اللي انت اشتريتها ( ساعات بيشوف الحاجات دي وساعات لاء ) وهو بيخيرك بين انك تسترد الفلوس كاش او انه يضيفها على الفيزا ( غالبا اما بتاخد كاش بيكون المبلغ اقل عشان بياخدو عموله )

​

​

س5 : طيب لو انا اشتريت الحاجه دي بفيزا هل بيرجعلي الضريبه كاش ولا برضو فيزا؟
ج5 : كنت شاري حاجات بفيزا وحاجات بكاش وأخدت الضريبه بتاعة الأتنين كاش عادي

​

​

س6: هل فيه شركة واحدة لاسترداد الضريبه في المطار ولا أكثر من مكان ؟
ج6 : غالبا على حسب المطار والبلد، انا شفت في مطار ميلان أكتر من شركة وانت بتشوف انت تبع شركة ايه وبتروحلها

​

​

س7: هل الموضوع مستاهل انك تعمله ؟
ج7 : لو انك بتشتري من بره كتير وبتتسوق كتير فهتلاقي الموضوع عامل معاك فلوس حلوه وانت راجع، انت أولى بيها 

​

​

س8 : هل الموضوع ده بيحتاج وقت كتير عشان اعمله في المطار ؟
ج8 : في بعض الأوقات بتكون الدنيا زحمه جدا والموضوع أوقات بياخد وقت عشان بيكون فيه زحمه أو عشان بيطلب منك تختم ورق من اماكن تانيه فيفضل تروح بدري عشان تخلص الموضوع ده بدون ما يكون عليك ضغط

​

​

س9 : طيب هل فيه طريقة تانيه غير موضوع الاسترداد من المطار ده ؟
ج9 : اه فيه طريقه تانيه من خلال البريد بس انا ما اعرفهاش ولا جربتها ومش بحبها عشان مش هاخد كاش في ايدي 
صديق لينا شاركنا تجربته في الموضوع ده 

وهو انك بتملا بيانات الاستماره مع الفواتير وبتحطها في البريد على عنوان هو كاتبه ليك والفلوس بتتحول بعد حوالي ٣ اسابيع 

 

​