تقريري عن رحلة تايلاند -بوكيت

يارب تكونوا بخير و2018 تكون سنة اشراق وانطلاق علينا كلنا ونقرب خطوات أكتر لأحلامنا فيها …

هكلمكم عن رحلتي لتايلاند، هجزأها لثلاث أو أربع بوستات لإني زرت فيها 4 مدن ومحتاجة اتكلم شوية عن كل مدينة لان كل مدينة فيها تفاصيل كتير فعايزة التقرير يكون مفيد وفي نفس الوقت مش طويل… حبيت أنقل تجربتي ليكم، يارب بوست يقدر يساعدكم ويكون مفيد ليكم في رحلتكم الجاية لتايلاند …

البوست ده هتكلم فيه عن المدن الي زرتها و مدة إقامتي في تايلاند وهعمل تقرير مفصل عن رحلتي داخل جزيرة بوكيت،

للناس الي سافرت بوكيت قبل كدة، ايه الحاجات المختلفة الي شوفتوها وأنا ما شوفتهاش؟ وقولولنا انطباعكم إيه عن بوكيت ولو عندكم صور شيروهالنا في كومنت…

1- المدن إلي زرتها وطريقة التنقل بينها

Phuket - ChiangMai - Battaya - Bangkok

​

- سبب اختياري لبوكيت أنها تكون أول محطة في رحلتي لتايلاند هي كانت لسبب إني ما بحبش احجز ذهاب وعودة من نفس المدينة لأني بحس إن ده تضييع وقت وكمان بشوف رحلات الطيران المناسبة في الوقت وفي السعر وبالنسبة لي كانت رحلة بكين-بوكيت هي الأنسب لي لاني كنت عايزة اعمل ترانزيت في كوالامبور-ماليزيا

وبالفعل عملت ترانزيت لمدة 18 ساعة وبكدة زرت ماليزيا للمرة التانية وكنت سعيدة اوي بالتجربة دي.. بحب الترانزيت جدا خصوصا لو هقدر أطلع برا المطار وأزور أماكن لو معايا وقت، رحلات الترانزيت كمان دايما بيكون سعرها مناسب …

طيب ليه المدن الي زرتها بدأت بالترتيب من بوكيت، وانتهت عند بانكوك؟، أما تقرروا هتسافروا بلد معين أول حاجة لازم تتعمل هي انكم تمسكوا خريطة البلد دي وتحددوا هتسافروا من البلد الي انتوا مقيمين فيها لاي مدينة في الدولة الي هتسافروا ليها (عامل المسافة- السعر- التوقيت بيكونوا اسباب رئيسية في الاختيار).

بتحددوا بعدها كام مدينة هتزوزوها وهتتنقلوا ازاي من مدينة للتانية فماينفعش تسافروا بلد من غير ما تشوفوا الخريطة بتاعتها لان ده هيفيدكم جدا (معلومة للناس الي لسه ما سافرتش)، وانا عامة بحب أجرب كل وسائل التنقل المتاحة في البلاد الي بروحها لاني بشوف حاجات جديدة وبعرف أكتر عن البلاد دي .. تمام أولا بوكيت في جنوب تايلاند فانا ابتديت من الجنوب لآقصى الشمال والي هي تشيانغ ماي (طيران داخلي)، وبعدين من تشيانغ ماي ل بتايا (باص ليلة كاملة)، ومن بتايا لبانكوك (باص 3-4 ساعات). ومن بانكوك لبكين طيران وعملت ترانزيت في ماكاو لاني كنت راكبة طيران ماكاو…

​

2- مدة الإقامة

أنا سافرت تايلاند لمدة اسبوعين —- انتوا على حسب الوقت المتاح معاكم وعدد المدن الي هتزوروها بتحددوا مدة إقامتكم

3- مناخ تايلاند

​

أولا تايلاند من دول جنوب شرق آسيا، مناخها استوائي وفي موسم أمطار وموسم جفاف..

موسم الجفاف: بيكون من شهر 3 لشهر 5 والجو بيكون حر جدا جدا درجة الحرارة بتوصل ل38 وأكثر خصوصا في الجنوب، وقت أما رحت جالي ضربة شمس على خفيف كدة، عامة الصيدليات هناك كتير فماتقلقوش…

موسم الأمطار: بيكون من شهر 6 لمنتصف شهر 10، موسم مطر يعني نسبة 85٪ من المطر السنوي في الشهور دي ، المطر بينزل في أي وقت وممكن يأثر على الطيران ورحلات الاسنوركلينج والدايفينج الي هتقوموا بيها.. والوقت ده من السنة السياحة بتقل في تايلاند.

موسم الجو معتدل فيه: من شهر 11 لشهر 2 .. وده أحسن وقت وكمان موسم السياحة في تايلاند عامة.. وطبعا بما انه موسم سياحة فهتلاقوا اسعار الهوتيلات والطيران عالية ، ومن شهر 1 بيبتدوا الصينين يندفعوا على تايلاند فبتكون زحمة بالصينيين هههه لانه موسم اجازات في الصين …

ليه بقول كدة؟ مش عشان اقولكم سافروا في شهر كام . لا عشان تفهموا انتوا هتروحوا على ظروف ايه .. بالنسبة لي بحب أكتر موسم الجفاف مع ان الجو بيكون حر، بس احسن من موسم المطر لاني جربت في اندونسيا كان بداية موسم المطر، استمتعت بالجو ده لكن مش بحب اسافر بلد فيها جزر في موسم مطر، بتكون بهدلة شوية ومش بعرف انظم رحلتي كويس…

4- جزيرة بوكيت

- أول محطة في رحلتي لتايلاند… جزيرة بوكيت موجودة في جنوب تايلاند، والحياة فيها غالية إقامة ومطاعم و رحلات سياحية فيها غالية لإنها بقعة سياحية أساسية في جزر جنوب شرق آسيا. الحياة أغلى من جزيرة بالي اندونسيا و كمان سبا في ماليزيا..

الإقامة: بتحددوها على حسب المنطقة الي عايزين تسكنوا فيها ، كنت في هوتيل كويس جدا حجزت من موقع بوكينج. لكن كان بعيد شوية عن منطقة وسط المدينة لاني حجزت في اليوم الي سافرت فيه وكانت معظم الهوتيلات محجوزة ، كنت بمشي حوالي نص ساعة عشان أوصل للسوق… فاما تحجزوا حاولوا تحجزوا قبل السفر بأسبوع أو أقل شيئ 3 أيام عشان تعرفوا تسكنوا في فنادق أو هوستيلز قريبة من وسط المدينة لان ده هيسهل عليكم كتير التحرك.. أنا قعدت فيها 5 أيام…

من المطار للهوتيلات(غالبا بتكون في منطقة patong ): هتلاقوا قبل ما تخرجوا من باب المطار زي لافتات ومكاتب ميني باصات بتدفعوا 180بهات(عملة تايلاند) وبيدوكم تذكرة تطلعوا برا المطار تستنوا الميني باص لحد ما العدد يكمل 8-10 أشخاص بعدين بيتحرك و بيوصلكم لحد باب الفندق أو الهوستيل الي انتوا هتسكنوا فيه. المسافة بتكون حوالي 40 دقيقة أو ساعة، اة المكان بعيد شوية … وممكن تاخدوا تاكسي من المطار للفندق لكن هياخد حوالي 700-800 بهات.. فلو هتسافروا لوحدكم، الأفضل طبعا تاخدوا الميني باص ده، وهو عامة نظيف جدا جدا وخدمات السياحة في تايلاند كلها على ما يرام … مش هرشحلكم هوستيل أو هوتيل لان ده بيتحدد على حسب ميزانيتكم، لكن برشحلكم تسكنوا في منطقة patong لانها في وسط الجزيرة وتقدروا تتحركوا براحتكم لاي مكان منها…

من الهوتيل للمطار وانتوا راجعين: يااما هتاخدوا برده ميني باص وده هيساعدكم فيه الهوستيل أو الهوتيل الي ساكنين فيه، أو لو طيارتكم بدري زيي هتاخدوا تاكسي مخصوص، سآلت الهوتيل الي كنت ساكنة فيه وطلب مني 950 بهات في حين إني رحت مكتب سياحي جانب الهوتيل واخدت مني بس 600 بهات… فخلي بالكم ودايما اسالوا أكتر من مكان وقارنوا الأسعار…

​

وسائل التنقل داخل الجزيرة

1- لو مش بتعرفوا تركبوا موتوسكلات يبقي هتمشوا على رجلكم هههه أو هتركبوا تاكسي زي ما أنا عملت .. لكن لو بتعرفوا تركبوا موتوسكلات هيوفر عليكم كتير جدا بس لازم تاخدوا بالكم لان الطرق هناك ضيقة شوية وهتلاقوا ارتفاعات محتاجة حد بيعرف يسوق موتوسكلات كويس… الموتوسكلات الناس بيأجروها من الهوتيل عادي أو من محلات تأجير موتوسكلات ودي موجودة برده بكثرة…

طرق الاتفاق على رحلات غطس

خدمات السياحة في الجزيرة ممتازة.. هتلاقوا مكاتب السياحة في كل مكان، كمان هتلاقوا عروض في الفندق أو الهوستيل إلي انتوا ساكنين فيه، كمان في شارع كامل قصاد شاطىء patong ده فيه وكلاء سياحة كتير جدا، هتلاقوا تفاوت في الأسعار، طبعا ممكن تفاصلوا ولازم تروحوا أكتر من مكان وتسآلوا ايه البرامج السياحية بالظبط داخل الرحلة.

بتدفعولهم 50٪ من الفلوس والباقي بتدفعوه أما بيجي الميني باص للمكان الي ساكنين فين عشان ياخدكم لرصيف الي هتركبوا منه القارب السريع، ما تقلقوش انهم ممكن يخدعوكم، من تجربتي ومن تجارب قريتها قبل أما أسافر الموضوع أمان جدا وهما بالنسبة لهم السمعة هي الي بتجبلهم شغل مش النصب… الميني باص بيجي ياخدكم من المكان وبيوصلكم ليه تاني بعد ما الرحلة بتخلص، هتلاقوا كل شخص بيسلمكم للتاني في كل مرحلة من رحلتكم، اطمنوا على الاخر واستمتعوا …

الرحلتين الي طلعتهم كانوا من خلال مكتب قصاد شاطىء patong، طنط سكر جدا واسعارها كويسة مقارنتا بالاماكن التانية لكن للاسف رقمها ضاع مني

​

 أماكن للزيارة في جزيرة بوكيت

​

1- معبد wat chalong

المعبد ده كان أول مكان زرته في جزيرة بوكيت.. كان عندي شغف رهيب أني أشوف معبد بوذي في تايلاند برغم أني زدت معابد بوذية كتير في الصين، لكن معابد البوذية في الصين أخدة طابع شكل طابع البناء في الصين وممتزجة جدا بالثقافة الصينية.. الي شوفته في المعبد ده كان مختلف تماما من ناحية طابع البناء ودة هتشوفوه في الصور…

حتى في طريقة الصلاة، بخلاف انهم بيولعوا بخور وبيركعوا قدام تمثال بوذا، كمان شفت الناس أول أما بتدخل في ورق رفيع كدة لونه ذهبي بيرشوا عليه مية وبيلزقوه على مكان كدة جوا، سآلت أكتر من حد ليه بيعملوا كدة، كانوا بيبصولي باستغراب وما بيردوش، فعرفت وقتها أني مش هينفع أسألهم لانهم ممكن بيعتبروا ده تدخل مني في الدين باعتباره حاجة شخصية وما عرفتش السبب برده واعتبرته جزء من صلاتهم وشوفت المشهد ده تقريبا في كل معبد بعدين دخلته في تايلاند…(اليوم 1 الصبح)

ملحوظة:المعبد دة هو أكبر وأشهر معبد في جزيرة بوكيت، فلو قررتوا تزوروا معابد في الجزيرة يبقي هو كفاية ووفروا الوقت لزيارة الجزر لأنكم أما تروحوا المدن التانية مش هتزوروا غير معابد بوذية أصلا ههههه.. ومش كل معبد تشوفوه تدخلوه لانهم كتير أووووي، إحنا بنروح الأشهر أو الي فيه حاجة مميزة بس… المعابد كلها مش ببلاش .. أسعارها بتختلف باختلاف عراقة وتاريخ المعبد …

2- شاطيء patong

شاطىء موجود في منتصف جزيرة بوكيت.. لو ساكنين في منطقة patong هيبقي سهل تمشوله من الفندق الي ساكنين فيه.. هو شاطيء نضيف ومش مزدحم. الناس بتقعد لحد الساعة 9 أو 10 بالليل قدامه، تقدروا تلعبوا عليه ألعاب مائية، أمواجه هادية مش زي شواطئ بالي إلي أمواجها قوية جدا وتناسب أكثر الناس المتمرسة في لعب الألعاب المائية المثيرة زي التزحلق على الماء وركوب الأمواج، بالنسبة لي أنا مش بعرف،

وبكتفي أني بستمتع بمشاهدة الغروب على الشواطيء والعوم البسيط فيها لحد وقت الغروب. كنت بروحه كل يوم وأنا هناك.. الغروب على شاطيء patong حسيت وكأنه لوحة فنية ألوان كتير ممزوجة فيها شايفاها مرسومة في السما و منعكسة على المياة ، هو من الشواطئ الي الغروب فيها مميز، فده محطة مهمة لازم تروحوها .. (اليوم 1 بعد الظهر)

​

ملحوظة:كل الشواطىء مجانا لكن الألعاب المائية طبعا بفلوس

3- جزيرة Ray island ونطقي للشهادتين تحت المية هههههه

للناس إلي مش ناوية تعمل غطس عميق diving وما عملتش في حياتها قبل كدة يبقي روحوا على جزيرة Ray.. أما تروحوا شركة سياحة هيسآلوكم عملتوا غطس قبل كدة ولا لا، فلو ما عملتوش قبل كدة هيرشحولكم الجزيرة دي لان المية فيها هادية وما فيهاش أي خطر.. أما إذا كنتوا غطاسين أو دايما بتعملوا رحلات غطس فالاختيارات هتكون كتيرة بالنسبة لكم زي مثلا جزيرة phi phi وغيرها.. تجربتي مع الغطس لاول مرة في حياتي كانت مختلفة، سافرت قبل تايلاند ماليزيا واندونسيا لكن كنت جبانة وبتراجع عند آخر لحظة..

أما رحت تايلاند كان تحدي لخوفي وقلت لازم المرة دي أعمل غطس وفعلا عملت ههههه تجربتي تحت المية كانت مثيرة جدا ههههههه … قبل أما بتنزلوا المية بيكون في مرافق معاكم بيعلمكم بعض الحركات زي لغة تفاهم بينا وبينهم في المية مثلا (تمام - في مشكلة ف التنفس- خلاص مش قادرة أكمل وعايزة اطلع) ، وكان نازل معايا في مجموعتي ولد وبنت كمان مع مدرب تاني.. نزلنا احنا الخمسة، أنا والبنت كنا تمام جدا بس كان ف صعوبة شوية في التنفس بس كنت قادرة أكمل بيها، الولد فجأه قرر يطلع، أنا طبعا ما كنتش مركزة فيه ومركزة في الغطس،

فجأة ما لقتش المدرب بتاعي ولا لقيت حد، وقتها اقسم بالله حسيت أنها اخر لحظة في حياتي ونطقت الشهادتين، لأني أكيد مش هعرف أطلع لوحدي، فخمنت اني اتحركت بعيد من غير ما أحس وتهت منه.. فجأة اكتشفت ان البنت فوقي والمدرب بتاعها معاها، فشاورت للمدرب بتاعها وشرحلي بايده ان الولد قرر يطلع ومدربي اخده لفوق… لحد دلوقتي مااعرفش ليه مدربي سابني…

حقيقي اللحظة دي حسيت أن اتردت فيا الروح من جديد والله…كانت تجربة جميلة غطست بعمق 10-15 متر تحت المية لمدة 25 دقيقة… طبعا ما شفتش سمك كتير وشعب مرجانية كتير لانهم ما دخلوناش مناطق عميقة لاننا zero experience .. وما ينفعش نتعمق في الغوص أول مرة ننزل فيها… رحلة دي اتكلفت حوالي 100 دولار (اليوم 3)

​

ملحوظة:

آ- ممكن تحضروا معاكم لبس غطس ولو مش عايزين هما بيكون عندهم لبس بس بيكون شكله مش حلو وبيكون على حسب حظكم، فده حاجة ترجعلكم انتوا.

ب- حاولوا قبل ما تنزلوا المية تحطوا واقي من الشمس وبعد أما تطلعوا تاخدوا شاور بسرعة (الحمامات موجودة ومتاحة بس بدائية يعني للاستحمام فقط ،لازم تحضروا معاكم فوطة ومستلزمات الشاور)وتحطوا كريم واقي من الشمس، وبعد كل ده هتلاقوا وشكم قلب أحمر بعد الغطس كدة ب 5 ساعات.. أنا أنفي هي الي قلبت أحمر هههههه

ج- بالنسبة للصور تحت المية، لو معاكم كاميرا بتصور تحت المية يبقي تمام، لو مش معاكم ممكن تأجروا منهم وبيدوكم الصور على memory card وانتوا ماشيين …

د:اعملوا حسابكم أن يفوت 24 ساعة بعد الغطس عشان تركبوا طيران، فلو قررتوا تعملوا غطس عميق يبقي تحجزوا طيران بعدها بيوم للمدينة الي هتروحوها بعد بوكيت مش في نفس اليوم، ده حفاظا على سلامتكم …

4- شاطيء كارون Karon beach

شاطىء موجود في جنوب جزيرة بوكيت ، مسافة حوالي 40 دقيقة من منطقة patong… المية فيه حلوة جدا وأمواجه عالية شوية فحلو لو هتنزلوا تلعبوا مع الأمواج (طبعا أنا ما بدخلش لجوا، كفاية المية تكون مغطية 3/4 طولي لأني مش بعرف أعوم كويس ههه).. ممكن تقعدوا فيه ساعتين مثلا ، وبعدين تستعدوا عشان تروحوا تشوفوا الغروب في cape promthep …(اليوم 4- الظهر)

5- نقطة cape promthep

الview point دي موجودة في أقصى جنوب جزيرة بوكيت وتعتبر آخر نقطة على خريطة جزيرة بوكيت ..من أجمل الأماكن إلي هتشوفوا فيها غروب في حياتكم، ما ينفعش تفوتوا مشاهدة الغروب فيها. عشان تتراح محتاجة مثلا أكثر من ساعتين عشان توصلولها من وسط جزيرة بوكيت… فالافضل تتحركوا مثلا الساعة 2 الظهر أو 3 بالكتير عشان تلحقوا الغروب هناك..

في مطعم هناك حلو أوي وأسعاره معقولة، ممكن تقعدوا فيه تشوفوا الغروب وكمان تقعدوا فيه لحد بالليل، بس خلوا بالكم أن بعد الساعة 7 الدنيا بتضلم، فمحتاجين تتحركوا برده مش متأخر عشان تعرفوا ترجعوا بالسلامة لوسط الجزيرة ، اسمه .. phromthep cape restaurantالاسعار فيه معقولة جدا (اليوم 4 بعد الظهر)

6- جزيرة Similan

جزيرة رائعة، ما بتكنش متاحة طول السنة، بس بتتفتح في موسم معين حوالي شهرين أو تلاتة على مدار السنة لان أمواجها عالية والمية مش هادية فيها . هي بعيدة جدا حوالي ساعتين بالقارب السريع عن جزيرة بوكيت وأغلى من جزيرة phi phi لان phi phi. ناس كتير أوي بتروحها فبتكون زحمة طول الوقت. لكن جزيرة سميلان مختلفة كتير.

عملت فيها snorkling كان روعة وشكل السمك حلو أوي أوي والشعب المرجانية.. بصراحة حبيت أكتر الsnorkling أكتر من الغوص العميق، يمكن لأني ما نزلتش مكان أعمق وماشفتش حاجات كتير.. السفرية الجاية لأي جزيرة هعمل الاتنين وهقارن تاني ههههه… ممكن تباتوا في الجزيرة بس أنا ما عملتش كدة لإني لقيت الفنادق هناك غالية جدا جدا ..فكرة البيات في جزيرة أنا جربتها في بالي وكانت روعة، بتقدروا تستمتعوا بالمكان بعد ما كل الناس بتمشي ومش بتخليكم مرتبطين بالوقت.. لكن لو ما فيش بيات، مفروض بتتحركوا من الجزيرة قبل الساعة 4 لان كل ما الوقت بيأخر، الأمواج بتعلى أكثر وبيكون خطر .. رحلة دي اتكلفت 50-60 دولار (اليوم 5)

7- سوق patong night market

هو موجود في منطقة patong، فيه محلات لبيع الهدايا التذكارية وتيشرتات ومايوهات وحاجات كتير.. لو انتوا محتاجين حاجة لنفسكم ممكن تشتروا ، ولو هتشتروا هدايا استنوا اشتروا من Chiang mai أو من بانكوك هتكون أرخص.. في هناك مطاعم عربية وتركية ومحلية بس غالية شوية.. برشحلكم المكان الي ف النقطة الي تحت

8- Banzaan Fresh Market in Phuket

دة سوق للأكل بيفتح بعد الساعة 5 المغرب عبارة عن محلات أكل جانب بعضها، هي محلات باعة كدة بسيطة، أساسها المأكولات البحيرة، وبيبيعوا أكلات تانية محلية وكمان فواكة كتير متقطعة، الفاكهة هناك حلوة أوي، ماكنتش ببطل أكل فاكهة خالص هههه…الأكل هناك حلو أوي أوي وفي ناس مسلمين كتير واقفين بيبيعوا، فاطمئنوا…

9- Jungceylon Shopping Mall

المول ده هو أكبر مول في بوكيت.. حلو بس للتمشية بالليل لو عندكم وقت، مش موجودة كل الماركات العالمية فيه، بس الماركات العالمية المتداولة، في جوا المول كدة سفينة كبيرة ممكن تتصوروا عندها، وكمان في بعض الأشخاص بيعملوا عروض فنية ممكن تتفرجوا عليها لو قررتوا تروحوا المول ده..

انطباعي عن الجزيرة

1- كل يوم في الجزيرة كان فيه تجربة مختلفة عن اليوم إلي قبله. معظم سياحها من الجنسيات الغير عربية، ما افتكرش اني صادفت كام حد عربي ، الباقي معظهم روس وأوروبيين

الجزيرة أمان جدا وتايلاند عامة أمان جدا جدا لو بنت هتروح لوحدها ما تخافيش، الناس متعاونين جدا جدا جدا وما حدش هيأذيكي حتى لو بنظرة..

2- معظم السكان المحليين بيتكلموا انجليزي، طبعا اللكنة غريبة شوية لكن هتفهموا، هما بيعملوا كل ما في وسعهم عشان يفهموكم … وأحلى حاجة فيهم انهم مش بيوصفوا الطريق غلط، يعني لو سآلت حد مش عارف بيوقف حد تاني يسآله عشان يقولي المعلومة صح، عثلات أوي أوي والله…

3- في موقف حصلي قدام معبد وات شالونج، حلقي وقع مني وكنت بدور عليه، جت طنط وعمو تايلانديين شافوني بدور على حاجة وهما كمان بدأو يدوروا معايا وهما مش عارفين بدور على أية، فبصتلهم كدة وأنا وشي مبتسم وبقولهم حلقي وقع وبدور عليه وكنت بشاور لان باين عليهم مش بيتكلموا انجليزي، المهم قعدنا ندور دقيقتين كدة وبعدين فقدت الأمل وقولت همشي، فشكرتكم وأنا ماشية وشايفاهم كانوا لسه بيدوروا هههههه …. طيبين أوي والله(للعلم الحلق كان اكسسوار مش حاجة غالية أوي يعني عشان ما حدش يفكر أنهم كانوا طمعانين فيه لانهم شافوا فرده الحلق التانية)

4- لو مسافرين لوحدكم ما تخافوش مش هتحسوا بالوحدة ، روح المكان هتفرض نفسها عليكم وده من خلال اكتشافكم للحاجات إلي أول مرة تشوفوها، وشكل الحياة هناك.. أما بالنسبة للتصوير ففي سيلفي ستيك وكماان الناس هناك كتير، لو طلبتوا من أي حد يصوركم بيكونوا مرحبين جدا…

5- طبعا احنا أما بنسافر مش بس بنتعرف على المكان والسكان المحليين فيه، لا كمان بنشوف أجانب غيرنا. من ضمن الناس الي شفتهم، شفت ناس احنا بنسميهم في ثقافتنا"مسنين" ، إلي هما كبار في السن يعني، ناس فوق ال60 سنة ورايحين يتفسحوا، بجد اتبسط بيهم جدا وأما كانت بتيجي فرصة اتكلم معاهم كنت بتكلم، ناس دي عندها حب للحياة وإقبال عليها غيرنا خالص، التجربة دي لازم تتنقل لينا، محتاجين نفهم أن مهما سننا كبر فعمرنا لسه ما خلصش ولازم نستمتع بيه حتى آخر لحظة فيه، لان عمرنا ده حاجة ملكنا إحنا…

(اليوم 6) الفجر اتحركت من الهوتيل وكانت طيارتي لتشيانغ ماي هتقوم الساعة 8:40، والمسافة بين المدينتين ساعتين …

رحلتي في تايلاند ما خلصتش، لسه في 3 مدن فيها حكايات جميلة وذكريات أجمل، استنوا بوستي الجاي عن مدينة تشيانغ ماي والأكل التايلاندي