جزر المالديف
المالديف بلد الجمال والطبيعة الرائعة الخلابة والهدوء وراحة الاعصاب حبيت ابدا بيها لانها من اكتر الرحلات اللي اتبسطت وارتحت فيها
ترتيبات السفر
أولا الفيزا :
جمهورية المالديف من الدول اللي مش بتتحتاج فيزا قبل زيارتها ولا بتحتاج تدفعلها أي مبلغ مالي عشان الدخول كل اللي تحتاجه هو حجز فندق وحجز طيران ذهاب وعودة و فيه بعض الواقع بتقول انهم بيحتاجو وجود مبلغ مالي يعادل 100 دولار + 50 دولار لكل يوم من أيام الاقامة لكن محدش طلب مني يشوف الكلام ده في المطار أعتقد على حسب الموسم و عدد الزائرين .
ثانيا : تذكرة الطيران :
لو حاطط لنفسك ميزانية قليلة وعايز تتتفسح بمبلغ مش كبير تقدر توفر جدا في تذاكر الطيران اللي هي تعتبر أغلى حاجة هتدفعها في الرحلة فانت مكن تحجز على الاماراتيه مثلا أو القطرية بس هتتكلف تقريبا ضعف اللي ممكن تدفعه لو اخترت شركة زي فلاي دبي ولكن في المقابل هتلاقي نفسك ترانزيت حوالي 8 ساعات في مطار دبي في Terminal 2 اللي مفيهوش أي خدمات او وسائل راحة بعكس Terminal 1 & 3 بس هتوفر مبلغ لا باس يه ممكن تتفسح بيه هناك كويس اوي .
فيه كذا موقع ممكن يعملك بحث عن ارخص تذاكر الطيران في الوقت اللي عايزتطلع فيه زي skyscanner.com مثلا .
طبعا مش محتاج اقوللك انك كل لما تحجز بدري كل ما هتلاقي السعر أقل بس عموما أنا حجزت قبل السفر بأقل من 48 ساعه وكان الموضوع سهل جدا .
ثالثا : حجز الفنادق :
المالديف عبارة عن جزر كتيرة .. فيها الجزيرة الرئيسيه اللي هي العاصمة (مالي ) بس لا ينصح بالسكن فيها عشان زحمة جدا ومفيهاش تقريبا اي نشاطات تتعمل غير زيارة سوق السمك والفاكهة
فيه جزر بتكون عبارة عن منتجعات خاصة وعلى درجة كبيرة من الرفاهية والخصوصية بس بتكون أسعارها غاليه جدا ممكن توصل من 15000 الى 60 الف جنيه شامل فطار فقط في ال 4 أيام مثلا وهتفضل فيه طول الرحلة لان السفر ليها بطيران خاص والخروج منها واليها بياخد وقت طويل وتكلفة كبيرة يعني الطيران الداخلى بطيارات مخصوصة بيكلف في رينج 250 – 360 دولار للفرد رايح راجع بس هي كشهر عسل ممكن تستاهل جدا كمنتجع لطوال فترة الاقامة ومتنزلش في حتة تانية مش مهم قوي يعني
ولكن يوجد أيضا جزر عادية عبارة عن مجموعه فنادق صغيرة وشواطىء مجانيه حلوة جدا واسعارها معقولة يعني ممكن تدفع في حدود ٥٠٠٠جنيه في ال 4 أيام شامل الافطار والتوصيل من المطار واليه (فيه فنادق بتقدم الخدمة دي مجانيه واماكن اخرى بتاخد حوالي 10 دولار مثلا من المطار وزيهم وانت راجع ) .
ممكن بسهولة جدا تدخل على www.booking.com وتختار الفندق اللي يعجبك بس وانت بتختار لازم تركز في تفاصيل الفندق يعني موجود فيه واي فاي مجاني وللا لا في الاوضة .. تليفزيون وتكييف الفطااار بفضل يكون شامل الغرفة والحاجات الاساسية دي وطبعا تبص على ال reviews بتاعت الناس اللي راحو الفندق ده (سيبك من الكلام الحلو وشوف التعليقات اللي بتقول السلبيات ممكن تستفيد وممكن تلاقي ناس مأفورة ) .. غالبا العرب اللي بيبقو كاتبين بيبقو من الخليج وبيدورو دايما على مستوى رفاهية عالي جدا انت ممكن تتنازل عنه شوية لو بتدور على رحلة مصاريفها معقوله وبرضه هتنبسط جدا وطبعا يفضل ان يكون الفندق شامل الافطار لان باقي الوجبات سهله انك تلاقيها في مطاعم كتير في البلد .
الانشطة :
ممكن تدخل على trip advisor وده application ممتاز جدا على الموبايل هتلاقي عليه كل الحاجات اللي ممكن تتعمل في البلد اللي انت تختاره و reviews الناس عن البلد والجو واحسن وقت تروح فيه من السنه وعموما هي جزر المالديف مشهورة بالانشطة البحرية زي الغطس والسنوركلينج والصيد واسعار الانشطة تعتبر نسبيا مش رخيصه ولكن ممتعه جدا لاقصى درجة .
ممكن تعتمد على الفندق في انه يزبطلك الانشطة اللي انت عايز تعملها يعني تتفق مع موظف الريسيبشن انك عايز تعمل كذا وكذا وهم بيبقى ليهم المكاتب اللي بيتعاملوا معاها .
الأكل :
بما أن جزر المالديف دولة مسلمة اغلبيتهم مسلمين فدي حاجة مريحة جدا في الاكل لانك هتلاقي تنوع كبير جدا في انواع الاكل وكله حلال .. المالديف دولة متعددة الثقافات والاجناس يعني هتلاقي اللي اصله هندي او صيني او مماليزي او تايلاندي وبالتالي هتلاقي انواع اكل كتير جدا وبالذات المميز هناك المأكولات البحرية بما انها جزر في المحيط فاكتر حاجة متوفرة عندهم هي الاسماك
ولكن حتلاقي انتشار فظيييع جدا للتونة وبيعملوها في كل حاجة تقريبا بدون مبالغه يعني الفطار الرسمي بتاعهم تونة وعيش تونه سمبوسه تونه ساندوتشات تونة طبيخ اندومي بالتونة فا ممكن الموضوع ده يتعب بعض الاحيان لان الرائحة بتكون ساعات زايده عن حدها ولكن في المجمل الاكل هناك متنوع تنوع اسيوى ويعتبر المطبخ التايلاندي من أحسن المطابخ في المجال ده .. الأكل طعمه مختلف وحلو .
حالة الجو :
مناخ المالديف استوائي فا علشان كدة هي ممطره طول السنة تقريبا ، بيزيد في اوقات ويقل في اوقات اخرى موسم المطر الشديد عندهم شهر يوليو واغسطس فيه رياح موجوده دايما فا بترطب الجو شوية بالرغم انو فيه رطوبة عالية ودرجة حرارة في حدود 28 – 30 ولكن الجو بشكل كبير محتمل وحتى لو مطرت فا شوية فا هو امر محتمل فا متقلش في الهدوم اللي معاكم ومتنساش الشورت والمايوه
دلوقتي حنتكلم عن الرحلة بالتفصيل بالنسبالنا كانت الرحلة عباره عن4 ليالي بشكل كبير كان كفاية المدة دي
اليوم الاول وصلنا متاخر معاد الطيارة كان يوصل الساعه 9 مساء بتوقيت المالديف خلصنا الجوازات بشكل سريع جدا مجرد بيشوفو ورقة حجز الفندق زي ما قلنا واحتمال المبلغ المالي وحجز الرجوع وبيديك ورقة تحتفظظ بيها وبيختم الجواز وشكرا
كان في انتظارنا موظف الريسيبشن بتاع الفندق اخدنا بالعربية لحد الفندق الفندق كان بيبعد مسافة ربع ساعة تقريبا عن المطار وصلنا بسرعة بشكل كبير لان الطرق هناك فاضية
عملنا ال check in وحطينا الحاجة في الاوضة بتاعتنا اتشعينا عشا خفيف في الفندق وريحنا لتاني يوم لان البلد اصلا اخرها 10 بليل وتكون قفلت
تاني يوم كانت الرحلة عبارة عن اننا روحنا العاصمة (مالي ) ركبنا من الجزيرة اللي كنا فيها عبارة بيسموها ferry boat ودي رخيصة جدا تكلفة الفرد الواحد فيها 5.50 روفية اللي هي حوالى 2 وربع جنيه مثلا رايح وزيهم راجع مالي تعتبر زحمة جدا بالرغم ان عدد السكان مش كبير ولكن بسبب مساحتها الصغيرة حوالي 5 كم 2 فا ده بيحسسك ان الدنيا زحمة
عموما مالي مفيهاش مزارات كتير ولكن اللي نقدر نقولو واللي معظم الناس بتعملو هو انك تروح سوق السمك وسوق الخضار جنبو وياريت كل ده تمشية متركبش اي حاجة (عموما في كل مالي ) هما اسواق صغيرة يعني بس الناس بتحب تروح تتصور هناك ومن سوق الخضار تشرب ثمرة كدة مش فاكر اسمها حاليا بس ظريفة جدا وبتشبه الى حد كبير ثمرة جوز الهند ممكن بعد كدة تشترى سوفينير او هدايا هو مفيش حاجات قوي تتشرى
بس على فرض فا فيه محلات منتشره لكدة كتير بس خلى بالكم اهم حاجة تفاصلو وبدون خوف لانهم بيبالغو جدا باسعار الحاجة وممكن بعد كدة بقى تتغدي في مطعم من المطاعم ممكن تكون سائل عليها من قبلها لانو فيه مطاعم اسعارها غريبة جدا ومرتفعة الى حد كبير وفيه مطاعم الى حد ما مقبولة يعني الفرد يعمل فيها حوالي 100 جنيه الى 150 جنيه وفيه مسجد مشهور جدا هناك اسمو مسجد السلطان محمد تكرفان الاعظم . الى حد كبير مالي بتاخد وقت مش بطال من اليوم وغالبا حترجع بعدها عايز تنام او تريح
تاني يوم نزلنا بدرى روحنا البحر الساعه 8 الصبح وفطرنا وريحنا شوية لحد معاد الغدا وبدا بعديها رحلة الصيد ومشاهده غروب الشمس بالنسبالنا كانت رحلة ممتعة لاقصى درجة ولو صدفت وانكم كنتم في منتصف الشهر العربي فا دي ميزة رهيبة انك تشوف شكل القمر وانت في نص البحر اصطدنا والحمد لله الى حد كبير عدد حلو من السمك وهنا بيديك اختيار انك تاخدو معاك او يعملو بيه باربكيو احنا اخدناه معانا علشان كنا متفقين مع الفندق انو حنتغدى او نتعشي بيه سوا
طبعا رجعنا متاخر شوية فا بالتالي خلص اليوم ونمنا رحلة الصيد بتكلف للفرد ما بين 50 الى 60 دولار غاليه حبتين بس تستحق بشكل كبير
ثالت يوم وده كان الاخير بالنسبالنا كنا ناويين نعمل دايفينج وسنوركلينج وحاجة اسمها ساند بانكينج بس للاسف المدرب قالنا انو مش كويس ننزل دايفينج ورحلتنا بعدها باقل من 24 ساعه فبالتالي عملنا السنوركلينج والساند بانكيج وده عبارة عن جزء كدة في الميا سبحان الله رملة بيضا جميلة شبه الى حد كبيرة جزيرة صغيرة جدا بس حلوة قوي الصراحة وتقدر تاخد فيها مجموعة صور رائعة والترتيب ليها بيبقى على حسب المد والجزر
لان اوقات المد بتتغطى خالص بالمياه السنوركلينج بالنسبالنا كان ممتع جدا لانو بتشوف الشعب المرجانية بشكل كبير من غير ما تبعد عن الجزء الرملى ده فبالتالي كان كفاية بالنسبالنا للمعلومات الدايفينج بيعمل في رينج 85 الى 90 دولار والسكنورلينج والساند بانكج في رينج 70 تقريبا
بعد كدة اتغدينا السمك اللي اصطدناه وريحنا شوية واخر حاجة عملناها اللي انصح بيها اي حد هي المساج في المالديف في انواع مختلفة من المساج اختار اي نوع واي مكان واعملو بيفرق كتير في الاسترخاء والراحة النفسية وسعرو للفرد بيكون في الاماكن العادية 45 دولار للفرد وفي الريزورتس والاماكن والجزر الغالية ممكن يوصل 115 دولار
اخر اليوم حضرنا شنطنا وريحنا علشان كانت طياراتنا الساعه 8 الصبح وكان لازم نكون هناك من بدرى
معلومات قد تهمك : العملة الرسمية للمالديف هي : الروفية والدولار الواحد بيساوى 15.35 تقريبا ولكن لما حتيجي تحول من الفندق او محل حيدهولك بقيمة اقل طبعا حاول تجيب احسن سعر
فيه خطوط اتصالات بتاعت الدولة شايفاها غالية بشكل ما يعني سعر اقل خط كان ب 30 دولار وبيديك باقة نت 1.2 جيجا النت مهم اه بس سعر الخط عجيب شوية ممكن تحاولو تسالو الفندق لو بيقدر يقدملكم خط بسعر احسن
الاسعار شايفاها غالية حبتين سوا كاكل او انشطة بس البلد تستاهل الصراحة نظافة والفه من الناس وهدوء ظريف عن نفسي برشحها لشهر العسل جدا
بيقولو انو اسوء فترات هناك للجو هي شهر 7 و 8 فا يفضل عدم الذهاب في الاوقات دي
خدو معاكم قبل ما تسافرو سناكس كتير شيبسي عصاير بسكوتات اي مسليات بتفرق كتير وبتوفر بردو كتير معاك سواء في الليل لان مفيش اي انشطة ليلية
ممكن بردو تاخد فلاشة عليها افلام او اي حاجة تسليكم فترة المساء بردو لنفس السبب اللي فات
عموما لاي بلد اسيوية حتسافرها ممكن تاخد معطر جو لان ساعة ريحة الاكل بتبقى مش مريحة