هولندا
في البداية هتلاقي الفيديو ده و الفيديو ده فيهم كلام تفصيلي عن خطوات التقديم لهولندا
===========================
خطوات التقديم فى سفارة هولندا وبرنامج سياحى بالتفصيل..
السلام عليكم ورحمة الله وبركاته أولا
هبتدي مع حضراتكوا موضوع جديد من مواضيعي فى الجروب الرائع ده
والنهاردة هتكلم عن هولندا .. ولما أذكر هولندا يعني الورود وصناعة الجبنة وطواحين الهواء
**
وهولندا ودول أوروبا عموما فيها برده موضوع إسترجاع قيمة الضريبة وانا شرحت التفاصيل فى موضوع تايلاند وتقريبا نفس الخطوات.
**
وخلى بالكوا كلامي هيكون كتييير عشان لاقيت كل الناس هنا فى الجروب بتحب التفاصيل فشرحت كل حاجة
أول حاجة هتكلم فيها عن خطوات التقديم للحصول على التأشيرة الهولندية
بيتم عن طريق مكتب VFS Global وبيتم التقديم عن طريق الموقع بتاعهم
http://www.vfsglobal.com/netherlands/egypt/
كل الخطوات هتلاقيها فى الموقع وسهل وبعد ما تكمل كل الخطوات هتروح المكتب
وطبعا الورق المطلوب:
حجز طيران - حجز فندق - كشف حساب بنكي (يكون لآخر 6 شهور) - صورة شخصية عادية حديثة 3*4 بخلفية بيضاء - والباسبور طبعا يكون باقي على انتهائه مش اقل من 6 شهور (وتقوم بتصوير الباسبور ورقة بياناتك صورة) - وصورة الإقامة بالنسبة لغير المصريين المقيمين فى مصر - ورقة جواب عمل (وبالنسبة لأصحاب الشركات السجل التجاري والبطاقة الضريبية) - وبالنسبة للطلبة شهادة قيد من الجامعة - ولو عندك معاش استخرج ورقة رسمية بمعاشك - ولو معاك تأشيرات شنجن سابقة أو أمريكا أو انجلترا أو كندا (بتقوم بتصويرهم عشان هتقدمهم مع الورق) - تأمين طبي يغضي فترة إقامتك فى هولندا وده من أي شركة تأمين معتمدة - شهادة تحركات (وأحيانا يتغاضوا عنها لو انت معاك تاشيرات شنجن قبل كدة أو لو باسبورك مش جديد) - وطبعا الأبليكيشن.
وطبعا كل الورق لازم يكون انجليزي (وأي ورقة بالعربي لازم تترجمها من مركز ترجمة معتمد)
والمكتب ده طبعا بتتعامل مع موظفين مصريين (ليس لهم علاقة بالموافقة أو رفض التأشيرة) (بس فى نفس الوقت خد بالك عشان ليهم نظرة برده وتقييم بيعملوه فى الخباثة )
بعد ما تقدم كل الورق ويتأكدوا ان ورقك كله مضبوط بتسيبلهم كل حاجة حتى باسبورك وفى غضون اسبوعين بيجيلك رسالة انك تيجي تستلم الباسبور أو بيجيلك على البيت لو انت طلبت كدة من الأول (وساعتها هتعرف سواء خدت التأشيرة ولا لأ).
محلوظة: هولندا بتختم على الباسبور (والختم على فكرة ليس ختم رفض ولكن ختم معناه ان الباسبور تم دخوله السفارة) - وانا الحمد لله واحد من اللى خدوا الختم ده أول مرة اقدم فيها لهولندا :D
فى خطوط طيران كتير بتروح هولندا ومنها مصر للطيران والمسافة تقريبا من القاهرة لأمستردام بتاخد 5 ساعات.
نصيحة 1:
انا فى معظم المعلومات والأماكن اللى بقول عليها بقولكوا الويب سايت بتاعهم على النت مش مجرد حاجة زيادة بكتبها ولكن انا شخصيا قبل ما اسافر أي دولة بشوف كل المواقع اللى تخص الدولة دي واخد افكار عنها (بالبلدي كدة بحسها قبل ما اروحها)
وأكيد أكيد أكيد زيارة أي ويب سايت هيفيدكوا.
نصيحة 2:
بالنسبة لأي حد أول مرة يسافر شنجن (أو حتى لو سافر قبل كدة) وكلامي ده مش للشنجن بس نصيحة مني أنه يكون معاه مبلغ وليكن 1000 يورو وفيزا كارت لحسابه عشان أحيانا ضابط الجوازات بيكون رخم وغير أنه بيسأل عن حجز الفندق وتيكيت طيران العودة ممكن يسأل ويطلب يشوف الفلوس اللى معاك هيشوفها وتوريلوا كارت الفيزا بتاعك وتقوله معايا برده فيزا.
حصلت قدام عيني أكتر من مرة ان ضابط الجوازات رفض يدخل ناس.
نصيحة 3:
دايما قبل أي سفرية اسحب صورة باسبورك وتأشيرتك سكانر وخليهم على فلاشة معاك واطبعهم ألوان وخليهم معاك لما تسافر
لاقدر الله لاقدر الله لاقدر الله لو حد ضاع باسبوره فى السفر بتبقى مشكلة كبيرة أول حاجة بيروح قسم الشرطة يعمل محضر (وأحيانا الضابط يكون رخم ويشك أنك عامل هجرة غير شرعية أو كاسر الفيزا فيتلكك) عشان كدة تبقى معاك صورة باسبورك وتأشيرتك عشان يشوفهم وبعد ما تعمل محضر بتروح السفارة المصرية عشان يطلعولك وثيقة تسفر عشان ترجع بيها مصر، وبيرخموا فى المطار فى مصر كتحقيق عشان باسبورك الى ضاع.
مطار هولندا
Amsterdam Airport Schiphol https://www.schiphol.nl/en/
مش عارف ليه اشمعنى المطار ده بالذات وانت واقف قدام البوابة برة تحس انك مبسوط :D
المواصلات من المطار فى قطار كل شوية لمنتصف البلد Amsterdam Centraal التذكرة فى حدود 4 يورو تقريبا
وممكن التاكسي لمنتصف البلد ياخد تقريبا 50 يورو
دلوقتي هبتدي معاكوا البرنامج السياحي والأماكن اللى تزورها:
متحف ريجكس (المتحف الوطني) Rijksmuseum
بيفتح من 9 الصبح وحتى 5 العصر
سعر التيكيت ب 16 يورو
(على فكرة فى ناس بتقول يورو وناس بتقول إيرو وناس بتقول أورو عادي كلهم صح كل واحد حسب لغته :D ) (والهولنديين بيقولوا إيرو)
ممكن تحجز أونلاين وممكن تحجز وانت هناك
متحف روعة بس للناس الى بتحب الكلام ده
لو هتمشي بينه وبين الدام سكوير تقريبا نص ساعة مشي (حوالى 2 كم)
انا عن نفسي بحب اتمشى اوي
المتحف موجود فى Museumstraat
متحف أني فرانك Anne Frank House
بيفتح من 9 الصبح وحتى 3 العصر للحجز الأونلاين
وده الموقع اللى عايز يروح يحجز أونلاين
سعر التيكت 9 يورو
ولو حجزت مش أونلاين المتحف هيكون من 3 العصر وحتى 10 مساء فى الشتاء
وفى الصيف حتى 7 مساء
والمتحف ده موجود فى Prinsengracht
وبرده قريب من الدام سكوير ممكن تروحوا مشي (هتعد حوالى 10 دقايق)
ولو المترو 14 ناحية Slotermeer وهتمشي شوية صغيرين
وعلى فكرة انا اشتريت قبل كدة من سوبر ماركت حاجات ب 19 يورو إداني شريحة خط تليفون مجانا :
متحف فان جوخ Van Gogh Museum
طبعا مش محتاج اني اتكلم عنه
وده الموقع بتاعه
https://www.vangoghmuseum.nl/en
التيكيت ب 16 يورو
طريقه 172 ناحية Raadhuisstraat بالترام
يعتبر بعيد شوية ولكن مش اوي يعني برده تروحوا مشي ممكن تعد نص ساعة.
أمستردام عموما مدينة متعتبرش كبيرة أوي .. وساحرة ساحرة ساحرة
فخلوا معظم تنقلاتكوا تبقى مشي حتى عشان تكتشفوا جمالها
وأمان جدا والبوليس منتشر فى كل مكان
ومعظم الشعب هناك بيتمشوا بالعجل
ونصيحة اشتروا كارت GVB وبراحتك ممكن تشتريها ليوم أو اكتر عشان تركبوا بيه سواء المترو أو الأتوبيس
الساعة ب 3 يورو واليوم كامل تقريبا ب 16 يورو واليومين ب 21 يورو وال3 ايام ب 26 يورو
وده الموقع بتاعهم
وممكن تشتروا الكارت من المطار
هتلاقوا كوبونات بتتوزع عموما تخفيضات ممكن تحتاجوها وخرائط لأمستردام مجانا أكيد هتفيدكوا
متحف الشمع Madame Tussauds
يعني الروعة والخيال
https://www.madametussauds.com/amsterdam/en/
(بس انا مدخلتوش عشان دخلته فى دولة تانية)
وده عند الدام سكوير يعني مش هتمشي كتير
وطبعا لازم تروح البرت كب Albert Cuyp
تعمل شوبينج هناك وهتلاقي عرب كتير ومحلات عرب
مشي ممكن تاخد تقريبا نص ساعة من الدام سكوير
بالمترو 4 ناحية محطة RAI
حديقة الحيوانات أرتيس Artis Royal Zoo
http://www.artis.nl/nl/language/visitors-information/
روووووووووعة
والتيكيت فى حدود 20 يورو
وقريبة من الدام سكوير (مشي تقريبا اقل من نص ساعة)
ولو بالترام 14 ناحية Flevopark هتنزل Paleisstraat
حديقة الورود كيوكنهوف keukenhof
مش هتكلم عنها ولكن لو مروحتهاش يبقى انت مروحتش هولندا ( الموضوع منتهي :D )
على فكرة بتفتح من مارس لمايو فقط طول السنة
التيكيت فى حدود 16 يورو تقريبا (معرفش الصراحة ايه حكاية رقم 16 معاهم :D )
معرفش بصراحة اوصف طريقها لكن بالعربية من الدام سكوير ممكن تاخد تقريبا ساعة
حديقة فوندل بارك Vondelpark
ودي مشي تقريبا نص ساعة من الدام سكوير
ودي بالترام طريقها 2 ناحية Nieuw Sloten هتنزل فى Leidseplein
زحمة جدا وضخمة جدا ورووووعة وفيها عروض كتيييرة جدا سواء مسرحية أو موسيقى أو حفلات.
الحي الصيني Nam Kee
تجربة مختلفة وغريبة جربوها
ومش بعيد عن الدام سكوير
مشي تقريبا 10 دقايق
وبالنسبة عموما للدام سكوير Dam Square
لو قعدت قدامه طول اليوم مش هتزهق هتلاقي طول الوقت وفى كل مكان فعاليات واحتفالات ومهرجانات :D
(اللى عايز اقوله ان كلمة السر فى امستردام هيا الدام سكوير)
وجنب الميدان شارع الدام راك damrak يعني المتعة ومش هتلاحق على الزحمة والفعاليات فيه ومليان محلات وكافيهات ومطاعم منها مصرية وتركية وأنواع كتير.
معلومة بقى ..
شارع الدام راك مليان شركات سياحة بتعمل رحلات سياحية سواء داخل أمستردام أو خارجها
يعني زيارة متاحف أو كروز (رحلة نهرية حول أمستردام) ودي طبعا لازم تطلعها أو زيارة الحدائق أو مدن أخرى.
وأمستردام على فكرة مشهورة بالشوبينج والمحلات التجارية الكتيييييرة جدا وحتى بيع الأشياء المستعملة
ودي أشهر أماكن الشوبينج (سواء غالية أو رخيصة):
Leidsstraat
Kalverstraat
Nieuwendijk
Museum
واحد هيقولي طب انا كدة زورت الدام سكوير وشوية متاحف وحديقة الحيوانات والورود والرحلة الكروز حول أمستردام (كدة كفاية وتمام؟)
أقوله انت كدة كأنك مسافرتش هولندا أصلا
الى هقولكوا عليها دي لو مروحتوهاش يبقى ملهاش لازمة سفرية هولندا كلها
لازم لازم لازم تطلعوا قرية عشان تزوروا الريف الهولندي (الريف الأوروبي) وطواحين الهواء (من علامات هولندا) ومصانع الجبن والقباقيب (أيوا قباقيب محدش يضحك :D )
Countryside and Windmills
فى قرى كتير وفى شركات السياحة عندهم اختيارات .. وعلى فكرة لو انت بتحب المغامرة مع نفسك (اسأل واطلعها مع نفسك بالقطار بس هيطلع عينك :D )
فى قرية Volendam للصيد والأسماك
وفى قرية Marken
وفى قرية Zaanse Schans يعني سحر وجمال طواحين الهواء والريف الأوروبي ومصانع الجبنة (وممكن تدوق بس مش مسئول لو أغمى عليك من الجمال)
معرفش ليه القرية دي نفسيا كدة عاملة زي الهروين تخليك تدمنها ومتسبهاش وفكرت والله اني اصفي كل شغلي واجي اعيش فيها (تقريبا بيعملوا تنويم مغناطيسي للي بيروحها :D )
شوفت بنات هناك فى المزارع (كنت هعيط وربنا :D )
ومع شركة السياحة الرحلة ممكن تكون فى حدود من 40 إلى 50 يورو
(أنا فى كل حاجة بقولكوا الأسعار عشان يكون عندكوا خلفية عشان الميزانية وعشان تاخدوا بالكوا هناك)
والتنقل عموما بين المدن فى هولندا راااااااااااائع وهتتمتع بمناظر الريف والأراضي الزراعية.
وفى الآخر لو لسة عندك يوم فاضي وعايز تروح مكان مختلف ممكن تسافر مدينة روتردام Rotterdam
مدينة جميلة جدا جدا جدا جدا وفيها بيوت مبنية بأشكال هندسية غريبة جدا جدا.
بينها وبين أمستردام تقريبا ساعة ونص بالعربية
================================
رأيي الشخصي المتواضع الذي لاقيمة له فى نظام السفرية عموما
(هولندا مش اكتر من 5 ايام) أمستردام اخرها 3 ايام ممكن تعمل حسابك يوم فى الدام سكوير والشوارع اللى حواليه وزيارة متحف أو اتنين وتعمل شوبينج أو براحتك واليوم التانى ممكن حديقة الحيوانات أرتيس أو حديقة الورود أو حديقة فوندل بارك وباقي اليوم طبعا برده تلف فى الشوارع (عايزك تدن زي النحلة لحد ما رجلك متحسش بيها من كتر المشي :D ) واليوم التالت رحلة سياحية محترمة مع اي شركة سياحة حول مدينة أمستردام بالباص والكروز واليوم الرابع تفضي نفسك بقى لرحلة الريف الأوروبي وطواحين الهواء ومصانع الجبنة.
ولو لسة قدامك وقت فى هولندا ممكن تروح روتردام .. وطبعا مينفعش تسافر السفرية دي كلها عشان تعد فى هولندا وبس .. لازم تعمل حسابك على ليلة تقضيها فى بلجيكا.
***
فى طبعا طرق كتير ممكن تسافر بيها داخل أوروبا سواء ب
Rayan Air
https://www.ryanair.com/gb/en/
أو
Easy Jet
أو
بالقطار
ولو انت بتحب اللف الكتير وتستغل كل فرصة وعايز السفرية تكون إقتصادية وتوفر على قد ما تقدر ممكن برده تستخدم
Flix Bus
كلمة السر فى هولندا (المشي ثم المشي ثم المشي)
كلمة السر فى أي سفرية عموما (التغيير - التنوع - التجديد - المغامرة - الإكتشاف)
ومتستغربوش هتلاقوا المخدرات بتتباع عادي فى اي سوبر ماركت وفى الكافيهات (مسموح ببيعها قانونيا)
وبكدة نكون انتهينا من رحلة دولة السحر والجمال (هولندا) وإن شاء الله اتكلم عن رحلات لدول تانية قريب
(فى صور كتير عشان تتخيلوا المدينة والشرح اللى انا شرحته)
اتمنى الكلام ده يكون فيه إفادة - وبالتوفيق للكل (وأي استفسار انا تحت أمركوا)
ورحلة سعيدة مقدماً
===============================
دليل السفر إلى أمستردام
( أماكن سياحية / حدائق / أسواق / مطاعم )
نبدا بالشوبينج
الشوارع التجاريه :
( 1 ) Leidsstraat
( 2 ) Kalverstraat
( 3 ) Nieuwendijk
( 4 ) PC Hoofdstraat
كلو ممكن تروحو مشي معادا hoofdstraat
المولات
( 1 ) Magna Plaza shopping center : يقع في ساحة دام سكوير
( 2 ) Bijenkorf shopping center : يقع في ساحة دام سكوير
( 3 ) Kalvertoren shopping center : ويقع في دام سكوير وبالتحديد في شارع يحمل نفس الاسم على مسافة ميل .
( 4 ) Shopping Center Barones
( 5 ) amsterdamse poort - shopping center
( 6 ) فيلا أرينا villa arena: مجمع الرائع / العنوان
العنوان : *De Entree 1, 1101 BH Amsterdam Zuidoost
الساحات المشهورة في أمستردام :
• دام سكوير dam square: كل الطرق في أمستردام تؤديك في النهاية إلى ساحة دام الشهيرة، فهي القلب النابض للعاصمة وتضم القصر الملكي، وفيها تشاهد الحياة الهولندية على طبيعتها وحقيقتها وتنتشر فيها المطاعم وتستقل منها المراكب السياحية الصغيرة لتطوف بك في قنواتها الجميلة .
• ساحة ليدين Leiden Square : تنتشر في تلك الساحة أغلبية المطاعم والمقاهي ومحلات بيع القهوة
• جوردان The Jordaan : إنها منطقة جميلة بمحاذاة القناة وتعني الحديقة باللغة الفرنسية Le Jardin كلها شجر وفيها بيوت يعود تاريخ بنائها إلى القرن السابع عشر و فيها محلات التجارية الراقية والمطاعم الفرنسية ومحلات بيع القهوة، جاءت تسميتها بعدما كان الفرنسيون أول من جاءوا واستقروا فيها منذ آلاف السنين .
• مينت سكوير mint squar : اشتهرت بوجود برج Mint Tower والذي تأسس في القرن الــ 17 .
هولندا الصغرى في مدينة الأقزام ( madurodam ) :
• يمكن للسائح في أسرع رحلة بالعالم أن يزور ويشاهد هولندا خلال نصف ساعة فقط، في مدينة صغيرة لا تزيد مساحتها على ألفى متر مربع، يطلق عليها "مادورودام" أو هولندا الصغرى. فهي نموذج مصغر، ومطابق لهولندا التي تبلغ مساحتها في الواقع نحو 36 ألف كيلو متر مربع.حيث تحتوي على العديد من الأماكن السياحية و المشهورة في أمستردام مثل ساحة دام سكوير، نموذج لبرج يورو ماست، نموذج للقصر الملكي إلى آخره متعة في التجول حول هذه الأماكن وأنت تشاهد هولندا كاملة بأقل من ساعتين
أكثر حاجه ممتعه هو مجسم لشاحنة لو حطيت 20 سنت يفتح باب الكراج وتخرج من الكراج إلى أن تقف أمامك وهي محملة بشيكولاته ( كافي مارس ) "لاهاي" (Den Haag). كل ما تتميز به هولندا ستجده في تلك الحديقة بمقياس مصغر .
العنوان : تقع في مدينة Den Haag أو ما نسميها نحن العرب لاهاي
Madurodam B.V
George Maduroplein 1
RZ The Hague 2584
The Netherlands
طواحين الهواء :
• zaanse schans : هنا بقا تيجي هولندا الحقيقية ( بلد الطواحين ) و انت ماشي علي رجلك هتلاقي نفسك بين الطواحين بينها و بينك كام سنتي .قي الشمال .
- كما تشتهر هذه المدينة أيضاً بصناعة الجبن او ( مدينة الجبن ) كما توجد أيضاً ألزبده بأنواعها إضافة إلى الأجبان بأنواعها، و
الموقع الرسمي: www.zaanseschans.nl
• مكان أخر رائع للطواحينKinderdijk : الموقع الرسمي : Welcome to Kinderdijk .
حدائق :
• ( متحف + حديقة ) Palais Het Loo : العنوان
* Address : Koninklijk Park 1, Apeldoorn, HollanD , Opening times April to October, Daily, 10am to 5pm , Admission Entrance fee / Nationaal Museum Paleis Het Loo / Website .
• Keukenhof : العنوان
* Address : De Keukenhof, Stationsweg 166a, AM Lisse, Holland, 216152.2558 Opening times End March to end May / Keukenhof –
• Amsterdamse Bos : العنوان
* Address : Amstelveense weg, Amsterdam, Holland, Opening times All year , Daily , Open dawn to dusk , Admission Entrance free / Amsterdamse Bos
• ( قصر + حديقة ) Kasteel Warmelo : العنوان
* Address : Stedeke 11, 7478 RV, Diepenheim (OV), Holland Welkom op de / Website van Kasteel Warmelo
• حديقة فونديل Vondelpark : تعتبر أشهر حديقة في أمستردام، يعود تاريخها إلى عام 1850.
* Address : Stadsdeel Amsterdam Oud Zuid , t.a.v. projectgroep renovatie Vondelpark , Postbus 51160 , ED Amsterdam 1007 .
( Giethoorn ) الهولنديه أو مايسمى فينيسيا الهولندية :
• جسور خشبيه وقنوات مائيه لايمكن عدها وتحفها حدائق في قمة الروعه وبيوت ريفيه تكاد تسرق العين، وإذا كنت تحس ببعض النشاط يمكنك استئجار قارب ريفي بسيط تجدف به بنفسك او ركوب أحدى القوارب التي تعمل بالمحرك .
* Address : Rondvaart- en Botenverhuurbedrijf , 't Zwaantje , Postadress: Ds. T.O. Hylkemaweg 1 , CD Giethoorn .
( قرى الصيد التقليديه ) Volendam :
إذا أردت الطبيعة الهولندية الشهيرة بجمـــالها فعـلاً ! هتلافيها في رحلــة اسمهـا Edam Countryside Tour ، المكان يبعد عن المـدينة ساعــة هـــي عبـارة عن قـرية للصيــد ( يشبه المينـاء الصغيــر ) مناسب للمشي وممكن أن تأخذ جـولـة بإحدى القوارب
( قرية ماركن ) marken :
• تقع على البحر والتي تتميز بوجود السكان الهولنديين الأصليين بملابسهم التقليدية ولبسهم للأحذية الخشبية.
مطاعم :
• يوجد في أمستردام كل المطابخ العالمية لاسيما الأرجنتينية والاسبانية والهندية والفرنسيةبس لو عايز اكله البلد فطائر «البان كيك» أسعارها ما بين 5 و10 يــــورو. نذكر أهـــمها ( كافيه تـــي سمول ) ( Café t Small ) أقدم محل لبيع القهوة في أمستردام، ويعود تاريخه إلى عام 1786:
( 1 ) Zina ( مطعم مغربي )
العنوان : Bosboom Toussaintstraat 70, Amsterdam, The Netherlands 1054
( 2 ) Pakistan Restaurant ( مطعم باكستاني )
العنوان : Scheldestraat 100, Amsterdam, Noord-Holland 1078
( 3 ) Jerusalem ( مطعم القدس الفلسطيني )
( 4 ) المطعم العربي دانه