الشرح الوافى لفيزا بريطانيا

​

كتير وصلنى اسئله على الخاص وكتير فى تعليقات ومتطلبات غلط سواء عن عمد او بالخطأ

هنبدا خطوه بخطوه علشان نسهل الموضوع

​

1- أول خطوه وهو التسجيل على الموقع على الرابط ازاى تسجل

تدخل على الرابط ده

https://www.visa4uk.fco.gov.uk/home/welcome

​

مطلوب منك ايميل وقم سرى الرقم السري لازم يحتوى على حرف كبير كابتال يعنى وعلامه زى مثلا@ وارقام.

يعنى خليط بيسالك عن الاسم الاول والاخير وتاريخ الميلاد وبلد الاقامه والجنسيه ورقم تليفون.

2- بيوصلك رابط تفعيل على الايميل بتفعل منه الحساب

خلصت التسجيل تبدا فى الطلب بعد ماتدخل فى الحساب زى اللى فى الصوره.

​

3- بيكون عندك اختيارين طلب لنفسك او طلب لشخص اخر

بتعمل طلب لنفسك بيحولك مباشره لصفحة تعليمات ايه المطلوب وهكذا بتعمل استمرار.

تفتح اول صفحه اللى فيها بياناتك اللى كنت مسجل بيها وبتكون ناقص فيها حاجتين بس وهما رقم الجواز وتاريخ الوصول لانجلترا , بعد ماتكتبهم بيظهر مباشرة 3 اختيارات جديده.

• سبب الزياره ( زياره او دراسه او عمل او ترانزيت الخ) بتختار طبعا اللى يناسبك وليكن زياره.

• بعد كده نوع الفيزا( سياحه او عمل او زواج او علاج الخ) خلينا فى السياحه.

• بعد كده مده الفيزا 6 شهور او سنتين او 5 سنين او 10 سنين طبعا بتختار المده وكل مده وليها رسوم مختلفه.

​

مجرد ماتحتار مده الفيزا المطلوبه بيسالك 3 اسئله طبعا كل واحد هيجاوب بالمناسب الاسئله هى

• ناوى تشتغل فى انجلترا

• هل هتزور حد قريبك وهتقيم معاه

• هل ناوى تدرس فى انجلترا

• بعد الاجابه تبتدى الطلب

الطلب سهل جد ا بس طويل شويه كلها اسئله روتينيه وبيانات شخصيه عنك والعنوان اللى هتقيم فيه فى انجلترا. , مكان اقامتك او مقيم فى دوله تانيه. , معلومات عن شغلك ووظيفتك وتاريخ سقرك الخ.

اهم نقطه وهى نقطه الدخل الشهرى وتوزيعه على مصروفاتك الشهريه وتكاليف الرحله والنقطه دى تقريبا عليها عامل كبير فى الموافقه على الفيزا لذلك كنت عامل ليها بوست خاص.

لو عندك املاك او شهادات استثمار او اى طريق بتتحصل منه على دخل فى اسئله عنه فى نقطة الدخل الشهرى بتشرح فيه كل اللى انت عاوزه بس مش معنى كده تقدم مايثبت زى حجه الارض والبيت والميراث الشرعى مش كده ياجماعه لو احتاجو يطلعو على اثبات هما نفسهم بيقولو متقدمش اللى مش مطلوب الا لما نقولك.

وتنهى الطلب باماكن الزياره او الاماكن اللى ناوى تزورها فى انجلترا ودفع الرسوم وحجز موعد.

تروح فى الموعد تبصم وتتصور هناك حتى الاطفال ياجماعه لازم يبصمو ويتصورو كمان مفيش اى استثناء.

المطلوب للتقديم فقط

1- الابلكيشن اللى حضرتك قعدت تكتب فيه تطبعه وتاخده معاك.

2-كشف حساب البنك لاخر 6 شهور وطبعا يكون واضح فيه الراتب.

3- رساله العمل HR واضح فيها الراتب وتاريخ الالتحاق والمسمى الوظيفى.

غير مطلوب

1- تامين السفر والله العظيم مش مطلوب.

2- حجز الطيران اقسم بالله مش مطلوب.

3-حجز الفندق ............... مش مطلوب.

4-رخصة العربيه وحياه ابنى مش مطلوب.

5- ملكيه الشقه عليا ........ انتو كملو بقي.

نصايح

​

• متعملش ايداع بمبلغ كبير وتطبع كشف الحساب

• متعملش سحب وايداع كلها حركات مكشوفه لانه فى الاخر هو مبلغ مبيتغيرش مجرد ينقص ويرجع وخلاص.

• بلاش اوراق اكتر من المطلوب ملوش لازمه

• اثبات الاستقرار هو الاساس فى الموافقه.

ارجو ميكنش فى حاجه ناسيها وان شاء الله اقدر ارد على اى استفسار

============================
 

#تأشيرة_المملكة_المتحدة_UK

المملكة المتحدة أو بريطانيا العظمى تضم كل من سكوتلاند و إنجلترا و أيرلندا الشمالية و ويلز

(جمهورية أيرلندا لها فيزا مستقلة)

​

هى كانت جزء من الإتحاد الأوروبى حتى تم التصويت على الإنفصال فى يونيو 2016 Brexit و لكن حتى الآن لم يتم إتخاذ أى إجراءات بخصوص الخروج

​

يتم التقديم على الفيزا الخاصة بها من خلال tlscontact سواء بالإسكندرية أو القاهرة

الأبليكيشن الخاص بها أنا أعتبره من أغلس الأبليكيشنز اللى ممكن تملاها للحصول على تأشيرة

خطوات التقديم:

- أولا يفضل إنك تدخل على الموقع https://www.gov.uk/browse/visas-immigration للتعرف على جميع الإجراءات و أنواع الفيزا المختلفة سواء كانت سياحة أو زيارة عائلية أو دراسة .... إلخ

​

ملحوظة يوجد موقعين للأبليكيشن و كل واحد فيهم له أنواع فيزا معينة الموقعين هم

https://visas-immigration.service.gov.uk/product/uk-visit-visa

و

https://www.visa4uk.fco.gov.uk/home/welcome

- بالنسبة لفيزا السياحة أو الزيارة يتم الدخول على موقع https://www.visa4uk.fco.gov.uk/home/welcome و يتم عمل أكونت عليه و بعد ما يوصلك إميل بالتأكيد بتقدر تدخل على الأكونت بتاعك و بتبدأ خطوات الأبليكيشن

-لما بتدخل على الأكونت بتلاقى فى كذا أوبشن

• لو بتقدم لنفسك Applying for myself

• أو applying for someone else لو بتقدم لحد تانى من نفس الأكونت

• أو view my applications لو عايز تدخل على الأبليكيشنز اللى إنت عاملها

بتختار أوبشن applying for myself بيطلب منك تدخل بعض البيانات الأساسية زى الإسم و تاريخ الميلاد و رقم الباسبور و تايخ السفر و الجنسية – بعد كده بيطلب منك تختار نوع التأشيرة اللى هتقدم عليها و بتضغط على create فبيدخل على صفحة الأبليكيشن

-الأبليكيشن بيتكون من 7 أجزاء و كل الأجزاء الخاصة بالأبليكيشن لازم تتملا و كل ما تكمل جزء منها هيتحول من اللون الأسود للون الأخضر

-يفضل إنك تكون عامل حجز فندق مبدئى لأن فى الأبليكيشن هيطلب منك تدخل العنوان اللى هتنزل فيه

-بعد ما بتخلص كل أجزاء الأبليكيشن و تراجعها كويس جدا و تتأكد أنها سليمة بتعمل submit

-الخطوة اللى بعد الأبليكيشن إنك بتملا زى إقرار أو تعهد بصحة البيانات اللى فى الأبليكيشن

-بعدين بيفتح لك المواعيد المتاحة و بتختار الموعد المناسب لك سواء فى القاهرة أو فى الإسكندرية مع الأخذ فى الإعتبار إن مكتب إسكندرية فيه رسوم زيادة حوالى 60 دولار تقريبا و بيوصلك إيميل تأكيد بالموعد و العنوان

-بعد كده بينقلك لصفحة تانية بتروح تدفع عليها و للأسف المشكلة إن الدفع أون لاين هو الأوبشن الوحيد المتاح عندهم بعد الدفع بيوصلك إيميل تأكيد الدفع

-بعد كده بتسجل على موقع المكتب الوسيط https://uk.tlscontact.com/eg/aly/splash.php

و بتختار إسكندرية أو القاهرة و بتعمل أكونت على السايت بعد ما بيوصل لك إيميل التأكيد بتدخل على الأكونت بتاعك و بتعمل أبليكيشن بسيط برقم GWF بتاع الأبليكيشن بتاعك و برضو هيوصل إيميل تأكيد

-بعد كده بتطبع الأبليكيشن و توقع عليه و بتطبع إيميل تأكيد الدفع و بترفق المستندات المطلوبة و المناسبة لنوع الفيزا اللى مقدم عليها و اللى هى مبدئيا بتكون:

- الباسبور و أى باسبورات قديمة و صور منها و كل الصفحات اللى عليها أختام و تأشيرات

– كشف حساب بنكى عن ال 6 شهور اللى فاتت و أى مصدر للدخل كتبته فى الأبليكيشن لازم تقدم دليل عليه

– خطاب من جهة العمل للموظفين أو سجل تجارى و بطاقة ضريبية لأصحاب الأعمال الخاصة أو شهادة قيد للطلبة

– حجز الفندق اللى كتبت عنوانه فى الأبليكيشن

(شهادة التحركات – حجز الطيران – التأمين مش مطلوبين للفيزا) لكن الناس اللى فى المكتب مش بيقولوا لأ على أى ورقة بتقدمها بصراحة بياخدوا أى حاجة

طبعا اى أوراق و مستندات بتكون مترجمة للغة الانجليزية

- فى مجموعة من الخدمات طبعا إسمها added value services فى حالة إنك مستعجل على الفيزا أو عايز تحتفظ بالباسبور معاك لحين الإنتهاء من الإجراءات أو إنك تستلم الباسبور بال DHL هتلاقوها على السايت و برضو بتتدفع أون لاين وإنت بتعمل الأبليكيشن

https://uk.tlscontact.com/eg/CAI/page.php?pid=added_value_services

​

-اليوم اللى بتروح فيه الموعد بيتم إستلام الباسبور و المستندات و بيتم عمل بصمة ألكترونية و بصمة صوت و بيتم التصوير هناك (مش بيحتاجوا صور شخصية) و بتوقع ألكترونى

- مافيش إنترفيو المكتب وظيفته إستلام الورق فقط

- سعر التأشيرة (الـ 6 شهور) 125 دولار (مكتب القاهرة) و 190 دولار (مكتب إسكندرية)

- فى تأشيرات سنة و سنتين و لحد 10 سنوات و لكل تاشيرة لها سعر مختلف لكن لو أول مرة تقدم يفضل تقدم على ال (6شهور) لأنك لو طلبت أكتر من كده لازم تثبت إن فى سبب مقنع يخليك تحتاج تسافر بصفة مستمرة

- التأشيرة بتاخد 14 يوم تقريبا و بعدين بيوصلك رسالة إن الباسبور جاهز إما بتروح تستلمه بنفسك أو عن طريق شركة الشحن حسب ما إخترت و إنت بتعمل الأبليكيشن

حبة نصايح كده فى السريع

* الأبليكيشن طويل و مش شرط إنك تخلصه كله مرة واحدة بس نصيحة إنك كل ما تسجل معلومة تعمل لها save لأن ساعات الموقع لما بيحس إنك idle بيعمل log off من نفسه و لو مش عامل حفظ كل الداتا اللى دخلتها بتضيع

* التركيز مهم و إنت بتعمل الأبليكيشن عشان فى أسئلة بتكون مكررة بس بصيغة مختلفة (نظام توقيع)

* ماتعملش submit للأبليكيشن غير لما تكون راجعته أكتر من مرة و تأكدت إن المعلومات صحيحة

* لو عملت submit للأبليكيشن و إكتشفت إنك كتبت معلومة غلط أو عايز تغيرها لو إنت لسه مادفعتش إعمل أبليكيشن جديد و القديم بيتلغى لوحده بعد فترة معينة و لو كنت دفعت هتضطر تراسلهم عشان تقدر تعمل refund

ده فى حالة ان المعلومة الغلط حاجة كبيرة ... لو حاجة صغيرة ممكن تعدلها باليد فى المكتب و توقع جنبها

*لو حبيت مستقبلا تقدم تانى على فيزا جديدة مش هتحتاج تعمل أكونت جديد بتدخل بنفس الأكونت اللى إنت عامله سواء على visa4uk أو tlscontact

* اقصى موعد للتقديم بيكون 90 يوم من تاريخ السفر ... ماينفعش قبل كده

معلش البوست طويل بس أنا حاولت أكتب كل الخطوات اللى فاكراها و لو فيه حاجة ناسياها ممكن تفكرونى بيها