السجل التجاري والبطاقة الضريبة

​

 

النهاردة هنتكلم إن شاء الله عن كيفية عمل السجل التجاري والبطاقة الضريبة للي عاوز يحط مهنة في باسبوره اللي عاوز يفتح نشاط اللي محتاج للسجل عشان السفارات

 

مع نفسك مش محتاج محامي والا غيرو لاني سمعت ان في ناس بتعمل السجل وبيصرف عليها 2000 جنية ومحامي وغيرو في حاجة تاخد يومين أو تلاتة وما تصرفش اكتر من 300 جنية

 

الكلام ده عن تجربة شخصية مرتين

 

اولا السجل التجاري

​

ده عبارة عن اللي عاوز يفتح نشاط مثلا بقالة مكتب استيراد وتصدير مقاولات .... الخ

السجل التجاري نوعين  فردي أو شركة

الفردي : ده للشخص نفسة يعني زي مكتب استيراد وتصدير ويكتب ليك ف السجل مكتب مقاولات وزي كدا .

الشركة : ده يكتب ليك فية صاحب شركة مقاولات عامة مثلا صاحب شركة ملابس ع حسب نشاطك

وده لازم يكون شخصين فية أو اكتر ما ينفعش شخص لوحدة يعمل شركة لأن فية عقد شراكة بينهم فيكتب ليهم شركة كذا كذا .

​

​

ثانيا البطاقة الضريبة

وده بطاقة عن ضرائب النشاط بتاعك ودي اللي بتطلع السجل من غيرها مش هيطلع ليك سجل تجاري

لأن لازم تطلعها الأول قبل السجل وما حدش يخاف ويقول يجي عليا ضرائب

اكيد مافيش ضرائب لأن مش هتشتغل اصلا ومعروف انك هتطلع ده مجرد روتيني عشان تغير الباسبور والسفارات

بس تابع مع مصلحة الضرائب كل سنة أفضل ربما يحطوا ضرائب .

​

ثالثا كيفية عمل السجل التجاري والبطاقة الضريبة والأوراق المطلوب والخطوات .

​

استخراج البطاقة الضريبية بيكون من مصلحة الضرائب الخاصة بك

استخراج السجل التجاري بيكون من الغرفة التجارية

في المحافظة بتاعتك

​

اولا عقد ايجار

• وده تجيبو من أي مكتبة ب 50 قرش  

• بعد ما تجيب العقد ده تملاه وطبعا كلو شئ روتيني

• تكتب اسمك فية واسم اللي هياجر ليك وليكن اخوك صاحبك  

• وبعدين تكتب مده العقد ولتكن 5 سنوات وسعر الإيجار

• وتكتب الأهم العنوان اللي هو عنوان الشركة أو المكتب

• وتكتب اسم النشاط اللي عاوزه حضرتك والي عاوزه لأن ده اللي هيكتب ليك ف السجل وباسبورك

• زي استيراد وتصدير. .. الخ

• وتكتب وصف للمكان مثلا شقة وزي كدا

 

​

ثانيا توثيق العقد

• بعد كدا تاخد العقد ده وتطلع ع الشهر العقاري توثق العقد ده أو حاجة اسمها إثبات تاريخ ومش بياخد 10 دقايق بحوالي 20 جنية

 

ثالثا تطلع علي مصلحة الضرائب

• ومعاك العقد وصورة منه وصورة بطاقتك ومبلغ 50 قرش

• تروح هناك هيعمل ليك البطاقة الضريبية ويديك مستخرج منها عشان تروح تعمل السجل بية لأن الأصل مش هيطلع غير بعد شهر وبقي زي الفيزا كارت دلوقتي مش ورق كل ده مش بياخد دقيقة

• ملحوظة ممكن يقولك نطلع نعمل معاينة للمكان وممكن لا

• وخدوا معاكم إيصال كهرباء احتياطي رغم ما حدش طلب مني ده

• انا ماحدش طلع والا اخدتش غير دقيقة واحدة كل محافظة ممكن تختلف عن التانية وعندنا في سوهاج ماحدش بيطلع يعمل معاينة اصلا

 

كدا تمام طلعنا البطاقة الضريبة

الخطوة اللي بعدها وهي

​

استخراج السجل التجاري

• بعد ما عملت البطاقة الضريبة تطلع علي الغرفة التجارية في المحافظة بتاعتك ومعاك عقد الإيجار الموثق وصورة البطاقة الشخصية وصورة من مستخرج البطاقة الضريبية والأصول

• وهناك هيطلعوا ليك السجل التجاري بكل بساطة .

 

 

نتكلم بقي علي حتة رأس المال اللي عاوز تكتبه في السجل

لأن أغلب الناس بتفكر أنها لو هكتب مثلا 50 الف يبقي هتدفع 50 الف  , لا الموضوع مش كدا خالص هشرح ده بالتفصيل

 

رأس المال المثبت في السجل التجاري , كل واحد بقي يكتب رأس المال اللي عاوزة في ناس بتكتب 10 آلاف وفي 50 الف وفي 25 وزي ما انت عاوز

​

انت هتدفع رسوم فقط ع رأس المال ومش هتحتاج تجيب ما يثبت أن معاك مبلغ رأس المال .

رسوم المبلغ دي هتكون كالآتي

• المبلغ × 2 يعني المبلغ اللي هتكتب تضربو في 2

 

مثال 20 الف    , يبقي 20 × 2 = أربعين جنية . ونضيف ع المبلغ ده 30 جنية رسوم

 

يبقي الرسوم الإجمالية 70 جنية فقط

 

القاعدة المبلغ × اتنين + 30 رسوم ثابتة = رسوم السجل التجاري .

 

انا طلعت السجل بتاعي برأس مال 60 الف دفعت رسوم علية 150 جنية

120 جنية راس المال و 30 جنية رسوم السجل

 

وطبعا المبلغ ده بيندفع سنويا للسجل لذلك ننصح بإيقاف السجل بعد استخراج الباسبور والحصول ع الفيزا المطلوبة أو قبل بداية السنة الجديدة

 

أو يعمل بمبلغ قليل مثلا 20 الف او اقل وزي كدا هتدفع فيهم 70 جنية كل سنة واقل

 

كدا خلصنا استخراج السجل التجاري والبطاقة الضريبة بنفسك  , ومش هتصرف فيهم 200 جنية أو 300 بمواصلاتك

 

ملخص سريع

 

المطلوب لاستخراج السجل التجاري والبطاقة الضريبة.

• عقد إيجار 50 قرش

• صورة البطاقة

• توثيق عقد الإيجار في الشهر العقارى ب 20 جنية

• تطلع ع مصلحة الضرائب بالورق السابق وصور لية وهناك تدفع 50 قرش

• تطلع ع الغرفة التجارية بالورق السابق مع صور لية

• وتدفع ع حسب رأس المال وليكن 150 جنية لإ رأس المال 60 الف

• + 5 جنية تصوير ورق

• كدا إجمالي المبلغ 177 جنية غير مصاريفك ومواصلاتك

 

ملحوظة

يختلف الكلام ده من محافظة لمحافظة وبالنسبة لية عملت كل ده في يوم واحد والله العظيم

ممكن بسبب قرب المسافة بين كل الإمكان دي

وخالي مأمور ضرائب ومدير عام الغرفة التجارية ومدير استخراج السجلات التجارية اصدقاء شخصين ليا وكلو كان بيساعد

​