نصائح ذهبية للسفر
تحذير هذا البوست للــBackpackers أو المسافرين قليلي الميزانية والمبتدئين
البوست طويل جدًا بس هيفيدك جدًا جدًا جدًا
• باختصار شديد البوست ده ممكن تعتبروه شوية نصايح على معلومات على اشتغالات على حركات نص كم اتعلمتها من كوني مصري -كوننا مرينا بمعظم الحوارات ف بلدنا الحبيبة ف يومنا المعتاد -
* هقولك ازاي تظبط شنطتك .. تحجز طيرانك .. تعمل plan للسفرية .. تقلل نفقاتك وانت مسافر تحمي نفسك م النصب والاشتغالات يعني البوست ميكس بين كل دول
بسم الله ..
١- طبعًا أنت دلوقتي مسافر ومقررتش تروح فين بتظبط ميزانيتك وتشوف معاك كام، طبعًا الاختيارات للمبتدئين بتبقى أيزك عشان أشهر حاجة بتسفر جوه الجامعة إلي جانب الجمعيات العلمية، فطبيعي بتنشن ع بلد اللي بيجيلك الماتش فيها وبتروح، يا إما مسافر لوحدك
٢- لو مسافر لوحدك ومش غني فشخ يعني ف الاختيارات انك يا تسافر أطول ف آسيا أو أقل ف اوروبا -احنا بنسميها شهور آسيا وأسابيع أوروبا - لإن آسيا أرخص طبعًا والفيزا شبه مضمونة زائد إن في دول مش محتاجة فيزا أصلًا أو ليها فيزا عند الوصول *Google them* أما أوروبا فعشان أغلى طبعًا مبيتعقدش فيها كتير والفيزا حظوظ
٣-نفترض إنك اخترت آسيا فالمعظم يا إما بيعمل بلان ١ وهي (تايلاند-كمبوديا-ڤيتنام-لاوس) بلان ٢ (تايلاند-ماليزيا) بلان ٣ (سنغافورة"غالية فشخ"-ماليزيا-تايلاند) بلان ٤ للقدامى إنك تزود ع أي بلان (الصين-بورما-بروناي"غالية برضه"-الهند) أو بلان ٥ ( أي بلد منهم لوحدها انت وشوقك)
٤- نفترض انك اخترت أوروبا فمفيش رغي كتير هتختارلك بلد تنشن عليها تكون عارف إن ڤيزهم حنينة وع حسب فلوسك حتحسب كام مدينة هتروحها (باريس-أمستردام-برلين) وهكذا، في طيران بينهم طبعًا بس ارخص اتوبيسات دور ع أرخص شركة أتوبيسات وشوف نظام حجزهم ايه واتعامل ع قد فلوسك
٥- بعد مختارت البلد اللي هتروحها قبل ما تسافر لازم تعمل شوية حاجات مهمة جدًا زي ايه / انك تعمل سيرش ع جوجل عنها تعرف ايه أكبر مدنها / ايه المعالم اللي عاوز تشوفها وف انهي مدن / تعرف المدن الساحلية والغابات والصحرا عشان متروحش أماكن نفس النوع / تعمل تخيل مبدئي للرحلة يعني م الشرق للغرب لأ هبدأ م الشمال وانزل تحت وازور كذا وكذا ف سكتي وهكذا
٦- حاجة انا شخصيًا بعملها ببتدي اتعلم شوية من لغة البلد على Dulingo -موقع بتاع لغات مش محتاجه نباهة يعني😂- بس بسيط وبيتعامل معاك من تحت خالص كإنك بهيم ولا مؤاخذه ..
بتعلم الأرقام ! عشان شخصيًا مبحبش اتسك ع قفايا ف الفلوس فكونك عارف الأرقام دا بيحميك م الأفشخانات / بتعرف الأسعار ع الفترينة لو مش أرقام / بيساعدك ف الفصال مع البياعين اللوكال -غالبًا مبيعرفوش انجلش أو بيبقو حافظين رقمين هما السعرين ومبيرددوش غيرهم- بس المعظم قرود الصراحة ما علينا
٧- شنطتك العظيمة لابد لابد الBackpack عشان تبقا مُسافِر ملو هدومك كدة ومتبقاش قليل وسط صحابنا المسافرين / الشنط العجل دي قذرة قذرة هتبطأ حركتك وهتخليك تكسل تروح مدن تانية/ دي ع ضهرك وشنطة ضهر كمان ع بطنك /ع البطن الأول وتعشّق بالضهر / الحركة أشرع وأخف ايديك فاضية تعرف تطلع سلالم الموضوع ده أحسن بكل المقاييس مفيش Backpacker بيسافر بشنطة عجل
٨- القاعدة وانت بتحضر شنطتك عشان متشيليش كتير هي لو قلت What if ماذا لو حصل كذا، فانت أكيد مش محتاجها .. فانت بتعرف جو البلد اللي رايحها صيفي شتوي عشان اللبس .. صيفي بتاخد حتتين شاوي احتياطي عشان مترحش مدينة ع الجبل والجو يبقى سقعة فشخ وتتخزوق، شورتس وميلتونز كتير طبعًا قلل م الجينز عشان هما اسهل ف الحركة -ده بالنسبالي يعني-،
ظبطت نفسك داخلي وخارجي / أهم حاجة تاخد معاك لبس أسبوع واحد بس متجبش لبس لكل يوم لإنك هتغسل يا بيه سواء ع إيدك سواء ف هوستيل سواء ف لوندري ف وسط البلد أيًا كان والحساب بيبقى بالكيلو فانت معاك لبس قليل وبتغسله مش عشروميت تيشرت وبنطلون
٩- بتعمل سيرش الأول بس ف أوروبا غالبًا لازم تجيب شطافتك العظيمة -وتنتظر منظرك هيبقى عامل ازاي ف حمام مكدونالدز وانت بتملاها- مرة واحد قالي واخد الزمزمية معاك الحمام ليه .. قلتله عشان أعوض السوايل اللي بفقدها 😂 ف العزبي رخيصة قوله fresh buzz وحياة أبوك بلاش شطافة عشان غالبًا بتبقى دكتورة حلوة وقفة وهتحتقر نفسك لو قلت للقمر دا شطافة
١٠- حاجاتك الاستعمال الشخصية البسيطة المعروفة زائد مثلًا انا كنت ف الهند والنظافة مشكوكة هناك شويتين فخدت معايا ملاية صغيره بفرشها ومعايا فوطتي وبغسلهم وكدة -اذ اضطررت يعني- / بتاخد معاك شبشب للمشي والهوستل وكوتشي رنينج للتريكنج والبهدله وشوز نضيفة للخروج وترشقهم ف قاع الشنطة وتسك عليهم / هتملا الباك واللي ع بطنك فاضيه عشان دي هتملاها حاجات وانت راجع / فش شنطة صغيره كمان كروس معاك تحط فيها فلوس محافظ باسبورك ودي بتاخدها وانت خارج
١١- مشكلة تانية بتواجه الناس وهى الفلوس، طبعًا لو معاك فيزا كارد بتحرّص أه بس مبتقلقش أوي .. انما لو كاش زي حالاتي فانا بقسِّم فلوسي ع كل الشنط .. المعظم ف الباك باك ف جيب مستخبي كدة عشان أصعب شنطة تتسرق عشان اتقل الا لو انت مغفل بقا مش مشكلتي 😂 .. الباقي ع البطن ..
وحبة ف الكروس وحبة ف جيبي -الحمدلله نمسك الخشب متسرقتش ولا مره 😂- .. الباكباكرز مبيسرقوش من بعضهم كلنا مسافرين زي بعض مننا فينا يعني
١٢- دلوقتي انت حجزت طيرانك رايح مدينة ف بلد متعرفش عنها حاجة هكلمك دلوقتي عن حجز الهوستل
١٣- ف ابليشكنز لا تعد ولا تحصى للباكباكرز للسكن - TripAdvisor - Expedia - Booking - Airbnb -Couchsurfing - بس المفضّل لينا Hostel World تخش عليه زي الشاطر هتحدد المدينة والبلد والمدة اللي هتقعد فيها يومين تقريبًا وتبتدي تدور
طبعًا احنا بنمشي ع الRating بس قبليه بعمل custom وتحدد الهوستلز ضمن سعر السكن اللي محدده ف البدچت بتاعتك وليكن ١٥ يورو ف الليلة / هيظهر ليك مثلًا عشرين أوبشن بعد مكانوا ١٠٠ / بعد كدة تشوف الراتنج من ٧،٥ بيبقوا حلوين بس ممكن يكون الراتنج خادع ركز ع عدد الريڤيوز كمان ساعات بيبقى واخد ريت ٩ بس ٩ ريڤيوهات الي هما صحابه يعني بيوجّبوا -المكان ده صح الصح
تقرا حبة ريڤيوهات عشان تعرف دماغ الناس وايه الخوازيق اللي ممكن تلبسها وتبقى مهيأ نفسك (مفيش فوط -حمامات فيها مشكلة - مفيش صابون إلخ ) وتقرا جنسية صاحب الريڤيو عشنان ساعات بيبقو أوروبيين وفرافير وعندهم expectations عالية فيقولك ايييه دا ازاي مفيش تكييف صباح الفل احنا بنام ع الأسفلت يعني 😂 / شفت صور المكان وسعره تمام وريتنج كويس قدامك خيارين
١٤- يا تحجز أونلاين يا تستنى اما تروح هناك وتحجز walking، انا عن نفسي بجمع كل المعلومات من هوستل ورلد واخد سكرين شوتس بس بحجز واكنج 😂 ليه عشان أرخص، لما بتحجز أونلاين الموقع بياخد نسبة فلازم الهوستل يغلي السعر عشان يعوّض يعني مثلًا اونلاين ٤٠ ج الواكنج ب ٣٠ -ا
شتغلت ف هوستل برّه وعرفت الموضوع ده😂 ... لسة ف الابلكيشن تنزل تحت هتلاقي الأوض، متضعفش احنام بنام ف Dorms احنا بتوع الرخيص حظك بقا ٥ ٦ ٧ سراير ف دورم بيوصل ٣٠ سرير 😂
لسه ف صفحة الهوستل تنزل تحت تلاقي ديتيلز ساعات بيقدموا فطار ببلاش - حلو ده - ف بيقولوا .. نيجي للأهم تروحله ازاي ونركز شوية يا إما هيبقى محترم ويوضحلك بالتفصيل السكة م المطار والاوبشنز اللي قدامك (تاكسي-مترو-اتوبيس) وأسعارهم / يا إما هيقولك احنا ف الشارع الفلاني وامشي كذا وكذا وخلاص فانت تكتشف بنفسك
١٥- الحتة دي مهمة هتسيّڤ سكرينشوت للوكيشن وتركنها، دلوقتي انت رايح بلد جديدة ومعكش انترنت اللي هوسهل كل حاجة دلوقتي من هوستلز تلاقيها ومطاعم كله كله، يا إما هتقعد ف البلد فترة طويلة فتنتشلك خط من شركة هناك و ع حسب البلد والشركة ف سرعة ال Activation
يا إما مش عاوز تشتري لإنك مش هتقعد كتير ف البلد دي مثلًا، ولازم تركز كمان ف الشركة لإن في بلاد كبيرة ف الشركات بتغطي مناطق أه ومناطق لأ
١٦- طب يا سيدي انت معكش غير اسم الهوستل بس وشارعة ومش هيبقى معاك نت تعمل ايه .. هتمشي عكسي هتظبط كل حاجة لأول يوم ف البلد دي وانت فبيتك / هتمشي عكسي معاك جوجل هتعرف الشارع ده ف انهو منطقة لو عاصمة اعرف أقرب محطة مترو ليه لو مدينة عادية اعرف الاتوبيس اللي بيعدي علية
الموضوع بيوصل غالبًا لمحطة كبيرة ف أي بلد روحتها زي رمسيس كدة مثلًا / فهتعول سيرش بقا تروح ازاي م المطار للمحطة دي اتوبيس مترو بقا أيًا - مسمعش سيرة تاكسي دي خالص! 😂- ف بلاد موصله خط مترو للمطار في بتطلع اتوبيسات فيه لازم تاخد تاكسي وأمرك لله / دلوقتي انت هتشتغل ع Google maps كل ده ..
طب ازاي وانا معييش نت .. في حاجة اسمها Offline maps بتدونها وانت ف بيتك معزز مكرم / عاوز تدون المدينة كلها قشطه بس اهم حاجة المنطقة اللي حوالين الهوستل عشان توصله بسهولة / في أبليكشن maps me بيشتغل أوفلاين برضة قشطة / أهم حاجة يبقى معاك map
طبعًا كل ده سكرين شوتس كدة انت معاك الهوستل ومكانه وهتوصله ازاي سيب الباقي لحد متفتح واي-فاي ف الهوستل وتعمل بلان كل يوم بيومه / هتوصل مطارك بدري تجنبًا للخوازيق / تخلص ليلتك تركب طيارتك توصل البلد الجديدة ع خير / تخلص الإجراءات
١٧- دلوقتي عرفت ازاي هتسيب المطار سواء اتوبيس أو مترو لو ملقتش حواليك وتايه مش عارف تروح فين والمطار كبير شوف واحد غلبان كدة امشي وراه لإنه غالبًا هيركب أرخص حاجة 😂 متمشيش ورا بنات حلوة لإنهم غالبًا بيركبوا تاكسيات
طبعًا قبل أي حاجة تسأل ع ازاي تحول فلوس فين بعملة البلد / ومتحوِّلش كتير ٥٠$ بس مثلًا فلوس تكفيك يومين عشان أسعار المطار قليلة جدًامقارنةً ببره -السعر الرسمي وكدة - هتحول جوه ف المدينة هتلاقي محلات صرافة بالعبيط مش زي مصر بنحول فلوس ولا كإننا بنهرب مخدرات هتشوف الاتوبيس فين ركبته خلاص او المترو
١٨- انت طبعًا عارف هتنزل فين اسمًا بس الشوارع طبعًا واللغة الحوار كبير .. لو السواق قريب منك قله اسم المكان ومتهريش كتير انجلش عشان ممكن ميكنش بيتكلم انجليزي كويس ويتقفل منك قول اسم المكان بس عشان يعرف يركز ، ارجع بقا مكانك ومتعتمدش اوي انه هيفتكرك عشان هو معاه عشروميت واحد غيرك ..
فانت بتشوف حد جنبك تكلمه بلطف يلاغيك لما محطتك تيجي .. او تظبطها قبل متركب بتشوف اللي هيركبوا معاك وتنقي حد native وصغير عشان الشباب غالبًا بيبقوا عارفين انجلش وهتريح نفسك شوية
١٩- نزلت محطتك هتفتح الأوفلاين المابس اللي دونتها وتوصل للهوستل اللي رايحة / متفتحش الموبيل كتير ومتمشيش بالماب علطول زي الأهطل هتعرف أه يمين ف يمين ف شمال ودخل الموبيل تاني ومتقفش هقولك ليه دلوقت
٢٠- الموضوع بيختلف ع من مدينة للتانية ف اماكن أمان وأماكن لأ كونك شايل شنطة فانت تارجت للسماسرة اللي هياكلوا ودانك والبياعين وخلافة فانت فغنى عن كل ده فكونك ماسك الموبيل كل شوية هيقولوا بس زبون تايه هاتووه
هيقلولك تعالى واوض رخيصة وبتاع خليك ماشي ف خطتك وخلاص "الحذر أفضل من الندم" لو اتزنقت أوي ومش لاقي مكان روح معاه بس خليك متحكم كدة بس طبعًا تبقى عارف إنك هتاخد سعر أعلى وهو ليه عمولة ولازم تراضيه
٢١-وصلت "نيو دلهي" الساعة ٢ بليل لوحدي طبعًا ورايح حتة زي الباطنية كدة -اللي راح الهند عارف انا بقول ايه- ومكنش معايا نت والمابس خربانة خالص اضطريت امشي واسلك نفسي واركب تكاتك معتمدًا ع الكلمات القليلة اللي اعرفها وقابلت سمسار وفاصلت ف سعر الأوضة ووصلتها للنص وقلت للسمسار هدفعلك بكرة عشان معاييش فكة -متوترتش قدامه واديته اي فلوس معايا وخلاص-
٢٢- لازم تبقى ماشي بثقة مش هقولك حتى لو ماشي ف طريق غلط أو ايه حاجة لازم تبقى ماشي بثقة وكانك عارف رايح فين كونك متوتر وبتلف حوالين نفسك بتبقى هدف للحراميةوالسمامسرة وأي حاجة مش لطيفة دي أهم حاجة ممكن أنصحك بيها
٢٣- في أماكن لازم تفاصل فيها زي آسيا كتير فتبقى عارف الليلة ماشية ع ايه اعرف الأسعار العادية قبل متروح عشان ساعات بيضربوا الأسعار ٦ مرات لو انت مش مركز
٢٤- وصلت الهوستل بسلام طبعًا أول م ه بتبقى مش متعود، حتى لو مش متعود لازم تبقى متعود .. أول متخلص check-in تسألهم ع فوطة اذا مدوهالكش .. تسأل اللي قاعد ع جولة سريعة ف المكان عشان تعرفه ..
معظم الهوستلز بيبقى عندهم تلاجه بيبيعوا فيها كوكا وميه وبيره وكدة وفي لوندري عشان تغسل وكل ال facilities مطبخ هقولك تستخدمه قدام وكدة .. هتروح لأوضتك الدورم يعني .. طبعًا دي لحظة مهمة جدًا زي أول يوم دراسة كدة 😂 .. لازم تثبت نفسك ف المكان 😂😂 مشتتخانق يعني .. بس تثبت وجودك ف الاوضة ومتتكسفش تخش تشوف سريرك فين تسلم ع الناس سريعًا تحط شنطتك جنب السرير وتريح كدة كإنك كنت ف ٢٠ هوستل قبل كدة
وبعدين بابتسامة خفيفة كدة اكنك نسيت سلم عليهم وقولهم اسمك وبلدك -متبنش متحمس أوي وساذج ولا تقيل ورخم وتنك- حط حاجتك وآمن عليها بس مش أوي يعني قفل ع الفلوس بس سيب شنطة اللبس مفتوحة نص فتحة مثلًا اللي هو -أنا مأمنلكو يا سيادنا بلس اني مش مقلق منكو يا كاوركات 😂- تاخد شور لذيذ وبعدين تطلع تاكل اكيد جعان
طبعًا احنا ملتزمين بالرخص بس أول ليلة مسمحولك أي مكان عشان لسه مدرستش المنطقة .. خلي بالك م ال pork وكدة واعرف اسمه فالبلد اللي انت فيها عشان متلبسش ف الاكل .. وانت راجع خد لفة ف المنطقة شوف سوبر ماركت قريب واحد بتاع أكل حلو / أقرب محطة اتوبيس ومترو ليك.
٢٥- تمام بقا ارجع الهوستل اعمل صداقات ف ال common room هتلاقي الناس يا اما بتتفرج ع تلفزيون يا اما عاملين حلقة بيتكلموا ف أمر ما .. فانت هتيجي كابس عليهم زي بوليس الآداب كدة وتقولهم hi guys, can i join you وصدقني محدش هيقول عليك بائس أو حكاك دا شىءطبيعي جدًا كلنا بنعمل كدة انما هتاخد موبايلك وتقعد ف جنب متستناش حد يقولك تعالا ..
الهوستلز مكان لطيف كل المسافرين بيتجمعوا فيه ويحكوا لبعض عن أسفارهم وكل حاجة ف الدنيا فمتخفش محدش هيقولك لأ متقعدشمعانا احنا شلة .. لإن مفيش شلة أصلًا دي حلقة وكل مرة واحد بينضم فمتقلقش .. الكلام هيجيب بعضه وهتتعرف ع واحد ولا اتنين ..
ايه يا سيادنا هتعملوا ايه بكرة اه انا لسه محددتش طب منتدنجل مع بعض قشطة قشطة .. بس يا سيدي كسبت صديق ولا اتنين .. وهكذا لو انت مسافر لوحدك هتعرف ناس جديدة كل يومين ف كل هوستيل ف كل مدينة
٢٦- متتكسفش ! انت ف أوضة مشتركة .. انت زي مانتا بتتعامل عادي، نايم تحتك واد.. بنت.. شمبانزي، الموضوع صعب ف الأول بس بعد كدة هتتعامل بروفيشنال
٢٧- الموضوع الأهم ع الإطلاق انت مسافر بلد جديدة بعادات جديدة بثقافات جديدة بأديان مختلفة انت شايف معاك ثقافتك وعاداتك بس بتحترم عادات البلد اللي انت فيها، هتقابل مسيحيين ويهود وهندوس وملحدين ومسلمين كل الناس، لازم عقلك يبقى متفتح وتتقبل أي حاجة عشان تبقى استفدت م التجربة السفر مش سفر مكان بس عقلك لازم يتغير وينضج .. متشكرش وشك او تعمل متفاجىء لو حد قالك حاجة غريبة .. كل شىء عادي وانت مسافر
٢٨- حاجة تانية "الخمرة" بأنواعها بقا أنا مش هتكلم م الناحية الدينية اللي عارفني شخصيًا عارف إن آخر واحد يتكلم ف الحوار ده .. بس هقولك حاجة اللي بتعمله ف بلدك اعمله ف اي حتة تانية بتشرب خمرة وسجاير ف مصر اشرب برّة هقدرك عن اللي اتعامل بمنطق كان ف جرّة وطلع لبرّة .. خلي شخصيتك قوية وعندك ثقة فنفسك ..
اه قاعد ف قعدة كلهم بيشربوا بس بروح اجيب كوكا واقعد معاهم عادي مبحسش بنقص ولو حد سأل بسف ع نفسي عادي ولو سألوا بجد بهزر وقولهم عشان عاوز أحافظ ع كبدي 😂 ولودخلوا فناحية الدين حرمه ليه بقول عشان أضراره الصحية وغياب العقل وكدة وبهزر واقولهم كمان اللي بتشربوا عشان تقدرواتعملوه احنا بنعمله رباني من غير شرب ..
فبيضحكوا والموضوع بيتقفل وبيحترموا الموضوع وبتبقى انت المميز اللي فالشلك واتحول من نقص لحاجة طريفة ... الخلاصة انت مش ناقص عنهم انت مختلف زي م كله مختلف بس عندك ثقة ف مميزاتك التانية اللي بتثبت حضورك وسط المجموعة .. متعملش فيها محمد حسان وتقولهم الخمره حرام وتكشر.. انت كدة منصرتش الإسلام خالص .. هما already عندهم فكرة سيئة عن الاسلام وانت سبتها ..
ولو حبيت ترضيهم يا بُرم انت مبتعرفش تتنيل تشرب أصلًا وهما حيتان هتفيص وهيبقى منظرك وحش زائد عن انهم هيحتقروك عشان اتخليت عن مبادئك حتى لو هما مش موافقين عليها -كلي دي مواقف حصلت فعلًا- فاعمل اللي انت بتعمله ف اي حتة ربنا مش فوق بيتكو بس
٢٩- نرجع لمرجعونا الأكل عشان تخفض الميزانية هتشتري م السوبر ماركت (كيس توست كبير+ مربى فراولة -عشان بحبها 😂) بس يا سيدي دي حاجة رخيصة وهيبقى فطارك ل ٣ أيام .. العشا هتجيب إندومي ترشقها ف الميكرويف آمين .. غداك شبرق ع نفسك فيه برّه ياسيدي بس متعرضهاش يعني ..
والأحلى لو بتعرف تطبخ شوية مكرونة وبتاع تعملك حبة يكفوك لكام يوم ف مطبخ الهوستل وترشقهم يومين تلاته تعيش عليهم ف التلاجة.
٣٠- بليل هتجيب الموبيل وتعيش شوية ع واي-الفاي الهوستل تجوجل ع الأماكن اللي عاوز تروحها... كل حاجة حرفيًا ع حوجل هتقوله what to see in berlin مثلًا هيوريك الأماكن .. تنقي مكانين تعرف ف منطقة ايه واقرب محطة مترو ايه .. بيفتحوا امتى وبفلوس ولا لا عشان متتخزوقش ..
لو المدينة اللي انت فيها فيها مترو وش ليه ابليكشن نزله هيوريك تروح ازاي من محطتك للمحطة دي وتغير فين وكل الحبشتكنات بسهولة كدة يومك خلص بأكلك بفسحك بشربك
٣١- لو عاوز تتنقل من مدينة للتانية اعرف مواصلتك اتوبيس عبّارة لو جزيرة واحجز قبلها بيوم احتياطي كل ده بعمله من ع جوجل لو معاكش فلوس ممكن ت Hitchhike تقف ع الطريق وتستنى حد يركبك معاه ف المعظم بيبقى سهل وأمان بس دول ودول طريقة سريعة ومجانية للسفر
٣٢- لو معاكش فلوس برضة للسكن في موقع workaway وغيره كتير بتلاقي ناس عندهم عمل ومحتاجين حد يشتغل شغل بسيط مقابل الإقامة وجربته قبل كدة شغل بسيط ساعتين تلاته ف اليوم وبتتفسح وساعات بيبقى فيه أكل كمان وسرير مجاني الشغل حسب المكان ممكن محل قطط.. مصنع.. هوستل .. مركز غطس ويعلموك غطس ببلاش كمان أوبشنز كتير.
٣٣- في أوقات لازم تتعامل ك local في الأكل والشرا عشان في دول محتاجة فصال ف الأسعار ف آيا كتير ف كنت بستغل معرفتي بالأرقام وكام كلمة كدة ف كنت بافاصل وافضل ساكت وهو يتكلم بلغتهم وانا أمثل اني فاهم واهز راسي واقول لا واقول الرقم اللي عاوزه لحد مفتكروني من أهل البلد
٣٣- لو عاوز تركب تاكسي متاخدش حاجة من قدام محطة او المطار طبعًا .. لو ماشي فالشارع متاخدش اللي بيقفلك عشان هو بيبقى عارف إن السياح مغفلين فعاوز يغفلك ولو ركبت معاه هيفرهدك .. اهجم انت ع واحد واكبس عليه بس تبقى عارف الأسعار المتوسط للبونديرة عشان ممكن تدفع أزيد شوية بس متدفعش زيادة أوي
٣٤- أهم حاجة ف السفر الالتزام بالميزانية متنساقش ورا حاجات غالية هتنبسط اه بس لأسبوع فحين انك ممكن تنبسط شهرين بنفس الفلوس اللي بعترتها وصدقني فالسفر المدة أهم بكتير
٣٥- هتلاقي ناس كتير بتوقفك فالشارع فاكس منهم بنسبة ٩٨٪� عاوزينك ففلوس ٢٪� مش مهم هيفتروك وقح .. محدش يعرفك هناك
٣٦- أوقات لازم تتعامل فيها ك foreigner ولازم تتكلم بارساقراطية كمان لو بتخلص حاجة فيها طوابير locals الناس هيهتموا بيك هناك غالبًا لإنهم زي مصر بيطلعوا ميتين الوكالز ، اعمل اهبل وعدي الطابور وروح ع الشباك واتكلم بيراءة هيعملك كل حاجة
٣٧- ليك حقوق ف الطيران نسيت أقولها . لو ترانزيتك عدا ٨ ساعات ليك فندق ع حساب شركة الطيران بس هما بيطنشوا طالب بحقك متسقطش .. لو الكرسين اللي جنبك فاضيين متتكسفش ارفع الإيد ومدد ونام عملتها برضة عادي
٣٨- ال pork و ال Ham و ال Bacon هما هما نفس الشىء والله
٣٩- لو حتحجز طيارة ف بلد تانية بعد متحجز خش موقع الشركة واتأكدت انها سليمة عشان في تيكتس مضروبة عادي يعني
٤٠- حاول تبعد عن شركات السياحة والتورز والguides وانت مسافر فلوس ع الفاضي وممكن تعملها بأرخص بكتير
٤١- لو انت بتزور حاجة ولقيت واحد جاي بيكلمك عن المكان من غير متقوله غالبًا guide وهيقولك ف الآخر قرشين فقله م الأول شكرًا واخلع وهكذا حرّص ولا تخونش ياعمنا
=====================================
بسم الله...
ده تاني بوست هكتبه بناءا علي طلب الناس اللي عايزة تعرف اكتر عن السفر بأقل التكلفة او ال Backpackers
البوست هيبقي طويل شويه بس مهم جدا وان شاء الله يكون فيه كل اللي هتحتاجه فنصيحه تعمله Save...
هبتدي بتزاكر الطيران! عشان تسافر لازم اول حاجه تحجز تزاكر الطيران ودي اسعارها بتختلف حسب الميعاد وحسب شركة الطيران والموقع اللي بتحجز من عليه.
الافصل لما تحجز الطيران تختار ايام في وسط الاسبوع يعني حاول تتجنب انك تحجز في الاجازات عشان بتكون زحمة والتزاكر هتبقي غالية نوعا ما..
طبعا المواقع اللي ممكن تحجز منها كتيرة جدا جدا بس ارخصم عن تجربتي الشخصية موقع زي
1. Kiwi.com
2. cheapoair.com
وتاني حاول تكون ذكي في مواعيدك
تاني حاجه محتاج تعرفها او تعرفيها هي ازاي متكلفش نفسك كتير وانت مسافر ودي هتبقي عن طريق حاجتين انا هتحتاج تقعد في Hostel وانك هتعمل عمل تطوعي او Volunteer work
لما تيجي تقعد في مكان طبعا مش هتقعد في فندق خمس نجوم انت عايز تختار الارخص واللي في نفس الوقت هيناسب سنك وطريقة سفرك اللي هي Backpacking
ارخص حاجه هي ال hostel وده هتلاقيه علي موقع اسمه
hostelworld.com
لما تحجز هتحجز dormroom يعني الاوضة اللي هتقعد فيها هيكون فيها من ٤ ل ٦ اشخاص معاك
ال dormroom ممكن تكون للبنات بس او ولاد بس او الجنسين.. هتشوف الانسب ليك طبعا وتحجزه ودي استارها بتختلف من بلد لبلد ومن مدينة لمدينة بس غالبا بتكون ارخص من اي حاجه تانية...
انك تقعد في dormroom اغلب الناس هيبقوا في نفس سنك تقريبا وهتتعرف علي ناس كتير وتكون صداقات وهتعرف اماكن جديدة عن طريقهم وهتسافر مع بعضهم كمان في رحلتك وهتسيبهم وهتقابل غيرهم في مكان تاني وتكمل طريقك عادي..
نيجي لاهم موضع في البوست ده اللي هو ازاي تقدر تعمل volunteer work او عمل تطوعي ؟!
فكرة العمل التطوعي انتشرت كتير في السنين الاخيرة بين الناس اللي بتسافر وسنهم صغير لان بتوفر عليك فلوس كتير تسافر بيها وتشوف المكان اللي انت فيه..
العمل التطوعي او ال "volunteer work" ببساطة عبارة عن انك بتشتغل في مكان ساعات عمل مبتزدش عن ٦ ساعات يوميا تقريبا علي اختلاف المضيف وفي المقابل بتاخد اكل وشرب وسكن ودي طبعا فرصة حلوة تكتسب خبرات وتعرف ناس وتوفر اكتر وتكمل رحلتك
في كذا موقع متخصص في ال "volunteer work" في العالم وكل موقع له مميزاته وعيوبه حسب المكان والسعر وعدد الناس اللي هتستضيفك.. بس انا هكتب اهمهم وانت تختار الانسب ليك حسب طبيعة رحلتك..
اول موقع هو
hippohelp.com
الموقع ده الوحيد المجاني ومش هتدفعله فلوس عشان تشترك فيه لانه جديد واتعمل السنة دي 2017
ممكن تشترك ع الموقع ده لان ممكن تستفاد منه وانت كده كده مش هتدفع حاجه زي المواقع التانية ولكن زي ماقولت الموقع جديد جدا فمش عليه ناس كتير اوي لسه...
تاني موقع وهو اهمهم عن تجربتي الشخصية برده هو
https://www.workaway.info/
ده تقريبا افضل الموقع في ال volunteer work دلوقتي لانك ببساطة هتلاقي عليه اماكن كتيرة للشغل وباختلاف انواعه وفي معظم دول العالم تقريبا
تكلفة الاشتراك السنوي للموقع ده بتختلف انك تكون لوحدك او في حد مسافر معاك رحلتك.
يعني لو اتنين هتعملوا اكونت مشترك وهتدفعوا اشتراك 38 دولار في السنة
لو انت لوحدك هتدفع 29 دولار في السنة...
تالت موقع هنتكلم عنه هو
helpx.net
ده موقع كويس واكتر منافس بعد ال workaway وتقريبا مشابه ليه جدا هو كمان اقدمهم...
بس عيوب الموقع ده انك مش هتلاقيه كتير اوي في كل القارات زي افريقيا مثلا .. يعني لو هتسافر في افريقيا يبقي افضل متشتركش في الموقع ده..
تكلفة اشتراك helpx في السنة 11 دولار بس الموقع ده تقدر تشترك عليه بسنتين اقل حاجه وهتكلفك 23 دولار اشتراك سنتين ورا بعض وده سعر كويس جدا طبعا..
رابع موقع هو
wwoof.net
الموقع ده زي ماقولت في البوست الاول الناس المتابعة متخصص في ال organic farms او اعمال الزراعة يعني هتشتغل في النبات وفي الارض " عادي جدا كلنا فلاحين"
مشكلة الموقع ده ان كل بلد ليها موقع خاص بيها يعني مش زي باقي الموقع ليها موقع واحد في العالم كله..
بمعني انك لو مسافر اكتر من دولة هتضطر تشورك مرتين في موقعين باشتراكين مختلفين واشتراك كل دولة مختلف عن غيرها طبعا..
الموقع ده برده متخصص في حاجه واحدة وهي اعمال الزراعة غير باقي المواقع..
ممكن يوصل اشتراكك في بعض الدول حوالي 70 دولار حسب الدولة طبعا في دول ارخص بكتير بس ده اقصي حاجه تقريبا..
اخر موقع هنتكلم عنه هو
worldpackers.com
واعتقد ده اضعفهم واقلهم ومش منتشر اوي... غالبا موجود في امريكا الجنوبية ودي معظم الناس مش بتسافرها بس للي محتاج يعرف عنه وهو برده غالي نوعا ما..
اتمني البوست يفيد الجميع ان شاء الله...