هل أنا مؤهل للهجرة الي كندا  ؟ 

​

​

الحلقة الثالثة من سلسلة #الهجرة_لكندا_بالتفصيل_الممل

جميع الحلقات هتلاقيها هنا 

 

 

=================================

​

اتكلمنا في الحلقة الاولي عن اهمية الهجرة لكندا . . .

 

وعرفنا في الحلقة التانية انواع الهجرة  . . .

 

دلوقتي عايزين نعرف هل انا مؤهل للهجرة لكندا ولا لا , يعني هل كندا هتقبلني مهاجر ولا راحت عليا الفرصة . .

 

كندا شغالة بنظام النقاط للهجرة , يعني انت مطلوب تجمع مجموعة من النقاط عشان تكون مؤهل للهجرة , لو عرفت تجمعها , فانت مؤهل للتقديم للهجرة - مؤهل للتقديم مش معناها انك اتقبلت , لكن ممكن تقدم - لو معرفتش تجمع النقط ديه , فللاسف مفيش فرصة . .

 

النقط ديه معتمدة علي كذا حاجة , تخليهم يعرفو هل انت هتفيد البلد لما تروح ولا هتكون عالة عليهم . و ده حقهم في اشتراط مجموعة من العناصر عشان يتاكدو ان اللي رايح هيكون عنصر فعال

 

النقط ديه هي كالتالي :

 

• العمر

• التعليم

• سنوات الخبرة

• اللغة الانجليزية و الفرنسية

• عناصر اضافية  

 

 

كل حاجة من ديه ليها تقييم , والدرجة القصوي من  100 , والمطلوب تجيب 67 عشان تكون مؤهل مبدئيا للتقديم

 

انت حالا ممكن تحسب درجتك حسب التقييم اللي جاي دلوقتي , لو جبت 67 فاكتر , يبقي ممكن تقدم , جبت اقل من كدة , يبقي لازم تتصرف و تزود درجاتك عشان توصل للرقم ده

 

حضر ورقة و قلم و خليك معايا خطوة خطوة عشان تعرف درجاتك كام بالظبط

 

=================================

 

نبدأ بالعمر . .

 

كندا مش عايزة عواجيز جايين يتعالجو وياخدو معاش , عايزين الشباب اللي معاه شوية خبرة ونضوج , عشان ييجي يشتغل علي طول

 

هما عاملين جدول فيه درجات كل فئة عمرية , , واقصي درجة للي سنه من 18 لـ 35 , بعدها الدرجات بتقل تدريجيا

​

والدرجات تقييمها كالتالي :

 

• اقل من  18 سنة   ← ← ← ←    مينفعش يقدم لوحده  , لازم يكون مرافق للاب او الام

• من 18 لـ 35  سنة  ← ← ← ←      12 نقطة

• 36 سنة  ← ← ← ←    11 نقطة

• 37 سنة  ← ← ← ←    10 نقاط

• 38 سنة  ← ← ← ←    9 نقاط

• 39 سنة  ← ← ← ←    8 نقاط

• 40 سنة  ← ← ← ←    7 نقاط

• 41 سنة  ← ← ← ←    6 نقاط

• 42 سنة  ← ← ← ←    5 نقاط

• 43 سنة  ← ← ← ←    4 نقاط

• 44 سنة  ← ← ← ←    3 نقاط

• 45 سنة  ← ← ← ←    2 نقاط

• 46 سنة  ← ← ← ←    1 نقاط

• اكبر من  46 سنة  ← ← ← ←    صفر

 

والعمر بيتم احتسابه يوم القبول في الهجرة , مش يوم التقديم , وخد بالك ان القبول ممكن يتم خلال سنة او سنتين حسب ما هنشوف في الحلقات الجاية

 

بس برضه متخليش الموضوع ده يعطلك لو انت سنك كبير , لان عوامل تقييم العمر مش كبيرة قوي, هتشوف دلوقتي ان اللغة هتفرق اكتر  

 

=================================

 

تاني عامل هو التعليم

 

والمقصود بيها اعلي شهادة معاك هي ايه  ؟ ؟  , هل ثانوي ولا جامعة ولا ماجيستير  ؟ ؟

 

وعاملين ليها التقييم ده

 

• ثانوي او دبلوم ← ← ← ←    5 نقاط

 

• معهد سنتين بعد ثانوي ← ← ← ←    19 نقطة

 

• شهادة جامعية (بكاليريوس او ليسانس ) ← ← ← ←    22 نقطة

 

• ماجيستير← ← ← ←    23 نقطة

 

• دكتوراه ← ← ← ←    25 نقطة

 

=================================

 

الحاجة التالتة هي اللغة

 

والمقصود بيها لغتك الانجليزية او الفرنسية او الاتنين . . .

 

انت الاول بتحدد لغتك الاولي ايه , واغلبنا لغته الاولي الانجليزي

 

بعدها لازم تمتحن امتحان ايلتس ( جينيرال مش اكاديميك ) او امتحان كندي اسمه CLB  , وعلي اساس درجتك في الامتحان هتاخد نقط

 

• لو جايب درجات كويسة  في الايلتس او CLB هتاخد 24 نقطة

 

• لو جايب درجات متوسطة هتاخد 20

 

• لو جايب الحد الادني للقبول في الهجرة ( اللي هو 6 في الاستماع , التحدث , الكتابة  ,القراءة ) هتاخد 16  نقطة

​

• لو جايب اقل من 6 في الايلتس مش هينفع تقدم اصلا للاسف

​
 

طيب لو انت بتتكلم كمان شوية فرنسي مثلا , فانت ممكن تزود النقط بتاعتك

 

فيه امتحان زي الايلتس للفرنسي اسمه TEF ,  ولو انت جبت فيه درجة متوسطة هتاخد 4 نقط زيادة , لو جبت درجة وحشة فمش هتاخد حاجة , بس زي ما قلنا , الامتحان مش مطلوب , يعني لو مش بتتكلم فرنسي متقلقش

 

موضوع الايلتس هو اكبر معضلة عند كتير من اللي عايزين يقدمة في الهجرة , وموجود بوست منفصل عنه هنا

 

=================================

 

الحاجة اللي بعدها سنوات الخبرة

 

و ديه بيتم تقييمها بورق رسمي , يعني ورق ممضي و مختوم من مكان عمل , يوضح فيه انت شغال ايه و من تاريخ كام لكام , ومرتبك كان كام و هكذا

 

و اوعي تفكر في ضرب الورق ده  ,لانهم بيتصلو بشكل حقيقي بمكان العمل لما يجيلك القبول النهائي للهجرة , و لو شافو انه مضروب هتاخد بلوك نهائي من سيستم الهجرة لكندا

 

و بيحسبوها كالتالي :

 

• سنة واحدة خبرة ← ← ← ←    9 نقاط

 

• سنتين او 3 سنين ← ← ← ←    11 نقطة

 

• 4 او 5 سنين ← ← ← ←    13 نقطة

 

• 6 سنين فاكتر ← ← ← ←    15 نقطة

 

===================================

 

نيجي لاخر حاجة , وهي النقاط الاضافية

 

و هي بتكون حاجات اغلبها مش متاح معانا ( ما عدا اول نقطة ) , لو موجودة هتزود الفرص , لو مش موجودة فمفيش مشاكل بس النقط مش هتزيد

 

• لو زوجتك جابت درجة متوسطة علي الاقل في الايلتس  ← ← ← ←  5 نقط

 

• هل درست قبل كدة في كندا ← ← ← ←   5 نقط

 

• هل ليك اقارب درجة اولي في كندا انت او زوجتك ← ← ← ← 5 نقط

 

• هل اشتغلت في كندا بشكل نظامي قبل كدة ← ← ← ←  5 نقط

 

مع العلم ان الحد الاقصي للبند ده 10 نقط بس

 

=================================

 

بس يا سيدي , ده كدة نظام النقط المبدئي

 

هات ورقة و قلم و احسب لنفسك معاك كام نقطة منهم , عديت الـ 67 يبقي كويس , انت مؤهل للخطوات الجاية , معدتش , يبقي انت محتاج تطور نفسك و تدوس في الانجليزي او الفرنسي , او تخلي زوجتك تشد حيلها و تتعلم ايلتس هي كمان عشان تاخد 5 نقط كمان

 

ولو انت من محبي اللغة الانجليزية هتلاقي كل التفاصيل ديه هنا في الموقع الرسمي للهجرة

​
 

في الحلقة الجاية هنتكلم بقي علي الخطوات الفعلية للتقديم للهجرة ان شاء الله