النهاردة هنتكلم عن حاجة مهمة كتير مننا بيسأل عليها , وهي تأشيرة الاتحاد الأوروبي الشنجن , اللي تتيح لحاملها الدخول لكل بلاد اوروبا ما عدا بريطانيا
بشكل عام تأشيرة الشنجن – وكذلك تأشيرة امريكا وكندا واستراليا – محتاجة مجموعة من الخطوات لو عملتها , يبقي بنسبة كبيرة هتاخدها ان شاء الله
الأول ياريت تقرأ المنشور ده بالتفصيل , لأن فيه كلام كتيير عن الشنجن
كمان عايز أأكد علي حاجة , ان التأشيرات ديه – الشنجن وامريكا وكندا – ملهاش قواعد ثابتة بتتطبق بشكل اوتوماتيك , يعني مش معني انك تنفذ الخطوات اللي هنقولها انك اكيد هتاخد التاشيرة , ومش معني ان حد تجاهلها يبقي اكيد هيترفض
لأن بشكل او بآخر الموضوع بيعتمد علي نظرة الموظف في السفارة اللي بيقابلك , وده بيخلي المعايير مش دقيقة 100 % , عشان بس الناس تاخد بالها ان تنفيذ الخطوات ديه مش معناها ان اكيد هتاخد التاشيرة , احنا بنعمل اللي علينا و ربك بييسر الحال
تعالوا ناخد الخطوات بالتفصيل واحدة واحدة
===========================
الخطوة الأولي : الإقامة
===========================
طالما انت مقيم في بلد مش بلدك , فلازم يكون معاك اقامة , سياحة , طالب , عمل , عقار , اي إقامة لأن من غير الإقامة مش هتقدر اصلا تقدم علي الشنجن
الحقيقة ان من تركيا التقديم مش اسهل من مصر كتير , يعني افضل اه لكن مش للدرجة اللي بتخلي الامور سهلة
كمان فيه قاعدة مهمة لازم تعرفها , ان الافضل دايما انك تقدم من البلد اللي ورقك فيها قوي . .
يعني انت لو في مصر عندك عربية و شقة و هتعرف تجيب ورق انك شغال بمرتب كويس , يبقي تقدم من مصر افضل من ما تقدم من تركيا طبعا , لان موقفك فيها افضل . .
فانت متقدمش من تركيا الا لو كان ورقك فيها معقول
===========================
الخطوة التانية : الحساب البنكي
===========================
زي ما السفارة التركية عدلت في شروط الحساب البنكي انه يكون لمدة 6 شهور , كذلك كل دول الاتحاد الأوروبي , بتركز قوي علي موضوع الست شهور او السنة , عشان عايزين يتأكدو يا تري انت مستواك المادي معقول ولا هتيجي تشحت في اوروبا
و خد بالك الموضوع مش صعب خاصة لو اشترك كذا واحد في حركة معينة , ان لو فيه 5 اصدقاء عارفين بعض , وكل واحد عرف يجمع مثلا الفين دولار , فيتم وضع العشر الاف دولار في حساب واحد فيهم , وبعدها باسبوعين تسحب 6 الاف منهم وتروح في حساب واحد تاني
وبعدها باسبوع تسحب الاربعة وتحطهم في التالت , وتسحب الستة وتحطهم في الرابع وهكذا , بحيث العشر الاف دولار تقعد تلف بين الخمس حسابات فكل حساب فيهم يبدوا انه فيه فلوس رايحة وجاية
وعشان تخلي الحركة مقنعة , متسحبش الست الاف دولار بالظبط , اسحب مثلا 5740 دولار , وبعدها اعمل ايداع ب 3290 وهكذا عشان الموظف في السفارة يحس ان السحب والايداع حقيقي مش متفبرك
طبعا الكلام ده علي حساب في بنك في تركيا , ملناش دعوة ببنوك مصر دلوقتي
والميزة ان كل البنوك التركية فيها خدمة التعاملات البنكية علي الانترنت , وبالتالي كل واحد في الـ 5 يقدر يحول لزمايله في دقايق وهو قاعد علي الجهاز
واي فلوس تقدرو تحوشوها حطوها مع العشر الاف عشان يزيد الرقم بشكل ما , فالحساب البنكي المتغير لمدة 6 شهور من اهم الورق المطلوب في مقابلة السفارة
===========================
الخطوة التالتة : الباسبور المليان
===========================
وهي من الحاجات اللي بتفرق كتير في التقديم للفيز القوية
فلو كان باسبورك فاضي , او فيه فيز قليلة , فاحتمال قبولك قليل للأسف , لكن لو كان باسبورك فيه مثلا خمس او عشر تاشيرات لدول كتيرة , ومليان اختام دخول وخروج , ساعتها اهيكون كلامك ان انا اصلا مدمن سياحة , وياما لفيت دول , واوروبا بالنسبة لي هي مجرد محطة من رحلاتي الطويلة , وهيكون كلامك مقنع ونسبة الموافقة كبيرة
بس هو الموضوع سهل ؟ ازاي اجيب تاشيرات دول كتيرة واسافر ده كله , هجيب فلوس منين لده كله ؟
خد بالك الموضوع مش صعب للدرجة دي
اولا عندك عدد كبير من الدول انت كمصري تقدر تدخلها وتاخد التأشيرة في المطار , وفي اللينك ده هتلاقي 30 دولة منهم
مش كل الدول ديه معفنة , فيه دول كويس في جنوب شرق اسيا , والميزة ان الدول ديه قريبة من بعض فتقدر تعمل رحلة ليهم مرة واحدة
كمان فيه دول كويسة سهل انك تجيبلها تاشيرة زي جورجيا وارمينيا وروسيا , وجورجيا اصلا لازقة في تركيا يعني تاخد اتوبيس من اسطنبول هتلاقي نفسك هناك , وتذاكر الطيران مش غالية للدرجة دي خاصة لو حجزت قبلها بفترة ومن هنا هتشوف تفاصيل كاملة ازاي تحجز تذاكر طيران بسعر كويس
ولما تنزل دولة معينة مش لازم تقيم في فندق كبير ولا تصرف ارقام يعني , من النت ممكن تحجز فندق معقول وتقعد يومين وترجع تاني وهكذا , والصفحة ديه هتلاقي فيها ازاي تحجز فنادق باسعار رخيصة
وطبعا مش هوصيك بقي لما تنزل اهري نفسك صور وسيلفي والحوارات ديه , عشان لما تروح تقدم علي الشنجن وريهم الصور ده , واقنعهم ازاي انك مدمن سفر و سياحة , وصدقني الحاجات ديه بتأثر ايجابا في المقابلات
===========================
الخطوة الرابعة : اشتري عقار
===========================
وديه خطوة اضافية – مش ضرورية – لكن مفيدة جدا للي يقدر يعملها
انت كأجنبي تقدر تشتري شقة في تركيا ولو اشتريتها بتاخد اقامة انت وكل اسرتك , فانت لو اشتريت شقة بتكون من اهم المستندات اللي بتقدمها في مقابلة الشنجن او التاشيرة الأمريكية
انت بتقولهم انا مش بس حالتي المادية كويسة , ده انا كمان عندي القدرة اني اشتري شقة في بلد غير بلدي , ومستحيل اسيب تركيا واهاجر في بلد تانية , فاطمنوا عمري ما هاكسر الفيزا
وشراء الشقة في تركيا مش غالي جدا , الشقق في اسطنبول ايوة غالية بس في شقق في محافظات بعيدة – زي انطاليا و غازي عنتاب وانطاكيا واضنة والاسكندرون – بتكون فيها شقق رخيصة فعلا بتوصل لـ 20 الف دولار
فلو ان اسرة قدرت تجيب الرقم ده وتشتري الشقة وتعمل عليها اقامة ويروحو بالعقد للسفارة الامريكية او الشنجن هتكون نسبة الموافقة كبيرة , وطبعا لو حالتك المادية افضل وقدرت تجيب شقة في اسطنبول هيكون احسن بحيث تقيم فيها , ولما تاخد الشنجن , بيع الشقة وخد فلوسها
بس أأكد إن شراء الشقة مش حاجة اساسية , ناس اعرفهم من غير شراء اي شئ وجابو التاشيرة , بس زي ما قلنا هي من الحاجات القوية , خاصة لو كانت اسرة مقيمة هنا مش فرد لوحده
===========================
الخطوة الخامسة : أسس شركة
===========================
تاسيس الشركات هنا من الحاجات اللي بتخلي نسبة الموافقة علي الفيزا اعلي , و ده يا اما تعملها لوحدك او تشترك فيها مع كذا حد
يا سلام لو الشركة يبقي ليها حساب بنكي كبير , وعليه تعاملات علي طول , ده بيخلي موقفك اقوي بكتير . .
مشكلة تاسيس الشركات انه مش بس مكلف في البداية , ده كمان محتاج مصاريف شهرية لا تقل عن 200 دولار . .
فلو تقدر انت و كام واحد تشتركو و تعملو شركة هتخلي نسبة الموافقة كبيرة . .
===========================
الخطوة السادسة : سبب للذهاب
===========================
و هي انك يكون معاك سبب مقنع انت رايح ليه , حكاية انك رايح سياحة , ده سبب كويس , بس برضه ممكن تشوف معرض خاص بشغلك , او مؤتمر بيتكلم عن حاجة متعلقة بدراستك , او رايح جامعة هناك تسال علي ماستر مثلا . .
بس خد بالك ان اي سبب هتكتبه , هيسالوك فيه , ولازم يكون معاك ورق مقنع , وتكون اصلا مؤهل عشان تعمل الحاجة ديه , مش تكون رايح معرض لتيكنولوجيا المعلومات في برلين و انت مجال دراستك الاقتصاد مثلا . . .
لو انت مؤهلك مناسب للفعالية ديه , ومعاك ورق رسمي هتقوي موقفك كتير
ممكن يكون بس السبب انك رايح سياحة , ساعتها يكون معاك حجز فندق و طيران و برنامج سياحي
===========================
الخطوة السادسة : دعوة من مواطن او شركة اوروبية
===========================
موضوع ان يكون فيه دعوة من مواطن بلجيكي مثلا , ده سيف ذو حدين , اما يقوي موقفك , او يكون سبب في رفض ورقك اصلا . . .
الدعوة الاصل فيها ان ليك حد هناك في البلد اللي انت رايحها , هيستقبلك و هتقعد عنده وهو هيتحمل المسؤولية عنك , فانت اصلا لو ورقك قوي , فالدعوة بتقوي موقفك , وبتخلي نسبة القبول اكتر . .
بينما انت لو ورقك ضعيف , فالدعوة هتكون سبب انه يرفضك , لانه هيتاكد انك رايح مش راجع تاني , فالافضل ساعتها متقدمش دعوة
===============================
نيجي بقي للخطوة المهمة . . .
انا عملت كل ده خلاص و عايز اقدم , اقدم ازاي و انا في تركيا اروح فين ؟ فين عنوان سفارة ايطاليا عشان اقدم هناك ؟ ؟ ؟
الحقيقة ان تقريبا كل بلاد اوروبا , انت مش بتقدم في سفارتها , لكن في مكتب وسيط ليهم . .
اما مكتب VFS او IDATA
المكاتب ديه بتستلم منك الورق , وبتدفع الفلوس , و بتبصم , وهما بيبعتو الورق للسفارة , و بعدها بييجي الرد من السفارة بحاجة من اربعة . .
-
يا اما يبتعت الباسبور , ويكون فيه الفيزا ( لو ورقك قوي )
-
يا اما يتبعت الباسبور و تم الرفض (ورقك ضعيف)
-
يا اما السفارة تقول للمكتب احنا عايزين ورق كذا كذا ( حاسين ان ورقك قوي بس عايزين لسة حاجة معينة )
-
يا اما السفارة تتصل بيك , احنا عايزين نقابلك ( حاسين ان ورقك قوي بس عايزين يسالوك علي كام حاجة او يقابلوك )
-
فانت اول خطوة حدد انت عايز تروح دولة ايه :
لو عايز المانيا او ايطاليا يبقي عليك و علي مكتب ايداتا
ولو عايز باقي دول اوروبا عليك و علي في اف اس
انت بتدخل الموقع , سواء هنا او هنا , وبتختار عايز دولة ايه , وبتحدد انت فين , و عايز يوم ايه
بعض الدول بيقولك املي الابليكاشن ده الاول , وبعدها بيقولك تعالي الموعد علي طول , وبتحدد عايز انهي مكتب , لو انت في اسطنبول فافضل مكتب هو مكتب حربية , اللي جنب تقسيم علي طول , وده مكان مكتب في اف اس و ده مكتب ايداتا
و الاتنين تروحهم بسهولة من محطة مترو عثمان بيه
يوم المقابلة تروح المكتب في معادك و معاك الورق التالي :
-
صورة شخصية بخلفية بيضا , ولو مش عندك جوة المكتب فيه تصوير ب 20 ليرة
-
حساب بنكي محترم علي كذا شهر فات
-
حجز فندق , وممكن تعمله من هنا
-
حجز طيران , وممكن تعمله من هنا
-
تامين صحي خاص بالسفر للشنجن , والافضل تعمله لمدة 3 او 6 شهور , و فيه مكاتب في حربية بتعمله بما يساوي مثلا 200 ليرة
-
التامين الصحي الحكومي SGK
والحقيقة ان اخر حاجة هي اصعبهم , لان سفارات الشنجن غالبا مش بتقبل حد الا لو معاه تامين صحي الحكومي SGK اللي هو بيتعمل للي شغالين بشكل رسمي في تركيا
و ده مشكلته مش بس انه مكلف ( تقريبا 200 دولار شهريا ) المشكلة ان مين هيعملوهلك اصلا , لانه لازم يتعمل علي اسم شركة رسمية حقيقية . .
لو انت مأسس شركة او انت طالب فانت مش محتاج الورقة ديه , لكن غير كدة فاحتمال القبول قليل جدا من غيرها
كمان خد بالك من حاجتين مهمتين جدا
لازم تكون مرتب المواعيد مع بعض بشكل سليم . .
يعني ايه الكلام ده ؟ ؟
يعني انت مثلا هتقدم يوم 1 يونيو , فتكون مخطط انك هتسافر مثلا يوم 10 يوليو , والسفر لمدة 6 ايام , فالرجوع هيكون يوم 16 يوليو
فلازم يكون كلا من : حجز الفندق + حجز الطيران + التامين الصحي + المواعيد المذكورة في الابليكاشن بنفس التواريخ بالظبط
ميكونش فيه اي لغبطة او تداخل في المواعيد , عشان ميتمش رفض الفيزا
الحاجة التانية المهمة هي خد بالك من حجز الفندق جدا
لان حجز الفندق لو وهمي , او لو مش متاكد عليه , فهيتم برضه للاسف رفض الفيزا
و خد بالك ان موقع بوكنج , لو انت حجزت الفندق اللي من غير اي ديبوزيت , فاحتمال يلغيه فورا من غير ما يقولك , فالافضل تحجز الفندق اللي ممكن تلغيه مجانا
سيادتك بتروح بالورق ده علي المكتب , تصوره الاول يا اما برة يا اما من جوة , لما بييجي دورك الموظف بيشوف الورق , ويستلم الصور , ساعتها يديلك وصل تدفع الرسوم ( حوالي 80 يورو او ما يعادلها بالليرة )
وبعدها تدخل تبصم , وتتصور تصوير ليهم ( غير صورتك الشخصية ) و تروح
و خلال اسبوع او اسبوعين بيبعتولك رسالة من تلاتة
-
اما ان الباسبور بتاعك وصل المكتب تعالي استمله , وبيكون مقفول انت اللي بتفتحه , و بيكون بالموافقة و معاه الفيزا او بالرفض
-
او يقولولك هات ورقك كذا كذا عشان السفارة طلبته
-
او ممكن بقي السفارة نفسها اللي تتصل بيك و تقولك تعالي لنا يوم كذا قابل القنصل عشان يشوفك
والمقابلة بتكون مهمة الحقيقة , لان علي أساسها بيبان هل فعلا انت رايح سياحة ولا لا