نقوم هنا بعرض عدد من الأفكار الاستثمارية الجميلة للشباب الآتي لتركيا

===================================

​

قبل كل شيء حابب اقول كلمة للشباب انا مش عاوز اعرف انتا معاك كام فجيبك من الفلوس دلوقتى لكن يهمنى اعرف انتا معاك اد ايه احلام فخيالك

 

عمر مكان الفقر هو الحاجز بين الناس الناجحه وبين أحلامهم .. طول ما عندك اراده وفيك نفس اسعى ورا احلامك مهما طال الزمن ومهما كبرت فالعمر , لازم تعرف ان الاسد بينجح فربع المحاولات اللى بيعملها فقط عشان يصطاد فريسته وبيفشل فباقى المحاولات وانتا مش محتاج غير انك تستمر بالمحاولة والمثابرة وان شاء الله هتوصل للى بتتمناه ..

​

البوست ده ما هو الا عرض لمجموعه من الافكار اللى انتا ممكن تشوف بعضها او واحده بس منها مناسبة للتنفيذ ..

 

البوست ده بداية لسلسلة بتقدملك مادة خام من الافكار تقدر تطلع انت من كل فكره 100 فكره جديده تسادك انك تنجح خد كلامى بمحمل ليه لا وشوف تقدر تعدل عليه ازاى بحيث اى فكره من الافكار المعروضة تكون قابلة للتنفيذ على ارض الواقع لو مش منك يبقى من حد تانى ..

 

لكن بطلب منك انك تضيف افكارك على البوست وعلى كل بوست فالسلسلة دى بحيث تكون زى مخزن للافكار لكل واحد بيدور على حلمه .. وانا معاكم ..

​

============================

 

1- أجر شقة او بناية كاملة وافتح هوستل :

​

ببساطة انتا تقدر تأجر شقة فمكان يكون كويس .. كويس يعنى قريب من الاماكن السياحية والمزارات والمواصلات العامة زى المترو والمتروبوص والباصات , طيب يعنى ايه هوستل يعنى مينى هوتيل بتأجر فيه ليلات للنوم زيه زى الاوتيلات بالظبط لكن الاوتيل او الفندق بيبقى اكبر فعدد الغرف وبتبقى متعددة الادوار ولها فروع ..

​

يمكن تحديدا اللى عاوز اتكلم عنه فموضوع الهوستل نقطتين .. الاولى طريقة تسويق الهوستيل , والثانية الشقة اللى هتعملها هوستل ومتطلباتها ..

​

فشرم الشيخ وبما انها مدينة سياحية كان فيه نظام كان بيعمله ناس كتير من هواة الاستثمار ايام مكانت السياحة شغالة كويس هناك وهو انه يأجر شقة ويبدأ يضيفها رسميا على نظام الهوستلات المعتمد والمعروف البحث عنه عالويب من خلال اشهر المواقع العالمية الخاصة بتأجير الفنادق والاوتيلات والهوستلات والشقق الفندقية ..

​

وعلى سبيل المثال موقع بوكينيج www.booking.com تقدر تتعاقد معاه علشان ينزلك الهوستل بتاعك ضمن الهوستلات المعتمده عليه ..

​

ايه المزايا ؟

​

• اولها ان الموقع مضمون عالميا ومشهور للناس اللى متعوده تحجز قبل متسافر وهى رايحه مكان معين .

• الموقع بيحصلك من العميل الحجز الفعلى اذا اخترت ان يكون الهوستل بتاعك الحجز فيه مؤكد قبل الوصول .

• الموقع بيحولك فلوسك اول وبياخد نسبته على العملاء اللى بيحجزوا من خلاله للهوستل بتاعك .

• الموقع بيسيب ميزة التقييم للهوستل واللى من خلالها تقدر تعرف رضاء العميل الحقيقي من عدمه عن مكانك من حيث كل شيء الخدمه , المكان , النضافة , المعاملة , الخ ..

• الموقع هيبعتلك زبائن من كل حته فالعالم يعنى هيجيلك من كل القارات ومع الاستمرارية بتكون هناك مستويات وتفضيلات للهوستلات حسب التقييم عالموقع واللى من خلاله تقدر مع مرور الوقت تكون من أوائل نتائج البحث على الموقع نفسه فالظهور للناس اللى عاوزه هوستلات فالمكان بتاعك 

​

​

طيب ايه شروطه ؟

​

المعلومات القديمه اللى كانت عندى كانت كالتالى :

​

• اولا بخصوص الهوستيل .. هيحتاج الموقع انه يتأكد من كل اللى بتقول انه موجود عندك فالهوستل يعنى مثلا قولت 4 غرف وكل غرفه فيها 4 سراير يبقى زى مقولت بالظبط .. قولت هيبقى شاشة تليفزيون فكل غرفة وفى واى فاى يبقى لازم يكون موجود ..

​

• الموقع هيبعتلك مندوب من خلاله يشيك على كل الوصف بتاعك اللى انتا باعته بالصور ويشوف مدى مطابقة المكان للموقع والصور والمعلومات اللى انتا مقدمها عن الهوستل بتاعك وكان الموقع بيشرط انك تدفع تأمين بيكون متوازى مع عدد الاشغالات الكاملة فى الهوستل بتاعك ..

​

• مثلا انتا عندك 10 سراير وكل سرير بيتأجر ب20 دولار مثلا فالليلة يبقى 200 دولار فحسبة 30 يوم فيكون تأمينك فالغالب 6000 دولار وهكذا .. واحيانا التأمين بيقل وبيكون فحدود 4 الالاف دولار كحد أدنى .. كل الاشتراطات هتلاقيها عالموقع وهيلزمك بفتح حساب بنكى تحول علية فلوس الحجوزات المؤكده .

​

• والمعلومات الجديده الخاصة بموقع بوكينجج اللى ضافهلنا الاخ محمد فؤاد بما انه عامل المشروع هى كالتالى :

  • ​بالنسبه للحساب او الصفحه الخاصه بالهوستيل فهي من غير اي مصاريف تماماً ولا حتي تحت بند التأمين، كل اللي علي حضراتكم انكم بعد إدخال البيانات اللازمه والصور ذات الجوده العاليه بتنتظروا لإستلام جواب بريدي لتإكيد العنوان بالنسبه لهم وده بييكون فيه كود لتفعيل الحساب رسمياً وانه يكون (online and bookable)

  •  اما النسبه المتعاقد عليها وبتكون موجوده فالعقد المبرم بين صاحب الهوستيل والموقع هي بتكون ١٥% من ما دفع كل مشتري حجز عن طريقهم وده فالحالتين ( كاش او كريديت كارد)، لو دفع كاش بيكون عليك تحويل النسبه لحسابهم البنكي فهولندا (الشركه هولنديه والمكتب الرئيسي فهولندا)

  • وبكده يبقى انتى شيلت هم التأمين اللى كان ممكن تدفعه ..والسؤال هنا طيب هما هيضمنوا حقوقهم ازاى ؟!

  • اذا لم يتم تحويل المبلغ المطلوب اللى هو مبلغ العموله الخاص بالموقع في خلال ٣٠ يوم بعد ارسالهم الحساب الخاص بك والعموله المطلوبه من كل شخص دخل عن طريقهم بيتم توقيف الحساب واعادته لنمط (offline) لحين اشعار اخر او غلقه نهائياً وحظر صاحبه من عمل اي حساب اخر وده طبعا معناه خساره كبيره لوسيله فعاله ومعروفة عالميا ..

  • كان فى صديق مصرى عامله فمنطقة فندق زاده من كام سنه واضطر يقفله لعودته لمصر .

  • طبعا هتقدر تلاقى مواقع تانيه كتير ممكن بتشترط تامين وممكن تسويقها مبيكونش بنفس كفاءة الحجز من على بوكينيج لكن هتحتاج تبحث اكتر عن النقطه دى ..

 

وانتا عندك كذا طريقة تسويق تانية اتكلمنا عنها فأفكار تانية مشابهه تقدر تشتغل عليهم كلهم بالتوازى .. سواء موقع اليكترونى او صفحة فيس او تسويق من خلال جروباات مواقع التواصل او الايميلات وحتى دائرة المعارف ..

​

نيجى للكلام عن الشقة ..

​

الشقة لازم تكون احسنت اختيارها من ناحية اتساع الغرف ومكانها ودى مهمه جدا لازم تكون قريبة من المواصلات وكل ما كانت الشقة قريبة من المواقع السياحية كل مكان فرصتك فوضع سعر مربح ليك اعلى لانك بتوفر على السياح انهم يدفعوا فالمواصلات وانهم يتأخروا بالليل زى مهما عاوزين بأمان وسهولة للوصول ..

​

صاحب الشقة التركى لازم يبقى عارف انك هتعملها هوستيل ومتوقع انه يرفع عليك السعر شوية او يرفض لكن أفضل من انه يلغى التعاقد بعد متكون عملت كل حاجه وبدأت فعليا فالنشاط ودا طبعا معناها خساراة ليك ..

​

لازم تكتب فالعقد انك مأجرها هوستيل لان مع اول خلاف ممكن يقولك انه ممكن يلغى العقد وهيبقى من حقه يلغيه لانك مسجلتش الحقيقه عالورق ..

​

العيب فموضوع التسجيل انك لو اضريت تفتح عددات المياة والغاز والكهرباء هتتحاسب تجارى ودا هيزود من تكلفة فواتير التشغيل .. ممكن تزود التأمين شوية قليلة مش كتير مع صاحب الشقة وتقنعه انه يفتحلك العدادات على اسمة افضل وان مصاريف الانتقالات عليك اللى هى مثلا 200 ليرة ولا حاجه هو مش صارف ربعهم فعليا بس علشان ميحسش انه هيدفع من جيبة ..

​

الشقة كل مكان الفيو بتاعها حلو كل مكانت عنصر جذب وكمان كل مكانت فادوار مش علوية يعنى دائما يفضل انها تكون فالاول علوى او التانى لان فالغالب العمارة او البناية هتكون سكنية مش فندقية .

​

الشقة ممكن تقسم الغرف بتاعتها لغرف فردية وغرف عائلية لأن فالغالب هيجيلك عائلة من فردين او ثلاثو او اكتر وتقدر تستم الشقة زى مانتا عاوز بديكور داخلى غير دائم يعنى ملكش دعوه بالحوائط وازالتها او فتح غرف على بعض وغيره الا بالاتفاق مع المالك ومنصحكش بده أبدا لان مصاريفها فالبلدية عالية جدا وهتضر تدفع هنا وهنا بشكل غير رسمى علشان امورك تمشي وبتاخد وقت طويل الوقت ده هيتعد عليك فالايجار وهيعطلعك فالبداية وده طبعا معناه خسارة ليك .

​

لازم تحافظ على مستوى خدمه فندقى لو حابب تكسب بجد والمكسب الفعلى هيكون من تانى سنه لما تقييمات مكانك الايجابية تزيد ..

​

مش محتاج اكلمك عن المعاملة مع الزبائن وتوفير الراحه والهدوء ليهم والامان وخلافة الخاص بالمتعلقات والغرف .. فى نمازج مصرية لكن لست على معرفة بها مطبقة الفكرة دى فعليا فاسطنبول وفبلاد تانيه غير مصر . ودى 50 نصيحه من ناس ناجحه فاتحه المشروع وشغال معاهم كويس اوى :

​

• خليك قريب من المعالم الاثرية

• خليك قريب من وسائل المواصلات العامة

• اعمل الهوستل بتاعك فمكان آمن

• اعلم الهوستل فمكان ميكونش غريب فيه المشروع

• اعرف لغة تقدر تتعامل بيها دوليا زى الانجليش مثلا

• خليك على قمة نتائج البحث عن السفر فالويب

• مش شرط تكون فوسط البلد لكن مهم تكون فمكان امان للسياح

• لازم تقرر هتشترى الشقة اللى هتعملها هوستل ولا هتاجرها

• عنصر الوقت مهم لو معندكش التمويل الكافى لازم تكون عامل حسابة

• احصل على مشورة قانونية قبل متفتح عشان تعرف اللى ليك واللى عليك

• شوف ناس عامله نفس المشروع وحاول تتكلم معاهم واطلب النصيحه

• فحالة اذا كنت هضيف نشاط تانى زى كافية داخل المشروع اعرف مدى امكانية دا قانونيا

• الاضافات اللى هتعملها للهوستل ممكن تكون مصدر اضافى ممتاز للدخل

• احسب كل كبيرة وصغيرة فمشروعك الاول من علبة المناديل للفيل

• اعمل عروض فالسيزون عالسراير اللى عندك كعنصر جذب

• وانت بتجهز راعى ظروف السوق بتاعك واصرف على قد مستواه وبلا رفاهية زايده عديمة الجدوى

• فى حاجات زى المراتب والشراشف والحاجات دى بتحتاج تغيير دورى فمفيش داعى تجيب حاجات غالية الثمن

• اعمل مطبخ كويس وميكونش صغير فالمساحة ابدا واوعى تفكر ان وجود ميكرويف فقط كافى لمساعدة النزلاء .. من الاخر اصرف شوية عالمطبخ لانه مهم

• حافظ على عملائك وانا عارف ان التكييفات مكلفه شويه لكن محدش بيحب ينام فسونا وكمان محدش بيقدر ينام من غير غطا كويس فالجو البرد

• خلى فيه جو اجتماعى عندك فالهوستل ومكان تقدر الناس تتكلم فيه ويحسوا بمتعة المكان مش نومه والسلام

• خلى فيه غرفه للى مش عارف ينام يقدر يدردش فيها برحته بالليل من غير ميزعج حد

• ممكن تكون غرفة مشاهدة التليفزيون هى غرفة الدردشة رغم انها ممكن تعكنن على اللى بيتفرج ,

• تهوية الحمام مهمه جدا لتجنب الروايح الكريهه ومن حق اى نزيل ياخد دوش محترم فجهز كل شيء بخصوص الحمام لانه مهم اوى

• اعمل خزن علشان اللى عاوز يشيل حاجه وقلقان عليه كأمانات وراعى ان تكون مساحة الخزنة مناسبة انها تشيل حاجات زى اللاب توب مثلا واعمل مكان للشنط

• متنساش غسالة الملابس والمجفف او وفر مكان للغسيل خارجى على حسابك

• وفر فطار مجانى وممكن بمكونات رخيصه توفر وجبة فطار مرضية زى شوية نواشف ومربات وجبنه وخبز او نوع من انواع الفطاير البسيطه

• وفر شاى وقهوه وزجاجات مايه مجانية كل الحاجات دى بتخلى الناس مبسوطه

• حاول تستفاد من عروض الماركتات الخاصة بالاكل والشرب والمنظفات اللى بتستخدهم بشكل دائم هيقلل عليك التكلفة

• حاول توفر كتيبات معلومات وخرائط للمدينة علشان ميعملش عليك ضغط اسئلة او على الموظفين لو عندك موظفين

• وفر سماعات للرأس وشوية كماليات لو حابب زى الجيتار وبعض الالعاب الرقمية بلاى استيشن مثلا

• تقدر تقدم جولات مجانية لبعض الاماكن القريبة للسوق او اماكن سياحية او اماكن ممارسة الرياضة

• لو حابب تتعاقد مع شركة سياحة او باص كويس ينقل نزلائك وقت الحاجه هيكون شيء جميل ,

• لو حابب توفر اكتر بقى يبقى خلى العربية او الباص دى بتاعتك ملك يعنى هيدخلك عائد مجزى ,

• خلى زباينك على اتصال بالعالم من خلال واى فاى قوى وسريع واعمل فيش كهربا كتير فكل حته عشان الشواحن وخلافة

• لازم يكون فى مكتب او ديسك للاستقبال ومتعينش موظفين كتير

• انسي ان يكون ليك وقت محدد للشغل هتعمل كل حاجه واى حاجه فاى وقت خلال ال24ساعة بتاعة اليوم وخاصة مسالة المغادرة والتسكين

• فالغالب هتحتاج ناس تساعدك فلما تختار حد اختار حد يقدر يعمل مهام متعدده زى التنظيف واعطاء النصيحة للنزلاء واعداد الافطار يعنى يكون سوبر

• النظافة هى كل شيء هى اللى بتقش .. حمامك نضيف فرشتك نضيفة واللى يكلمك غزه

• ممكن توفر عمالة مقابل النومه والاكليعنى لو تعرف حد ظروفه صعبه وكده هيكون مفيد للطرفين ,

• لازم اللى واقف على ديسك الاستقبال يكون بيعرف انجليزى كويس

• وجود عقد مع الموظف هيريحك من موضوع الزيادات اللى ممكن يطلبها فجأه

• لازم تكون صاحب هوستل وفنفس الوقت صديق للكل يعنى النظام مطلوب مع الود

• حط الامور فنصابها من ناحية انك تبين مهام كل واحد والامور المفروض تكون ماشية ازاى

• لازم يبقى لك موقع على شبكة الانترنت لان دى وسيلة اعلان كويسة

• حسن من ترتيب على جوجل من خلال جوجل اد وورد ومن خلال مواقع التواصل الاجتماعى ,

• وزع بوسترات فالاماكن القريبة منك عنن الهوستل بتاعك

• فى قائمة مواقع كتير ممكن تفيدك فتسويق مشروعك

• اهتم بتعليقات النزلاء وردود افعالهم

• لو بدأت تلعب معاك ممكن تطبع تى شيرتز وتديها للنزلاء هيفتكروك ويبعتولك ناس تانية ويكونوا وسائل دعائية فعاله

• لازم يكون عندك دليل كبير لكل حاجه ممكن يفكر العميل يسأل عليها فمدينتك .

​

​

 

• هنا هتلاقى القانون الخاص بعمل الهوستل فتركيا

• وهنا هتلاقى نصائح قانونية عن الموضوع فتركيا  

• وهنا هتلاقى هتلاقى نصائح ازاى تبدأ وتستمر

 

============================

 

2- استأجر شقة وأجرها سياحى :

​

نفس الفكرة الخاصة بالهوستيل لكن دى هتكون شقة سياحية بتؤجر لعيله او شخص لمده معينه اسبوع مثلا او اكثر وممكن لمده توصل لشهرين متتاليين

 

بإختصار هى عباره عن شقة مفروشة وموجوده فمكان قريب من المواصلات بتوفر على السايح اللى معاه اسرته انه يقعد ففندق بمبلغ وقدره وكمان لان الفندق بيكون له اشتراطات زى عدم دخول الاكل الغرف وانه لازم يدفع فوجبة فطار ممكن متكونش مناسبة لية او لاسرته بالاضافة انه لو أكل الغدا والعشا بره هيكون الكوست عالى عليه اوى وعشان كده ناس كتير بتفضل الشقق السياحية ..

​

كل اللى حضرتك قريته بخصوص الهوستيل قابل اننا نقوله تانى على الشقق السياحية .. لكن النقطه اللى حابب اتكلم عنها بإختصار هى الجدوى الاقتصادية من الشقة السياحية .. متوسط سعر الليلة الفندقية فاسطنبول هى حوالى 70 دولار للغرفة ودى للفنادق ال3 نجوم وهونفس سعر متوسط الليلة فالشقه السياحية

 

لكن الشقة ميزتها عدد الغرف والخصوصية وامكانية ان المستأجر يجيب عيلته معاه مهما كانت كبيرة لانهم ببساطه حرين يناموا ازاى وياكلوا ايه بدون قيود ... المفترض انك لو هتأجر شقة فمكان كويس ومساحتها معقولة 110 م او اكتر مثلا هيكون متوسط ايجارها حوالى 1300 الى 1800 ليرة يعنى متوسط 1500 ليرة تقريبا بما يعادل 500 دولار بالاضافة لفواتير شهرية متوسطة 100 دولار

 

كمان يبقى شهريا مطلوب منى 600 دولار تقريبا وهوما يعادل اشغال للشقه عدد 12 يوم تقريبا اذن لو حضرتك حققت الحد الادنى للمصروفات بتأجير الشقة 12 ليلة فمفيش اى خساير والارباح تبدأ مع حضرتك بداية من الليلة ال13 ..

 

لو افترضنا هتأجرها شهر كامل لشخص واحد بيكون فيه خصم حضرتك بتعمله وانتا بتتحرك تبع حركة السوق لو فى ضغط شغل فالسيزون ممكن ترفع السعر شوية او تقلله وهكذا لكن تصور لو حققت اشغال شهر كامل مضروب فالسعر الاساسى فهيكون فى صافى ربح حوالى 1500 دولار تقريبا .. وهكذا .

​

الموضوع لا يخلو من مخاطرة ودا اساس اى تجارة .. فالشتا نسبة الاشغالات بتكون قليلة تكاد تغطى مصاريفها او اقل احيانا والموضوع مرتبط ارتباط وثيق بالسياحة والقدوم لتركيا فكل مكانت الاجواء السياحية كويسيه كل مكان فرص الربح من المشروع اكبر .. والفكره منفذه بشكل واسع جداا فاسطنبول ومن مختلف الجنسيات والطبقات ..

​

 ولازم تقرا المقال دا قبل متأجر الشقة

 

============================

​

 3- افتح مطعم لو عندك خبرة فمجال المطاعم

​

اسطنبول تحديدا ليها سيستم انا شايف انه فقمة الروعة لو احسنت استغلاله فموضوع المطاعم والمشروعات بشكل عام .. ايه هو ؟؟!

​

لو تلاحظ طول ما أنتا ماشى فأسطنبول وتحديدا فالاماكن السياحية زى السلطان احمد وسيركجى وبايزيد وتقسيم وايمينيو . هتلاحظ ان فى ناس عامله كافيهات ومطاعم على السطوح للعمارات السكنية .. الحقيقة ان القانون هنا بيسمح انك تعمل المشروع اللى انتا عاوزه فالمكان اللى انتا عاوزه .. يعنى ايه ؟؟

​

يعنى مثلا حضرتك عاوز تفتح مطعم فالدور الخامس فشقة سكنية بعد متحولها لمطعم البلدية تقولم مفيش مانع .. عاوز تفتح كافية فبرج فالدور العشرين علشان تشوف البلد كلها من فوق البلدية تقولك مفيش مانع .. عاوز تفتح اى نشاط تجارى فاى حته البلديه بتوفرلك الورق وتسمحلك بيه .. ودى ميزة خرافية اذا احسنت اختيار المشروع والمكان وتحديدا المطاعم والكفيهات ..

​

يقال دائما بالبلدى فمصر اى حاجه فيها اكل وشرب بتنجح وفالغالب المقولة صحيحة اذا اخدت باسباب نجاحها .. زى ايه مثلا ؟ ..

 

عوامل كتير فالعمل الحر مشتركة بتساعدك تنجح لكن اهمها موضوع الخبرة فنفس المجال .. ا

 

لخبرة هى العنصر رقم واحد فنجاح المشروع لو فكرتك نفذتها قبل كده وكانت ناجحه معاك فاحتمال نجاحها معاك لو كررتها فتركيا عالى جدا مع الاخذ فالاعتبار طبيعة المكان الجديد وبما ان كلامنا عن المطاعم فأنا حابب اضرب مثال بالاخوة السوريين .. كل ما بيروحوا فحته مبيفتحوش غير مطاعم ويمكن كمان تحديدا شاورما واكل سورى والحقيقه انا بعتبر ده عنصر قوة فشخصية صاحب المطعم السورى لانه ببساطة بياخد بابسط قواعد النجاح المعروفة فعالم المطاعم والعمل الحر بشكل عام وهى ( اعمل فيما انت ماهر فيه ) ! بس .

​

الخبرة تساوى المهارة , الخبرى تساوى حسن الادارة , الخبرة تساوى تقليل التكاليف والنفقات , الخبرة تساوى عدم السذاجه وتجنب الوقوع فاخطاء البدايات .. بإختصار الخبرة تساوى النجاح اذا احسنت التوكل على الله ..

​

اكيد كمان لازم لو هتفتح مطعم يكون عندك حسن اختيار للمكان لان ده تانى اهم عنصر فنجاحه .. اختيار المكان من حيث الزبائن المستهدفين ومن حيث الحى ونشاطه وقربه من مطاعم مشابهه وسهولة الوصول ليه وكل شيء من حيث الايجارات وخلافة اللى نقطة الخبره هتوفر عليك كل ده يمكن بنظرة عين للمكان ..

​

حابب انوه على نقطه مهمه جدا وخطأ بيقع فيه معظم الناس الجديده او الناس الخبيرة لكن حديتة الاقامة بتركيا .. تركيا بلد لها طبيعة خاصة من حيث الاكلات وطبيعة الناس .. مش كل الاكل هيصلح ينافس فتركيا فعلشان كده متغمرش بحاجه جديده لانهم منغلقين شوية على الاصناف اللى بيعمولها واللى بيعمولها بطريقتهم تحديدا ..

 

عندهم محشى وعندنا محشى لكن المحشى بتاعنا غير اللى عندهم نهائى فطريقة التحضير وبعض المكونات العشبية البسيطة اللى بيديله نكهه مختلفه تماما عن اللى عندنا ,

كمان مثلا البدنجان الاتراك بيجففوه الاول وبعدين يستخدموه لعمل المحشي ونادرا لو لقيت محشى بدنجان طازه ميعرفهوش تقريبا ..

​

النقطة التانية المهمة جدا جدا ان وانت بتنوى تفتح مطعمك ومن الاخر يا تخلية للاتراك يا سياحى للاجانب .. الاتراك مبيحبوش ياكلوا فمطاعم غالبية الزبائن الموجودين فيها اجانب ابدا .. بالبلدى بيحبوا المطاعم البلدى بتاعتهم ..

 

لو حسوا ان الرجل عالمطعم غالبيتها غير اتراك فاحتمالية جزبك لزبائن اتراك لمطعمك ضعيفة جداا وده خطورة الحقيقة بتظهر فموسم الشتا ووقت عدم وجود سائحين مش هتلاقى اللى يشيلك ويخلى العجلة شغالة لان انتا قررت تضحى بالزبون التركى اللى مبيحبش الصوت العالى والهزار بتوع العرب ولا بيحب نوعية الاكلات العربية فمعظمها واللى كمان حرمته انتا خصوصيته الثقافية بانه يحس انه بياكل فوسط اتراك .. فنصيحتى أحذر النقطة دى لو عاوز تنجح فمطعمك .. وربنا يوفقك ان شاء الله .

​

ملحوظة! فى نمازج مطاعم عربية ناجحة جدااا فتركيا تحديدا السورية والعراقية وها يا مسهل فى كام مطعم مصرى بدأوا يدخلوا فالمنافسة وصنع اسم دائم وزبائن شبه دائمى التردد على المطعم ..

​

​

============================

​

4- افتح مطعم سمك او خد اسم تجارى لحد فمصر واشتغل عليه.

​

قعدت سنتين فتركيا بلف على مطاعم سمك تقدم وجبة محترمة ملقتش .. مطاعم السمك اللى هنا فتركيا فيها عيوب قاتله .. اولا ميعرفوش يعنى اية سي فود ..

 

 شوربة السمك كل اللى يعرفوه هو الشوربة العادية بتاعة السمك مش شوربة السى فود بتاعتنا بتاعة مصر .. وعلى فكرة شوربة السي فود اللى بنشربها فمصر دى العالمية اللى موجوده فكل دول العالم ماعدا تركيا مش منتشرة فيها ..

​

مؤخرا اخ مصرى معانا عالجروب لقيته بيعلن عن مطعم سمك فمنطقة طرابيا وحاطط منيو شوربة سمك سي فود مصرية .. فرحت اوى بس كنت خرجت من تركيا والا كنت هبقى زبون دائم عنده الحقيقه ..

​

تانى عيب فمطاعم السمك التركية انها بتقدملك السمكه زى ماهى بعد التسوية عالنار سواء قلى او شوى .. يعنى بدون التوابل المصرية ودقة الثوم والفلفل والليمون وكمان ميعرفوش الشوى بالرده ولا السنجارى ومعندهمش سمك بلطى بحرى او نيلى زى مصر .. لكن برده عندهم الدنيس واللفريك وغيره من السمك الطيب ..

​

طيب الفكره ايه .. الفكره انك تقدر تنافس بمطعم سمك محترم بيقدم اللى بيفتقده السوق التركى فى الاكلات البحرية .. الاكلات البحرية موسوعة يا جماعة وفيه منيو كبير جداا منها .. الطواجن والمكرونات وانواع الرز وانواع الشوى وانواع السي فود وانواع السلطات البحرية ..

​

انا من عشاق المأكولات البحرية الحقيقة وأكلت فمطاعم كتير فاسطنبول وللاسف ملقتش الطعم اللى يتقال علية سوبر فالاسماك ..

​

من فترة كان فى مجموعة شباب مصريين اعلنوا انهم بصدد فتح سلسلة مطاعم سمك فاسطبول وبعدين اختفوا.. اتمنى ان حد يدرس الفكرة بتوسع ويكون له خبره فالمطاعم ويشوف شيف بحرى من مصر يمسكله المكان ويحسن اختيار المكان بتاع المطعم ويتوكل على الله ..

​

الاماكن الاساسية لفتح مطعم سمك لازم يكون منها الاتى : ايمينينو , سيركجى , السلطان أحمد , بيازيد , بشكتاش , كاركوى , ينى كابى , تقسيم , الاستقلال, الفاتح , اكسراى , شيشلى , السلطان ايوب . .

​

وغيرها من الاماكن لكن دى فالغالب الاماكن السياحية اللى شغل عليها ممتااااز فالاكلات البحرية .

​

شوف البوست ده عن انواع السمك الموجوده فاسطنبول  وهنا هتلاقى خطة عمل لمشروع قبل متبدأ