دروس خاصة لتعلم اللغة التركي
بوست في منتهي الأهمية , سواء للمقيمين في تركيا اواللي في مصر و عايزين ييجو . . وياريت الناس تركز معاه . . .
حاليا بلادنا العربية ماشية من سئ الي اسوء , وكل اللي كان عنده امل ان البلاد تنصلح قريب راح خلاص , وده يخلي كل واحد في مصر لازم يعمل لنفسه خطة واضحة انه يشوف لنفسه وطن بديل خلال فترة قريبة . . .
وبما ان تركيا - حتي الان - من البلاد اللي سهل الي حد ما الوصول ليها وعمل الاقامة فيها , فده مخليها البديل الاكثر مناسبة . . .
بس العقبة الاساسية اللي بتقف قدام اللي بييجو هنا , هي فرص العمل , وده للاسف واقع صعب الاتراك نفسه عايشينه من زمان . . .
و هنا هتلاقي بوست تفصيلي عن ازمة فرص العمل
طيب نعمل ايه ؟ ؟ ؟
سنة الكون بتفرض قاعدة معروفة علي مدار التاريخ , ان اللي بيجتهد اكتر , هو اللي بينال الجزء الاكبر من الكعكة , وهو اللي بيستريح في حياته قدام . .
والميدان اللي قدامنا دلوقتي للاجتهاد هو تعلم اللغة التركي , واتقانها بشكل كبير . .
ليه ؟ ؟
ايه الدافع الكبير لتعلم اللغة التركي ؟ ؟
-
ان اولا تركيا من اسرع الدول نموا في العالم , وبتشهد حاليا – و هتشهد السنين الجاية – انشاء لعدد كبير من الشركات و المؤسسات . . .
-
ثانيا ان انهيار اسعار البترول في الخليج , هيخلي كتير من المستثمرين اللي كانو هناك – سواء مواطنين خليجيين او عرب مقيمين هناك – يخلعو من هناك و يشوفو بديل , وتركيا من افضل البدائل . . .
-
ثالثا ان انهيار الجنيه في مصر هيخلي اغلب مستثمري و اغنياء مصر , يقررو ينقلو نشاطهم للخارج , ونقول تاني ان تركيا من افضل البدائل . . .
طب و ايه علاقة الحوار ده كله باللغة التركي ؟ ؟
علاقته قوية جدا , في محورين مهمين . .
ان اولا كل المستثمرين العرب دول اللي هيفتتحو مؤسسات وشركات او فروع لشركاتهم هنا , محتاجين حد بيتكلم تركي زي ما بيتكلم عربي , عشان يكون حلقة الوصل بينهم و بين المجتمع التركي , وطبعا الاولوية في التعيين للناطقين بالتركي
وثانيا ان عدد كبير من الشركات التركية يهمها انهها تتواصل مع ملايين الدولارات اللي جاية تستقر في تركيا , و شركات السياحة والاقامات و تاسيس الشركات وغيره وغيره , يهمهم يتواصلو بقوة مع الشركات العربية , وده معناه ان عندهم رغبة اكيدة في تعيين العشرات من اللي بيتكلمو عربي و انجليزي
ده غير ان كل ده هيعمل تنشيط كبير لمجالات تانية متعلقة بوجود العرب في تركيا , عندك تصدير , مجالات تعليمية , تقديم للجامعات , بحث عن عقارات , انشطة سياحية , وغيره كتير من المجالات اللي كلها محتاجة نفس النقطة المهمة : اللغة التركية
تخيل انت حجم البزنس اللي هيكون قدامك وانت محترف لغة تركي ؟ تخيل كمية الفرص هتكون عاملة ازاي ؟ ؟ والمقابل انك تجتهد لكام شهر بس
طيب نيجي للنقطة الاهم . . . نتعلم تركي ازاي ؟ ؟ ؟
اكيد في طرق رخيصة , عندك اليوتيوب , عندك دولينجو , عندك سنتر اولاد الحاج محسن في اخر فيصل , من ابو 100 جنيه في الشهر
بس المعضلة الكبيرة في الطرق ديه , ان بالها طويل جدا , وان اغلب اللي بيبدئوا فيها مش بيكملو و بيزهقو سريعا
ده غير ان طول المدة لتعلم اللغة هيضيع عليك كم كبير من الفرص , والوقت يساوي فلوس , وعمرك مش ناقص سنوات تضيع
والحقيقة ان فيه حاجات كتيرة ممكن الواحد يسترخص فيها , تجيب شقة بعيدة , تجيب هدوم رخيصة , مش لازم فراخ ولحمة , عادي مش مشكلة
بس فيه حاجات , الاسترخاص فيها بيعمل ضرر كبير علي المدي الطويل , وممكن مثلا عشان وفرت 10 الاف جنيه , تضيع علي نفسك فرص بمئات الآلاف
ففكرة انك تعتمد علي كورس ضعيف , او تعلم ذاتي للاسف جابت نتائج سلبية كتير , واكبر دليل كان الكورس المجاني اللي عملناه في الدقي , والكورس التاني اللي عملناه في زيتين بورنو , الحضور كان ضعيف والاستفادة قليلة جدا
وهنا عندنا فكرة مختلفة , اغلي شوية , هتاخد وقت اكتر شوية , محتاجة التزام اكتر , بس النتيجة مبهرة
الفكرة ببساطة ان خمسة يتجمعو , ويفضو 3 ساعات يوميا علي الاقل من وقتهم , بشكل اجباري , ويتم الاتفاق مع مدرس لغة تركي خصوصي , يتجمعو في بيت حد منهم , ويبدئو كورس لغة تركي مكثف و جاد , بشكل يومي , ولمدة 3 ساعات في اليوم
تخيل لما تتعلم لغة لمدة 3 ساعات يوميا علي مدار شهرين او تلاتة مثلا , تصور لغتك التركي هتكون عاملة ازاي ؟ ؟
طبعا اللغة مش بس كورس , لابد من التطبيق والمعايشة و الاستماع لليوتيوب , بس الكورس هيكون الدافع الرئيسي لده كله , وهو اللي هيحطك علي اول السلم الصحيح
ولازم المجموعة متزدش عن 5 , عشان يكون فيه استيعاب حقيقي , وتركيز من المدرس علي الافراد , والا هتكون تضييع وقت , وملهاش لازمة
هتبص علي التكلفة , مش هتلاقيها خيالية , المدرس ده لو تم الاتفاق معاه علي 1500 او 2000 ليرة شهريا ياخدها من المجموعة كلها , هيكون موافق جدا , وده معناه ان كل فرد هيكون عليه 300 او 400 ليرة شهريا , وده كلام فاضي بالنسبة للاستفادة الكبيرة من الموضوع ده , خاصة ان انت اصلا مش محتاج الكورس لمدة كبيرة , يعني شهرين او تلاتة و هتلاقي نفسك زي الفل
فهتلاقي ان توتال اللي انت هتدفعه مش هيزيد ابدا عن 1500 ليرة في المدة كلها , وبالمقابل , هيكون معاك استثمار بعيد المدي , هيفرق في حياتك كلها
والموضوع برضه ممكن يتم في مصر , وبفلوس اقل , يعني لو خمس بنات جمعو نفسهم في القاهرة , واتفقو مع واحدة خريجة السن او لغات و ترجمة علي درس خصوصي ليهم في كورس مكثف زي ده , هتنجح الفكرة لو الجدية موجودة
كمان لو حد متزوج و عنده اولاد , ممكن يعمل نفس الموضوع في بيته ، وان المدرس او المدرسة يجيلو البيت يعلمه هو ومراته و اولاده , وهيلاقي ان بقي هو و مراته و اولاده اتعلمو تركي بشكل كبير , وبقو جاهزين للمعيشة بشكل كامل في تركيا , هو ومراته يشتغلو بسهولة , واولاده يدخلو مدارس حكومية مجانية , وكل ده بكام يعني ؟ هيدفع 10 الاف جنيه مثلا خلال 3 شهور عشان اسرته ؟ يظل مبلغ قليل مقارنة بالمكسب الضخم ده
والحصول علي مدرس لغة تركي سواء بمصر او تركيا مش صعب , مش لازم تجيب حد متخصص من سنتر معتمد , يكفي حد خريج السن او لغات و ترجمة , وفاهم اللغة كويس , وعنده ملكة التدريس
بس الفكرة مش ممكن هتنجح , الا لو فيه قدر كافي من الجدية و الالتزام عند الخمسة اللي هيحضرو الدرس , لو انت داخل الموضوع بتتسلي , ومش قادرتفضي من وقت ساعدتك 3 ساعات في اليوم عشان تبني مستقبلك , فخليك في مصر افضل , وانجوي يور تايم
والجدية مش هتيجي الا عن طريق ان كبير المجموعة يجمع فلوس ال 3 شهور كلها الاول قبل ما تبتدئو , ويبقي واضح الزمان و المكان و التفاصيل , عشان اللي مش عايز يحضر بعدها ميأثرش علي باقي المجموعة
للاسف احنا كمصريين , بنفتقر بشكل عام لنقطة الجدية , والتركيز علي عمل محتاج التزام , احنا شعب سريع الملل , وبيحب الفهلوة , فالافكار ديه مش بتاكل معاه
اتمني الفكرة يتم تطبيقها , الموضوع مش متعب بس عايز "رجالة" عندهم شوية طموح , وشوية حرص علي مستقبلهم عشان يجتهدو كام شهر و يستريحو بعيدين
اتمني الفكرة تجد صدي عند اللي عايزين يغيرو حياتهم , و سهل جدا علي الجروب هنا , ان حد يكون مستعد ويشوف مين تاني عايز يشارك معاه عشان يجمع الخمس افراد , وبعدها يوصلو لمدرس , ويبدئو من الاسبوع الجاي لو عايزين
ونقول تاني , اوعي تسترخص في التعليم ابدا , متقولش خلاص هروح الكورس بتاع جمعية رسالة المجاني , اللي هي حصتين في الاسبوع و 40 واحد قاعد في الحصة , مفيش اي استفادة , انت كدة بتضيع وقتك وفلوسك فعلا , وفر من فلوسك الفين جنيه , وشوف اربعة كمان زي حالاتك , وبالعشر الاف اللي جمعتوها , هتجيبو اتخن مدرس تركي في البلد , مش هيسيبكو الا وانتو عارفين معني الكلمة الجهنمية في اللغة التركي
Muvaffakiyetsizleştiricileştiriveremeyebileceklerimizdenmişsinizcesine
المانيا و اليابان و انجلترا و كندا ، مبقوش علي قمة العالم من فراغ ، هناك فيه حكومة بتخطط و شعب بينفذ ، ان كان عندنا مفيش دور للحكومات ، فانت لوحدك ممكن تخرج من علبة السردين اللي باقي الناس محشورين فيها طول عمرهم ، و تلاقي حياتك اتغيرت بشكل جذري خلال شهور قليلة
انا مش هينفع يكون ليا اي دور في تنظيم الموضوع ده ، انت بنفسك اعمل كومنت هنا وقول ايوة انا جاهز ، مين يبدأ معايا ، و شوف اربعة كمان ، و اتفقو مع حد يدرسلكو اللغة ، و تدريجيا هتلاقي نفسك بتقرب من هدفك خطوة بخطوة
و نهاركو زي الفل