التصريح الأمني للسفر لتركيا , هو مطلوب لكل فرد مسافر لتركيا و عمره بين 18 و 40 عام , لو كان الفرد أصغر أو أكبر من هذا السن فغير مطلوب منه التصريح , ولكن رصدت عدد من حالات التعنت مع أفراد اقل من 18 و اكبر من 40  عام , لطلب التصريح الأمني منهم , ولكن حالات نادرة 

​

و نقوم هنا بنقل منشورين هامين بهما التفاصيل الوافية للتصريح الأمني  كما أن هذه الصفحة فيها المزيد من التفاصيل: 

​

==========================================================================

​

​

روحت انا مجمع التحرير النهاردة للمرة الأولى في حياتي علشان أطلع تصريح السفر من ضابط الإتصال الي بيقولوا عليه، في المجمل التجربة مش مؤلمة زي ما كنت متخيلة من كلام الناس المغرض عن المجمع، الموظفين و الناس متعاونين و ممكن تسأل أي حد في الطرقة هيجاوبك عن سؤالك. الموظفين مش بيبتسموا خالص و مركزين بس في اللي بيعملوه و دي حاجة معنديش معاها مشكلة قوي مادام مصلحتي بتتقضي، بس لو ابتسموا اعتقد حياتهم هتبقى أحسن على المدي الطويل

المهم، الإجراءات كالتالي:
---------------------
هتاخدي معاكي  

• -الباسبور-صورة الباسبور-صورة التأشيرة لتركيا.

• -اعرفي اسم والدك "الخماسي" علشان هتكتبيه في الإستمارة

• -تمن الاستمارة "نص جنيه" مش هيقبلوا ياخدوا جنيه او اي مبلغ تاني و يدوكي الباقي. ممكن تاخدي معاكي حبة فكة علشان تبقي تفكي للناس و تكسبي فيهم ثواب

​

-أنا اخدت معايا احتياطي نسخة مطبوعة من التذاكر و حجز الفندق

 

لما توصلي التحرير:

-لو رايحة بعربية اركني في جراج التحرير، الاجراءات هتاخد حوالي ساعة هتدفي عليها بتاع ٧ جنيه

في الجراج.

-هتطلعي من السلم الي على اليمين الدور الاول، هتخشي يمين، آخر الطرقة هتلاقي في طابوور عليه

شباب كتير...خدي بعضك و ادخلي جوة علشان طابور البنات جوة.

آخر شباكين في الاوضة للتصاريح، رجال و سيدات، بس ده طابور و ده طابور و الشباكين بيبدلوا مع بعض.

- لما ييجي دورك، هتدي الموظفة الورق و الباسبور و هتاخدي منها الاستمارة و تطلعي من الطابور تمليها و ترجعي تاني و هي هتراجع كل حاجة و تقولك هتستلمي امتى التصريح.
و بس كدة

 

ملاحظات عامة:

​

• روحي بدري على قد ما تقدري، ٨-٩ ظريف بعد كدة الدنيا بتتزحم أوي.

• لازم صاحب/ة الباسبور هو/هي الي تقدم.

• كان في حتة في الاستمارة بيتكتب فيها معلومات عن الحالة الاجتماعية، فأعتقد لو واحدة متزوجة هتحتاج تجيب حاجة زيادة، ممكن تكلمي المصلحة في الحالة دي و تسألي.

• خدي معاكي قلم و دوسيه تسندي عليه لما تيجي تملي الاستمارة.

• في مكان تصوير في الدور الارضي جنب السلم.

• في ناس خدت التصريح في ساعتها و في ناس زي حالاتي بتستلم بعديها بيومين أو تلاتة.

• أنا قبل ما اروح كلمت مصلحة الجوازات و الهجرة علشان اتأكد من الخبر و دي نمرهم:

0227927766 - 0227948661

و دي نمر ضابط الاتصال (بس ما عرفتش اوصله بيها )
 

0227956301 - 0227956303-0227956302

- ضابط الاتصال طلع مش بني آدم لابس بدلة ميري و هروح أقف قدامه و يسأل و انا اجاوب، هو في الحقيقة مكتب فيه بتاع ٦ موظفين بيعملوا إجراءات تصاريح السفر

-------------------------------------------
تحديث:

يوم الاستلام

طنط الموظفة قالت لي تعالي اسألي على الاستلام الاتنين او التلات...و بناءً عليه روحت يوم التلات قلت اديهم فرصة يخلصوا الي عايزين يخلصوه
روحت النهاردة ٨:٣٠ و استلمت بعد ٣ ساعات

الخطوات:

تروحي بالباسبور ابدر ما يكون...هما بيستفتحوا٨:٣٠...لو روحتي ٨ ده تحصيل حاصل

النهاردة لما سألت الموظفة قالت لي الاستلام من تاني شباك، بس لما روحت اسأل من باب الموظفين اخدوا الباسبور و قالولي استنى... فماتخديش المعلومة كدة، اسألي لما تروحي و اعملي زي الناس

بعد ما تسلمي الباسبور حاولي تسلي نفسك من ٢-٣ ساعات انتظار

ملاحظات:

- شوفت ضابط الاتصال النهاردة

- ضابط الاتصال عنده صبر و طولة بال تحسب له الصراحة

- التصريح بيتكتب و انتي واقفة و ده سبب التأخير.

- الميعاد الطبيعي للإستلام بعد ٤٨ ساعة من تقديم الطلب، بس ممكن يكون اكتر و انت و حظك

- في كوسة و دي عطلتنا كالعادة

- مش بيمشوا بالدور...بس الباسبورات الي بتروح بدري بتطلع في وقت متقارب

- الفرجة على الناس الي في المجمع مش بطالة

- هتتزقي، و هتداس على رجلك، و هيجيلك عسكري يقومك انتي و الي جنبك من على الكرسي علشان عايز يقعد هو

- في ناس مجانين

- في الآخر انا كنت ماسكة نفسي من العياط...ده بجد! من كتر الاهانات الي شوفتها بتحصل في الناس و الوقت الي مالوش قيمة...اجراء زي ده ممكن جداً يبقى مميكن و نخلص.

- الموظفين من الضغط العصبي جم على الساعة ١٠:٣٠ و استأذنوا و مشيوا....و من حظي ان ورقتي كانت اتملت و ما اضطريتش استناهم إلى اجل غير مسمى

- من الآخر المجمع وسط الاسبوع غير يوم السبت

 

-حاولي ما تزنقيش نفسك في وقت التقديم علشان ما تتوتريش زيي...اسبوعين قبل السفر فُل قوي

​

​

​

==========================================================================

​

​

بعد ما بتطلع الفيزا من السفاره 

بتروح على مجمع التحرير .. الدور الاول ويمينك السلم وانت داخل

بتحط اي شنطه معاك ع السير وتعدي من الباب وتاخد يمينك وتمشي ف طرقه لحد اخرها وتعدي من باب وتلاقي ملف بياخدك يمين وهتلاقي ع شمالك اوضه رقم 15 مكتوب عليها لوحه اداره الاتصال او ضابط الاتصال.
 

-هتدخل الاوضه دي وف ايدك باسبورك وتكو طبعا مصور الباسبور والتشيره اللي استلمتها 
وتروح تقف ع اول شباك من اليمين عشان تاخد استماره بنص جنيه ( مع العلم ان الاستماره ب 30 قرش ) هههههه

- هتملى الاستماره ببياناتك اللي طالبنها ومرفق الصوره بالطلبات اللي مسجله ف اخر ورقه ف الاستماره
 

- تقف تستنى دورك ع الشباك التاني من اليمين ( الشباك اللي جنب الشباك الاولاني اللي خدت منو الاستماره ) بتاخد رقم مكتوب باليد من الموظفه ع الاستماره ده دورك ف الطابور عشان متوجعش دماغك
 

-تسلم الاستماره والباسبور والصورتين للشباك للتاني ف دورك
 

- هتسالك ابوك عايش ؟ طيب اسمه خماسي وتاريخ ميلاده ؟ ولو مش فاكر الخماسي او متعرفوش قولو ليها رباعي وخلاص من غير ما تقول معرفش
 

- هتديك معاد بعد اربع ايام بحد اقصى عشان تروح تستلم وقبل الساعه 1 ظ والافضل تروح بدري من النجمه .. عشان هتسلم باسبورك وتستنى بردو دورك لحد ما تستلم الباسبور مع التصريح
وكل ده مش هياخد منك اقل من ساعتين ان شاء الله لما تروح بدري
 

---- ملاحظات ...
 

- تعمل اداره الاتصال كل يوم عدا الجمعه من 8 ص الى 2 ظ والاجازات الرسميه
- دي الخطوات التصريح لفيزا السياحه وجواز السفر مسجل فيه مهنه او وظيفه وتختلف الاجرائات او الطلبات بناء ع نوع الفيزا و عدم وجود مهنه او طالب
- نصيحه لو عايز تخلص روح من بدري جدا اول ما يفتحو
- مفيش قلق من اي حاجه وبتخلص بنفسك وانت واقف
- متهولش الموضوع ع نفسك وغيرك لانها كلها اجرائات روتينيه بسيطه بس انت امشي فيها وتوكل ع الله
- مده التصريح او صلاحيته .. شهرين فقط

​

أما بالنسبة  للتصريح الأمني الخاص بفيزا الطالب : 

=======================================================

​

​

عشان الناس متخلطش المعلومات في واحد ببقا مكتوب في بسبوره طالب ومعاه ڤيزا سياحه او علاج او زياره او اي حاجه دا مليش علاقه بيه ومجبتش سيرته لانه بيطلع مرافق او بدعوه وفي احتمال رفض ف مهجبش سيرته،،انا هتكلم عن ال مكتوب ف بسبوره طالب والتاشيره بتعته مكتوب فيها Oğrenim/education

تاشيره دراسه يعني،،،

​

التصريح بتاعه هيتم كالتالي:-

 

هيروح السفاره ويقدم علي حاجه اسمها خطاب الموافقه الامنيه..اول خطوه بيقلك ارسال ايميل مشعارف ايه كدا وبلا بلا بلا فكك منها اكنك مقريتهاش،،،

 

دي حالياً السفاره هي ال بتتكفل بيها مش انت علي عكس قبل كدا ،،،المهم هتسلم صوره الڤيزا وصوره البسبور وشهاده الثانويه اصل وصوره وصورتين شخصيتين ليك وبتستلمه بعد ٧ ايام او ٥ ايام لا اقل ولا اكتر انت وحظك بقا،،،،بيبقي مكتوب بلعربي هوا،،،هتاخدو وتطلع علخارجيه توثقو ملخارجيه وبعدها تروح بيه مجمع التحرير تسلمو هوا صوره الفيزا وصوره البسبور فقططططط

 

وبتستلم التصريح بكل سهوله وبدون ادني مشاكل بعدها ب٥ ايام بحساب اليوم ال انت سلمت فيه،،،يعني بعد ما تطلع الفيزا بعدها ب ١٠ او ١٢،،{٧للخطاب و٥ للتصريح}بتسافر بعدها عادي خلاص كدا