الإقامة في الولايات المتحدة
الاقامة في الولايات المتحدة . . .
البوست ده مخصص للي معاهم فيزا سياحية لامريكا , وبيدعبسو علي طريقة الاقامة في البلد , فلو انت مش معاك فيزا امريكا بالفعل هات الفيزا الاول و اقرا البوست , او لو انت فائز لوتيري او معاك جرين كارد فالبوست مش مخصص ليك عشان انت مقيم بالفعل بشكل رسمي في البلد
دلوقتي كتير مننا معاه فيزا سياحة الخمس سنين , وجه امريكا مرة و مرتين و عايز يقيم في امريكا بشكل دائم و بعدها جرين و جنسية , و مش لاقي اي حل
انا في الايام اللي فاتت قابلت اكتر من حد عنده معلومات وفيرة في الموضوع ده , فهعرضها عليكم و يارب تكون مفيدة ليكو
خد بالك انت ان معملتش اقامة في البلد , فهتفضل شغال كاسر طول حياتك , وده معناه مرتب ضعيف جدا , فرص عمل كتير مش هتعرف تشتغلها , مش هتعرف تخرج من امريكا , ولو خرجت مش هتدخلها ابدا , مفيش جنسية , مفيش تامين صحي
ونقول تاني , البوست مخصص للي معاهم فيزا سياحة و عايزين يعملو اقامة , لو عايز تعرف ازاي تجيب فيزا سياحة اقرا ده
================================
فيه 5 طرق اساسية , ممكن منها تحول فيزا السياحة لاقامة دائمة و جرين كارد , بس المشكلة ان الطرق الخمسة اصعب من بعض , و فيهم عدد كبير من العقبات , فمحدش يبقي تفائل قوي لغاية لما يقرا الطرق الخمسة و تفاصيلهم
الطرق الخمسة هما :
-
اللجوء
-
الزواج
-
الاستثمار
-
الدراسة
-
العمل
لاحظو اني متكلمتش عن تملك العقارات , لان كل اللي قريته عن تملك العقارات في امريكا ان مفيش اي نوع من الاقامة او الجرين للي يتملك عقار , اشتري بيت براحتك بس برضه مش هتاخد الا فيزا السياحة تروح و تيجي عليه , وارد يكون فيه اقامة علي البيوت الغالية جدا اللي تزيد عن 2 مليون مثلا , وحتي لو كدة فهي مش متاحة معانا
تعالو نتكلم عن تفاصيلهم واحدة واحدة
================================
اولا اللجوء :
-------------
اللجوء الكلام فيه كتير , بس اختصارا للموضوع , هقول كام نقطة مهمة فيه :
-
مينفعش تقدم علي لجوء الا لما تدخل امريكا بالفعل
-
لازم يكون عندك قضية حقيقية او سبب حقيقي للاضطهاد
-
الموضوع فيه انتظار سنين طويلة قد تصل ل 5 او 6 سنين لغاية لما تاخد الجرين كارد
-
مش هتعرف ترجع بلدك لاي سبب الا لما تاخد الجنسية , اللي هو ضيف 3 سنين علي 6 سنين كمان
وهنا كل التفاصيل اللي تهمك عن اللجوء , ياريت تقراها بالكامل
================================
ثانيا الزواج :
--------------
مشكلة الزواج ان الناس فاكراه لعبة , و ان الموضوع سهل و شقلب و اقلب و خلاص , ومش عارفين ان ادارة الهجرة في امريكا حفظت كل الالاعيب بتاعتنا , وبيعملو كل جهدهم عشان يعرفو جوازك حقيقي ولا لا
خلينا برضه نقول كام نقطة مهمة في موضوع الزواج
-
اولا الموضوع فيه شبهة شرعية كبيرة لو انت عامل حسابك انه زواج مؤقت , لان لابد الزواج يكون قائم علي نية الاستمرار , ولو انت متجوز و عامل حسابك انك هتطلق بعد كام سنة فانت بتدخل في شبهة شرعية كبيرة
-
كمان مينفعش قانونا تتجوز و انت متجوز في مصر , لازم تطلق مراتك الاولي رسميا وتجيب ورقة انك مطلق , ابقي اعرف اقنع ام العيال بكدة بقي لو شاطر
-
ادارة الهجرة دلوقتي بقت متعنتة مع اي زواج هما مش شايفينه متوافق , يعني انت متجوز واحدة اكبر منك بكتير , او مستوي تعليمها مختلف عنك او ديانتها مختلفة او لغتها مختلفة ,مش هاقول انك بتترفض فورا بس احتمالية الرفض واردة جدا
-
كمان بيطبو عليك في البيت في اي وقت , يشوفو هل بالفعل مقيمين مع بعض ولا لا , ويا تري السرير في اوضة النوم ليكو انتو الاتنين ولا كل واحد بينام لوحده
-
كمان لازم الزوجة الامريكية تكون مكملة معاك المشوار للاخر , لو اي لاي سبب سابتك قبل ما تاخد الجرين ( مدة 3 سنين ) يبقي انت لبست في الحيط , واياما حصل ان الزوجة الامريكية تكون متفقة معاك علي مبلغ معين في الاول , وبعد سنة مثلا تقولك عايزة الضعف والا هسيبك و امشي , واجري وراها بقي
-
فالاقامة عن طريق الزواج تكون مناسبة لشاب هو بالفعل مش متجوز , وناوي انه يتجوز جواز حقيقي , مش دكاكيني ,و زي ما قلتلك ادارة الهجرة حفظت كل الاعيبنا من زمان
و هنا مقال تفصيلي فيه كل المحاذير عن الزواج المزيف
================================
ثالثا الاستثمار :
---------------
مشكلة الاستثمار في امريكا , ان لازم ادارة الهجرة تقتنع انك غني فشخ , وانك فعلا عايز تستثمر في امريكا , مش واخدها سلم و خلاص
عشان كدة شروط الحصول علي جرين من البزنس في امريكا صعبة جدا للاسف
يعني فيه 3 شرائح اساسية لعمل بزنس في امريكا
(اولا مبلغ اقل من 100 الف دولار )
---------------------------------
وده ميسمحلكش انك تعمل اي نوع من انواع الاقامات , يعني ابدء البزنس لو عايز , وسيبه و اخرج من امريكا , وارجع وتابعه و هكذا , وطبعا مش بيعطي جرين ولا حاجة
( مبلغ من 100 الف الي 500 الف دولار )
----------------------------------------
و هنا لما البزنس يشتغل بتاخد اقامة لمدة سنة ( اقامة مش جرين ) , وتجدد سنة بسنة , طول ما البزنس شغال
ايه ده ؟ اومال هاخد الجرين امتي ؟ ؟
لا مفيش جرين كارد ولا جنسية خالص في المبلغ اللي اقل من 500 الف دولار
( مبلغ يزيد عن 500 الف دولار )
--------------------------------
و هنا لو البزنس شغال تاخد اقامة , تتحول لجرين كارد و بعدها جنسية
طبعا مبلغ مفزع , حتي بالنسبة للامريكان نفسهم , مين من الامريكان نفسهم معاهم نص مليون دولار , يعني تقريبا 9 مليون جنيه مصري , اللي هو مبلغ مستحيل تستلفه من حد عشان ترتب ورقك
المشكلة مش في كدة و بس , المشكلة في الشروط بتاعتها كمان . .
يعني اللي هيعمل بزنس سواء بالشريحة التانية ( اقامة بس ) او الشريحة التالتة ( اقامة و جرين و جنسية ) مينفعش يحط الفلوس في البنك وهو مطمن ,او حتي يعمل كشك صغير ويكون الريسك فيه قليل
لكن لازم يعمل مشروع حقيقي , ويكون في دراسة جدوي تفصيلية , ويصرف حقيقي المبلغ المنصوص عليه , ده كمان بتيجي الولاية و تختارله مكان معين يعمل في البزنس , عشان يعمر المكان ده ,واحيانا بيشترطو انه يوظف عدد معين من المواطنين او المقيمين بشكل رسمي , وتديلهم مرتبات شهرية
و الانيل ان كل سنة بييجو يشوفو البزنس شغال ولا لا , وعامل ارباح ولا لا , ولو كان بيخسر هيقولوله انت جاي بتهزر , مفيش اقامة ولا جرين و يا للا مع السلامة
ففكرة البزنس هتكون مش مناسبة لاغلبنا للاسف
================================
رابعا الدراسة :
---------------
الاصل ان اللي هيدرس في امريكا , انه يقدم علي ما يسمي فيزا اف 1 ,اللي هي الخاصة بالطالب , و اي حد قدم عليها يعرف هي صعبة قد ايه ,و ان لازم القنصل يقتنع انك بالفعل رايح تدرس مش تشتغل هناك , و لازم حسابك البنكي يكون ضخم جدا , ومعاك قبول من جامعة محترمة , وغالبا معاك ايلتس او تويفل و هكذا . .
طب انا يا سيدي معايا فيزا سياحة , وعايز احولها دراسة هناك , اعمل ايه ؟ ؟
عشان حد معاه فيزا سياحة يحولها دراسة , الاول بيروح جامعة او معهد لغة و يقدم طلب بالكلام ده , والمشكلة ان اغلب المعاهد و الجامعات بترفض , لان المفروض الدراسة متاحة للمقيمين بشكل رسمي او المواطنين او اللي جايين بفيزا طالب (اف 1) , لكن ان حد معاه فيزا سياحة عايز يدرس المعهد او الكلية بيدخل نفسه في حوار غالبا مش بيستريحله
بس بعض الجامعات و المعاهد بتوافق , وتقولك ماشي انت هتدرس عندنا , واحنا هنهعملك الورق
بتيجي تدفع رسوم الجامعة او المعهد , واللي اقل رقم سمعته من معاهد اللغة 5 الاف دولار سنويا , اضافة الي رسوم تحويل ورقك من سياحة لدارسة , حوالي 1500 دولار , طب و بعدين
اللي هيحصل ان المحامي الخاص بالمعهد او الجامعة هيبعت كل ورقك لادارة الهجرة الامريكية , ان فلان الفلاني عايز يدرس هنا و ياخد اقامة طالب
ادارة الهجرة بترد غالبا بعد 8 او 9 شهور بالموافقة او الرفض , والمشكلة الاساسية بقي انك في الفترة ديه هتكون كسرت فيزا , لان اساسا فترة اقامتك في البلد مينفعش تزيد عن 6 شهور باي طريقة
فلو ادارة الهجرة بعتت انهم موافقين , ساعتها بتاخد اقامة طالب , وبتكون سنة بسنة , وطول ما انت بتدفع المصاريف , فلو دفعت مصاريف سنة واحدة , هتاخد اقامة سنة و هكذا , عشان اول ما تبطل تدفع مصاريف تتلغي الاقامة فورا
كمان انت لازم تحضر حضور حقيقي في المعهد او الاكاديمية , اللي هو اقل حاجة يومين في الاسبوع ,فلو انت محضرتش فاصلا هيتم الغاء اقامتك , لان المعهد مش هيدخل نفسه في مشاكل مع ادارة الهجرة عشان زرقان عيونك ( لو كانت لونها ازرق )
ولما يتوافق علي اقامة طالب ليك , ممكن تقدم بعد كام شهر علي فيزا اف 2 لمراتك و اولادك , ويروحو في السفارة الامريكية في بلدهم يعملو مقابلة , ويا يتوافق يا ميتوافقش , برضه مفيش حاجة مضمونة للاسف
مش كدة و بس , انيل حاجة انك اصلا مش هتاخد تصريح عمل مفتوح ,لكن تصريح عمل يتيح لك بس انك تشتغل في المؤسسة التعليمية اللي انت بتدرس فيها . .
ايه ده , يعني مش هاعرف اشتغل بشكل رسمي ؟ ؟
للاسف مش هتعرف تشتغل في اي مكان رسمي , ولا حتي في بيتزا هت تغسل المواعين , لان تصريح عمل اقامة الطالب المتحول ( اللي جاي بسياحة و هيدرس ) يتيح ليه انه بس يشتغل في المعهد او الجامعة اللي هو فيها
و بطبيعة الحال لو انت مش معاك مؤهلات عليا فشيخة , وجاي علي اي معهد لغة هتدرس فيه ,فالمعهد ده مش هيكون عنده اي فرص عمل , لانها معاهد فقيرة مفيهاش فرص عمل , لو انت بقي راجل معاك ماستر او دكتوراه , و مؤهلاتك جامدة ,و بتعمل دراسات عليا في جامعة محترمة , ممكن تلاقي عندهم فرصة عمل تجيبلك دخل معقول
فمشكلة الدراسة بفيزا سياحة انك ايوة جبت اقامة , بس بتدفعلك 5 الالف دولار سنويا , ومش هتعرف تشتغل الا شغل الكاسرين , اللي هو تحت بير السلم بتمسح مواعين باقل من الحد الادني للاجور
================================
خامسا العمل :
----------------
مينفعش ابن خالتي يبعتلي عقد عمل من امريكا ؟ ؟
انا عمي هناك بقاله 8 سنين , مينفعش يبعتلي عقد عمل ؟ ؟
انا مدرسة لغة عربية , مينفعش اشتغل هناك بشكل رسمي ؟ ؟
هو خريجين علاج طبيعي ينفعو يشتغلو في امريكا ؟ ؟
عشرات الاسئلة اللي زي كدة , واللي كلها بتدور في فلك واحد , وهو ما يسمي فيزا H1B
الحقيقة ان امريكا مفيهاش مسمي عقد عمل , ولو جوز خالتك اللي مقيم في امريكا من سنين طويلة , عايز يجيبك عشان تمسك محل العطارة اللي هو فاتحه في ولاية اوريجون , فاصلا الحكومة الامريكية هترفض , سواء انت في مصر , او حتي لو عرفت توصل امريكا بفيزا سياحة ( لو جيت بلوتري مفيش مشاكل )
ليه كدة يا امريكا طيب ؟ ؟
لان امريكا تعداد سكانها 320 مليون بني ادم , امريكان علي مهاجرين شرعين علي لاجئين , كتير منهم مش شغالين ,او شغالين يوم اه و خمسة لا , و كتير منهم مش لاقيين شغل مناسب , فمستحيل الحكومة الامريكية توافق انك تستقدم مواطن اجنبي ييجي يشتغل في امريكا و فيه الف واحد مش لاقيين شغل
و حتي لو انت وصلت امريكا بفيزا سياحة , وعندك ابن عمك هناك عنده مطعم و عايزك تشتغل هناك كاشير ولا بتاع بيتزا ,فادارة الهجرة هناك هترفض اساسا
يعني مفيش اي حل خالص ؟ ؟ ؟ ؟
الحقيقة ان فيه ثغرة صغيرة خالص , و شروطها صعبة , ولما جه ترامب ضلمها اكتر , بس خلينا نتكلم عنها
فيه ما يسمي فيزا H1B اللي هي فيزا العمالة الماهرة النادرة , وديه موجودة للتخصصات الفشيخة , اللي فعلا نادرة جدا في امريكا
يعني طبعا بتاع بيتزا ولا بتاع غسيل مواعين ولا بتاع كاشير مش تخصص نادر ولا حاجة , العمالة الماهرة النادرة , اللي هو تخصص يندر جدا وجوده في امريكا , ولازم المؤسسة اللي هتعمل الورق ليك , تقدر تقنع ادارة الهجرة بالكلام ده . .
ازاي يعني ؟ ؟
الموضوع بيتم كالتالي , ان الشركة اللي عايزة تعمل لشخص استقدام من برة امريكا , تقدم لادارة الهجرة , اننا عايزين حد يشتغل بتخصص كذا كذا بالتحديد
ولازم الشركة تكون عملت اعلان في الجرنان , انهم عايزين حد يشتغل كذا كذا , و هيستقبلو العشرات من المتقدمين للوظيفة , و طبعا ممكن يكون فيهم حد مناسب , ولو حد فيهم اشتغل فخلاص مش هينفع تعملك استقدام
وممكن ادارة الهجرة نفسها ترشح عدد كبير من اسماء المواطنين و المهاجرين اللي من التخصص ده
طيب لو لسة مفيش اي حد مناسب للوظيفة النادرة ديه ؟ ؟
في خلال 9 او 10 شهور , لو ادارة الهجرة بالفعل اقتنعت ان مفيش بني ادم فيكي يا امريكا مناسب للشروط ديه , وعنده الخبرة او التخصص ده , ممكن توافق
ساعتها تروح السفارة الامريكية في بلدك , و تعمل مقابلة , وتوريهم شهاداتك و خبراتك و مؤهلاتك , ولازم برضه القنصل يقتنع ان انت يا سبع البرمبة اللي فيك التخصص النادر الفشيخ ده , ساعته بتاخد فيزا H1B , لمدة سنة واحدة
لما تدخل البلد , لازم تشتغل في الشركة اللي عملتلك استقدام , وبالمرتب اللي هيقولولك عليه , مش انت اللي هتختار
طيب لو سبتهم يحصل ايه ؟ ساعتها اخبط راسك في الحيط , الفيزا هتخلص و مش هتعرف تجددها و مع السلامة
طيب انا لسة شغال معاهم و عدت السنة و خلصت الفيزا , ساعتها تعمل طلب تجديد لسنة كمان , ولما تخلص تعمل طلب تجديد لسنة تالتة ( بشرط انك لسة شغال معاهم بشكل رسمي )
و مع انتهاء السنة التالتة , ممكن تطلب تقدم علي الجرين كارد, اول ما تاخد الجرين ,انت خلاص بقيت حر نفسك , وممكن تشتغل مع اي حد لو عايز , وبعد 3 سنين كمان تاخد الجنسية
و المشكلة ان حتي مع الصعوبات اللي فيها ديه , فترامب لما جه , حط نقره بنقر الفيزا الوحيدة اللي ممكن تجيب حد من برة امريكا , وعمل تضييقات كتير عليها , سواء علي الموافقة اول مرة , او علي التجديد سنة بسنة , او علي الحصول علي الجرين لما تقعد 3 سنين
و هنا لينكات مهمة عن ترامب و اللي عمله
http://usa.inquirer.net/6330/trump-makes-harder-shift-work-visa-green-card
https://www.inc.com/emily-canal/trump-administration-h1b-visa.html
https://www.quora.com/How-will-the-H1-B-visa-process-change-due-to-a-Trump-presidency
ترامب لسة موقفهاش , لكن زي ما قلتلكم خلاها اصعب كتير للاسف
بيستخدم الفيزا ديه تقريبا 85 الف شخص سنويا , والرقم ده كبير مش قليل , يعني بمعدل 230 شخص يوميا بيقدرو يدخلو امريكا بالفيزا ده
و غالبا اكتر ناس بتقدر تيجي امريكا من الفيزا ديه , هما الهنود , لان اكتر التخصصات المطلوبة و النادرة هنا هي كل ما يتعلق بالكومبيوتر (برمجة , آي تي , نيتورك , داتا اناليسيز , هارد وير) التخصصات ديه مرتباتها عالية جدا هنا ( لا يقل عن 6 الاف دولار شهريا ) و في نفس الوقت نادرين لانهم مطلوبين جدا , والهنود عشان دايسين جامد في الموضوع ده , فاغلب اللي بيعرفو ييجيو بالفيزا ديه هما الهنود
بالنسبة للعرب , فغالبا اللي بيتم استقدامه بالفيزا ديه , هما محفظي و قارئي القرآن , لانهم بيكونو مطلوبين في المساجد و المدارس الاسلامية , بس زي ما قلتلكم , ان مكانتش دراستك شرعية , وان مكانش معاك إجازة و عندك خبرة حقيقية في المجال ده , فاحتمال قبولك قليل جدا
ده غير ان كتير من المساجد و المدارس الاسلامية مش بيحب يحط نفسه في مواجهة مع ادارة الهجرة في الموضوع ده لاسباب كتير
لكن اي تخصص تاني هيكون بلح للاسف , مالم بقي يكون تخصص نادر جدا , وفيه مؤسسة بتحارب عشان لغاية لما يتوافق عليك . . .
فياريت لو انت راجل تخصص نادر جدا (مبرمج فشيخ مثلا ), وعرفت تيجي امريكا , حاول تروح لمؤسسات او شركات في المجال ده , وقابل حد من الاتش ار هناك , واعمل معاه صفقة . .
قولهم لو كان مرتب المبرمج هنا 5 او 6 الاف , انا موافق اشتغل عندكو ب 3 الاف بس , و هكون ملتزم معاكو 3 سنين علي الاقل , بس انتو ابدؤو اعملولي فيزا H1B
لو بالفعل شغلك جامد , وانت بالنسبة لهم هتكون صفقة رابحة هيعملو كدة, ساعتها انت لازم ترجع بلدك عشان متكسرش الفيزا , وهما هيبعتو ورقك لادارة الهجرة , وهيردو بعد 9 شهور مثلا , ولو اتوافق عليه تاخد الفيزا من بلدك و تيجي امريكا بشكل رسمي , وتجدد الفيزا سنة بسنة لغاية لما تاخد الجرين بعد 3 سنين
================================
ديه هي الانواع الخمسة للحصول علي اقامة في امريكا , للاسف كلهم اصعب من بعض , وده طبيعي لان العالم كله عينه علي امريكا
نصيحة ليك , سيبك من ده كله و اطحن نفسك مذاكرة ايلتس , هتلاقي هجرة كندا بقت سهلة ان شاء الله
و هنا فيه بوست تفصيلي عن الهجرة لكندا
ربنا معاكو