الاقتصاد التركي المتصاعد , يقوم باغراء العديد من المستثمرين , وحتي غير المستثمرين , بفكرة إقامة مشاريع في تركيا , علي اعتبار أن هذا الاقتصاد الصاعد بقوة , يعني بالضرورة مشاريع ناجحة , ودخل سريع . . 

​

و الحقيقة أن الأمر ليس بهذه الصورة الوردية . فالاقتصاد النامي للجمهورية التركية , لا يعني بالضرورة توافر فرص عمل , او ضمان نجاح المشاريع بالبلاد  . . 

​

والمشكلة أن سهولة تأشيرة تركيا النسبية لمواطني الدول العربية  , وكذلك سهولة عمل الإقامة , صنع حالة من التشبع و الإغراق لدي تقريبا جميع المشاريع المعروفة , خاصة مع عوامل الطرد العديدة لمواطني دول  الربيع العربي . . 

​

و نرجو قراءة هذه الصفحة الهامة في الموقع عن فرص العمل بتركيا  , لتفهم المقصود . . 

​

و نسرد هنا عددا من النصائح الهامة والتي عليك أن تعيها  قبل المضي قدما في أي مشروع في تركيا

​

• عليك بتعلم اللغة التركية أولا , فهي المفتاح الرئيسي لنجاح اي مشروع هنا , فأغلب الأتراك لا يتكلمون العربية أو الإنجليزية , فإذا تمكنت من التركية , ملكت مفتاح البلاد 

​

• عليك بعمل دراسة جدوي متقنة للمشروع , وأن تكون شاملة المصاريف و الايرادات المتوقعة بالكامل , دون الانصات لسماسرة البزنس , فهم كثر , وكلامهم لا وزن له 

​

• عليك بعدم الاعتماد علي الزبون العربي في المشروع الخاص بك , فاغلب المشاريع التي تقام هنا تعتمد عليه فقط , وهو ما يجعلها سبب في فشلها , قم بالتوسع للزبون التركي او الاوروبي  او غيره 

​

• قم بالخروج من دائرة اسطنبول الضيقة , الجمهورية التركية بها 81 ولاية , لا تضع نفسك في نفس المكان الذي يتنافس فيه الجميع , ذهابك لولايات تركية أخري , سيفتح لك مجالات عديدة 

​

​

​

و ننقل هنا منشورا هاما للمهندس محمد سعودي عن المشاريع بتركيا :

======================================================

​

​

معاك مبلغ معين وعايز تستثمره فى تركيا ؟

 

 السلام عليكم جميعا.

​

​

دلوقتى يا جماعة فيه اسئلة بتتكرر كتير جدا جدا جدا وهى أسئلة من نوع ... معايا 25 الف دولار اعمل مشروع ايه ؟ او ايه المشروع اللى ممكن الواحد يعمله ب 10 الاف دولار ... او صاحبى معاه 75$ عايز يستثمرهم 

 

والكلام اللى زى كده. ولأن الموضوع فيه كلام ملوش لازمة كتير بيتقال حبيت اشارككم برأيى فى الموضوع باختصار عشان الناس كلها تستفيد

 

• أولا حضرتك عشان تعمل أى مشروع سواء فى تركيا او فى غيرها الموضوع مش فلوس بس. الأهم من الفلوس انت تفهم فى ايه عشان تشغل فلوسك فيه. فبدل متسأل والناس تقولك افتح مطعم وانت ولا ليك فى المطعم ولا فى الطبخ وتسمع كلامهم وتروح تعمل كده هتفشل طبعا زى كتير مفشلو. ولا المشروع الفتاك الآخر بتاع افتح كافيه وتفتح وتاخد على دماغك بردو ( مع تحفظى على ان الكافية اصلا حرام لو بيقدم مشروبات او حاجة حرام)

​

• طب مبتفهمش فى حاجة ( لامؤاخذه يعنى) اعمل ايه ؟ 
  اقول لحضرتك ... تدور على صديق " تثق فيه " وتشاركه وتعمل معاه مشروع فى حاجة هو بيفهم فيها وانت تموله. ده طبعا لو هو اصلا عايز وقادر وبيدور على كده.

​

• لو حضرتك معندكش خبرة فى ادارة المشاريع والشغل الخاص ؟ ؟ 
  بلاش والنبى الفهلوة لأنها مش هتنفع فى بلد ناسها بتفهم زى تركيا. يعنى هتفتح مطعم ومش هتهتم بالنظافة والشياكة زيهم مش هيقربولك. خدمة عملاء سيئة او مفيش توصيل والباقى كلهم عنده .. نفس الكلام.

​

• الجمهور المستهدف: حضرتك بتفتح مشروع فى تركيا. بلاش الذكاء فى استهداف المصريين اللى فيها.
  انت بتفتح فى سوق تركي يبقى تعمل حاجة تشتغل فى السوق التركى ويكون زبونك تركي + عربى. بس متقولش مطعم المصريين وتجي تقولى محدش بيجي عندنا والمشروع فشل.
  هما المصريين فى تركيا كلها قد ايه ؟ ومتوزعين فى مليون مكان. ايه بقه السر الخطير فى الحاجة اللى انت بتقدمها اللى هتخليهم يجولك من كل انحاء تركيا ؟ هه ؟ اعترف .

​

• فيه ناس ربنا يشفيهم لما بيفتحوا مشروع وبيلاقوا اقبال قليل بيعملوا حركة ذكية جدا ... انهم يزودوا الأسعار .. هو كده بقه ذكى يعنى وجاب التايهه. ببساطة اخواتنا السوريين ربنا يحفظهم مغرقين تركيا هسيبك واروح اطلب الخدمة منهم طبعا وبأسعار أقل كتير او من الاتراك نفسهم عادى جدا.

​

• طب ايه انواع المشاريع اللى تنفع فى تركيا ؟
  دى مش هفتى فيها بس حضرتك انزل اتمشي فى الشارع كده وشوف مطاعم ايه شغاله بايه وحوانى ايه شغال بايه وخدمات و ... و ... و ... وطبعا هنرجع لنفس السؤال انه لو انت عارف مجالك و عارف انت بتفهم فى ايه هيكون البحث أسهل. انه تقول مثلا .. "هل مجال صيانة الموبايلات يمشى فى تركيا ؟" " هل لو اشتغلت سباك انفع فى تركيا" وهكذا.

​

• رجوعا للنقطة رقم 4 + 6 ... لو ممعكش لغة مش هينفع تكون فى الواجهه بنفسك. اما متفتحش اما تعين حد بيتكلم تركى كويس يقف فى المحل او يدير البيزنس او يتواصل مع العملاء... واديله مرتب. هتقولى ايه ... ادى التركي مرتب منيييييين ده انا لسه بادىء مشروع .... لو هنخش فى النبرة دى بلاش تفتح احسن وارتاح وريحنا . اما انت ممعكش فلوس تستثمر وتشغل ناس وتبنى بيزنس بتفتح ليه ؟ هه ؟ قول 
  بلاش مبدأ الفقاقة والتوفير واحسبها صح.

​

• مشروع يعنى استثمار حضرتك يعنى يكسب او يخسر. متبقاش بانى حياتك وامالك واولادك وعمرك على المشروع اللى لو فشل هتشحت فى الاخر. خليك ذكى وحط بدائل.

​

• النفس الطويييييييييل. البلد مش سهله ولازم نفسك يبقى طويل جدا عشان تستمر وتصحح وتقع وتقوم وتستمر.

​

• ليه رجال الأعمال بتنجح هنا وانت بتفشل ؟ لأنك مش رجل أعمال بكل بساطه. هو عنده اعمال وعنده فلوس والأهم من كل ده انه فاهم بيزنس او فاهم استثمار.
  ده انا مش هقوله اتعلم لغه ده وقته بفلوس. ده بيجيب ناس تشتغل صح ومنهم اتراك طبعا وهو يدفع فلوس بس ويدير الدنيا من فوق ويلم ربح.

​

• هأكد تانى على موضوع اللغة. متقوليش هتعلم اللغة فى 3 شهور وافتح مشروع بعدها .. حبيبي ... مش هتتعلم حاجة. هات حد بيعرف تركى كويس وشغله معاك وانجز واتعلم انت براحتك على جنب.

​

• لو جاى لسه جديد فى البلد ومتعرفش حاجة لازم تقرأ أهم صفحة اللي هنا واللى فيه مواضيع تخص كل حاجة تقريبا. اما بالنسبة للمشروع تعالى الأول زيارة وشوف البلد والوضع واتكلم مع الناس وروح اسأل الناس اللى عملت حاجة مشبهه وخد رأيهم وبعدها قرر.

 

​

​