شهادات الخبرة

 

الحلقة السابعة من سلسلة #الهجرة_لكندا_بالتفصيل_الممل

جميع الحلقات هتلاقيها هنا 

 

.....................................................................................

​

 

ياريت محدش يكون تاه من الكلام , قلنا في الحلقات اللي فاتت ان عندك 3 حاجات اساسية لازم تحضرها قبل ما تفتح الملف بتاعك علي موقع الهجرة اول حاجة الايلتس اللي قلناها في حلقة 5 , تاني حاجة تقييم الشهادات اللي قلناها في حلقة 6 , تالت حاجة شهادات الخبرة اللي هنقولها حالا

 

يعني ايه شهادة خبرة ؟ ؟

 

انت اصلا مش هتعرف تهاجر لكندا مالم يكون معاك خبرة في مجال معين , والخبرة ديه لازم ليها اثبات , والاثبات هي شهادات الخبرة

 

شهادات الخبرة ملهاش صيغة معينة , ولا فورمة محددة , هما عايزين ورق رسمي ايا كان شكله , يقول انك كنت شغال من الفترة كذا للفترة كذا , في المكان الفلاني , وكانت مهامك كذا كذا , مع تفاصيل التواصل مع الشركة , تليفون و عنوان و ايميل

 

تليفون و عنوان و ايميل الشركة مهم , لان ادارة الهجرة بتتصل فعليا ببعض المقبولين في السحب اللي بيتم , عشان يتاكدو من صحة الشهادات , ولو طعلت مضروبة فكدة مع السلامة

 

مش مطلوب الشهادات تكون متوثقة من الخارجية , لكن تكون ممضية و مختومة من الجهة المعنية في مكان عملك , عشان يكون ورق رسمي

 

ياريت الشهادات تكون بالانجليزي , ولو هي بالعربي ترجمها ترجمة موثقة , واعمل للاتنين سكان , وخليهم جاهزين عشان ترفعهم في موقع الهجرة الكندية

 

ولما هنتكلم بالتفصيل عن ترشيح المقاطعات الكندية (الحلقة بعد الجاية ) هنعرف ان بعض المقاطعات بتطلب احيانا صيغة معينة لشهادات الخبرة , عشان يقبلوك , وبالتالي يبعتولك الـ 600 نقطة اللي هترفعك لفوق و تتقبل فورا

 

فياريت تتابع المقاطعات اللي انت مهتم بيها , عشان تشوف مواصفات شهاداتهم عاملة ازاي

 

.....................................................................................

​

و الشكل الأساسي لاي شهادة خبرة زي ما وصفها احمد عزيز ومصطفي سعد بيكون فيها  :

​​

• كل job title في ورقة لوحده.

• فيها اسمك بالكامل والتاريخ اللي ابتديت وأنهيت فيه الشغلانة دي.

• اسم الشركة واسم ال team أو الإدارة اللي اشتغلت فيها.

• ال main duties بتاعتك في الشغلانة.

• ممضية من مديرك المباشر أو حد من ال HR.

• سواء مديرك أو ال HR اللي ماضي,لازم يكون فيه contact information. اسم الراجل, مسماه الوظيفي, رقم تليفونه, ال email بتاعه.

• الكلام ده كله يبقى مطبوع على ال letter head بتاعت الشركة. اللي عليها logo الشركة من فوق, وعنوان الشركة وأرقام تليفوناتها وال email بتاعها من تحت

• يبقى فيها تاريخ بدء وانتهاء العمل (طبعا الوظيفة الحالية تتكتب till now ولازم يبقى فيه تاريخ للجواب)

• يبقى مذكور فيها الposition ويكون مطابق أو مشابه لأحد الtitles الموجودة في الNOC

• يبقى فيها المهام الوظيفية وده أهم جزء في الشهادة (ولازم تكون matching مع وظيفتك طبقا للNOC)

• يبقى فيها المرتب

• يبقى فيها ساعات العمل الأسبوعية

 

يعني ايه بقي رمز الـ NOC اللي المفروض يتكتب في الشهادة ؟ ؟

 

الـ  NOC هو اختصار لـ National Occupational Classification  يعني التقسيم الوطني للوظائف , ومعناه ان كل وظيفة ليها رقم معين او كود معين من اربع ارقام , مثلا وظيفة اللي شغال في الريسيبشن هي 1414

 

حضرتك لازم الاول تدخل في اللينك ده , وتبحث عن مهنتك بالتفصيل , وتعرف رقم النوك بتاعها كام , عشان تحطه في شهادة الخبرة  وهيكون نفس الرقم اللي هتسجله في موقع الهجرة

بعض المواقع بتقول ان كتابة رقم النوك مش ضروري في شهادة الخبرة , لكن اظن وجودها بيعطي مصداقية اكبر

 

.....................................................................................

​

طب لو انت اشتغلت في اكتر من مجال مع بعض , يعني انت محامي و كويس في الفوتوشوب , واشتغلت فعليا في الشئون القانونية , وفي التصميم و عندك خبرة هنا و هنا

 

اقولك الأول دور علي المهن اللي بتتطلب اكتر في المقاطعات , وياريت تكون هي ديه اللي واخد فيها البكاليريوس , ولو هي فعلا , يبقي اعمل تقييم الشهادات ليها , وشهادات الخبرة علي اساسها

 

فالمفروض ان المهام الوظيفية المذكورة في الشهادة تبقى متماشية مع المهام اللي في النوك.. متماشية مش يعني متطابقة يعني مش تعمل لها Copy & Paste لأ يعني تبقى متقاربة.. يعني لو قولنا مثلا ان النوك فيه 10 مهام وانت هتكتب في الجواب 10 مهام برضه.. ممكن يبقى فيه اتنين أو تلاتة من اللي في النوك مش عندك، وممكن يبقى عندك اتنين أو تلاتة مش في النوك، والسبعة أو التمانية الباقيين تكتبهم بصياغة مختلفة عن اللي في النوك بحيث انه ما يبانش انك ناقلهم..

 

ويفضل انك بتعمل حاجة اسمها PAYSLIP او Salary cerificate على ورق الشركة وممضي ومختوم ايضا, اللي هو ايصالات دفع من الشركة

 

​

.....................................................................................

​

​

طيب لو فشلت انك تجيب شهادة بالمواصفات المطلوبة .. يبقى ايه الحل؟ قدامك حل من اتنين:

 

لو الشركة طلعت لك شهادة خبرة بس مافيهاش كل التفاصيل المطلوبة (مثلا مافيهاش المهام الوظيفية أو مكتوبة بشكل اجمالي غير مفصل أو مافيهاش عدد الساعات أو المرتب.. إلخ) ممكن تعمل جواب مكمل وتكتب فيه كل البيانات الناقصة وتخلي مديرك المباشر يمضي لك عليه

 

ممكن ترفق صورة من العقد أو شيكات القبض أو الوصف الوظيفي لوظيفتك

 

 

طيب لو فشلت انك تجيب أي حاجة من الحاجات دي :

 

تكتب جواب ترفقه مع شهادة الخبرة اللي هتقدر تجيبها من شغلك وتكتب فيه سبب انك ماقدرتش تجيب بيان بالمعلومة دي وساعتها الموضوع خاضع لتقييم الأوفيسر اللي هيبقى مسئول عن ملفك يا يقبلها يا يرفضها

 

وده بيكون اسمه  Letter Of Explanation بتشرح فية وضعك وبعدين تذكر وظيفتك ومهامك وبعد كدا تشوف التيم ليدر بتاعك او زميل تكتب بياناتة وامضاءة والكرت بتاعة لو عندة

 

كندا مابتحتجش اى اثبات لشهادات خبرة زي حسابات بنكية او تأمينات او كشف راتب لاكن في حالة انك قدمت الخطاب دا هتحاول تجيب اى اثبات من دول ولو ماعندكش اى اثبات من دول يبقي تدور بقي على اي ورق ايميلات اى حاجة تساعددك وتقوى موقفك ولوماعندكش حاجة من دى قدم بردوا احتمال القبول موجود بالنسبة لكيبك هما بيقولوا ممكن نطلب تأمينات كأثبات عند القبول يعنى هيطلبوا فقط لو شاكين في حاجة

 

​

Letter of Explanation for Reference Letter of my Current Company

 

This is with regards to Reference Letter of my Current Company.

When I approached my HR Manager and my supervisor for reference letter they told me that they

cannot provide me such letter based on fact and internal rules that such kind of letter only can be

provided to me upon my resign from the company. Therefore, I am writing this letter to state my role

and responsibilities in my current company. Moreover, I’ve attached the default employment certificate

I got from HR (Without my real job title and responsibilities), copy of my official contract with my

company, and the last 6 months pay slips in support with this letter.

I the undersigned, [your name], residing at [your address], hereby solemnly affirm that from [work start

date] until the present I am employed with [your company name] as a [your job title] in [your

department name] department.

I am working 40 hours per week in a full time basis and being paid [your salary] [currency] / [equivalent

amount] CAD annually. [Exchange rate]

My main duties and responsibilities are:

• xxxx

• xxxx

• xxxx

• xxxx

• xxxx

Name/ Date/

Xxxxx xxxxxxx

Signature/

xxxxxx

 

============================================

 

نقول تاني , متفكرش تضرب اي ورق خبرة , لأن اللي بيفحصة ورق المتقدمين فاهمين كل الحوارات ديه , وعدي عليهم عشرات الاف من العرب والهنود و الصينيين و اللاتينيين , اللي بنفس الفهلوة بتاعتنا و اكتر , فهما  هرشو كل حاجة بنعملها

 

قول الحقيقي , حتي لو قليل بس يكون صادق

 

اتبقي 3 حلقات , الجاية رقم 8 عن التسجيل في الموقع , اللي بعدها رقم 9 عن تسجيل المقاطعات , الاخيرة رقم 10 عن هجرة كيبيك

 

يارب بالتوفيق