الحلقة 4 : خطوات التقديم للهجرة
خطوات التقديم للهجرة لكندا
الحلقة الرابعة من سلسلة #الهجرة_لكندا_بالتفصيل_الممل
جميع الحلقات هتلاقيها هنا
=================================
ياريت اللي مقراش البوستات التلاتة الاولي للهجرة الي كندا يقراها , هتلاقيها في اللينك اللي فوق . . .
بعد ما عرفنا الحلقة اللي فاتت يا تري انت مؤهل للهجرة لكندا ولا لأ , هعرف دلوقتي الخطوات الفعلية للتقديم للهجرة . .
التقديم للهجرة مش بيتم بخطوات سهلة و بسيطة زي الهجرة العشوائية لامريكا , و احيانا بكون حاسس ان الحكومة الكندية متعمدة ان خطوات الهجرة تكون طويلة و متبعة و مملة , ومحتاجة متابعة دايمة , عشان يفلترو الناس المهتمين و الصبورين بس , يعني الناس بتاعت نظام "شقلب و اقلب" و "كبر الجمجمة" غير مرغوبين انهم ييجو للاراضي الكندية و ياخدو جنسيتها , لكن هما عايزين الناس الصبورة المثابرة . .
المقدمة ديه , عشان تعرف ان الموضوع هياخد شوية وقت و مجهود ومتابعة و فلوس , لكن النتيجة هتكون ايجابية ان شاء الله لو انت تابعت معاها . .
=================================
الخطوات للهجرة لكندا ببساطة كالتالي :
-
امتحان الايلتس (او التيف )
-
تقييم الشهادات
-
شهادات الخبرة
-
التسجيل في موقع الحكومة الكندية
-
ترشيح المقاطعات
الخمس خطوات دول لازم نمشيهم بالترتيب , الخطوة 1 و 2 و 3 ممكن يكونو بالتوازي او حاجة قبل التانية , لكن التلاتة دول لازم يتم الانتهاء منهم قبل ما تعمل 4 و 5 . . .
وخلينا نشرح ببساطة الموضوع بيتم ازاي , وبعدها نعمل حلقات منفصلة عن كل خطوة بالتفصيل الممل . . .
=================================
1 - الايلتس
--------------
اول حاجة لازم امتحان اللغة , والمقصود بيها الايلتس لو لغتك الاولي انجليزي , او التيف لو لغتك الاولي فرنسي , و ديه خطوة لا نقاش فيها , ومن غيرها مفيش هجرة باي طريقة
مش لازم تجيب فيه درجات رهيبة , لكن اقل من 6 في كل امتحان , فمش هتعرف تقدم , واقل من 7 فاحتمال القبول ضعيف . . .
اختبار الايلتس هو اختبار عالمي , بيتم امتحانه في مكانين علي مستوي العالم
اختبار الايلتس عبارة عن 4 اختبارات في بعض
قراءة , كتابة , تحدث , سماع
وهنتكلم بالتفصيل عن الاختبار ده في حلقات منفصلة
تكلفة الاختبار تقريبا 2000 جنيه , و فيه حوالي 3 اختبارات شهرية
و غالبا الايلتس هو اكبر عقبة بتخلي هجرة كندا صعبة لاغلب شباب العالم , ولو تغلبت عليها يبقي باقي الخطوات اسهل
و هنا منشور تفصيلي عن الأيلتس
=================================
2 - تقييم الشهادات
--------------------
والمقصود بيها انك تجيب شهادة البكاليريوس او الليسانس الخاصة بيك , وتبعتها بطريقة معينة لاحد المؤسسات التابعة للحكومة الكندية ( زي مؤسسة ويس ) عشان تعترف بيها
و المطلوب بيكون الشهادة الجامعية او الاعلي منها , يعني مش مطلوب شهادة ثانوي
تكلفة معادلة البكاليريوس تقريبا 200 دولار , ولو بكاليريوس و ماستر تقريبا 300 دولار
وهنا صفحة خاصة بتقييم الشهادات
=================================
3 - الشهادات الخبرة
---------------------
وديه مش معضلة , بس تكون اشتغلت بشكل حقيقي في اماكن معينة , وملهاش صيغة محددة , يكفي اي صيغة رسمية سليمة مختومة , وهنتكلم عنها بالتفصيل
بس اوعي تفكر تضربها , لانهم هيعرفو , ويدولك بلوك سليم
وهنا صفحة خاصة بشهادات الخبرة
=================================
4- التسجيل في موقع الحكومة الكندية
-------------------------------------
لو انت امتحنت ايلتس و جبت درجة معقولة , و عملت معادلة الشهادات خلاص , وطبعا تكون خلاص اتاكدت انك جايب 67 علي الاقل في تقييم الهجرة زي الصفحة هنا
فانت جاهز دلوقتي انك تسجل بياناتك في موقع الهجرة للحكومة الكندية
التسجيل مجاني , محتاج حوالي نص ساعة عشان بتملي بيانات كتير , و تكون متاكد من كل حرف بتدخله عشان ميحصلش اي لغبطة , وهنشرح خطوة خطوة التسجيل بيتم ازاي في بوست منفصل
لما تنتهي من التسجيل , انت كدة بقيت "متشاف" يعني "مرأي" من موقع الهجرة الكندي ,وبيكون الملف بتاعك في حاجة اسمها الـ Pool يعني البحيرة , و الموقع بيختار تقريبا من 10 لـ 15 الف شخص شهريا من الـ Pool
طيب جميل جدا ,10 او 15 الف ده رقم كبير جدا , يعني انا فرصة ان يتم اختياري كبيرة , صح ؟ ؟
اقولك مش صح , لان فيه تقييم تاني ( غير التقييم الاولاني ) , بيتم اختيارك علي اساسه , و التقييم ده من 1200 , و اغلب اللي بيقدمو بيكون درجاتهم من 300 لـ 400 , واقل رقم تم و سحبه هو 450 حتي الان
يعني سيادتك ان مكانش درجاتك "فشيخة" في كل حاجة مش هتوصل لدرجة 450 ابدا , وهتفضل سنين طويلة في الـ Pool
فالحل الوحيد لاغلبنا هو ما يسمي ترشيح المقاطعات
وهنا كل تفاصيل التسجيل في الموقع
=================================
5 - ترشيح المقاطعات
----------------------
و ديه اهم و اخطر و اطول خطوة , واللي لو تمت , اقولك بالفم المليان مبروك , يللا حضر شنطك عشان تسافر . .
وديه معناها ايه ؟ ؟
كندا فيها 13 مقاطعة هما :
-
Alberta
-
British Columbia
-
Manitoba
-
New Brunswick
-
Newfoundland
-
Nova Scotia
-
Ontario
-
Prince Edward Island
-
Quebec
-
Saskatchewan
-
Territory: Northwest Territories
-
Territory: Nunavut
-
Territory: Yukon
بعض المقاطعات ديه - مش كلها - بتفتح احيانا باب التقديم ليها في مواقعها الرسمية , عشان تستقبل طلبات الهجرة . .
و بيكون لكل مقاطعة متطلبات معينة , سواء درجات ايلتس , او سنين خبرة , او وظيفة معينة , او حساب بنكي . .
فانت لازم تتابع كل مواقع المقاطعات ديه , وتعرف كل واحدة محتاجة متطلبات ايه , وبتفتح امتي , واول ما تفتح , فورا تقدم بياناتك وورقك فيها . .
اغلب المقاطعات بتشترط تكون انت مسجل اصلا في موقع الحكومة الكندية ( خطوة 4 ) قبل ما تقدم عندهم , بعضها مش بيشترط
طيب لما تفتح مقاطعة , وانت تقدم , و بعدها هما يفرزو البيانات , وملفك يعجبهم , يحصل ايه ؟ ؟
ساعتها يبعتولك ايميل اننا موافقين عليك , هل انت مستعد تيجي ؟ ؟
تبعتلهم تقول ايوة موافق
هوب , ساعتها المقاطعة تديلك 600 نقطة كاملة في الملف بتاعك , فلو كانت درجاتك مثلا 320 , هتبقي فورا 920 , يعني هيتم اختيارك من الـ Pool خلال اسابيع قليلة
فزي ما قلنا اكبر معضلة هي متابعة المقاطعات و تشريحاتها
وهنا تفاصيل كاملة عن ترشيح المقاطعات
=================================
ديه سريعا هي خطوات التقديم لهجرة كندا ,و في الحلقة الجاية هنتكلم عن اول خطوة بالتفصيل , وهي الايلتس